Màtíyéè 27

Pà tanà Sèsíì Pìdátì pesá

¹ Ká̰ńyɛ̰̀ǹfa pìpìdì, kà dɔ̀hàka yam̀ma kpɛ̰́m̀ma, nà yɔtí kpɛ̰́m̀ma wɛǹni é peèta, é tódá ta̰kadáma è kó kɔ̀ù Sèsíì. ² Kà p'óò dákáná, óò tódá é taá ò tàa pa yɔtí yìkàǹyìko Pìdátì nɔ̀hi mɛhɛká, k'ò yòǹ Hɔ̀dɔ́m̀ kóoó.

Sùdásì kṵ́mú

³ Sùdásì mɛ̀ǹǹ de ò yɛɛ́ɛ̀-ko hɔ̰́tà-ma pà dènà-ní nùdi dèǹdèni è yɔ̀ p'óò kɔ̀ù, k'òo yàma é cɔ̰́ha n'ɔ̀ɔ̀ pa̰à̰-sa kú hḭ́ǹka. K'ó tódá ye díimáàti púta̰a̰ é taá tì tɛ̰́ná ye dɔ̀hàka yam̀ma kpɛ̰́m̀ma, n'ɛ̀ɛ yɔtí kpɛ̰́m̀ma. ⁴ K'ó tɛ̀i é pà caka è yɔ̀: N pa̰à̰ sḭ̀ḭ̀ma-dà, n yɛɛ́ɛ̀ nìi mɛ̀ǹǹ pú pa̰à̰-ko-dà yècḭ́ḭ̀ kà pà k'óò kɔ̀ù. Kà p'óò tɛ̰́ná è yɔ̀: Yècḭ́ḭ̀ pú ti dɛ́hà, yè hḭn a wɛmá-dà. ⁵ Kà Sùdásì é yahí-ho ye díimáàti Weèdi hɔ̰́ɔ̰̀ta mɛhɛká, é ka̰há é taá é dúná o cɔ̰́ɔ̰̀di wɛ̰̀ku. ⁶ Kà dɔ̀hàka yam̀ma kpɛ̰́m̀ma é tóńka ye díimáàti é caka pa tɔɔ̀pa è yɔ̀: Ti kpɛ̰́ńtìnùka pú ti pɛ̰ḭ nùdi è yɔ̀ tí cì tàa Weèdi hɔ̰́ɔ̰̀ta díikɔ́ɔ̀ta mɛhɛká, mìì tee-sá cì yòǹ hḭ̀ma dící-dà.

⁷ Kà pá múná nùdi nìcɔ̰́, é cì tódá é taá dontá kṵ́ḿpomato òcɔ̰́ǹ kú yɛ̀di, è kó n'dánì ye pesá cà̰m̀ma. ⁸ Ye kú kpɛ́mú-dà tee, kà pà káà nì yún "hḭ̀ma yɛ̀di" háá nà yenì. ⁹ Ma kú bookú-dà Weèdi wɛtɛ̰́náko Sèdèmíì wɛmà mɛmà de pa̰à̰-ma. Ò de yɔ̀: Pà tódá ye díimáàti púta̰di, Ìsìdàyɛ́dìpa de ò tantáà-fa kú nùdi, ¹⁰ é dontá-nà kṵ́ḿpomato yɛ̀di é n'yònà Bateó de mà nà cakáà-ma-hɔ̰.

Pìdátì békú Sèsíì

¹¹ Kà pá tanà Sèsíì pa teǹka yìkàǹyìdo Pìdátì pesá, é tɛ̀i k'óò béka è yɔ̀: A yòǹ Sùwífùpa wódo-dà? K'óò tɛ̰́ná è yɔ̀: A mà yɔ̀ɔ wɛdápu.

