24
Sèdìsàdɛ́m̀ pɔ́dáma wɛmá
1 Kà Sèsíì é yɛ̀dì Weèdi hɔ̰́ɔ̰̀ta mɛhɛká è kɛ̰hɛdi, k'òo dapàm̀ma óò hɛ́tá-ho è k'óò bɛka pà makáàma kú bookú Weèdi hɔ̰́ɔ̰̀ta k'yè sudi. 2 K'ó tódá wɛmá é pà caka è yɔ̀: N'ɛɛ̀ dìi ye wɛnnì? Mɔ́masí-dà n nɛ cakú-ma, tá̰à̰di nìcɔ̰́nì pú kó sɔ̰́ńtá é n'cɔ̰mú ni tɔɔ̀di hḭ́ǹka. Ye wɛnnì kó wáńtá é wuùdi-í-ma-ní teǹka.
3 K'ó taá é n'kaàdi òddífùna ta̰à̰di hḭ́ǹka, k'òo dapàm̀ma óò hɛ́tá-ho óò béka pa cɔ̰́ɔ̰̀di pesá è yɔ̀: Ti caka ye kú niì kó pa̰á̰ tḭ́ń daadí, nà yḭdó mɛ̀ǹǹ kó bɛka-kó a tóḿma-ní nà fòùku yɔ̀ɔmá.
4 K'ó pà tɛ̰́ná è yɔ̀: Pa̰á̰-nà yɔkàma, k'òòcɔ̰́ǹ dá nɛ yehèna. 5 Nìpa dɔ́ɔ́di pení-ma-ní nà n yèdi, è kó tɛ̀ni é m'báńtí è tonà: Mɛmpá-dà héé Weèdi ta̰kadáko, pà mɛ̀ɛ kó yehèna-á-ma nìpa sàma. 6 Nɛ kó n'yoú-ma kà pà wɛì ta̰à̰na wɛmá, kà nìpa tɔ̰ṵ-nà pa tɔɔ̀pa, nɛ dá héé kà wantafɔ̰̀di nɛ cɛ̰ɛ̰́, mìì tee-sá yè békú ye kú niì é tɛ̀ni-í-ma-ní. Há̰kà, yè mum pú kó n'yòǹ fòùku yɔ̀ɔmá. 7 Bookú kó dɔɔ-ɔ́-ma ku tɔkú ta̰à̰pu, kà wóoteǹka é dɔɔ ka tɔɔ̀ka ta̰à̰pu. Kòka nà teǹka sa̰mpàma, dà kó pa̰á̰ dɛ́dɛ́í páàti tìcɔ̰́ kú mɛhɛká. 8 Ye kú pa̰á̰mà wɛnnì kó n'yònà poòo hɔ̰́ n'kó pɛdá kà dɔnkú mɛ̀ǹkù óò cetá-ku-dà.
9 Ye wɔ̀ni, pà kó nɛ taàa-á-ma nìpa nɔ̀hi mɛhɛká, kà pá nɛ fá̰kapa, é nɛ kɔ̀ù. Boocí wɛǹni kó nɛ sɛ̰dá-ma nà n kpɛ́mú. 10 Ye kú daàka, nìpa dɔ́ɔ́di kó wɛ́í-ma pa dandaní, é n'sɛ̰ɛ̰́ pa tɔɔ̀pa è tṵ́mà pà yɛdí. 11 Weèdi wɛtɛ̰́nákpákpààpa dɔ́ɔ́di kó tɛ̀ni-í-ma-ní é yehèna nìpa dɔ́ɔ́di. 12 Kpákpààma pa̰á̰ma kó dɔ̀hà é wɛhika-á-ma, kà dɔ́kàma nìpa dɔ́ɔ́di káá-ma Weèdi hḭ́ǹka é bóka. 13 Mɛ̀ǹǹ há̰ kó pa̰á̰-ko wɛ̰́ɛ̰́ma háá é deèta, mɛnń-dà kó fḭ́tá. 14 Pà kó caka-á-ma Weèdi wóòti wɛnaamá teǹka nà ka nùdi k'yé teha kà boocí wɛǹni é mà yèkà, ye wɔ̀ni, kà fòùku é nɛɛ́ yɔ̀ɔ.
