Màtíyéè 26

Dɔ̀hàka yam̀ma kpɛ̰́m̀ma pɛnti pà kó hḭmá é kɔ̀ù Sèsíì

¹ Sèsíì yɔ̀ɔ-má ye kú wɛmà wɛnnì biɔhànamá, é caka o dapàm̀ma è yɔ̀: ² Nɛ yá̰á̰-ma è yɔ̀ Núǹtiyɛ̀ɛ̀ma kúúdi kaá daàa kàdɛ́ɛ́-dà è kó dii. Pà kó cɛ̰ɛ̰́-ma Niìfòùo bíitá é tà tàa nìpa nɔ̀hi mɛhɛká, kà pá tà kpɛ̰́ḭ́ kpíidɔkú hḭ́ǹka.

³ Ye wɔ̀ni, kà dɔ̀hàka yam̀ma kpɛ̰́m̀ma, nà yɔtí kpɛ̰́m̀ma é tíká dɔ̀hàdi kpɛ̰́ǹn Kàyífù nahàku mɛhɛká. ⁴ Kà pa wɛǹni é tódá ta̰kadáma è yɔ̀ pà kó cɛ̰ɛ̰́ Sèsíì sɔ̀sɔ̀ɔ̀ma mɛhɛká-dà óò kɔ̀ù. ⁵ Kà pá caka pa tɔɔ̀pa è yɔ̀: Ti pú yònà óò cɛ̰dí kúúdi mɛhɛká, kà mɛma dɔɔ, nìpa kó yee-é-ma o kpɛ́mú é pa̰á̰ hoodí.

Poòo òcɔ̰́ǹ hútà tùdàasá Sèsíì yudí hḭ́ǹka

⁶ Sèsíì de péé Bètàníì yɔtí mɛhɛká-dà nìi òcɔ̰́ǹ kú hɔ̰́ɔ̰̀ta, kà p'òò toò Sìmɔ́ɔ̀ kɔ̰̀ǹn. ⁷ Kà poòo òcɔ̰́ǹ é tɛ̀ni o pesá è toó-ní tá̰à̰ka pà toò-ka àdìbátídì déǹta kà tà sṵ́nà tùdàasá díikpecí kóoó. Sèsíì yon tḭ́ń wɔ̀ni, k'ó hútá ye tùdàdé o yudí hḭ́ǹka. ⁸ O dapàm̀ma dɛ́hà-ma mɛma, k'yé pà dɔnka, kà pà yɔ̀: Baà tee k'ó cɔ̰ha ye tùdàasá-ní? ⁹ Ti de kó nɛɛ́-ma óò yɛda díikpecí, é cì totá sɔ̰̀m̀ma.

¹⁰ Kà Sèsíì é yekà pà de wɛ́-wɛ́hàta-sá, é pà caka è yɔ̀: Baà tee kà n'ɔɔ̀ kpàà n'ɔ̀ɔ kpɛ́cí? Ò pa̰à̰-sa n kpɛ́mú suu-ú-ma, ¹¹ mìì tee-sá, sɔ̰̀m̀ma mɛmpa baà kó nɛ m'péé-nà-á-dà, àmá mmí n pú kó nɛ m'péé-nà wɔ̀ka wɛǹni. ¹² Ò sìdi tùdàasá n wɔ̰̀ǹku è dɔ̀hu n dánáma sɔ̀do-dà. ¹³ N nɛ cakú bemú-dà, pà kó caka-sá wɛǹni Weèdi wɛnaamá teǹka nà ka nùdi, pà kó deǹta-á-ma ye pooò kpɛ́mú é caka ò pa̰à̰-sa.

Sùdásì kpɛ̀i é yɛɛ-nà Sèsíì dɔ̀hàka yam̀ma kpɛ̰́m̀ma

¹⁴ Y'oo tɔntɔndipá píì-pàdɛ́ɛ́ mɛhɛká, k'òòcɔ̰́ yídá, kà p'òò toò Sùdásì Ìsìkàdìyɔ́tì, é taá é dɛ́há dɔ̀hàka yam̀ma kpɛ̰́m̀ma, ¹⁵ é pà caka è yɔ̀: Nɛ kó n boó m̀mɔ́ya̰, kà n nɛ yɛɛ́-nà Sèsíì?

