22
Wɛbemú yohènamá potóóma dikàdikú hḭ́ǹka
1 Kà Sèsíì é tṵ́má wɛɛ́ nà wɛbemú yohènamá é pà caka è yɔ̀: 2 Ǹtɛ hḭ́ǹka wóòti yònà-sa: Wódo òcɔ̰́ǹ-dà de pa̰à̰ dikàdikú o bíitá potóóma. 3 K'ó tɔn o dapàm̀ma è yɔ̀ pá taá caka ò yíí-pa ye dikàdikú è yɔ̀ pá ya̰ní. Àma, kà pá yee tɛ̀mpú-ní. 4 K'ó tṵ́má tɔn o dapàm̀ma tɔɔ̀pa é pà caka è yɔ̀: Tɔɔ̀ta-nà é taá caka n yíí-pa dikàdikú è yɔ̀ n dimá bii-í-ma sá̰mà. N kɔù-ú-ma n naàdaàka nà nɔtí mɛ̀ǹtì káá-ti kɔ̀ma. Sɔ̀do yɔ̀ɔ-ɔ́-ma pápáí, ya̰ní-nà-ní kà tí dii potóóma dipú. 5 Ò yíí-pa ye dikàdikú, p'oòcɔ̰́ǹ p'óò besí, é yíí taá cɔ̀ci pà de káá-ci. Òcɔ̰́ o yɛ̀di, tɔɔ̀ɔ o taakú. 6 Kà tɔɔ̀pa mɛmpa é cɛ̰ha ye dapàm̀ma é pà diá náńkú, é pà kɔ̀ù. 7 Kà fɔ̰́di é cɛ̰ɛ̰́ ye wódo, k'ó tɔn o sósìpa è yɔ̀ pá taá kɔ̀ù ye niìkɔ̀ùpà, é tɔɔ̀n pa yɔtí ha̰mú. 8 Ye kú dàhàka, k'ó caka o dapàm̀ma è yɔ̀: Potóóma dipú bii-í-ma, àmá n de yíí-pa pú sànà é mù dii. 9 Tɔɔ̀ta-nà cɔ̀ci peètadí, é yíí-ní nɛ kó dɛ́há-pa wɛǹni dikàdikú. 10 K'yèe dapàm̀ma é ka̰há cɔ̀ci hḭ́ǹka é tɛ̀i tíká pà dɛ́hà-pa wɛǹni, niìsuupá nà kpákpààpa kà kúúdi nàmɔ̀ni é sṵ́ná nìku.
11 K'yèe wódo é dúú è kó dɛ́há o cà̰m̀ma, é dɛ́há dɔɔ̀o òcɔ̰́ǹ k'ò pú bádí potóóma báatí. 12 K'óò béka è yɔ̀: N dóopó, ntɛ́ a hḭmà é dúú-ní miì è pú bádí potóóma báatí? Àmá, ye dɔɔ̀o pú tɛ̰́nà màcɔ̰́mà. 13 Ye wɔ̀ni, kà wódo é caka o dapàm̀ma è yɔ̀: Bowá-nà o nɔ̀hi n'ɔ̀ɔ tàka, óò ká̰ńtá tapaàdi bìḿbìni mɛhɛká, ye pesá-dà ò kó kɔń-ma é cécí o há̰ḿbíifá. 14 Kà Sèsíì é tɔhìna è yɔ̀: Weèdi yíí nìpa dɔ́ɔ́di-dà, àmá nì ta̰kadà-pa pú wɛhi.
Dàm̀póò bodáma Hɔ̀dɔ́m̀ wóosào
15 Ye wɔ̀ni, kà Fàdísìpa é taá é tíká è kó dɛ́há pà kó hḭmpú é díhìna Sèsíì wɛmá, k'ó yetá. 16 Kà pá tɔn pa dapàm̀ma pàcɔ̰́, nà Hèdótì kpɛ́ɛpá pàcɔ̰́, kà pá tɛ̀ni óò caka è yɔ̀: Dakpɛ̰́ǹn, ti yá̰á̰-ma è yɔ̀ a cakú mɔ́ma-dà. A hɔ̰́ m'biɔhanì nìdo yònà é n'fòùkaàma-dà Weèdi cɔ̀ku mɛhɛká. A mɛ̀ɛ pú wani òcɔ̰́ǹ bá k'ò dɔ́sí k'ó n'yòm̀pu. 17 Ntɛ́ a maàkumá dàm̀póò hḭ́ǹka? Ti kpɛ̰́ńtìnùka ti pɛ̰ḭ-ḭ́-dà nùdi nkɛ́ɛ̀ kà pú ti pɛ̰ḭ è yɔ̀ tí m'bopù dàm̀póò Hɔ̀dɔ́m̀ wóosào?
