21
Sèsíì dúúma Sèdìsàdɛ́m̀
1 Pà pàtì tḭ́ń wɔ̀ni Sèdìsàdɛ́m̀, è beé-nà Bɛ̀tìfàséè yɔtí, è pɛ̀ɛ-nà òdífùna ta̰à̰di, kà Sèsíì é tɔn o dapàm̀ma pàdɛ́ɛ́, 2 é pà caka è yɔ̀: Taá-nà yɔtì mɛ̀ǹtì péé-tì nɛ yìhìkà. Kà nɛ ta̰ntà, nɛ kó dɛ́há-ma sa̰mmùǹta nà ta bíidí k'yè pḭ́dí. Nɛ́ hì pḭ́tá-ní é hì nà n'ya̰à̰ní. 3 K'òòcɔ̰́ǹ nɛ wɛɛ̀-nà màcɔ̰́mà, kà n'ɔ́ɔ̀ caka è yɔ̀: Teó-dà hì kpɛ̀i. Ye wɔ̀ni n'ɛ̀ɛ wɔ̀ni, pà kó nɛ héé-ma kà nɛ́ hì ka̰há-nà.
4 Yè de pa̰à̰ ma kú bookú è kpɛ̀i Weèdi wɛtɛ̰́náko wɛmá ò de wɛɛ̀-ma-dà é pa̰ná. Ò de yɔ̀:
5 Caka-nà Sìyɔ̰́ɔ̰̀a kpɛ́ɛpá è yɔ̀:
Ǹtɛ kà nɛ wódo pení nɛ pesá
kà yaǹyɔ̀kàm̀ma ò sṵ́nà
k'ò dáá-ní sa̰mmùǹnitá nà ta bíidí.
6 K'yèe Sèsíì dapàm̀ma é ka̰há é tɛ̀i é pa̰á̰ ò de hḭ́n pá pa̰á̰-sa. 7 Kà pá dɛɛ̀di-ní ye sa̰mmùǹta nà ta bíidí, é tɛ̀ni tódá pa tóhòka é pohà hi hḭ́ǹka, kà Sèsíì é dìsi é kaàdi. 8 Kà nìku dɔ́ɔ́di é pitá pa tóhòka cɔ̀ku hḭ́ǹka, kà tɔɔ̀pa é pitá fa̰à̰ti pà bɔdi-tí-ní. 9 Nìpa mɛ̀m̀pà de péé-pa o yìhìka nà mɛ̀m̀pà de tṵ̀n-pá o dàhàka, kà p'òò dùǹti kpeéma è tonà: Dàfítì bíitá yèdi é wɛhika! Kónáma é m'péé-nà mɛ̀ǹǹ pení-ko-ní nà Bateó yèdi! Weèdi yèdi é wɛhika hḭ́ǹka sàka mɛhɛká!
10 Sèsíì dúú tḭ́ń wɔ̀ni Sèdìsàdɛ́m̀, kà yɔtí wɛǹni é sa̰mpà. Kà nìpa békú pa tɔɔ̀pa è tonà: Dɔɔ̀ɔ wodà mɛnǹ? 11 Nìpa mɛ̀m̀pà d'oò tṵ̀n-pá, kà pà tɛ̰́nì è tonà: Sèsíì-dà Weèdi wɛtɛ̰́náko, k'ò yɛ̀ni-nà-ní Nàsàdɛ́tì yɔtí, Kàdìdéè tempáàku mɛhɛká.
Sèsíì bɔ̀haà tantam̀ma Weèdi hɔ̰́ɔ̰̀ta mɛhɛká.
12 Kà Sèsíì é dúú Weèdi hɔ̰́ɔ̰̀ta mɛhɛká, é bɔhà mɛ̀m̀pà de yɛɛ́-pa nà mɛ̀m̀pà de dom-pá ta mɛhɛká. K'ó wé-wétá mɛ̀m̀pà de ceèni-pá dící tábídìpa nà mɛ̀m̀pà de yɛɛ́-pa pàǹdɔ̀ka kàhi. 13 Ye kú dàhàka, k'ó pà caka è yɔ̀: Pà wa̰tà Weèdi wɛmá mɛhɛká è yɔ̀: Pà yònà é yíí n hɔ̰́ɔ̰̀ta Weèdɔɔ̀mu hɔ̰́ɔ̰̀ta-dà, kà nɛ́na há̰ tà kpáhìna túùpa peètadí.
