Màtíyéè 19

Poyedàma wɛmá

¹ Sèsíì wɛɛ̀-ma miya̰ é yɔ̀ɔ, é yídá Kàdìdéè tempáàku é taá Sùdéè kpɛ́kú mɛhɛká kà kù péé Sùùtɛ̰́ɛ̰̀ kóńkú sóìdi tɔɔ̀di. ² Kà nìku dɔ́ɔ́di óò tṵ̀na, k'ó kpekàna mɔkàpa.

³ Kà Fàdísìpa pàcɔ̰́pà é tɛ̀ni o pesá è kpɛ̀i óò bɛń. Kà p'óò béka è yɔ̀: Weèdi kpɛ̰́ńtìnùka pɛ̰ḭ-ḭ́-dà nìdo nùdi è yɔ̀ ó bɔhà o poòo pa̰á̰ma bá mɛ̀mà dɛ̀ɛ̀-ma kpɛ́mú?

⁴ K'ó pà tɛ̰́ná è yɔ̀: Nɛ pú kaàn pà wà̰tà-sa Weèdi wɛmá mɛhɛká? Pà wà̰tà è yɔ̀: Nà cetáma-ní Weèdi de pa̰à̰ dɔɔ̀o nà poòo-dà. ⁵ Kà nì yɔ̀: Ye kú kpɛ́mú-dà tee, dɔɔ̀o té kó yíí-ma é héé o báàa n'ɔ̀ɔ màa, é taá é daàdi n'ɔ̀ɔ poòo, pa dɛ́ɛ̀di kà pá hḭn nìdo òcɔ̰́. ⁶ Mɛma, pà koò pú kó n'yòǹ nìi pàdɛ́ɛ́, àmá òcɔ̰́. Yè yòǹ-mà mɛma, nìi dá yetá é yaàta Weèdi múnà-sa.

⁷ K'yèe Fàdísìpa óò béka è yɔ̀: Bad'àá de tee kà Mɔ̀yísì é hḭ́ná nùdi è yɔ̀ kà nìi kó bɔhà o poòo, k'óò wà̰hà pɔ̀kàta mɛ̀ǹtà cakú-ta è yɔ̀ òò yedáà-á-dà, ye wɔ̀ni óò bɔ̀hà?

⁸ K'ó pà tɛ̰́ná è yɔ̀: Nɛ tokpeekú kpɛ́mú-dà tee Mɔ̀yísì de nɛ kɔ̰́ɔ̰̀-ma ye kú kpɛ̰́ńtìnùdì. Àmá, nà cetáma-ní, yè de pú yòǹ mɛma. ⁹ N nɛ cakú-ma: Kà nìi bɔɔ̀haà o poòo k'ò pú pa̰à̰ yáyámu, è tóò tɔɔ̀ɔ, ye yaǹn cɔ̰hú dɔudí-dà.

¹⁰ K'òo dapàm̀ma óò caka è yɔ̀: K'yè yòǹ mɛmá-dà dɔɔ̀o o poòo hḭ́ǹka, yè tɔ̰ṵ-ṵ́-ma nìi dá tóó poòo. ¹¹ K'ó pà tɛ̰́ná è yɔ̀: Nìpa wɛǹni pú kó nɛɛ́ é teha ye wɛmà, Weèdi pɛ̰ḭ-pá cɔ̰́ɔ̰̀di nɔɔ̀ti bààsí è yɔ̀ pá mà teha. ¹² Niìi dɔ́ɔ́di péé-ma è kpanì daapá pà kó tóó-ma poòpa. Pàcɔ̰́ péé-ma è kɔ́ɔ́ damá nà pa pɛdáma-ní, tɔɔ̀pa kà nìpa pà fɔ̰̀ǹtà, é yídá kà tɔɔ̀pa péé è pú kpɛ̀i é tóó poòpa nà hḭ́ǹka wóòti kpɛ́mú. Kà mɛ̀ǹǹ kó nɛɛ́ teha-kó ye biɔhànamà k'ó mà teha.

Sèsíì kónà bííhí

¹³ Kà nìpa óò tɛɛ̀ní bííhí è kpɛ̀i ó cɔ̰ná o nɔ̀hi hi hḭ́ǹka é hì kóná, k'oò dapàm̀ma é yeda è pà kɔ̰̀ǹti-nà. ¹⁴ K'ó pà caka è yɔ̀: Héé-nà kà bííhí é tɛ̀ni n pesá. Nɛ dá hì kpaná mìì tee-sá, hḭ́ǹka wóòti péé mɛ̀m̀pà hì yònà-pa kpɛ́mú-dà. ¹⁵ K'ó cɔ̰mu o nɔ̀hi hi hḭ́ǹka é yɔ̀ɔ yídá ye pesá é ka̰há.

Sèsíì nà káma yaǹn òcɔ̰́ǹ

¹⁶ Kà dɔɔ̀o òcɔ̰́ǹ é tɛ̀ni Sèsíì pesá óò béka è yɔ̀: Dakpɛ̰́ǹn, n yònà é pa̰á̰ suumá m̀mɔ́ma-dà é dɛ́tá fòùmu mɛ̀mù bá yɔ̀ɔ-pú?