¹² Ye kú dàhàka, kà dɔ̀hàka yam̀ma kpɛ̰́m̀ma, nà yɔtí kpɛ̰́m̀ma é m'pṵ́nì Sèsíì, ò mɛ̀ɛ pú tɛ̰́nì màcɔ̰́mà. ¹³ Ye wɔ̀ni, kà Pìdátì óò béka è yɔ̀: A pú you p'àà pṵ́nì-sà wɛnnì? ¹⁴ Àmá, Sèsíì p'óò tɛ̰́nà màcɔ̰́mà p'òò pṵ́nì-sa wɛǹni hḭ́ǹka, k'yé dii dɛ́dɛ́í ye teǹka yìkàǹyìdo.

Pà dènà nùdi dèǹdeǹni è yɔ̀ pá kɔ̀ù Sèsíì

¹⁵ Núǹtiyɛ̀ɛ̀ma kúúdi wɛǹni, teǹka yìkàǹyìko de hɔ̰́ wɛ́í kpenáku kùcɔ̰́-dà, nìku de hɔ̰́ n'kpɛ̀i-kú kú wɛ́íma. ¹⁶ Y'àá de hɔ̰́tà nìd'oòcɔ̰́ǹ-dà péé kódedí mɛhɛká kà nìpa wɛǹni ò yá̰á̰, kà p'òò tonà Bàdàbásì.

¹⁷ Kà Pìdátì é béka ye nìku mɛ̀ǹkù de tísí-ku è yɔ̀: Nɛ kpɛ̀i ń nɛ wɛ́í wodà? Bàdàbásì nkɛ́ɛ̀ Sèsíì pà yún-kó Kídísì? ¹⁸ Ò de pà békáà mɛma mìì tee-sá, ò de yá̰á̰-ma sukú è yɔ̀, nà sɛ̰sɛ̰kú kpɛ́mú-dà pà tàà-ma Sèsíì o nɔ̀ta mɛhɛká.

¹⁹ Kà Pìdátì é n'káà kàdi síipú hɔ̰́ɔ̰̀ta mɛhɛká è síi, k'òo poòo óò nàǹci-ní nùdi è yɔ̀: Ye dɔɔɔ̀ yòǹ niìcoóko-dà, á yɛ̀ɛ̀ o wɛmá mɛhɛká, mìì tee-sá yèǹkà mɛnkà, dɔhàti mɛhɛká n dii náńkú-dà dɛ́dɛ́í n'ɔ̀ɔ kú kpɛ́mú.

²⁰ Kà dɔ̀hàka yam̀ma kpɛ̰́m̀ma, nà yɔtí kpɛ̰́m̀ma é caka nìku è yɔ̀ kú héé kà pá wɛ́í Bàdàbásì, é kɔ̀ù Sèsíì.

²¹ Kà Pìdátì é tṵ́má tóó wɛmá é pà béka è yɔ̀: Pa dɛ́ɛ́dì mɛhɛkà, pa wodà nɛ kpɛ̀i ń nɛ wɛ́í-ma?

Kà p'óò tɛ̰́ná è yɔ̀: Bàdàbásì!

²² K'ó tṵ́má pà béka è yɔ̀: N'aá hḭ́n n pa̰á̰ badà Sèsíì pà tṵ́mà yún-kó Kídísì?

Kà pa wɛǹni óò tɛ̰́ná è yɔ̀: Ò kpɛ̰́ḭ́ kpíidɔkú hḭ́ǹka!

²³ Kà Pìdátì é pà béka è yɔ̀: Pa̰á̰ma m̀mɔ́ma-dà ò pa̰à̰-ma kà mà sḭ̀ǹ?

Àmá, kà pá dɔ̀hà é dedí kpeéma è yɔ̀: Ò kpɛ̰́ḭ́ kpíidɔkú hḭ́ǹka! ²⁴ Pìdátì cɔ́dí-ma è hɔ̰́tà ò pa̰kú-sà wɛnnì hécí-dà, hodí-dà baà hɔ́ù, k'ó tódá nɛ́ɛmá é nɛɛ̀ta o nɔ̀hi nìku wɛǹni yìhìka è yɔ̀: Ǹtɛ n bakù ǹtɛ ku tɔú, yè dìi nɛ́na-dà. ²⁵ K'yèe nìku wɛǹni óò tɛ̰́ná è yɔ̀: O kṵ́mú kó tɛɛ̀-sa-ní wɛǹni é dɔdi tḭ́ńti nà ti bííhí yuùka hḭ́ǹka. ²⁶ Ye wɔ̀ni, k'ó pà wɛ́í Bàdàbásì, é héé kà pá podí Sèsíì dáàfa, é yɔ̀ɔ k'óò tàa pa nɔ̀hi mɛhɛká, kà pà kó taá ò kpɛ̰́ḭ́ kpíidɔkú hḭ́ǹka.

