Màtíyéè 28

Sèsíì yá̰ńtáma

¹ Sùwífùpa damuhipàdi ka̰hà-ma, yà̰di ká̰ńyɛ̰̀ǹfa pìdìpìdì, kà Màdí Màkìtàdáà yɔtí kóoó, nà Màdí tɔɔ̀o é taá ye híúdi dentápu. ² Ye wɔ̀ni n'ɛ̀ɛ wɔ̀ni, kà teǹka é sa̰mpà sàma, kà Weèdi tɔntɔndikó é cútá-ní nà hḭ́ǹka é tɛ̀ni bídí ye tá̰hàku bɛ́ɛ́kú, é kaàdi ku hḭ́ǹka. ³ Ò de yònà tayḭkàdakú-dà, k'òo báatí pɛ́ì è yònà pà̰ḿpa̰tá. ⁴ Kà wantafɔ̰̀di é cɛ̰ɛ̰́ ye híúdi ceípa háá kà pà cèùdi, é dɔdi è yònà pà kpíi-má. ⁵ Àmá, k'yèe Weèdi tɔntɔndikó é caka ye poòpa è yɔ̀: Nɛ́na, nɛ dá n'wani. N yá̰á̰ è yɔ̀ nɛ pɛnti Sèsíì-dà pà kpɛ̰́ḭ́-ko kpíidɔkú hḭ́ǹka. ⁶ Ò koò kɔ́ɔ́ miì, ò yá̰ńtà-á-ma é n'yònà ò de hḭ́mpú. Ya̰ní-nà-ní é dɛ́há bɛ̀m̀bɛ̀ni ò de dɔɔ́-di. ⁷ Taá é caka-nà feǹ-fem̀ma o dapàm̀ma è yɔ̀ ò yá̰ńtà kpíípa mɛhɛká. Ò nɛ nihí Kàdìdéè tempáàku mɛhɛká. Mií-dà nɛ kó taá ò dɛ́há-ma. Ǹtɛ n de káá-ma è kó mà nɛ caka.

⁸ Kà pá cemá nátá-nà ye híúdi feǹ-fem̀ma, kà wantafɔ̰̀di pà káá, há̰kà nà yaǹnaakú. Kà pá cocí è kó taá caka ye wɛmá o dapàm̀ma. ⁹ Ye pesá n'ɛ̀ɛ pesá, kà pá ceḿ é n'dìi Sèsíì k'ò pení pa peètanàpu, k'ó tɛ̀ni è yɔ̀: Ǹnaa-nà! Kà p'óò hɛ́tá-ho é hìu é cɛ̰ɛ̰́ o tàka, óò dùǹtà. ¹⁰ Kà Sèsíì é pà caka ye wɔ̀ni è yɔ̀: Nɛ dá n'wani. Taá é caka-nà n kúcàpa, è yɔ̀ pá taá Kàdìdéè. Ye pesá-dà pà kó tɛ̀i é n dɛ́há-ma.

Ye híúdi ceípa de cakáà-sa

¹¹ K'yèe poòpa é n'káà sá̰á̰ cɔ̀ku, k'yèe sósìpa mɛ̀m̀pà de ceí-pa ye híúdi, pa pàcɔ̰́ é tóní yɔtí mɛhɛká, é tɛ̀ni é caka dɔ̀hàka yam̀ma kpɛ̰́m̀ma mìì de pa̰à̰-sa wɛǹni. ¹² K'yèe dɔ̀hàka yam̀ma kpɛ̰́m̀ma nà yɔtí kpɛ̰́m̀ma é tíká, é pɛ́ɛ́ nùdi nìcɔ̰́, é kɔ̰́ɔ̰́ dící sàma mɔ́ma ye sósìpa, ¹³ ye wɔ̀ni é pà caka è yɔ̀: Nɛ́ n'cakú è yɔ̀ o dapàm̀ma-dà tɛ̀ni é yódá o wɔ̰̀ǹku yèǹka kà nɛ dɔɔ́. ¹⁴ Kà tempáàku yìkàǹyìdo mà yèkaà, tíńti-dà yá̰á̰ ti k'óò caka-sá k'ó teha, ò pú kó nɛ pa̰á̰ yècḭ́ḭ̀. ¹⁵ K'yèe sósìpa é ta̰ǹta ye dící, é pa̰ná pà de hḭ́n pá pa̰á̰-sa. Mɛmá-dà, k'yèe kú wɛnùdì é pidá Sùwífùpa cɔhɔ̀ka háá nà yenì.

Sèsíì fodà o tɔntɔndipá

¹⁶ K'yèe Sèsíì tɔntɔndipá píì-òcɔ̰́ é yíí taá Kàdìdéè tempáàku mɛhɛká, ta̰à̰di ò de pà benà-di hḭ́ǹka. ¹⁷ P'òò dɛ́hà tíń wɔ̀ni, é hìu pa dúùka teǹka óò dɔwa. Àmá, kà pa pàcɔ̰́ pú n'taà dandaní è yɔ̀ mɔnń-dà. ¹⁸ Kà Sèsíì é pà hɛ́tá-ho é pà caka è yɔ̀: Weèdi n kɔ̰́ɔ̰̀-ɔ̰́-ma nɔɔ̀ti wɛǹni hḭ́ǹka mɛhɛká, nà teǹka hḭ́ǹka. ¹⁹ Cèn-nà teǹka nà ka nùdi é kpáhìna nìpa n dapàm̀ma boocí wɛǹni mɛhɛká. Nɛ́ pà cóńtá nà Báàa yèdi, nà Bíitá kpɛ́ɛdí, nà Weèdi Sèdi kpɛ́ɛdí. ²⁰ Nɛ́ pà biɔhàna, kà pá n'tṵ̀n n nɛ cakáà-sa wɛǹni. Ǹtɛ, n kó nɛ m'péé-nà-á-ma daàka wɛǹni, háá nà fòùku yɔ̀ɔmá.