14 Kà yɔ̀m̀ma nà mɛ̀m̀pà cèǹtì-pa tàdi é tɛ̀ni o pesá Weèdi hɔ̰́ɔ̰̀ta mɛhɛká, k'ó pà kpekàna. 15 Kà dɔ̀hàka yam̀ma kpɛ̰́m̀ma, nà Weèdi kpɛ̰́ńtìnùka biɔhànapá é dɛ́há pɔ́ńtápa̰á̰sàma ò de pa̰kú-ma, kà bííhí tṵ́mà dedì kpeéma Weèdi hɔ̰́ɔ̰̀ta mɛhɛká è tonà: Dàfítì bíitá yèdi é wɛhika, k'yé pà dɔnka. 16 Ye wɔ̀ni, kà p'óò caka è yɔ̀: A baà you-ú-dà pà wɛì-sà-n'áa?
K'ó pà tɛ̰́ná è yɔ̀ à̰à̰. Nɛ mum pú kan-kaàn daadí yènì, Weèdi wɛmá mɛhɛká wɛmá pà wà̰tà-ma è yɔ̀: A héè-é-ma bá kà bíisḭ̀m̀mɔ́nhí nà bíipàǹhi a duǹti. 17 Ye kú dàhàka, k'ó pà hédá é yɛ̀dì ye yɔtí, é taá Bètàníì é tɛ̀i weń ye pesá.
Sèsíì nɔdáà ka̰nka̰mú
18 K'yé weka ká̰ńyɛ̰̀ǹfa, k'ó n'tóńti-ní ye yɔtí, kà kòni óò cɛ̰ɛ̰́. 19 K'ó dɛ́há ka̰nka̰mú cɔ̀ku bɛ́ɛ́kú é mù hɛ́tá-ho, àmá é tɛ̀i é n'hɔ̰́tà mù yòǹ fa̰à̰ti cɔ̰́ɔ̰̀di-dà. Ye wɔ̀ni, k'ó wɛɛ́-nà ye tepú è yɔ̀: A koò pú kó pɛdá daadí yènì tebíidí! Ye pesá n'ɛ̀ɛ pesá, k'yèe tepú é hḭn wá-wákú. 20 O dapàm̀ma yè dɛ́hà-ma, k'yé pà dii, kà p'óò béka è yɔ̀: Ntɛ́ yè hḭmà k'yèe tepù é hḭn wá-wákú wɔ̀ni nìcɔ̰́?
21 K'ó pà tɛ̰́ná è yɔ̀: Mɔ́ma-dà n nɛ cakú-ma! Kà nɛ dań Weèdi, è pú káá màmàhìma nɛ yàma mɛhɛká, nɛ kó nɛɛ́ é pa̰á̰-ma n pa̰à̰-sà ye tepù. Nɛ múńtà kó nɛɛ́ caka-á-ma ta̰a̰dì mɛnì è yɔ̀: Hikàda ye pesà é taá dɔdi dàmɛ́dì mɛhɛká, yè mɛ̀ɛ kó pa̰á̰-ma. 22 Kà nɛ káá dandaní, nɛ kó cɔhà-sa wɛǹni weèdɔɔ̀pu mɛhɛká, nɛ k'éè dɛ́tá-ma.
Pà békú Sèsíì o nɔɔ̀ti péé-nà-sa-ní
23 Kà Sèsíì dúú Weèdi hɔ̰́ɔ̰̀ta mɛhɛká è biɔhànì, kà dɔ̀hàka yam̀ma kpɛ̰́m̀ma, nà Sùwífùpa yɔtí kpɛ̰́m̀ma é hɛ́tá-ní o pesá óò béka è yɔ̀: Nà nɔɔ̀ti m̀mɔ́ńti-dà a pa̰kú-nà-ma ye kú niì-ní? Wod'àà pɛ̰ḭ nùdi k'à yè pa̰kú?