¹⁷ K'óò tɛ̰́ná è yɔ̀: Baà tee k'à n békú suumá hḭ́ǹka? Nìi òcɔ̰́-dà yòǹ sudó. K'à kpɛ̀i é dɛ́tá fòùmu mɛ̀mù bá yɔ̀ɔ-pú, k'á tṵṵ̀na Weèdi kpɛ̰́ńtìnùka hḭ́mpú.

¹⁸ K'ó béka Sèsíì è yɔ̀: Weèdi kpɛ̰́ńtìnùka m̀mɔ́ńka-dà?

K'óò tɛ̰́ná è yɔ̀: A dá yetá é kɔ̀ù nìdo, a dá yetá é cɔ̰ha dɔɔdí, a dá yódá, a dá n'centì è cɔ̰hú tɔɔ̀ɔ yèdi, ¹⁹ á n'cuunì a báàa n'àa màa. Á n'dɔ́sí a tɔɔ̀ɔ é n'yònà a mɔ́nń.

²⁰ K'yèe dɔɔ̀o óò tɛ̰́ná è yɔ̀: N kà tṵnà-á-ma ka wɛnnì. Tɔɔ̀sa m̀mɔ́nya̰-dà n tṵ́mà yònà é pa̰á̰-ma?

²¹ K'óò caka è yɔ̀: K'à kpɛ̀i é n'weni dɛ́dɛ́í, k'á tɔɔ̀ta é taá yɛdá a káá-sa wɛǹni, é tóó ye dící é cì totá pɛ́íhí. K'à hḭn mɛma, a kó ya̰dá é dɛ́tá-ma káma Weèdi pesá. K'à pa̰à̰ mii è yɔ̀ɔ, k'á ya̰ní é n tṵṵ̀na. ²² Ye dɔɔ̀o yekaàma mɛma, k'òo yàma yɔ̀ kɔ̰̀, k'ó yídá é ka̰há mìì tee-sá ò de káá káma-dà sàma.

²³ Kà Sèsíì é caka o dapàm̀ma è yɔ̀: Bemú-dà n nɛ cakú-ma, yè dɔǹ-ń-ma sàma nà káma yaǹn kó dúú-ma hḭ́ǹka wóòti mɛhɛká. ²⁴ K'ó tṵ́má wɛɛ́ è yɔ̀: Káma yaǹn dúúma Weèdi wóòti mɛhɛká kó dɔǹ-ń-ma é ha̰tá bɔnamáku k'ó yɛ̀ɛ̀-ma yáafá bòdi. ²⁵ O dapàm̀ma yekaàma mɛma, k'yé pà dii dɛ́dɛ́í kà pà yɔ̀: Kà mɛmá-dà, wod'àá kó dɛ́tá fḭ́táma? ²⁶ K'ó pà wáńtá é pà caka è yɔ̀: Nìpa pesá, ye kú niì pú cédí pa̰á̰pu, àmá Weèdi pesá niìi wɛǹni cédí-ma pa̰á̰pu.

²⁷ Ye wɔ̀ni kà Píyɛ́ɛ̀ é tóó wɛmá óò caka è yɔ̀: Ǹtɛ, kà tḭ́ńti héè-ní ti kpɛ́ɛsá wɛǹni é tɛ̀n'áa tṵṵ̀na. Ntɛ́ yè kó wáńtá é n'yòmà tíńti? ²⁸ K'ó pà tɛ̰́ná è yɔ̀: Bemú-dà n nɛ cakú-ma, Niìfòù bíitá kó kaàdi tḭ́ń daadí ta wóokaàsàta hḭ́ǹka fòùku pànkú mɛhɛká, nɛ́na píì-pàdɛ́ɛ́ mɛ̀m̀pà n tṵ̀n-pà, nɛ mɛ̀ɛ té kó kaàdi-í-ma wóokàhi hḭ́ǹka é síi-nà Ìsìdàyɛ́dì nahàti píì-tídɛ́ɛ́ ²⁹ Mɛ̀ǹǹ kú wɛǹni kó yíí-ko nà n kpɛ́mú, é héé o hɔ̰́ɔ̰́hí, yoo o kúcàpa, yoo o potɔ̰ɔ̰̀pa, yoo o báàa, yoo o màa, yoo o poòo, yoo o bííhí, yoo o yɛ̀ka, k'ó dɛ́tá-ma pemà mɛmà kú mɛhɛká k'yé n'wɛhi sàma é ka̰há-nà o héè-sa-ní, é tṵ́má wáńtá dɛ́tá fòùmu mɛ̀mù bá yɔ̀ɔ-pú. ³⁰ Nìpa dɔ́ɔ́di mɛ̀m̀pà yòǹ-pa cecepá yenì, kó wáńtá hḭn dèǹdèma-dà, kà nìpa dɔ́ɔ́di mɛ̀m̀pà yòǹ-pa dèǹdèma yenì, é wáńtá hḭn cecepá.