18 Sèsíì há̰ de yá̰á̰-ma pa yam̀màhàkpákpààka tá, k'ó pà tɛ̰́ná è yɔ̀: Yam̀pèǹtacì nɛ́na, baà tee kà nɛ n bɛǹ? 19 N bɛka-nà-ní dící nɛ bopù-nà-ci dàm̀póò. Kà p'óò bɛka díimáàdi nìcɔ̰́. 20 K'ó pà béka è yɔ̀: Woò tee dìkù mɛ̀ǹkù dàdi-kù, nà yèdì mɛ̀nì péé-dì ni hḭ́ńkà?
21 Kà p'óò tɛ̰́ná è yɔ̀: Hɔ̀dɔ́m̀ wóosào.
Ye wɔ̀ni, k'ó pà caka è yɔ̀: Kɔ̰́ɔ̰́-nà Hɔ̀dɔ́m̀ wóosào mìì yòǹ-sa o kpɛ́ɛsá, é kɔ̰́ɔ̰́ Weèdi mìì mɛ̀ɛ té yòǹ-sa ni kpɛ́ɛsá.
22 Pà yèkaà-ma mɛma, k'yé pà dii, kà pá yíd'óò hédá é ka̰há.
Békàma kpíípa yá̰ńtáma hḭ́ǹka
23 Ye daadí ni cɔ̰́ɔ̰̀di, kà Sàdúkìpa, nìpa mɛ̀m̀pà pú dań-pa è yɔ̀ kpíípa kó wáńtá yá̰ńtá, kà pa pàcɔ̰́ é tɛ̀ni Sèsíì pesá óò béka è yɔ̀: 24 Dakpɛ̰́ǹn, ǹtɛ Mɔ̀yísì hḭ́mpú: Kà nìi káá poòo è kpíi è p'óò pɛɛ̀-nà bída, o ya̰ǹn yònà ó hɔɔ̀ta-á-ma ye pooò óò pɛɛ́-nà bííhí k'yé teha k'òo fùdi dá fédí. 25 Ǹtɛ há̰ka kà nìi pàyehì de péé ti cɔhàkà, è yòǹ kúcàpa cɔ̰́ɔ̰̀di. Kà pɔ̀ɔ é kádá poòo é kpíí ò pú pɛdà bída, kà Sàbi óò hɔ̀ta. 26 K'yèe sàbi mɛ̀ɛ té kpíí, ò p'óò pɛɛ̀-nà bída, Bíɔ́ mɛma cɔ̰́ɔ̰̀di. Pa yehìka, kà pá hɔɔ̀ta ye poòo é kpíí, p'oòcɔ̰́ǹ p'óò pɛɛ̀-nà bída. 27 Pà kpíi-má pa wɛǹni mɛma, k'yèe poòo mɛ̀ɛ té tṵṵ̀na é kpíí. 28 Kpíípa kó yá̰ńtá tḭ́ń daadí, pa yehìkà mɛhɛkà, ò kó n'yòǹ pa woò kú pooò-dà, è yá̰á̰ pa wɛǹni d'oò kádà-á-dà-ma?
