Màtíyéè 18

Wodà yòǹ sào Weèdi wóòti mɛhɛká?

¹ Ye wɔ̀ni, kà Sèsíì dapàm̀ma óò hɛ́tá-ho, óò béka è yɔ̀: Wodà yòǹ sào hḭ́ǹka wóòti mɛhɛká? ² Kà Sèsíì é yíí bíisḭ̀m̀mɔ́ǹta, é tà nɛ̀hìna pa cɔhɔ̀ka, è yɔ̀: ³ Bemú-dà n nɛ cakú-ma, kà nɛ pú pentà pa̰á̰ma, é kpáńtá é n'yònà bíisḭ̀m̀mɔ́nhí, nɛ pú kó dúú hḭ́ǹka wóòti mɛhɛká. ⁴ Mɛ̀ǹǹ kó yɔkàna-kó o cɔ̰́ɔ̰̀di é n'yònà bíítà mɛntà, mɛnń-dà kó n'yòǹ sào hḭ́ǹka wóòti mɛhɛká. ⁵ Mɛ̀ǹǹ kó codá-ko bíisḭ̀m̀mɔ́ńtà mɛntà kú tɔɔ̀ta nà n yèdi, mmí mɔ́nń-dà ò codà-ma.

Tɔɔ̀o yehènamá

⁶ Mɛ̀ǹǹ kó yehèna-kó bííhì mɛ̀ǹhì n dań-hì, hi tàcɔ̰́ sḭ̀ḭ̀ma mɛhɛká, yè kó n'tɔ̰ṵ-ṵ́-ma pá yíná ye yaǹn tá̰a̰sàku o fɔ̰̀ɔ̰kú, óò ká̰ńtá dàmɛ́dì mɛhɛká. ⁷ Náńkú sàku-dà fòùkù mɛnkù kú kpɛ́mú, nà pa̰á̰ma dɔ́ɔ́di mɛ̀mà péé-ma ku mɛhɛká è hán nìpa sḭ̀ḭ̀ma mɛhɛká. Pa̰á̰ma pú kó mɔ́ńka mɛ̀mà kó n'tee-má kà nìdo dɔdi sḭ̀ḭ̀ma mɛhɛká, àmá náńkú é m'péé-nà mɛ̀ǹǹ kó n'tee-kó k'yèe kú pa̰á̰mà é pa̰ná.

⁸ K'àa nɔ̀ku yoo a tàdi-dà héè k'à pa̰kú sḭ̀ḭ̀ma, k'á yè fìta, éè wɛ́í dɛùma. Yè tɔ̰ṵ-ṵ́-ma á dúú fòùmu mɛ̀mù bá yɔ̀ɔ-pú mɛhɛká nà nɔ̀ku kùcɔ̰́ yoo tàdi nìcɔ̰́, n'àa n'káá-ma yèdɛ́ɛ́ yèdɛ́ɛ́, è há̰ dúú ha̰mú mɛ̀mù pú kɔ̰́n-pú mɛhɛká. ⁹ K'àa nɔ̀ǹfa-dà héè k'à pa̰kú sḭ̀ḭ̀ma, k'á fà kokadá é fà wɛ́í dɛùma. Yè tɔ̰ṵ-ṵ́-ma á dúú Weèdi wóòti mɛhɛká nà nɔ̀ǹfa fàcɔ̰́, n'àa n'káá-ma cìdɛ́ɛ́, è há̰ dúú ha̰bíiní mɛhɛká.

Wɛbemú yohènamá nà hɔ̰̀fa mɛ̀ǹfà fée-fá kà pá fà dɛ́tá

¹⁰ Nɛ́ cɛ̰ɛ̰́ nɛ cɔ̰́ɔ̰̀di, nà n'aa yɔ̰́sa-má ye bííhì mɛnhì hi tàcɔ̰́. N nɛ cakú bemú-dà, Weèdi tɔntɔndipá mɛ̀m̀pà hì ceí-pa, péé-ma wɔ̀ka wɛǹni n Báàa mɛ̀ǹǹ péé-ko hḭ́ǹka yìhìka. [\v 11 Niìfòùo bíitá tɛ̀ni è kó fḭ́hìna mɛ̀m̀pà fée-pá-dà.]