24 K'ó pà tɛ̰́ná è yɔ̀: N mɛ̀ɛ té kó nɛ béka békàma màcɔ̰́-dà. Kà nɛ n tɛ̰́nà, ye wɔ̀ni n kó nɛ caka-á-ma nà mìì kú nɔɔ̀ti n pa̰kú-nà-ma miì. 25 Wodà de tɔn-ní Ìsá̰à̰ k'ò cómù nìpa nɛ́ɛmá mɛhɛká? Weèdi-dà nkɛ́ɛ̀ nìpa?
Ye wɔ̀ni, kà pá nɔ̀hìnà pa cɔ̰́ɔ̰̀di pesá, é caka pa tɔɔ̀pa è yɔ̀: Kà ti hḭ́n Weèdi-d'òò tɔn-ní, ò kó ti béka-á-ma è yɔ̀ baà tee kà ti pú teháà o wɛmá? 26 Kà ti mɛ̀ɛ tɛ̰́nà è hḭ́n: Nìpa-d'òò tɔn-ní, ti wani-í-ma nìku kó pa̰á̰-sa, mìì tee-sá nìpa wɛǹni d'oò tóńkú Weèdi wɛtɛ̰́náko-dà.
27 Mɛmá-dà, kà pá tɛ̰́ná Sèsíì è yɔ̀: Ti pú yá̰á̰. Ye wɔ̀ni, k'ó pà caka è yɔ̀: Kà mɛmá-dà, mmí mɛ̀ɛ té pú kó nɛ caka nà mìì kú nɔɔ̀ti-dà n pa̰kú-ma miì-ní.
Wɛbemú yohènamá bííhí hìdɛ́ɛ́ hḭ́ǹka
28 Kà Sèsíì é tɔhìna è yɔ̀: Ntɛ́ nɛ maàkaà-ma wɛmà mɛmà kú hḭ́ǹka? Dɔɔ̀ɔ òcɔ̰́ǹ-dà de káá o bííhí hìdɛ́ɛ́, é caka cecetá è yɔ̀: N bidà, taá é tɔn yeǹ kpɛ́ɛ́dì n yɛ̀ɛ̀di mɛhɛká.
29 K'yèe bíitá óò tɛ̰́ná è yɔ̀: N pú kó nɛdá. Àmá, k'yé hɔ́ɔ́-ní, kà tá peǹta yam̀màhàdi é yídá ka̰há yɛ̀ɛ̀di. 30 Ye kú dàhàka, k'yèe báàa é caka o bíitá tɔɔ̀ta ye wɛmá ma cɔ̰́ɔ̰̀di. Kà t'óò tɛ̰́ná è yɔ̀: Toò, n kó taá-ma n báà. Àmá, tà pú taá yècɔ̰́. 31 Hi dɛ́ɛ́dì mɛhɛkà, m̀mɔ́ńta-dà pa̰à̰ ta báàa kpɛ̀i-sá?
Kà pá tɛ̰́ná è yɔ̀: Cecetá.
Kà Sèsíì é pà caka è yɔ̀: Mɔ́ma-dà n nɛ cakú-ma, kaàcáhàpa nà poyáyáhí kó nɛ nihí-ma é dúú Weèdi wóòti mɛhɛká. 32 Ìsá̰-Bàtísì tɛ̀ni-í-ma-ní nɛ pesá è kó nɛ bɛka cɔɔ̀mɔ́nkú, nɛ pú taà dandaní o hḭ́ǹka. Àmá kà kaàcáhàpa, nà poyáyáhí é ta̰ǹta o wɛmá. Bá nà nɛ mɛ̀ɛ yè dɛ́hà-ma, nɛ pú pentà nɛ yàma é taàa nɛ dandaní o hḭ́ǹka.
