20
Yoǹku yaǹn nà dehèpa ò tóńkáà-pa Wɛbemú yohènamá
1 Kà Sèsíì yɔ̀: Ǹtɛ hḭ́ǹka wóòti yònà-sa: Tì yònà yoǹku yaǹn òcɔ̰́ǹ-dà mɛ̀ǹǹ yɛ̀ɛ̀-ko ká̰ńyɛ̰̀ǹfa pìdìpìdì è kó pɛha dehàpa kà pá tɔń o tená yoǹku mɛhɛká. 2 Kà pá kɔ̰dà k'ò kó pà bodá weǹtṵ́nní tɔmú dífa, ye wɔ̀ni é pà ka̰hàna o tená yoǹku mɛhɛká. 3 Ká̰ńyɛ̰̀ǹfa máàku màwɔ́ì kpɛ́ɛmá, k'ó tṵ́má yɛɛ̀ni é dɛ́há dehàpa tɔɔ̀pa kà pà kàdi tíká-bɛ̀m̀bɛ̀ni è kɔ́ɔ́ mùcɔ̰́mù. 4 K'ó pà caka è yɔ̀: Nɛ́na mɛ̀ɛtékà, taá é tɔń-nà n tená yoǹku mɛhɛká ká n yɔ̀ɔ nɛ bodá yè békáà-ma. 5 Kà pá yídá é ka̰há ye yoǹku. K'yèe yoǹku yaǹn é tṵ́má yɛɛ̀ni kà weèdi behú-nà yuùka é pɛha dehèpa. K'ó tṵ́má yɛɛ̀ni máàku màta̰a̰ é pɛha tɔɔ̀pa. 6 Yookú máàku mànùm̀, k'ó tṵ́má yɛɛ̀ni é dɛ́há tɔɔ̀pa kà pà kàdi ye bɛ̀m̀bɛ̀ni ni cɔ̰́ɔ̰̀di. K'ó pà béka è yɔ̀: Baà tee kà nɛ kaàdi miì weǹtṵ́nní ni wɛǹni è pú pa̰kú mùcɔ̰́mù?
7 Kà p'óò tɛ̰́ná è yɔ̀: Òcɔ̰́ǹ pú ti tódà è yɔ̀ t'óò pa̰á̰ tɔmù.
K'ó pà caka è yɔ̀: Kà mɛmá-dà, kà nɛ mɛ̀ɛ té taá é deha n tená yoǹku mɛhɛká.
8 Kà yookú é yodá, kà yoǹku yaǹn é yíí-ní o dehèpa kpɛ̰́ǹn óò caka è yɔ̀: Yíí-ní dehàpa é bodá bá mɛ̀ǹǹ dɛ̀ɛ̀-ko o dífa. Á cetá-nà dèǹdèma é deǹta-nà cecepá. 9 Kà mɛ̀m̀pà de cetà-pa tɔmú yookú máàku mànùm̀, é tɛ̀ni é ta̰ǹta bá mɛ̀ǹǹ dɛ̀ɛ̀-ko weǹtṵ́ṵní tɔmú dífa. 10 Kà cecepá kú wɔ̀ni é tɛ̀ni, kà pà màhu è tonà pa kpɛ́cí kó ha̰tá-ma mɛma. Àmá, kà bá pa mɛ̀ǹǹ dɛ̀ɛ̀-ko mɛ̀ɛ té ta̰ǹta weǹtṵ́ṵní tɔmú dífa. 11 Pà fà tà̰ǹtà-ma, é n'kɔ̰̀ǹti-nà yoǹku yaǹn 12 è tonà: Dehàpà mɛ̀m̀pà dèǹtà é tɛ̀ni-pà-ní, deháà máàku kùcɔ̰́ sá̰à̰di, k'àá pà bodá a ti bokáàma. Tḭ́ńti-dà há̰ deháà weǹtṵ́ṵní wɛǹni weǹtafá mɛhɛká é wédá! 13 K'ó tɛ̰́ná p'oòcɔ̰́ è yɔ̀: N dóopó, n p'áa dii tàkecí cìcɔ̰́cì. Ti de pú yeèkaà ti tɔɔ̀pa k'à yɔ̀ m'áa bodá weǹtṵ́ṵní dífa dò? 14 Ta̰ǹta a dífa é ka̰há. Mmí-dà kpɛ̀i é bodá mɛ̀ǹǹ tɛ̀ni-kó-ní dèǹdèma kà nɛ dífa é n'sá̰á̰. 15 N pú kó nɛɛ́ é pa̰á̰-nà n dící n kpɛ̀i-sá? Nkɛ́ɛ̀, a mɛhɛká n pɛ́ì-nà n nìdi-má kpɛ́mú?
