Màtíyéè 23

Nɛ́ pa̰á̰ yɔkàma nà Weèdi kpɛ̰́ńtìnùka biɔhànapá nà Fàdísìpa

¹ Ye wɔ̀ni, kà Sèsíì é caka nìku n'ɔ̀ɔ dapàm̀ma è yɔ̀: ² Weèdi kpɛ̰́ńtìnùka biɔhànapá nà Fàdísìpa-dà yònà é biɔhàna Mɔ̀yísì kpɛ̰́ńtìnùka. ³ Nɛ yònà é pà besí-ma é m'pa̰kú pà nɛ cakú-sa wɛǹni. Àmá nɛ dá tempa pa pa̰á̰ma, mìì tee-sá pà pú tṵ̀n pà biɔhanì-sa. ⁴ Pà hɔ̰́ bowá totoyṵhùka-dà é kà bukaná nìpa, è há̰ té yeda pà kó pà dɔ́dá-ma bá nà pa há̰ḿbíifá fàcɔ̰́ kà pá kà toó. ⁵ Pa pa̰á̰ma wɛǹni pà hɔ̰́ m'bɔhɔ̀ta nìpa-dà é pà dɛ́há. Ma kú bookú-dà pà dɛukànì-ma pa tókedɛutí yàǹyàǹti, è wɛkànì Weèdi *wɛpɔ̰pɔ̰hí pà hɔ̰́ yídí-hi pa tḭ́ḭ̀ka yoo é hì fḭ́ḭ́ pa bakaná. ⁶ Pà naa-nà kaàceceká-dà Weèdi wɛmá biɔhànàmɔ̀ka mɛhɛká nà dikàdikú pesá. ⁷ Pà naa-nà pá pà n'cùnì-í-ma è pà dɔnti tíkábɛ̀m̀bɛ̀ka mɛhɛká, é pà n'yún dakpɛ̰́m̀ma. ⁸ Nɛ́na mɛ̀ɛkà, nɛ dá teha k'òòcɔ̰́ǹ é nɛ yíí dakpɛ̰́ǹn, mìì tee-sá nɛ yòǹ kúcàpa-dà nɛ wɛnnì, è káá dakpɛ̰́ǹn òcɔ̰́. ⁹ Nɛ dá yíí òcɔ̰́ǹ nɛ báàa fòùkù mɛhɛkà, mìì tee-sá nɛ káá Báàa òcɔ̰́-dà, mɛ̀ǹǹ péé-ko hḭ́ǹka. ¹⁰ Nɛ mɛ̀ɛ dá héé k'òòcɔ̰́ǹ é nɛ yíí yìkàǹyìko, mìì tee-sá nɛ káá yìkàǹyìko òcɔ̰́-dà, Kídísì. ¹¹ Mɛ̀ǹǹ yòǹ-ko kpɛ̰́ǹn nɛ cɔhɔ̀kà, mɛnń-dà yònà é n'yòǹ nɛ deho. ¹² Mɛ̀ǹǹ kó wɛkàna-kó o cɔ̰́ɔ̰̀di, pà k'óò yàkàda-á-ma, kà mɛ̀ǹǹ yàkàdà-ko o cɔ̰́ɔ̰̀di, pà k'óò wɛkàna-á-ma.

Sèsíì dátà kpɛ̰́ńtìnùka biɔhànapá nà Fàdísìpa yam̀pèǹtamá

¹³ Kà Sèsíì é tɔhìna è yɔ̀: Náńkú nɛ m'péé-nà yam̀pèǹtacì nɛ́na, Weèdi kpɛ̰́ńtìnùka biɔhànapá nà Fàdísàpa! Nɛ kpanì nìpa-dà pà kó dúú-ma hḭ́ǹka wóòti mɛhɛká. Nɛ mɔ́mpá pú dúù ti mɛhɛká, è há̰ tṵ́mà kpanì mɛ̀m̀pà kpɛ̀i dúú-pa è yɔ̀ pà dá dúú. [\v 14 Náńkú nɛ m'péé-nà yam̀pèǹtacì nɛ́na, Weèdi kpɛ̰́ńtìnùka biɔhànapá nà Fàdísàpa! Nɛ́na-dà fèùdì kpíipoòti káá-sa wɛǹni, àá té tódá wɔ̀ni sàdi é n'dɔń Weèdi è kpɛ̀i pá nɛ yíí niìcoópa. Ye kpɛ́mú, nɛ kú toyɔ̰́ḿma kó wáńtá ha̰tá-ma tɔɔ̀pa kpɛ́ɛmá.]