Kà pá kaàn díimáàti púta̰di óò kɔ̰́ɔ̰́. ¹⁶ É cɛ̰ɛ̰́-nà ye kú wɔ̀ni, kà Sùdásì é m'pɛnti pa̰á̰ma mɛ̀mà k'óò tempa-nà-ma k'ó taàa Sèsíì pa nɔ̀hi mɛhɛká.

Sèsíì yon Núǹtiyɛ̀ɛ̀ma kúúdi dipú n'ɔ̀ɔ dapàm̀ma

¹⁷ Pɛ̰́ɛ̰̀pa mɛ̀m̀pà kɔ́ɔ́-pa yòmu yíkànasá kúúdi dacecedí, kà Sèsíì dapàm̀ma óò béka è yɔ̀: Ya-dà a kpɛ̀i t'áa béná-ma Núǹtiyɛ̀ɛ̀ma kúúdi dipú?

¹⁸ K'ó pà tɛ̰́ná è yɔ̀: Taá-nà yɔtí mɛhɛká, nìì mɛnǹ kú hɔ̰́ɔ̰̀ta, kà nɛ tɛ̀i, kà n'ɔ́ɔ̀ caka è yɔ̀: N wɔ̀ni-dà tɛ̀i. O hɔ̰́ɔ̰̀ta mɛhɛká-dà n kó dii-má Núǹtiyɛ̀ɛ̀ma kúúdi dipú nà n dapàm̀ma.

¹⁹ K'òo dapàm̀ma é pa̰á̰ ò hḭ́n pá pa̰á̰-sa, é béná ye Núǹtiyɛ̀ɛ̀ma kúúdi dipú.

²⁰ Kà yookú é yodá, n'ɔ̀ɔ dapàm̀ma píì-pàdɛ́ɛ́ kà pá kaàdi è kó dii. ²¹ Kà pá n'yon kó pà caka è yɔ̀: Bemú-dà n nɛ cakú-ma, n'ɔɔ̀cɔ̰́-dà kó n yɛda.

²² K'yòo dapàm̀ma yàma yɔ̀ kɔ̰̀, kà p'óò m'békú òcɔ̰́ òcɔ̰́ è toò: Mmí pú dɛɛ nkɛ́ɛ̀ n Teù?

²³ K'ó pà tɛ̰́ná è yɔ̀: Nà mɛ̀ǹǹ ti pɛ́ɛ̀ é baá-ko caadí mɛhɛká, mɛnń-dà kó n yɛda. ²⁴ Niìfòùo bíitá kó kpíí-ma é n'yònà pà wà̰tà-sa ta hḭ́ǹka Weèdi wɛmá mɛhɛká. Àmá, Náńkú-dà kó m'péé-nà nìdo mɛ̀ǹǹ kó tà yɛɛ-kó. Kà pà de cem̀ pú pɛdà ye yaǹn, ye kpɛ́ɛmá tɔ̰ṵ.

²⁵ Kà Sùdásì mɛ̀ǹǹ de k'óò yɛɛ-kó, óò béka è yɔ̀: Mmí pú dɛɛ nkɛ́ɛ̀ dakpɛ̰́ǹn?

K'óò tɛ̰́ná è yɔ̀: A mà wɛdà.

Núǹtiyɛ̀ɛ̀ma kúúdi dipú

²⁶ Pà yon tḭ́ń wɔ̀ni, kà Sèsíì é tódá pɛ̰́ɛ̰̀ é sɛda Weèdi, óò wɛ́ha, óò pà kɔ̰́ɔ̰́ è yɔ̀: Ǹto-nà kà nɛ́ dii, miì yòǹ n wɔ̰̀ǹku-dà.

²⁷ Ye kú dàhàka, k'ó tódá bondidí nà dìfɛ̰́ɛ̰̀, é sɛda Weèdi, é nì pà kɔ̰́ɔ̰́ è yɔ̀: Yà̰à̰-nà nɛ wɛǹni, ²⁸ mìì tee-sá, miì yòǹ n hḭ̀ma-dà, Weèdi nɛ pa̰kú-nà-ma múnápàm̀ma, kà mà kó wudí nìku dɔ́ɔ́di kpɛ́mú, kà Weèdi é deèda ku sḭ̀ḭ̀ma. ²⁹ N nɛ cakú-ma, é cɛ̰ɛ̰́-nà wɔ̀nì mɛnì, n koò pú kó nìì dìfɛ̰́ɛ̰̀ háá é n'sànà daadí n kó nìì-di pàǹn nà nɛ́na n Báàa wóòti mɛhɛká.