15 Nɛ kó dɛ́há tḭ́ń daadí sɔ̀kací mɛ̀ǹcì kó tɛɛ̀-ci-ní fɛ̰́ṵ́dáma, Weèdi wɛtɛ̰́náko Dànìyɛ́dì de wɛɛ̀-ci kú wɛmá, kà cì péé Weèdi nàmɔ̀ǹwentí mɛhɛká, (mɛ̀ǹǹ kàǹ-ko ye kú niyà̰ yònà é yekà-á-ma sukú y'òò cakú-sa). 16 Ye wɔ̀ni, mɛ̀m̀pà kó m'péé-pa Sùdéè tempáàku mɛhɛká yònà é cocí-ma é dìsi ta̰à̰ka hḭ́ǹka. 17 K'yè hɔ̰́tà mɛ̀ǹǹ péé-ko o nàmɔ̀ni mùmùǹti hḭ́ǹka, ò koò dá cútá-ní ni mɛhɛká è kpɛ̀i é tódá yècḭ́ḭ̀. 18 K'yè mɛ̀ɛ hɔ̰́tà mɛ̀ǹǹ péé-ko yɛ̀di mɛhɛká, ò koò dá kòǹ hɔ̰́ɔ̰̀ta é tódá o tókesàdi. 19 Yè kó n'yòǹ náńkú sàku-dà poòpa mɛ̀m̀pà kó m'póń-pa ye kú daàka mɛhɛká, nà mɛ̀m̀pà kó n'yɔ̰ɔ̰̀di-pá. 20 Nɛ́ cɔhà Weèdi kà nɛ cokomú wɔ̀ni dá peèta-nà yɔ̰ɔ̰di yoo damuhipàdi daadí, 21 mìì tee-sá, wèéwèdo sào-dà kó m'péé. Ye kú wèéwèdo pú kó n'sá̰à̰-nà tɔɔ̀ɔ òcɔ̰́ǹ, é tóó nà fòùku cetáma háá é yɔ̀ɔ cɛ̰ɛ̰́ nà wɔ̀nì mɛnì, o tɔɔ̀ɔ mɛ̀ɛ pú kaá è pení. 22 Kà Weèdi múńtà de pú yakàdà ye daàkà, òcɔ̰́ǹ de pú kó fḭ́tá. Àmá, nì kà yàkàdà nìpa nì ta̰kadà-pa kpɛ́mú-dà.
23 Kà nìi nɛ cakáà ye wɔ̀ni è hḭ́n: Kídísì péé miì yoo ò péé mɛnkà, nɛ dá taàa dandaní o hḭ́mpú, 24 mìì tee-sá, niìkpákpààpa kó wáńtá é tɛ̀ni-í-ma-ní é báńta nìpa è yɔ̀ pà yòǹ Weèdi ta̰kadápa, kà tɔɔ̀pa yɔ̀ pà yòǹ Weèdi wɛtɛ̰́nápa-dà. Pà kó pa̰á̰-ma pɔ́ńtáyḭḭ́pa, nà pɔ́ńtápa̰á̰ma è kpɛ̀i k'yè kó teha, kà pá yehèna bá Weèdi ta̰kadà-pa. 25 Ǹtɛ, n nɛ cakáà-á-dà ye wɛǹni k'yè mum pú tɛ̀ni.
26 Kà pà nɛ cakáà è hḭ́n: Ò péé càwenkú mɛhɛká, nɛ dá tadí. Yoo kà pà hḭ́n: Ò péé nàmɔ̀ni mɛhɛká, nɛ dá taàa ye yam̀ma dandaní. 27 É n'yònà tafá hɔ̰́ yḭkàda-má hḭ́ǹka weèdi yɛɛ̀kumá háá nà nì dɔkúma, ma kú bookú-dà Niìfòùo bíitá kó tóní-ma-ní. 28 Nɔkpíìta dɔɔ́-sa, yòti peèku-sá-dà.
Niìfòùo bíitá tɛ̀mmá-ní
29 Kà Sèsíì é tɔhìna è yɔ̀: Ye wèéwèdo daàka kó n'yɔɔ̀ta-má, wèǹku kó biìkà-á-ma, cḭ̀ma mɛ̀ɛ koò pú kó kɔ̰́ɔ̰́ ma wenkú, hà̰hi kó dɔɔ-ɔ́-ma-ní nà hḭ́ǹka, kà nɔɔ̀ti mɛ̀ǹtì púsí-ti mìì péé-sa wɛǹni hḭ́ǹka é sa̰mpà. 30 Ye wɔ̀ni, Niìfòùo bíitá yḭdó kó foó-ma-ní hḭ́ǹka. Fòùku boocí wɛǹni kó hódí-ma dɛ́dɛ́í. Cì kó dɛ́há-ma Niìfòùo bíitá kà tà cúti-ní wɔ́ɔ̀ka mɛhɛká nà ta nɔɔ̀ti sàti, é yíí nà ta wɛhimú sàmu. 31 Kà tṵ́ńtṵ́sàdi é kɔń, kà tá tɔn ta tɔntɔndipá teǹka nà ka nùdi, kà pá tíkáná Weèdi ta̰kadà-pa bá kà pà péé-sa.
Biɔhànamá ka̰nka̰mú ti kɔ̰́nì-ma
32 Nɛ́ cɔ́dí é yekà sukú biɔhànamá ka̰nka̰mú kɔ̰́nì-ma. Kà mu dɛ̀ɛcí yɔ̀ɔ pḭǹtapú, kà fa̰à̰ti pɔ̰ntà, nɛ yá̰á̰-ma ye wɔ̀ni è yɔ̀ bíhidí-dà tɔ́sí. 33 Ma cɔ̰́ɔ̰̀di-dà mɛ̀ɛtékà, kà nɛ dɛ́hà tḭ́ń wɔ̀ni mii kú wɛnnì, kà nɛ́ n'yá̰á̰ è yɔ̀ Niìfòùo bíitá tɛ̀mmá-ní tɔ́sí-ma kà tà dòsi há̰ńnùdi. 34 N nɛ cakú bemú-dà, wɔ̀ǹkù mɛnkù kú nìpa pú kó kpíí pa wɛǹni, k'yèe kú niì wɛnnì mum pú tɛ̀ni. 35 Hḭ́ǹka nà teǹka kó yɔ̀ɔ-ɔ́-ma, àmá n wɛmá pú kó yɔ̀ɔ daadí yènì.