16 K'ó tuɛ̀ha è yɔ̀: Mɛmá-dà dèǹdèma kó wáńtá hḭn-má cecepá, kà cecepá é hḭn dèǹdèma.
Sèsíì cakú ta̰á̰ma o kṵ́mú n'ɔ̀ɔ yá̰ńtáma
17 Kà Sèsíì é m'póńti Sèdìsàdɛ́m̀, é tódá o tɔntɔndipá píì-pàdɛ́ɛ́ pa cɔ̰́ɔ̰̀di pesá, kà pá n'tɔdì k'ò pà cakú è tonà: 18 Ǹtɛ kà ti póńti Sèdìsàdɛ́m̀. Ye pesá-dà pà kó taá taàa-má Niìfòùo bíitá, dɔ̀hɔ̀ka kpɛ̰́m̀ma, nà Weèdi kpɛ̰́ńtìnùka biɔhànapá nɔ̀hi mɛhɛká, kà pá deèna nùdi sídàma mɛhɛká è yɔ̀ pá tà kɔ̀ù, 19 ye wɔ̀ni é tà tàa mɛ̀m̀pà pú yá̰á̰-pa Weèdi nɔ̀hi mɛhɛká, kà pá tà dɛhí, é tà podí dáàfa é yɔ̀ɔ tà kpɛ̰́ḭ́ kpíidɔkú hḭ́ǹka. Data̰à̰di daadí, kà tá yá̰ńtá-ní.
Sàákì nà Ìsá̰à̰ Sèbèdéè bííhí màa cɔhàma
20 Kà Sèbèdéè bííhí màa é hɛ́tá-ní Sèsíì pesá n'ɔ̀ɔ bííhí, é tɛ̀ni hìu o yìhìka óò cɔ̀hà è yɔ̀ óò pa̰á̰ nììma. 21 K'óò béka è yɔ̀: A kpɛ̀i badà?
K'yèe poòo óò tɛ̰́ná è yɔ̀: Ǹtɛ n bííhí hidɛ́ɛ̀ka. N hḭ́ná nùdi è yɔ̀ a kó wódí tḭ́ń daadí, kà tàcɔ̰́-dà é n'kaàdi a heùma, tɔɔ̀ta a cà̰ǹkamá.
22 Kà Sèsíì é pà tɛ̰́ná è yɔ̀: Nɛ pú yá̰á̰ nɛ cɔɔ̀hu-sá. Nɛ kó nɛɛ́ é dii-í-dà náńkú n kó dii-kú?
Kà p'óò tɛ̰́ná è yɔ̀: Ti kó nɛɛ́-ma.
23 K'ó pà caka è yɔ̀: Mɔ́ma-dà nɛ wɛɛ̀-ma è yɔ̀ nɛ kó nɛɛ́ é dii náńkú n kó dii-kú. Àmá mìì héé-sa mɛ̀ǹǹ kó n'kaàdi-ko n heùma yoo n cà̰ǹkamá, mmí pú kɔ̰́nì ye kú kààkà. N Báàa-dà kà kɔ̰́nì ò kà dɔ̀haà-pa kú kpɛ́mú.
24 O tɔntɔndipá pítá tɔɔ̀pa yeèkaà-ma miya̰, kà pá mɔka fɔ̰́di n'ɛ̀ɛ kúcàpa padɛ́ɛ̀ka. 25 Mɛmá-dà, k'ó pà yíí pa wɛǹni é pà caka è yɔ̀: Nɛ yá̰á̰-ma è yɔ̀ boocí wóópa, pà hɔ̰́ n'wódí pa nìpa hḭ́ǹka nà kpeèti-dà. Mɛ̀m̀pà mɛ̀ɛ hɔ̰́ n'yòǹ-pa nɔɔ̀ti yam̀ma boocí mɛhɛká hɔ̰́ n'nɔɔ̀ǹta tɔɔ̀pa-dà. 26 Há̰kà, yè pú yònà mɛma é m'pa̰kú nɛ cɔhɔ̀ka. Múńdìkaà, kà n'ɔɔ̀cɔ̰́ǹ kpɛ̀i é n'yòǹ kpɛ̰́ǹn nɛ mɛhɛkà, ò yònà é n'yòǹ nɛ deho-dà. 27 Kà nɛ mɛ̀ǹǹ kpɛ̀i é n'yòǹ-ko cecedó nɛ cɔhɔ̀kà, k'ó hḭn nɛ núǹn. 28 Ma cɔ̰́ɔ̰̀di-dà, Niìfòùo bíitá pú tɛ̀ni é kpɛ̀i pá deha ta kpɛ́mú, àmá tà tɛ̀ni è kpɛ̀i é deha nìpa kpɛ́mú-dà, é kɔ̰́ɔ̰́ ta fòùmu é dontá nìku dɔ́ɔ́di.
Sèsíì dìhìnà yɔ̀m̀ma pàdɛ́ɛ́
29 Kà Sèsíì n'ɔ̀ɔ dapàm̀ma é yɛɛ̀ni Sèdìkóò yɔtí mɛhɛká, kà nìku dɔ́ɔ́di ò tṵ̀n. 30 Kà yɔ̀m̀ma pàdɛ́ɛ́ kaàdi cɔ̀ku bɛ́ɛ́kú é yekà è yɔ̀ ò kɛ̰hḭdi, kà pá ceḿ cetá è dedì è tonà: Dakpɛ̰́ǹn, Dàfítì bidà, ti kɔń séèma! 31 Kà nìku pà kɔ̰̀ǹti-nà è yɔ̀ pá kpḭ́ḭ́. Kà pà mɛ̀ɛ dɔ̀hà é dedí kpeéma è yɔ̀: Ti Teù, Dàfítì bidà, ti kɔń séèma! 32 K'ó nɛɛ̀hi, é pà yíí é pà béka è yɔ̀: Nɛ kpɛ̀i ń nɛ pa̰á̰ badà?