³⁰ Ye kú dàhàka, kà pá deèn Weèdi duntàma nɛ́yɛ̰̀ǹci, é yɔ̀ɔ é yɛ̀ɛ̀ é dìsi òdífùna ta̰à̰di hḭ́ǹka.

Sèsíì cakú è yɔ̀ Píyɛ́ɛ̀ k'ó nɔ̀hì è yɔ̀ ò p'óò yá̰á̰

³¹ Kà Sèsíì é caka o dapàm̀ma è yɔ̀: Yenì kú yèǹkà mɛnkà, nɛ kó n wɛ́í-ma é cocí nɛ wɛnnì, mìì tee-sá pà wà̰tà Weèdi pɔ̀kàta mɛhɛká è yɔ̀: N kó kɔ̀ù-ú-ma hɔ̰ɔ̰̀cɛ̰nto, kà hɔ̰ɔ̰̀kàdo hɔ̰̀ci é wi-wiìda ci bɛ́kà bɛ́kà. ³² K'ó tɔhìna è yɔ̀: Àmá, n kó yá̰ńtá tḭ́ń daadí, n kó nihí Kàdìdéè-dà é taá nɛ ceí.

³³ Kà Píyɛ́ɛ̀ é tódá wɛmá óò caka è yɔ̀: Bá kà tɔɔ̀pa wɛǹni a wɛ́i, mmí pú k'áa wɛ́í.

³⁴ K'óò tɛ̰́ná è yɔ̀: Bemú-dà m'a cakú-ma, yenì kú yèǹkà mɛnkà, kà kóotá é nɛɛ́ kɔń, a kó nɔ̀hì è yɔ̀ a pú n yá̰á̰ cɔ̀ku màta̰a̰-dà.

³⁵ Kà Píyɛ́ɛ̀ óò caka è yɔ̀: N pú kó nɔ̀hì daadí yènì è yɔ̀ n p'áa yá̰á̰, bá kà pà kó pɛ́ɛ́ n kɔ̀ù nà fɔ̰́ń.

K'òo dapàm̀ma tɔɔ̀pa mɛ̀ɛ té tɛ̰́ná-hɔ̰ mɛma cɔ̰́ɔ̰̀di.

Sèsíì dɔń Weèdi Sɛ̀tìsèmànɛ́ɛ̀ mɛhɛká

³⁶ Sèsíì n'ɔ̀ɔ dapàm̀ma kà pá taá bɛ̀m̀bɛ̀ni nìcɔ̰́nì kà pà nì toò Sɛ̀tìsèmànɛ́ɛ̀, é tɛ̀i k'ó pà caka è yɔ̀: Ní n'kaàa-nà miì, ká n taá mɛnkà é dɔwa Weèdi.

³⁷ K'ó tódá Píyɛ́ɛ̀, nà Sèbèdéè bííhí hidɛ́ɛ̀ka kà pá nɔdá. K'òo bɔ̀ti é cetá è pùdì dɛ́dɛ́í, k'òo yàma é cɔ̰ha. ³⁸ K'ó pà caka è yɔ̀: N yàma-dà cɔ̰háà dɛ́dɛ́í k'yè n yṵ̀hṵ̀-nà è yònà kṵ́mú. Cá̰ńtá-nà miì, nɛ́ n tempa-nà é n'you, nɛ dá dɔɔ́.

³⁹ K'ó tuùta-ho yìhìka cɛ̰́ma, é wɛ́í-ho o cɔ̰́ɔ̰̀di teǹka bìbìùdi, é cɔhà Weèdi è yɔ̀: N Báà, k'yè kó teha, k'á n yehèna ye náńkù mɛnkù. Há̰ka, a dá héé kà n kú dɔ́kàma é pa̰ná, àmá a kpɛ́ɛmá.