¹⁵ Náńkú nɛ m'péé-nà yam̀pèǹtacì nɛ́na, Weèdi kpɛ̰́ńtìnùka biɔhànapá nà Fàdísàpa! Nɛ hɔ̰́ cèn-ń-ma páàti wɛǹni, teǹka nà dàmɛ́dì hḭ́ǹka è pɛnti bá nìdo òcɔ̰́ hḭn Weèdi kóoó. Kà n'aá ò yɔ̀ɔ dɛ́tàpu, kà nɛ t'óò kpáhìna niìsḭ̀ǹn kó nɛ n'ha̰tà cɔ̀ku màdɛ́ɛ́ è sànà p'óò ká̰ńtá ha̰bíiní.

¹⁶ Náńkú nɛ m'péé-nà nɛ́na mɛ̀m̀pà yòǹ-pa yɔ̀ma è há̰ dɛɛ̀di tɔɔ̀pa! Nɛ hɔ̰́ n'yɔ̀: K'òòcɔ̰́ǹ wɛ̰́háà nà Weèdi hɔ̰́ɔ̰̀ta yè kɔ́ɔ́ màcɔ̰́mà, k'òá wɛ̰́háà nà ta wúdó, ò yònà é pa̰á̰-ma ò wɛɛ̀-sa. ¹⁷ Yíńtáyɔ̀ncì nɛ́na! M̀mɔ́ya̰-dà ha̰tà-nà ye tɔɔ̀sa: Wúdó nkɛ́ɛ̀ Weèdi hɔ̰́ɔ̰̀ta mɛ̀ǹt'òò wekanì-ta? ¹⁸ Nɛ hɔ̰́ tṵ́má é n'yɔ̀: K'òòcɔ̰́ǹ wɛ̰́háà nà dɔ̀hàdi cɔ̰̀ǹcɔ̰̀ni, yè kɔ́ɔ́ màcɔ̰́mà, k'òá wɛ̰́háà nà pa̰dí mɛ̀nì péé-di ni hḭ́ǹka, ò yònà é pa̰á̰-ma ò wɛɛ̀-sa. ¹⁹ Yɔ̀mà nɛ́na! M̀mɔ́ya̰ ha̰tà-nà ye tɔɔ̀sa: Pa̰dí nkɛ́ɛ̀ dɔ̀hàdi cɔ̰̀ǹcɔ̰̀ni mɛ̀nì nì wekanì-di? ²⁰ Mɛ̀ǹǹ wɛ̰́háà-ko nà dɔ̀hàdi cɔ̰̀ǹcɔ̰̀ni, ò wɛ̰́háà nà dɔ̀hàdi cɔ̰̀ǹcɔ̰̀ni-dà, nà mìì péé-sa wɛǹni ni hḭ́ǹka. ²¹ Mɛ̀ǹǹ mɛ̀ɛ wɛ̰́háà-ko nà Weèdi hɔ̰́ɔ̰̀ta, ò wɛ̰́háà nà Weèdi hɔ̰́ɔ̰̀ta-dà nà Weèdi mɛ̀nì péé-di ta mɛhɛká. ²² Mɛ̀ǹǹ wɛ̰́háà-ko nà hḭ́ǹka, ò wɛ̰́háà nà Weèdi wóokààta-dà, nà Weèdi mɛ̀nì kàdi-dí ta hḭ́ǹka.

²³ Náńkú nɛ m'péé-nà yam̀pèǹtacì nɛ́na, Weèdi kpɛ̰́ńtìnùka biɔhànapá nà Fàdísàpa! Nɛ kɔ̰́nì-í-ma Weèdi, niìya̰ píta mɛhɛká yècɔ̰́, háá nà nɛ yɛ̀ka kṵ́ńfa̰à̰ti, è há̰ wɛ́í mìì yòǹ-sa yudí kpɛ̰́ńtìnùka mɛhɛká, k'yé n'yònà coóma, nà nììma, nà cɔ́cɔ́ma. Mií-dà nɛ de yònà é m'pa̰kú-ma, è há̰ pú n'dúi ye tɔɔsà. ²⁴ Nɛ́na mɛ̀m̀pà yòǹ-pa yɔ̀ma è há̰ dɛɛ̀di tɔɔ̀pa! Nɛ hɔ̰́ nɔ́dá-ma nɛ nɛ́ɛmá é deèda sɔ̰hí, è há̰ té yà̰à̰-nà bɔnamáku.

²⁵ Náńkú nɛ m'péé-nà yam̀pèǹtacì nɛ́na, Weèdi kpɛ̰́ńtìnùka biɔhànapá nà Fàdísàpa! Nɛ hɔ̰́ nɛɛ̀ta bondidí nà caadí ye dàhàka-dà, àmá ye mɛhɛká kà nɛ yóu-sá-ní nà nɛ yam̀màhàkpákpààka sṵ́nà. ²⁶ Fàdísì yɔ̀ǹǹ fɔ̰́ń! Cedí nɛɛ̀ta bondidí nà caadí mɛhɛká, ye wɔ̀ni ye dàhàka mɛ̀ɛ té kó weka-á-ma.