29 K'ó pà tɛ̰́ná è yɔ̀: Nɛ yehìnì nɛ cɔ̰́ɔ̰̀di-dà, mìì tee-sá nɛ pú yá̰á̰ Weèdi wɛmá, nɛ mɛ̀ɛ pú tṵ́mà yá̰á̰ Weèdi kpeèti sá̰pu. 30 Kpíípa kó yá̰ńtá tḭ́ń daadí, daapá koò pú kó kádá poòpa, poòpa mɛ̀ɛ koò pú kó yan daapá, àmá pà kó n'yònà Weèdi tɔntɔndipá yòm̀pu-dà hḭ́ǹka mɛhɛká. 31 Mìì héé-sa kpíípa yá̰ńtáma wɛmá, nɛ pú kan-kaàn daadí yènì Weèdi nɛ cakáà-sa? Nì de yɔ̀: 32 N yòǹ Àbààhám̀, nà Ìsáákì, nà Sàkɔ́pù Weèdi-dà. Kà Sèsíì é tɔhìna è yɔ̀: Weèdi yòǹ fòùpa Weèdi-dà, nì pú yòǹ kpíípa kpɛ́ɛdí.
33 Niìdɔ́ɔ́di mɛ̀nì de yeèkaà-di ye wɛmá, k'yé nì dii n'ɔ̀ɔ biɔhànamá kpɛ́mú.
Hɔ̰́ɔ̰wencí nùdi mɛ̀nì ha̰tà-di tɔɔ̀ka
34 Fàdísìpa yeèkaà-ma è yɔ̀ Sèsíì dii wɛmá Sàdúkìpa, kà pá tíká. 35 Kà p'oòcɔ̰́ k'ò yòǹ kpɛ̰́ńtìnùka biɔhànakó, é n'kpɛ̀i óò díhìna wɛmá, óò béka è yɔ̀: 36 Dakpɛ̰́ǹn, kpɛ̰́ńtìnùka mɛhɛká, hɔ̰́ɔ̰wencí nùdi m̀mɔ́ni-dà ha̰tà tɔɔ̀ka?
37 K'óò tɛ̰́ná è yɔ̀: Á n'dɔ́sí Bateó a Weèdi n'àa yàma wɛǹni, n'àa sèdi wɛǹni, n'àa yam̀màhàdi wɛǹni. 38 Ye kú hɔ̰́ɔ̰wewencì nùdì-dà wɛhi, è tṵ́mà ha̰tà tɔɔ̀ka wɛǹni. 39 Ǹtɛ dɛ́ɛdí mɛ̀nì nì yònà-di: Á n'dɔ́sí a tɔɔ̀ɔ é n'yònà a mɔ́nń. 40 Mɔ̀yísì kpɛ̰́ńtìnùka wɛǹni, nà Weèdi wɛtɛ̰́nápa biɔhànamá péé ye hɔ̰́ɔ̰wewencì nùkà ka dɛ́ɛ́dì mɛhɛkà-dà.
Kídísì nà wódo Dàfítì pà yòm̀pu
41 Yè de hɔ̰́tà Fàdísìpa-dà tíkà ye pesá, kà Sèsíì pà béka békàmà mɛmà: 42 Nɛ maàhu m̀mɔ́ma-dà Kídísì hḭ́ǹka? Ò yòǹ woò kú yaàbíni-dà?
Kà p'óò tɛ̰́ná è yɔ̀: Ò yòǹ Dàfítì yaàbíibí-dà.
43 K'ó pà caka è yɔ̀: Ntɛ́ yè há̰ hḭmà kà Weèdi Sèdi de sṵ́ná Dàfítì k'òo mɔ́nń óò yíí Teó? Dàfítì de wɛɛ̀-ɛ́-ma è yɔ̀:
44 Bateó Weèdi cakáà n Teó è yɔ̀:
Kaàdi-ho n heùmà
háá é n'sànà n kó héé-ma
k'á cèn a kà̰à̰tɔɔ̀pa hḭ́ǹka. 45 Kà Dàfítì mɔ́nń ò yún o Teó, ntɛ́ yè kó hḭmà k'ó tṵ́má n'yòǹ o yaàbíidí?
46 P'oòcɔ̰́ǹ pú nɛdà óò tɛ̰́ná wɛnɔ̀di bá nìcɔ̰́. É cɛ̰ɛ̰́-nà ye kú daadí, òcɔ̰́ǹ koò pú nɛɛ̀ cḭḭ̀na kṵnnɔ̰̀ǹfa óò béka màcɔ̰́mà.