⁴⁰ Ye kú dàhàka, k'ó tóní o dapàm̀ma pata̰à̰ka bɛ́ka, é tɛ̀ni è hɔ̰́tà pà dɔɔ́. K'ó béka Píyɛ́ɛ̀ è yɔ̀: Nɛ pú nɛdà é n tempa-nà é n'you bá máàku kùcɔ̰́? ⁴¹ Nɛ́ n'you, é n'cɔɔ̀hu Weèdi k'yé teha kà nɛ dá dɔdi bɛḿma mɛhɛká. Nìdo sèdi hɔ̰́ n'kpɛ̀i-í-ma é pa̰á̰ suumá, àmá o wɔ̰̀ǹku pú kpenì.

⁴² K'ó tṵ́má nátá dɛ́ɛ́ma, é cɔhà Weèdi è yɔ̀: N Báà, k'yè pú cédí k'á n yehèna ye náńkù mɛnkù, k'yè békú n kù dii-í-dà, k'àa yàma kpɛ̀i-sá é pa̰ná.

⁴³ K'ó tṵ́má tóní é tɛ̀ni é n'hɔ̰́tà pà tṵ́mà dɔɔ́, mìì tee-sá nuǹdɔmú-dà de pà sɛ̀dà dɛ́dɛ́í, pà koò pú kó nɛɛ́ diìda. ⁴⁴ K'ó tṵ́má pà nátà-nà, é cɔhà Weèdi ta̰á̰ma ye wɛmá ma cɔ̰́ɔ̰̀di hḭ́ǹka. ⁴⁵ K'ó tṵ́má tóní o dapàm̀ma pesá, é tɛ̀ni pà caka è yɔ̀: Nɛ dɔɔ́-mɛ-ɛ̀ è muhipú-ì! Ǹtɛ wɔ̀ni-dà tɛ̀ni kà pà kó taàa Niìfòùo bíitá niìsḭ̀m̀ma nɔ̀hi mɛhɛká. ⁴⁶ Ǹtɛ kà mɛ̀ǹǹ kó n yɛɛ-kó hɛ́ɛ́-kú-ní, yíí-nà kà tí ka̰há.

Sèsíì cɛ̰ɛ̰́ma

⁴⁷ Sèsíì de káà wɛì-í-ma, kà Sùdásì, y'oo tɔntɔndipá píì-pàdɛ́ɛ́ mɛhɛká p'oòcɔ̰́, k'ó tɛ̀ni è nɔɔ̀-nà-ní nìku dɔ́ɔ́di kà kù toó sepɛ̰ɛ̰̀ká nà ya̰tí. Dɔ̀hàka yam̀ma kpɛ̰́m̀ma, nà yɔtí kpɛ̰́m̀ma-dà de pà tɔn-ní. ⁴⁸ Sùdásì, mɛ̀ǹǹ de kó yɛdá-kó Sèsíì de pà yɔ̀ɔ cakàpu-dà yḭdó ò kó pa̰á̰-ko kà p'óò bantá. Ò de yɔ̀: Nìdo n kó bàsi-nà-ko, mɛnń-dà nɛ pɛnti-má, n'ɔ́ɔ̀ cɛ̰dí. ⁴⁹ K'ó tɛ̀ni é cemá pàdi-ho Sèsíì, óò dɔwa è yɔ̀: Ǹnad'aa n dakpɛ̰́ǹn! Ye wɔ̀ni óò bàsi-nà. ⁵⁰ Kà Sèsíì óò tɛ̰́ná è yɔ̀: N dóopó, a tɛ̀ni è kó pa̰á̰-sa, yè pa̰á̰ fem̀ma. Ye wɔ̀ni, kà tɔɔ̀pa é ka̰há-ní é tɛ̀n'ɔ́ɔ̀ cɛ̰dí. ⁵¹ Kà mɛ̀m̀pà d'oò péé-nà-pa, p'oòcɔ̰́ é nɔɔ̀ta-ní o seedí, é potá dɔ̀hàka kpɛ̰́ǹn dapàǹn òcɔ̰́, é fiìta-ho o toodí. ⁵² Kà Sèsíì óò caka è yɔ̀: Tɛ̰́ná é nɔɔ̀na a seedí ni píìku mɛhɛká, mìì tee-sá, mɛ̀m̀pà kɔ̀ùdì-pa tɔɔ̀pa nà seèka, pà mɛ̀ɛ té kó wáńtá pà kɔ̀ù nà mɛnká-dà. ⁵³ A pú yá̰á̰ è yɔ̀ kà n de kpɛ̀i, n kó cɔhà-á-ma tempànàma n Báàa, k'ó n kɔ̰́ɔ̰́-ní ye pesá n'ɛ̀ɛ pesá o tɔntɔndipá tòhìka píhí dɔ́ɔ́di, kà pá ta̰á̰ n kpɛ́mú? ⁵⁴ Kà n há̰ hḭn mɛma, ntɛ́ yè kó hḭmà kà Weèdi wɛmá hḭ́mpú é pa̰ná? Mà yɔ̀ yè yònà é pa̰á̰ ma kú bookú-dà.