Weèdi cɔ̰́ɔ̰̀di-dà yá̰á̰ Teó kó tóní tḭ́ń daadí
36 Mɛ̀ɛkà, mìì héé-sa daadí nà wɔ̀ni tà kó tɛ̀ni-dí-ní, òcɔ̰́ǹ p'éè yá̰á̰. Bá Weèdi tɔntɔdipá mɛ̀m̀pà péé-pa hḭ́ǹka, nà ni bíitá mɔ́ntá p'éè yá̰á̰, Báàa cɔ̰́ɔ̰̀di bààsí. 37 Mìì de pa̰à̰-sa Nɔ̀wéè wɔ̀ni, mií-dà kó tṵ́má pa̰á̰ Niìfòùo bíitá kó tóní tḭ́ń daadí. 38 Kà nɛ́ɛsṵ́násàku é de nɛɛ́ é tɛ̀ni, Nɔ̀wéè wɔ̀ǹku kpɛ́ɛpá de yon-ń-ma, è púsí naàyà̰pu, kà daapá tóńkú poòpa, kà nìpa pɔ̰n pa bíipohí daapá, háá daadí Nɔ̀wéè dúú-di nɛ́ɛmá dawɛ́ɛ̀ku mɛhɛká. 39 Yè de pú pà yòǹ màcɔ̰́mà, háá kà nɛ́ɛsṵ́násàku é yɔ̀ɔ tɛ̀ni é pà dii pa wɛǹni. Yè kó n'yòǹ mɛmá-dà Niìfòùo bíitá kó tóní tḭ́ń daadí. 40 Nìpa pàdɛ́ɛ́ kó m'péé-ma yɛ̀di, kà pá tódá òcɔ̰́ é héé tɔɔ̀ɔ. 41 Kà poòpa pàdɛ́ɛ́ é pɛ́ɛ́ n'naǹ, kà pá tódá òcɔ̰́ é héé tɔɔ̀ɔ. 42 Nɛ́ n'you nɛ dá n'dɔɔ́, mìì tee-sá nɛ pú yá̰á̰ daadí nɛ Teó pení-di-ní. 43 Nɛ́ yekà miì sukú: Kà hɔ̰́ɔ̰̀ta yaǹn yá̰á̰ wɔ̀ni túùdo kó tɛ̀ni-dí-ní yèǹka, ò kó n'you-ú-ma ò pú cédí k'ó dúú o hɔ̰́ɔ̰̀ta mɛhɛká. 44 Ye kú kpɛ́mú, nɛ́na mɛ̀ɛtékà, nɛ́ n'sàà è yá̰á̰ Niìfòùo bíitá kó tɛ̀ni wɔ̀ni nɛ pú tà ceí-di-dà.
Deho mɛ̀ǹǹ coó-ko nà mɛ̀ǹǹ pú coó-ko
45 Kà Sèsíì yɔ̀: Pà hɔ̰́ n'toò deho wodà coó è káá yàma? Mɛ̀ǹǹ kú dakpɛ̰́ǹn ò kɔ̰́ɔ̰̀-ko-dà tɔmú è yɔ̀ ó n'cɔ́ti o dehàtɔ̀pa é pà n'kɔ̰́nì dipú yè békú tḭ́ń wɔ̀ni. 46 Wɛ̀ɛ̀di é m'péé-nà ye kú deho, k'òo dakpɛ̰́ǹn koní è tɛ̀ni è hɔ̰́tà ò púsí ye kú tɔmù kú bookù-ní hɔ̰́ɔ̰̀ta mɛhɛká. 47 N nɛ cakú bemú-dà, o dakpɛ̰́ǹn k'óò kɔ̰́ɔ̰́-ma kpɛ̰́ǹti o káma wɛǹni hḭ́ǹka. 48 Àma, k'yèe deho yòǹ dehàkpákpààdo, ò kó caka-á-ma o cɔ̰́ɔ̰̀di è yɔ̀: N dakpɛ̰́ǹn pú kṵnti-ní fem̀ma, 49 é yídá o dehàtɔ̀pa pootí, è té dii, é yà̰à̰ naàma nà naàyà̰pa. 50 Ye wɔ̀ni, o dakpɛ̰́ǹn kó koní daadí ò p'óò ceí-di-dà, wɔ̀ni ò p'óò màhu-nà-di. 51 Ò k'óò bɔ̀hà-á-ma, é yɔ̰́ń o toudí dɛ́dɛ́í é n'yònà pà hɔ̰́ yɔ̰́ńkamá yam̀pèǹtací kpɛ́ɛká, k'ó hódí sàma é cécí o há̰ḿbíifá.