Sósìpa dɛhikú Sèsíì

²⁷ Kà sósìpa é tódá Sèsíì óò tanà Pìdátì hɔ̰́ɔ̰́tà mùǹku mɛhɛká, é tɛ̀i é tíkáná sósìpa wɛǹni kà p'óò yéńtá. ²⁸ Kà p'óò bátá o báatí, óò báná tókesàdi hṵɛ̰dí mɔ̀ì, ²⁹ é dɛ̀i poòma pókàta è yɔ̀ wóopókàta-dà é yíná o yudí, óò púkáná kpadàkàdi o nɔ̀ǹheukú. Ye kú dàhàka, kà pà té hìu o yìhìka óò dɛhí óò dɔwa è yɔ̀: Ǹnadaà Sùwífùpa wódo!

³⁰ Kà pà tṵ́hú nuǹtɔ̰tí o hḭ́ǹka, è té tódá kpadàkàdi é potá o yudí. ³¹ Pà yɔ̀ɔ-má o dɛhípu, é bátá ye tókesàdi hṵɛ̰dí, é tɛ̰́ná o nɛǹti óò báná. Ye kú dàhàka, kà p'óò dèna tapaàdi è kó taá ò kpɛ̰́ḭ́ kpíidɔkú hḭ́ǹka.

Pà kpɛ̰́ḭ́ Sèsíì kpíidɔkú hḭ́ǹka.

³² Kà pá n'yɛtì yɔtí, é peèta-nà Sìmɔ́ɔ̀ k'ò yòǹ Sìdɛ́nì yɔtí kóoó. Kà Sósìp'óò pa̰á̰ nà nɔɔ̀ti è yɔ̀ ó toó-nà Sèsíì o kpíidɔkú. ³³ Kà pá ta̰ntá bɛ̀m̀bɛ̀ni pà toò-di Kɔ̀ɔ̀kòtáà, mìì kpɛ̀i é n'yɔ̀-sa yukókóku bɛ̀m̀bɛ̀ni. ³⁴ Ye pesá, kà pá kɔ̰́ɔ̰́ Sèsíì dìfɛ̰́ɛ̰̀, òò kɔkadà-nà tepú mɛ̀mù bókànì-pu dɔnkú è yɔ̀ ó yà̰à̰. K'óò dɛmpa, ò pú teháà óò nìì.

³⁵ Kà p'óò kpɛ̰́ḭ́ kpíidɔkú hḭ́ǹka, é yídá ta̰á̰ o báatí tɛ́tɛ́ é tì totá. ³⁶ Ye kú dàhàka, kà pá cá̰ńtá ye pesá è kàdi òò ceí. ³⁷ Kà pá wa̰à̰ta wà̰a̰cí é daàna o kpíidɔkú yudí hḭ́ǹka kà cì bɛkú ò yetà-sa kà pà k'óò kɔ̀ù-nà. Ye wà̰a̰cí de tonà: Mɛnǹ yòǹ Sèsíì-dà, Sùwífùpa wódo. ³⁸ Kà pá pɛ́ɛ́ óò kpɛ̰́ḭ́-nà niìsḭ̀m̀ma pàdɛ́ɛ́ kpíidɛcí hḭ́ǹka. Òcɔ̰́ o hiòma, tɔɔ̀o o cà̰ǹkamá.

³⁹ Kà nìpa mɛ̀m̀pà ka̰hù-pa ye pesá òò tèù, è mákápú yuùka, ⁴⁰ è tonà: Heì! Fɔ̰́ń mɛ̀ǹǹ de kpɛ̀i-kó é pɔ́dá Weèdi hɔ̰́ɔ̰̀ta, é madí tɔɔ̀ta daàa kàta̰a̰ mɛhɛká, fḭ́hìna a cɔ̰́ɔ̰̀di-ì! K'à yòǹ Weèdi bíitá-dà, k'á cútá-ní ye kpíidɔkù hḭ́ńkà!