⁵⁵ K'ó béka ye nìku è yɔ̀: Nɛ yònà é tɛ̀ni n cɛ̰ɛ̰́pu nà sepɛ̰ɛ̰̀ká-dà nà ya̰tí k'yè yònà n yòǹ-ma niìkɔ̀ùdo? Daàka wɛǹni, n de hɔ̰́ n'kaàdi Weèdi hɔ̰́ɔ̰̀ta mɛhɛká-dà è biɔhànì, nɛ pú n cɛ̰dí. ⁵⁶ Mii kú wɛnnì há̰ tɛ̀ni, è kpɛ̀i Weèdi wɛtɛ̰́nápa de wa̰à̰haà-ma wɛmá-dà é pa̰ná. Ye wɔ̀ni, k'òo dapàm̀ma wɛǹni óò wɛ́í é co-cocí.

Pà tanà Sèsíì sídàpa yìhìka

⁵⁷ Mɛ̀m̀pà de cɛ̰ɛ̰́-pa Sèsíì, kà p'óò tanà dɔ̀hàka kpɛ̰́ǹn Kàyífù hɔ̰́ɔ̰̀ta, Weèdi kpɛ̰́ńtìnùka biɔhànapá, nà yɔtí kpɛ̰́m̀ma de petà-sa. ⁵⁸ Kà Píyɛ́ɛ̀ óò n'tṵ̀n nà dɛùma háá-nà dɔ̀hàka kpɛ̰́ǹn hɔ̰́ɔ̰́tà mùǹku mɛhɛká-ho. K'ó tɛ̀i é pɛ́ɛ́ è kàdi-nà mɛ̀m̀pà tà ceí-pa è kó dɛ́há ye wɛmá kó yɔ̀kàma.

⁵⁹ Kà dɔ̀hàka yam̀ma kpɛ̰́m̀ma nà sídàpa tɔɔ̀pa wɛǹni pɛnti pà kó pṵ́á̰-sa Sèsíì k'yé teha kà p'óò kɔ̀ù. ⁶⁰ Àmá, pà de pú dɛ́tà yècḭ́ḭ̀ mìì sànà-sa p'óò kɔ̀ù, bá nà nìpa dɔ́ɔ́di de kɔ́dì-sà-ní è cakú nuǹhetí o hḭ́ǹka. Kà nìpa pàdɛ́ɛ́ é yɔ̀ɔ tɛ̀ni è yɔ̀: ⁶¹ Nìì mɛ̀ǹǹ wɛɛ̀-ɛ́-ma è yɔ̀ ò kó nɛɛ́ pɔɔ́ Weèdi hɔ̰́ɔ̰̀ta, é tṵ́má tà madí daàa kàta̰a̰ mɛhɛká. ⁶² Ye wɔ̀ni, kà dɔ̀hàka kpɛ̰́ǹn é yíí-ní, óò béka è yɔ̀: Aá pú tɛ̰́nì màcɔ̰́m'ɛ̀ɛ̀? A pú you pà wɛì-sa a hḭ́ǹka? ⁶³ Àmá, k'ò baà yòǹ wá̰m ò pú tɛ̰́nì màcɔ̰́mà. Kà dɔ̀hàka kpɛ̰́ǹn é tṵ́m'ɔ́ɔ̀ caka è yɔ̀: M'a cɔɔ̀hu nà Weèdi mɛ̀nì fòùdi yèdi è yɔ̀ á ti caka, kà fɔ̰́ń-dà héé Kídísì, ni bíitá? ⁶⁴ K'óò tɛ̰́ná è yɔ̀: Fɔ̰́ń-dà mà hḭ́n. Àmá, n nɛ cakú-ma, é tódá sá̰mà, nɛ kó dɛ́há-ma Niìfòùo bíitá kà tà kàdi Weèdi nɔɔ̀ti wɛǹni kpɛ́ɛdí nɔ̀kàǹhiòma. Nɛ kó tṵ́má tà dɛ́há-ma kà tà pení wɔɔ̀ka hḭ́ǹka. ⁶⁵ Ye wɔ̀ni, k'yèe dɔ̀hàka kpɛ̰́ǹn é cɛ́tá o báatí, mìì bɛkú-sa è yɔ̀ y'òò dɔnkáà. K'ò yɔ̀: Ò tèe Weèdi-dà! Yè koò pú ti békú-ma pṵ́tápà! Nɛ yeèkaà-á-dà-ma k'ò tèù Weèdi. ⁶⁶ Nɛ maàhu m̀mɔ́ma-dà? Kà p'óò tɛ̰́ná è yɔ̀: Ò yònà é kpíí-ma.