²⁷ Náńkú nɛ m'péé-nà yam̀pèǹtacì nɛ́na, Weèdi kpɛ̰́ńtìnùka biɔhànapá nà Fàdísàpa! Nɛ yònà híùka-dà pà mɔ̀ǹtaà-ka pɛ́ímá. Ka hḭ́ǹka hɔ̰́ n'yònà kà suu-má-dà, àmá kà ka mɛhɛká sṵ́nà kɔ̰́ɔ̰̀ka nà pɛ̰̀ḭsá wɛǹni. ²⁸ Nɛ mɛ̀ɛ té yòm̀pu-dà. Nɛ hɔ̰́ m'pa̰kú nìpa yìhìka, è yònà nɛ yòǹ-ma-dà niìcoópa, kà nɛ mɛhɛká há̰ sṵ́nà yam̀pèǹtamá nà sḭ̀ḭ̀ma.

²⁹ Náńkú nɛ m'péé-nà yam̀pèǹtacì nɛ́na, Weèdi kpɛ̰́ńtìnùka biɔhànapá nà Fàdísàpa! Nɛ madì Weèdi wɛtɛ̰́nápa híùka-dà, è sà̰nì niìcoópa kpɛ́ɛká. ³⁰ Nɛ wɛì è toò: Kà ti de péé ti yààpa wɔ̀ni, ti de pú kó pà pɛ́ɛ́-nà nùdi é kɔ̀ù Weèdi wɛtɛ̰́nápa. ³¹ Nɛ Wɛì mɛmá-dà, è bɛkú nà nɛ mɔ́mpá è yɔ̀ nɛ yòǹ mɛ̀m̀pà kɔ̀ù-pa Weèdi wɛtɛ̰́nápa yaàbíiká-dà. ³² Yè yòǹ-mà mɛma, nɛ dá teha! Dɔ̀hà é wɛ̰́ɛ̰́-nà é dehà nɛ yààpa cetà-sa. ³³ Waàbíidɔùkà nɛ́na! Ntɛ́ nɛ kó hḭmà é yentá ha̰bíiní mɛhɛká dúúpu? ³⁴ Ye kú kpɛ́mú-dà tee, n kó nɛ tɔn-má-ní Weèdi wɛtɛ̰́nápa, nà yaǹfòùma yam̀ma, nà pɔkàyá̰à̰pa, kà nɛ́ kɔ̀ù pàcɔ̰́, é kpɛ̰́ḭ́ tɔɔ̀pa kpíidɛ́cí hḭ́ǹka, é podí tɔɔ̀pa dáùka Weèdi wɛmá biɔhà-nàmɔ̀ka mɛhɛká, é pà tṵ̀na yɔtí nà ti tɔtí é pà fá̰kapa. ³⁵ Weèdi kó wáńtá kɔ̰́ɔ̰́-ti toyɔ̰́ńti mɛ̀m̀pà kɔ̀ù-pa niìcoópa kó dɔdi nɛ hḭ́ǹka-dà, é tódá Àbɛ́dì kṵ́mú háá é deǹta-nà Sàkàdíì kpɛ́mú, Bàdàsíì bíitá, nɛ kɔù-ko dɔ̀hàdi cɔ̰̀ǹcɔ̰̀ni nà Weèdi nàmɔ̀ni ye cɔhɔ̀ka. ³⁶ N nɛ cakú bemú-dà, Weèdi kó wáńtá yɔ̰́ń-ma wɔ̀ǹkù mɛnkù kú nìpa toòka n'ɛ̀ɛ kú niìkɔ̀ùpù wɛnnì kpɛ́mú.

Sèdìsàdɛ́m̀ yam̀ma pú bekù Weèdi pà tɔǹ-pa-ní

³⁷ K'ò yɔ̀: Sèdìsàdɛ́m̀ kpɛ́ɛpá-nà, Sèdìsàdɛ́m̀ kpɛ́ɛpá-nà! Nɛ́na mɛ̀m̀pà kɔ̀dì-pa Weèdi wɛtɛ̰́nápa, kà nì tɔn-pá-ní kà nɛ té pà kɔ̀ù nà tá̰à̰ka! Cɛ̰má màdɛɛ-dà n de kpɛ̀i-má é nɛ tíká k'yé n'yònà kóonitá hɔ̰́ tíká-ma ta bíící ta fɛ̀ɛ̀ti mɛhɛká nɛ pú teháà? ³⁸ Ye kú kpɛ́mú, Weèdi nɛ héè-é-ma nɛ yɔtí nì koò pú kó tì n'cɛ̰̀ɛ̰. ³⁹ N nɛ cakú-ma: É tóó-nà wɔ̀nì mɛnì, nɛ koò pú kó n dɛ́há háá é n'sànà daadí nɛ kó n'yɔ̀-di: Weèdi é kóná mɛ̀ǹǹ pení-ko-ní nà Bateó yèdi.