Mádíkì 1

Sèsíì wɛnaamá Mádíkì wà̰haà-ma

Ìsá̰-Bàtísì Weèdi wɛmá cakàma

¹ Ǹtɛ Weèdi bíitá Sèsíì Kídísì^a Wɛnaamá cetà-sa. ² Weèdi wɛtɛ̰́náko Èsàyíì pɔ̀kàta mɛhɛká pà wà̰tà yɔ̀:

N kó nihìna n tɔntɔndikó a yìhìka,

k'ó dɔ̀hà a cɔ̀ku.

³ Nìi boòku-dà kpákádí càwenkú mɛhɛká è tonà:

Dɔ̀hà-nà Teó cɔ̀ku. Cɔ́kàna-nà o cɔ̀ci.

⁴ Mɛmá-dà, kà Ìsá̰-Bàtísì é tɛ̀ni càwenkú mɛhɛká è bekànì è tonà: Cehèna-nà fòùmu é héé ká n nɛ *cóńtá k'yé teha kà Weèdi é nɛ deèda nɛ sḭ̀ḭ̀ma.

⁵ Kà Sùdéè tempáàku nìpa wɛǹni nà Sèdìsàdɛ́m̀ kpɛ́ɛpá wɛǹni é n'kɔ́dì-ní o pesá. Pà de hɔ̰́ bantá-ma pa sḭ̀ḭ̀ma nìku wɛǹni yìhìka, kà Ìsá̰-Bàtísì mɛ̀ɛ té pà cóńtá Sùùtɛ̰́ɛ̰̀ kóńkú mɛhɛká.

⁶ Ìsá̰-Bàtísì de bádí bɔnamáku kpìmu tókédi-dà è cɛ̰́ṵ́ nawɔ̰̀ǹfa o kɔùka. Ò de yonti kádáàka-dà nà ceèti. ⁷ Ò de cakú nìpa Weèdi wɛmá è toò: Òcɔ̰́ǹ pení n dàhàka è n kpenì-nà dɛ́dɛ́í. N pú sànà n kó bueí-má é dákátá o nɛ̀ùti nawɔ̰̀ǹci. ⁸ Mmí, n nɛ cómù nà nɛ́ɛmá-dà, àmá mɛnn kó nɛ n'cómù nà Seèwendí-dà.

Sèsíì cóǹti n'ɔ̀ɔ bɛḿma

⁹ Ye kú daàka mɛhɛká, kà Sèsíì é yíí-ní Nasàdɛ́tì yɔtí, kà tì péé Kàdìdéè tempáàku mɛhɛká é tɛ̀ni kà Ìsá̰-Bàtísì óò cóńtá Sùtɛ̰́ɛ̰̀ kóńkú mɛhɛká. ¹⁰ Ò yɛ̀tì-ní tḭ́ń wɔ̀ni nɛ́ɛmá mɛhɛká, é dɛ́há kà hḭ́ǹka é kpetá kà Seèwendí cútá-ní o hḭ́ǹka è yònà pàǹdɔ̀di. ¹¹ Kà pá yekà nà hḭ́ǹka-ní, Weèdi boòku kà kù tonà: A yòǹ n bíidɔ́kàta-dà kà n yàma wɛǹni péé a hḭ́ǹka.

¹² Ye pesá n'ɛ̀ɛ pesá, kà Seèwendí óò túdí óò tanà càwenkú mɛhɛká. ¹³ K'ó pa̰á̰ daàka púnàhì ku mɛhɛká, kà Wɛɛ̀kupá wódo óò bɛń è k'óò yehèna. Ò de pɛ́ɛ̀ péé-nà yɛ̀di nɔtí-dà, kà Weèdi tɔntɔndipá púsí tɔná o kpɛ́mú.

Sèsíì yíí num̀bíimɛ́nápa pànàhì è yɔ̀ p'óò tṵ̀na

¹⁴ Kà pá cɛ̰ɛ̰́ Ìsá̰-Bàtísì óò yɛ̰̀ḭ kódedí, ye kú dàhàka kà Sèsíì é yídá é tadí Kàdìdéè tempáàku mɛhɛká é tɛ̀i è cakú Weèdi wɛnaamá. ¹⁵ Ò de pà cakú è toò: Wɔ̀ni-dà tɛ̀i, kà Weèdi wóòti hɛ́tà-ní. Cehèna-nà fòùmu é ta̰ǹta Weèdi wɛnaamá!