¹² Nɛ maàhu m̀mɔ́ma-dà? Kà nìi káá hɔ̰̀ci kɔ̀ta, kà fàcɔ̰́ fédi, ò pú kó hédá mɛ̀ǹcì yòǹ-ci púwɔ́ì nà cìwɔ́ì ta̰à̰di hḭ́ǹka, é taá pɛha-ní mɛ̀ǹfà fée-fá dò? ¹³ N nɛ cakú bemú-dà, k'ò fà dɛ́tà tíń wɔ̀ni, yè h'ɔ̰́ɔ̰̀ naaka-á-ma dɛ́dɛ́í nà fa kpɛ́mú, é ha̰tá-nà mɛ̀ǹcì kaá-ci-ní è yòǹ púwɔ́ì nà cìwɔ́ì, è pú fédi. ¹⁴ Ma cɔ̰́ɔ̰̀di-dà nɛ Báàa mɛ̀ǹǹ péé-ko hḭ́ǹka pú kpɛ̀i-má, bííhì mɛnhì hi tàcɔ̰́ é fédi.

K'àa kúcàa a yetà-nà

¹⁵ K'àa kúcàa a yetà-nà, k'á taá ò dɛ́há nɛ dɛ́ɛ̀ka pesá, óò bɛka o yetádi. K'òà besí, a dontà-á-ma a kúcàa. ¹⁶ Àmá, k'ò yedáà è p'áa besí, k'á tódá nìi òcɔ̰́ yoo pàdɛ́ɛ́ kà nɛ́ n'nɔɔ́, k'yé teha k'yèe wɛmá wɛǹni é kɔ̀ù nìi pàdɛ́ɛ́ yoo pàta̰a̰ yìhìka ¹⁷ K'ò tṵ́mà yedáà è pú pà besí, kà nɛ́ mà caka weèdɔɔ̀pa tɔɔ̀pa. K'ò yedáà ò kó besí-ma weèdɔɔ̀pa tɔɔ̀pa, kà nɛ́ ò n'dìi mɛ̀ǹǹ pú yá̰á̰-ko Weèdi yoo kaàcáhàpa^a tɔɔ̀o.

¹⁸ N nɛ cakú bemú-dà, nɛ kó yee-sá tenkà mɛnkà kú hḭ́ǹka, Weèdi k'éè yee-é-ma hḭ́ǹka mɛhɛká. Nɛ mɛ̀ɛ kó teha-sá tenkà mɛnkà kú hḭ́ǹka, Weèdi k'éè teha-á-ma hḭ́ǹka mɛhɛká.

¹⁹ N tṵ́mà nɛ cakú-ma, è yɔ̀ kà nìi pàdɛ́ɛ́ múń nùdi nɛ mɛhɛkà teǹka hḭ́ǹka, è cɔ̀haà bá mìì dɛ̀ɛ̀-sa weèdɔɔ̀pu mɛhɛká, n Báàa mɛ̀ǹǹ péé-ko hḭ́ǹka k'éè pà kɔ̰́ɔ̰́-ma, ²⁰ è yá̰á̰ nìi pàdɛ́ɛ́, pàta̰a̰ tísí-sa nà n yèdi, n péé-ma pa cɔhɔ̀ka.

Wɛbemú yohènamá nà deho mɛ̀ǹǹ yení-ko tɔɔ̀o sḭ̀ḭ̀ma bútáma

²¹ Kà Píyɛ́ɛ̀ é hɛ́tá-ho ye wɔ̀ni Sèsíì óò béka è yɔ̀: N Teù, kà n kúcàa n yetà-nà, cɔ̀ku màdɛɛ-dà n yònà é bútá-ma dàhàka sḭ̀ḭ̀ma ò n pa̰à̰-ma? Háá cɔ̀ku màyehì-ì? ²² Kà Sèsíì óò tɛ̰́ná è yɔ̀: Óò, n pú kó n'à n'yɔ̀ cɔ̀ku màyehì, àmá n kó n'à n'yɔ̀ háá púyehì, cɔ̀ku màyehì.