⁴¹ Kà dɔ̀hàka yam̀ma kpɛ̰́m̀ma, nà Weèdi kpɛ̰́ńtìnùka biɔhànapá, nà yɔtí kpɛ̰m̀ma mɛ̀ɛ t'óò dɛhikú è tonà: ⁴² Ò fḭ́hìnà-á-ma tɔɔ̀pa, è há̰ pú kó nɛɛ́ é fḭ́hìna o cɔ̰́ɔ̰̀di. Ìsìdàyɛ́dì wódo baà dɛ̀ɛ̀-à, ó cútá-ní ye kpíidɔkù hḭ́ńkà, ye wɔ̀ni ti k'óò n'dań-ma. ⁴³ Ò tàà o dandaní-dà Weèdi hḭ́ǹka è yɔ̀ ò yòǹ ni bíitá. Kà n'ɔ̀ɔ̀ dɔ́sí-dà, kà n'ɔ́ɔ̀ fḭ́hìna sá̰mà-ní! ⁴⁴ Ye niìsḭ̀m̀ma pàdɛ́ɛ́ pà de pɛ́ɛ̀ óò kpɛ̰́ḭ́-nà-pa kpíidɛcí hḭ́ǹka, kà pà mɛ̀ɛ t'óò tèù ma kú bookú.

Sèsíì kṵ́mú

⁴⁵ Wèǹku beé-nà tḭ́ń wɔ̀ni yuùka hḭ́ǹka, kà pa teǹka é biikà ka wɛǹni, é n'yòǹ mɛma háá máàku màta̰a̰ yohokú. ⁴⁶ Máàku ta̰á̰ku mɛhɛká, kà Sèsíì é hoda kpeéma è yɔ̀: Èdíì, Èdíì, dàmá sàbàtàníì, mìì kpɛ̀i é n'yɔ̀-sa: N Weèdi, n Weèdi badà tee k'á n wɛ́í? ⁴⁷ Pàcɔ̰́ mɛ̀m̀pà de péé-pa ye pesá yeèkaà-ma mɛma, kà pà yɔ̀: Ò yún Èdíì-dà. ⁴⁸ Kà p'oòcɔ̰́ é cocí-ní é tɛ̀ni é tódá cɛbùti, é tì sɛ̰̀wa̰ dìfɛ̰́ɛ̰̀ naàkpáńkpáǹni mɛhɛká é tì bowá hà̰dikú yóùma, óò kɔ̰́ɔ̰́ è yɔ̀ ó yà̰à̰. ⁴⁹ Kà tɔɔ̀pa yɔ̀: Héé-nà kà tí dɛ́há kà Èdíì kó tɛ̀n'ɔ́ɔ̀ fḭ́hìna.

⁵⁰ Kà Sèsíì é tṵ́má hoda kpeéma, é tɔ̰ɔ̰̀ta. ⁵¹ Ye wɔ̀ni, kùdáasàpu mɛ̀mù de ca̰ncí-pu Weèdi hɔ̰́ɔ̰̀ta mɛhɛká, kà mú cɛ́tá é hḭn màdɛ́ɛ́, mu hḭ́ǹka háá-nà mu teǹka. Kà teǹka é sa̰mpà, kà tá̰a̰beèka é pḭ́há wɛncí, ⁵² kà híùka é kpetá, kà kpíípa dɔ́ɔ́di mɛ̀m̀pà de yòǹ-pa Weèdi kpɛ́ɛpá é yá̰ńtá-ní. ⁵³ Sèsíì yá̰ńtáma dàhàka, kà pá yɛɛ̀ni híùka mɛhɛká, é dúú Sèdìsàdɛ́m̀, Weèdi yɔtí mɛhɛká kà nìpa dɔ́ɔ́di é pà dɛ́há.