Wɛbemú yohènamá nà tɔntɔnsḭ̀m̀ma
33 Tṵ́má besí-nà wɛbemú yohènamá tɔɔ̀ma: Yɛ̀di yaǹn ocɔ̰́ǹ-dà de híúwà pɛ́ɛ̀sɔ̰ná o yɛ̀di mɛhɛká, é maá maafá é nì yéńtá, é tɔ̰̀ṵ̀ fɔ̰̀ɔ̰̀ku ò kó n'nípù-ku kú mɛhɛká o tebíiká, é yíí maá yɛɛ̀ceípa cɔ̰̀ǹcɔ̰̀ǹdɛudí. Ò yɔ̀ɔ-má miya̰, é pɛha tɔntɔm̀ma é nì pà ceá, è yɔ̀ kà tebíiká biù nà mɛmpá kà pá n'tookú, ye wɔ̀ni é ka̰há cà̰ǹku. 34 Pɛ́ɛ̀sɔ̰ná bii tḭ́ń daadí, k'ó tɔn o dapàm̀ma ye yɛ̀di tɔntɔm̀ma pesá, è yɔ̀ p'óò kɔ̰́ɔ̰́-ní o kú tebíiká. 35 K'yèe dapàm̀ma é tɛ̀i, kà pá pà cɛ̰ɛ̰́ é podí òcɔ̰́, é kɔ̀ù tɔɔ̀ɔ, é ká̰mu ta̰á̰ko tá̰à̰ka óò kɔ̀ù. 36 K'yèe yɛ̀di yaǹn é tṵ́má tɔn dapàm̀ma tɔɔ̀pa, kà pa kú dɔ́ɔ́di wɛhi-nà cecepá kpɛ́ɛdí. Kà pá tṵ́má pà tɛ̰́ná-hɔ̰́ pà hḭmpú cecepá. 37 K'ó tɔn o bíitá dèǹdèma pa pesá è màhu è tonà: Pà kó wampa-á-ma n bíitá. 38 Ye bíitá ta̰ntà tḭ́ń wɔ̀ni, k'yèe tɔntɔm̀ma é tà dɛ́há, é caka pa tɔɔ̀pa è yɔ̀: Ǹtɛ-nà mɛ̀ǹǹ kó wáńtá n'tee-kó ye yɛ̀dì. T'óò kɔ̀ù-nà k'yé teha kà ní hḭn ti kpɛ́ɛdí. 39 Kà tá tɛ̀ni, kà pá tà yɔ̰́ɔ̰́pa é tà dèna ye yɛ̀di bɛ́ɛ́kú é tà kɔ̀ù.
40 Kà Sèsíì há̰ pà béka è yɔ̀: Ntɛ́ ye yɛ̀di yaǹn kó tɛ̀ni tḭ́ń wɔ̀ni é hḭmà ye tɔntɔmmà?
41 Kà p'óò tɛ̰́ná è yɔ̀: Ò yònà é pà kɔ̀ù-ú-ma kà séèma é n'kɔ́ɔ́, é nì ceá tɔɔ̀pa mɛ̀m̀pà té k'óò kɔ̰́ɔ̰́-pa o kú pɛ́ɛ̀sɔ̰ɔ̰̀ka ka bii wɔ̀ni.
42 K'ó pà caka è yɔ̀: Nɛ pú kan-kaàn daadí yènì Weèdi wɛmá mɛhɛká kà pà yɔ̀:
Tá̰à̰di maápa de wɛ́i-dí
mɛní-dà tón é hḭn tá̰à̰di mɛ̀nì púsí-di nàmɔ̀ni kpɛ̰kpɛ̰kamá sukú.
Bateó-dà pa̰nà ye kú pa̰á̰mà,
kà mà yòǹ pa̰á̰sàma ti yìhìka.
43 Ye kú kpɛ́mú-dà tee n nɛ cakú-ma è yɔ̀: Weèdi kó feèda-á-ma ni wóòti nɛ pesá, é tì kɔ̰́ɔ̰́ bookú tɔkú mɛ̀ǹkù kó púsí-ku ni wóòti tɔmú. [\v 44 Mɛ̀ǹǹ kó dɔɔ-kó ye tá̰à̰di hḭ́ǹka, ò kó bɔ́-bɔ́kádá-ma, kà nì mɛ̀ɛ dɔdi òcɔ̰́ǹ kú hḭ́ǹka, nì k'óò nun-nuncí-ma.]