²³ Ye kú kpɛ́mú-dà tee, hḭ́ǹka wóòti yònà-ma wódo mɛ̀ǹǹ de kpɛ̀i-kó é dɔ̀hà o káma wɛkú n'ɔ̀ɔ dapàm̀ma. ²⁴ K'ó cetá é kù n'dɔ̀hu, kà p'óò tɛɛ̀ní òcɔ̰́, k'òò bàn díimáàti tòhèka sàka dɔ́ɔ́di. ²⁵ Ò há̰ de pú káá-ma yècḭ́ḭ̀ è kó bodá tá, k'òo dakpɛ̰́ǹn é kɔ̰́ɔ̰́ nùdi è yɔ̀ p'óò yɛda, mɛnń n'ɔ̀ɔ poòo, n'ɔ̀ɔ bííhí, n'ɔ̀ɔ̀ káá-sa wɛǹni, k'yé teha kà pá bodá ye bàǹti. ²⁶ K'yèe deho é hìu dúùka teǹka o dakpɛ̰́ǹn yìhìka, óò sɛ́uka è yɔ̀: Pa̰á̰ mùyɔ̰ n hḭ́ǹka, n k'áa bodá-ma a bàǹti wɛǹni. ²⁷ K'yèe dakpɛ̰́ǹn óò kɔń séèma, óò héé-ho ye bàǹti è yɔ̀ ò koò dá bodá, óò hédá k'ó ka̰há.

²⁸ K'yèe deho é n'yɛtì-ní, é peèta-nà o kóoó tɔɔ̀o òcɔ̰́ǹ, kà mɛnn ò káá bàǹti díimáàti kɔ̀ta sá̰à̰di. K'ò cem'ɔ̀ɔ̀ yɔ̀ cɔ́ù, é cɛ̰ɛ̰́ o níkú è yɔ̀: N bodá n bàǹti a n káá-ti. ²⁹ K'òo kóoó é hìu dúùka teǹka óò sɛ́uká è yɔ̀: Pa̰á̰ mùyɔ̰ n hḭ́ǹka, n k'áa bodá-ma a bàǹti. ³⁰ Àmá, kà mɛnn é yeda pápáí, é múńtá é taá ò yɛ̰̀ḭ kódedí è yɔ̀ ó m'péé ye pesá háá é bodá o bàǹti. ³¹ Dehèpa tɔɔ̀pa dɛ́hà-ma ye kú pa̰á̰mà, yè pú pà naakáà báà cɛ̰́ma. Kà pá taá caka pa dakpɛ̰́ǹn mìì de pa̰à̰-sa wɛǹni. ³² K'yèe dakpɛ̰́ǹn é héé kà pá yíí-ní ye deho, k'óò caka è yɔ̀: Dehetohikò fɔ̰́ń! A n sɛ́úkáà-á-dà, kà m'a hédá a kú bàǹti wɛǹni è yɔ̀ a dá bodá. ³³ Yè de pú sà a mɛ̀ɛ té kɔń séèma a kóoó é n'yònà m'a kɔnkáàma? ³⁴ Kà fɔ̰́di é cɛ̰ɛ̰́ o dakpɛ̰́ǹn dɛ́dɛ́í, k'óò tàa kódeceépa nɔ̀hi mɛhɛká, è yɔ̀ pá yɔ̰́ń o toòka háá k'ó tì bodá ti wɛǹni.

³⁵ Kà Sèsíì é dehà ye wɛmá è yɔ̀: Ma kú bookú-dà, n Báàa mɛ̀ǹǹ péé-ko hḭ́ǹka kó nɛ pa̰á̰-ma, kà bá nɛ mɛ̀ǹǹ dɛ̀ɛ̀-ko pú kpɛ̀i é bútá o tɔɔ̀o sḭ̀ḭ̀ma dàhàka n'ɔ̀ɔ yàma wɛǹni.