¹⁶ Daadí yènì, kà Sèsíì é n'tṵ̀n Kàdìdéè baàdi nùdi, é dɛ́há Sìmɔ́ɔ̀ n'ɔ̀ɔ kúcàa À̰ǹtìdéè kà pà ká̰mù ká̰ńcḭ̀mu ye baàdi mɛhɛká, è yá̰á̰ pà de yòǹ num̀bíimɛ́nápa-dà. ¹⁷ Kà Sèsíì é pà caka è yɔ̀: N tṵṵ̀na-nà-ní ká n héé kà nɛ́ m'pɛnti nìpa kà pá nà n tṵ̀n. ¹⁸ Ye pesá n'ɛ̀ɛ pesá, kà pá héé-ho pa ká̰ńcḭ̀na óò tṵ̀na.

¹⁹ K'ó tuùta-ho yìhìka cɛ̰́masí, é dɛ́há Sàákì Sèbèdéè bíitá nà ta ya̰ǹta Ìsá̰à̰, kà pà mɛ̀ɛ té péé hà̰à̰pu mɛhɛká è dɔ̀hu pa ká̰ńcḭ̀na. ²⁰ Ye pesá n'ɛ̀ɛ pesá, k'ó pà yíí, kà p'óò tṵ̀na, é héé-ho pa báàa Sèbèdéè n'ɔ̀ɔ dehèpa hà̰à̰pu mɛhɛká.

Sèsíì kpekanà nìdo wɛɛ̀ko fá̰kápú-ko

²¹ Sèsíì n'ɔ̀ɔ dapàm̀ma, kà pá taá Kàpɛ̀nàúm̀ yɔtí. Damuhipàdi daadí, k'ó taá Weèdi wɛmá biɔhà-nàmɔ̀ni mɛhɛká é tɛ̀i è biɔhànì Weèdi wɛmá. ²² K'yé dii nìpa n'ɔ̀ɔ̀ de biɔhànì-ma kú bookú, mìì tee-sá o kú biɔhànamá de pú yònà Weèdi kpɛ̰́ńtìnùka biɔhànapá kpɛ́ɛmá, ò de pà biɔhànì nà kpɛ̰́ǹti nɔɔ̀ti-dà.

²³ È hɔ̰́tà ye Weèdi wɛmá biɔhà-nàmɔ̀ni mɛhɛká, dɔɔ̀o òcɔ̰́ǹ yè péé kà wɛɛ̀ko péé o mɛhɛká. K'ó kpákada-ní è yɔ̀: ²⁴ Héì! Sèsíì Nàsàdɛ́tì kóoó, a ti kpɛ̀i-nà badà? A tɛ̀ni è kó ti sehèna-á-ma? N yá̰á̰-ma sukú è yɔ̀ a yòǹ niìwenikó-dà Weèdi tɔn-kó-ní.

²⁵ Kà Sèsíì é wɛɛ́-nà kpeéma ye wɛɛ̀ko è yɔ̀: Kpḭ́ḭ́ ye pesà! Yɛ̀ɛ̀ ye dɔɔɔ̀ mɛnǹ kú mɛhɛkà! ²⁶ K'ó sa̰mpà kpeéma ye dɔɔ̀o, é hoda sàma é yɛ̀dì o mɛhɛká. ²⁷ K'yé dii nìpa mɛ̀m̀pà de péé-pa wɛǹni ye pesá, kà pà yɔɔ̀ békú pa tɔɔ̀pa è tonà: Pa̰á̰ma m̀mɔ́ma-dà mɛmà-ní? Dɛ́há-nà nìdo k'ò kɔ̰́nì biɔhànamá cà̰m̀ma nà kpɛ̰́ǹti nɔɔ̀ti. Ò múńtà kɔ̰́nì wɛɛ̀kupá-dà nùdi nà nɔɔ̀ti kà pà t'óò yèkà-nà todí. ²⁸ Ye pesá n'ɛ̀ɛ pesá, k'òo yèdi é cemá pidá Kàdìdéè tempáàku wɛǹni mɛhɛká.

Sèsíì kpekanà mɔkàpa dɔ́ɔ́di

²⁹ Pà yɛ̀ni tḭ́ń wɔ̀ni Weèdi wɛmá biɔhà-nàmɔ̀ni mɛhɛká, kà Sèsíì é tadí Sìmɔ́ɔ̀ nà À̰ǹtìdéè hɔ̰́ɔ̰̀ta è nɔɔ̀-nà Sàákì nà Ìsá̰à̰. ³⁰ Sìmɔ́ɔ̀ poòo màa-dà há̰ de dɔɔ́ è mɔn mɛ́ti. Sèsíì tɛ̀ni-má-ní, kà pá cemá óò caka o dɔnkú kpɛ́mú. ³¹ K'ó taá ò dɔɔ́-sa é tɛ̀i é cɛ̰ɛ̰́ o nɔ̀ku óò yíkàna-ní. Ye pesá n'ɛ̀ɛ pesá, k'yèe wɔ̰ǹtòǹti é yɔ̀ɔ, k'ó yíí pà pɛha dipú kà pá dii.