⁵⁴ Hɔ̀dɔ́m̀ sósìpa kpɛ̰́ǹn, nà sósìpa mɛ̀m̀pà de pɛ́ɛ̀ ò ceé-nà-pa Sèsíì, dɛ́hà-ma teǹka sa̰mpàma nà tɔɔ̀sa mìì de pa̰à̰-sa wɛǹni, kà wantafɔ̰̀di é pà cɛ̰ɛ̰́ dɛ́dɛ́í, kà pà yɔ̀: Mɔ́masí-dà ye dɔɔò de yòǹ-ma Weèdi bíitá. ⁵⁵ Poòpa dɔ́ɔ́di d'eè péé-ma è nɛ̀hi-ní nà dɛùma è wáń. Pà de tṵnà-ní Sèsíì nà Kàdìdéè tempáàku-dà è dehú o kpɛ́mú. ⁵⁶ Pa mɛhɛká, Màdíì Màkìtàdáà yɔtí kóoó d'eè péé-ma, nà Màdíì Sàákì nà Sòsɛ́fù màa, nà Sèbèdéè bííhí kóoó.

Sèsíì dánáma

⁵⁷ Yohokú yodà tḭ́ń wɔ̀ni, kà káádo òcɔ̰́ǹ é tɛ̀ni, è yòǹ Àdìmàtéè yɔtí kóoó, kà p'òò toò Sòsɛ́fù, k'ò mɛ̀ɛ té yòǹ Sèsíì dapàǹn. ⁵⁸ K'ó taá é dɛ́há Pìdátì óò cɔhà Sèsíì wɔ̰̀ǹku. K'ó teha é kɔ̰́ɔ̰́ nùdi è yɔ̀ pá kù n'ɔ̀ɔ̀ kɔ̰́ɔ̰́. ⁵⁹ K'ó tódá ye wɔ̰̀ǹku é kù pɔ̰á̰ kùdáapɛ́íta, ⁶⁰ é taá kù tàa fɔ̰ɔ̰̀pàǹku mɛhɛká, ò de héè kà pá kpɛ́ha-kú tá̰a̰beèdi mɛhɛká o mɔ́ń-mɔ́nń kpɛ́mú. Ye kú dàhàka, k'ó bídí tá̰a̰sàku é hḭḭ̀na ku nùdi, é ka̰há. ⁶¹ Màdíì Màkìtàdáà yɔtí kóoó nà Màdíì tɔɔ̀ɔ, de péé-ma ye pesá è kàdi è coó-nà ye híúdi.

Pà ceí Sèsíì híúdi

⁶² K'yé wentá, pà hɔ̰́ pa̰á̰ damuhipàdi sɔ̀do kà daadí mɛ̀nì é tṵṵ̀na-dí-ní, kà dɔ̀hàka yam̀ma kpɛ̰́m̀ma nà Fàdísìpa é pɛ́ɛ́ taá Pìdátì pesá, ⁶³ é tɛ̀i è yɔ̀: Dapàǹkpɛ̰́ǹn, ti káà dèn-ń-ma ye nuǹhetì yanǹ de wɛɛ̀-sa è káà fòù. Ò de yɔ̀ kà p'òò kɔ̀ù, daàa kàta̰a̰ kú dàhàka, ò kó yá̰ńtá-ma. ⁶⁴ Kɔ̰́ɔ̰́ nùdi kà pá ceí o híúdi háá kà daàa kàta̰a̰ é ka̰há, k'òo dapàm̀ma dá tɛ̀ni é yódá o wɔ̰̀ǹku, yè wɔ̀ni é caka nìpa è yɔ̀ ò yá̰ńtà-á-ma. Ye kú nuǹhetì kó ha̰tá-ma cecetí.

⁶⁵ Kà Pìdátì é pà caka è yɔ̀: Ǹtɛ-nà sósìpa. Taá é pa̰á̰-nà kà pá nì ceí nɛ kpɛ̀kaàma. ⁶⁶ Kà pá yíí taá ye híúdi pesá, é tɛ̀i dɔ̀hà é ya̰hà ni nùdi tá̰à̰di mámáḿ, é tóó sósìpa é ceá.