⁶⁷ Kà pá cetá è tṵ́hú nuǹtɔ̰tí o yìhìka, òò podì nàwɛ̰ɛ̰̀ka, kà tɔɔ̀pa ò podì wencí ⁶⁸ è tonà: Fɔ̰́ń mɛ̀ǹǹ yòǹ-ko Kídísì, bantá mɛ̀ǹǹ à potà-ko.

Píyɛ́ɛ̀ nɔ̀hì è yɔ̀ ò pú yá̰á̰ Sèsíì

⁶⁹ Kà Píyɛ́ɛ̀ é cá̰ńtá è kàdi ye hɔ̰́ɔ̰̀ta mùǹku mɛhɛká. Kà núnpodeho òcɔ̰́ǹ óò hɛ́tá-ho é tɛ̀i óò caka è yɔ̀: Fɔ̰́ń mɛ̀ɛtékà, a de péé-nà-á-ma Sèsíì Kàdìdéè yɔtí kóoó. ⁷⁰ K'ó nɔ̀hì nìku wɛǹni yìhìka è yɔ̀: N pú yá̰á̰ a kpɛ̀i é n'yɔ̀pu. ⁷¹ Ye kú dàhàka, k'ó yídá é taá ye hɔ̰́ɔ̰̀ta mùǹku cɔ̀ùdi bɛ́ka. Kà núnpodeho tɔɔ̀ɔ óò dɛ́há é caka mɛ̀m̀pà de péé-pa ye pesá è yɔ̀: Dɔɔɔ̀ mɛ̀ǹǹ mɛ̀ɛ té de péé-nà-ní Sèsíì Nàsàdɛ́tì kóoó-dà. ⁷² Kà Píyɛ́ɛ̀ é tṵ́má nɔ̀hì é wɛ̰́ha è yɔ̀: N pú yá̰á̰ ye dɔɔɔ̀ mɛnǹ.

⁷³ K'yé tuɛ̀ha-ní, kà mɛ̀m̀pà de péé-pa ye pesá é hɛ́tá-ho Píyɛ́ɛ̀ óò caka è yɔ̀: Mɔ́masí-dà a yòǹ-ma pa kóoó. A wɛmá pesá-dà ti bantà-ma. ⁷⁴ Kà Píyɛ́ɛ̀ é wɛ̰́há è yɔ̀: Kà n báńtáà, kà Weèdi é yɔ̰́ń n todí. N pú yá̰á̰ ye dɔɔɔ̀ nɛ wɛì-kò kú wɛmà. Ye pesá n'ɛ̀ɛ pesá, kà kóotá é kɔń, ⁷⁵ k'ó deǹta-ní Sèsíì d'oò cakáà-ma è yɔ̀: Kà kóotá é nɛɛ́ é kɔń, a kó nɔ̀hì cɔ̀ku màta̰a̰-dà è yɔ̀ a pú n yá̰á̰. Mɛmá-dà, k'ó yɛ̀ɛ̀ tapaàdi é taá é hódí dɛ́dɛ́í.