³² Weèdi dɔɔ tḭ́ń wɔ̀ni, kà damuhipàdi é yɔ̀ɔ, k'yé biikà, kà nìpa é toha-ní o pesá mɔkàpa wɛǹni, nà wɛɛ̀kupá de péé-pa kú mɛhɛká. ³³ Kà yɔtí nìku wɛǹni é peèta ye hɔ̰́ɔ̰̀ta tapaàdi. ³⁴ K'ó kpekàna nìpa dɔ́ɔ́di dɔncí ci bodú bodú, é yídá bɔhà wɛɛ̀kupá dɔ́ɔ́di nìpa mɛhɛká. Ò de pú hɔ̰́ teha kà wɛɛ̀kupá wɛdá, mìì tee-sá pà de yá̰á̰-ma mɛ̀ǹǹ dɛ̀ɛ̀-ko.

Sèsíì cèǹtì Kàdìdéè tempáàku mɛhɛká è cakú Weèdi wɛnaamá

³⁵ Ká̰ńyɛ̰̀ǹfa pìpìdì, k'yè káà bìnì, kà Sèsíì yíí é yɛ̀dì é taá bɛ̀m̀bɛ̀ni nìpa pú péé-di, é tɛ̀i è dɔń Weèdi. ³⁶ Sìmɔ́ɔ̀ nà mɛ̀m̀pà de ò nɔɔ̀-nà-pa, kà pá yíí é taá o pɛhàpu. ³⁷ P'òò dɛ́hà tḭ́ń wɔ̀ni, óò caka è yɔ̀: Nìpa wɛǹni a pɛnti. ³⁸ K'ó pà tɛ̰́ná è yɔ̀: Tí ka̰há-nà bɛ́ɛ́kú tɔkú, yɔbící mɛ̀ǹcì tɔ́-tɔ́sí-ci miì. Yè békú n mɛ̀ɛ té tɛ̀i é cì caka-á-ma Weèdi wɛnaamá, è yá̰á̰ ye kú kpɛ́mú-dà tee ká n tɛ̀ni. ³⁹ K'ó yídá é taá Kàdìdéè tempáàku wɛǹni mɛhɛká, é tɛ̀i é dúú Weèdi wɛmá biɔhà-nàmɔ̀ka mɛhɛká, è cakú Weèdi wɛnaamá, è bɔ̀hu-nà wɛɛ̀kupá.

Sèsíì kpekànà kɔ̰̀ǹn

⁴⁰ Kà kɔ̰̀ǹn òcɔ̰́ǹ é ta̰ntá-ní Sèsíì pesá, é tɛ̀ni é hìu-ho o yìhìka òò sɛ́úkú è tonà: K'à kpɛ̀i, a kó nɛɛ́ n kpekàna-á-ma, ká n weka. ⁴¹ Kà séèma é cɛ̰ɛ̰́ Sèsíì, k'ó dɛɛ̀da o nɔ̀ku óò pḭ́ń è yɔ̀: N kpɛ̀i-í-ma, kpeka! ⁴² Ye pesá n'ɛ̀ɛ pesá, k'òo kɔ̰̀ǹku é yɔ̀a k'ó weka. ⁴³ Ye wɔ̀ni, kà Sèsíì óò wɛɛ́-nà kpeéma óò caka è yɔ̀: Tɔɔ̀ta é ka̰há. ⁴⁴ A dá yetá mà ca-caka òcɔ̰́ǹ. Àmá, á taá é bɛka a cɔ̰́ɔ̰̀di *dɔ̀hàdi yaǹn, é pa̰á̰ wekànamá dɔ̀hàdi, Mɔ̀yísì kpɛ̰́ńtìnùdi hḭ́n á pa̰á̰-di, é bɛka nìpa wɛǹni è yɔ̀ a kpekáà^b

⁴⁵ Àmá, k'yèe nìi ka̰há, é taá é bekaná páàti wɛǹni mìì ò pa̰à̰-sa-ní, k'yé n'tee-nà kà Sèsíì koò pú n'nɛɛ̀ é dúú yɔtí tìcɔ̰́tì kú mɛhɛká, kà nìì yá̰á̰. Ò de hɔ̰́ m'péé bɛ̀m̀bɛ̀ka nìpa kɔ́ɔ́-ka-dà, kà pà yɛ̀hu-ní páàti wɛǹni è kɔ́dì-ní o pesá.