Màtíyéè 17

Sèsíì wɔ̰̀ǹti pentà

¹ Kà daàa kàkɔ̀ɔ̀ é ka̰há, kà Sèsíì é tódá Píyɛ́ɛ̀, nà Ìsákì, nà Ìsá̰à̰ o ya̰ǹta, kà pá dìsi ta̰dɛudí nìcɔ̰́nì kú hḭ́ǹka, é tɛ̀i é m'péé ye pesá pa cɔ̰́ɔ̰̀di. ² Pà péé-sa-dà, k'òo wɔ̰̀ǹti é peǹta pa yìhìka. K'òo yìhìka sikàdi è yònà wèǹku, k'òo báatí é pɛ́ídá è yònà wenkú. ³ Kà pá ceḿ é n'hɔ̰́tà Mɔ̀yísì nà Èdíì fodà-ní òò wɛì-nà. ⁴ Kà Píyɛ́ɛ̀ óò caka è yɔ̀: N Teù, yè sudi tí m'péé miì-dà. K'à kpɛ̀i, n kó pḭ́ná miì fḭ́ḭná nàta̰a̰-dà, fɔ̰́ń kùcɔ̰́, Mɔ̀yísì kùcɔ̰́, Èdíì tɔkú.

⁵ Ò de káà wɛì mɛmá-dà, kà wɔ́ɔ̀di nìcɔ̰́nì, kà nì nɛ́ɔ́dí é tɛ̀ni é pà cḭ̀na. N'ɛ̀ɛ wɔ́ɔ̀di mɛhɛká-ní, kà pá yekà Weèdi boòku kà kù tonà: Mɛnǹ yòǹ n bíitá-dà n dɔ́sí-ta sukú kà n yàma wɛǹni péé ta hḭ́ǹka, tà besí-nà.

⁶ O dapàm̀ma yeèkaà ye boòku, kà wantafɔ̰̀di é pà cɛ̰ɛ̰́ dɛ́dɛ́í, kà pá wɛ́í-ho pa cɔ̰́ɔ̰̀di teǹka bìbìùdi. ⁷ Kà Sèsíì é pà hɛ́tá-ho é pà pḭ́ń è yɔ̀: Nɛ dá n'wani, yíí-nà! ⁸ Kà pá yíí-ní é wáńtá, pà koò pú dɛ́hà òcɔ̰́ǹ, Sèsíì cɔ̰́ɔ̰̀di bààsí.

⁹ Kà pá n'sḭ́ńti-ní ye ta̰à̰di hḭ́ǹka, kà Sèsíì é pà caka è yɔ̀ pà dá yetá é caka òcɔ̰́ǹ pa dɛ́hà-sa, háá é n'sànà Niìfòùo bíitá kó yá̰ńtá-ma-ní kpíípa mɛhɛká.

¹⁰ K'òo dapàm̀ma óò béka è yɔ̀: Baà tee kà Weèdi kpɛ̰́ńtìnùka biɔhànapá toò: Yè békáà Èdíì-dà é cedí tóní? ¹¹ K'ó pà tɛ̰́ná è yɔ̀: Mɔ́masí-dà, Èdíì yònà é cetá tóní-ma-ní é tɛ̀ni é dɔ̀hà niìi wɛǹni yè de yòm̀pu. ¹² Mmí há̰ nɛ cakú-ma, è yɔ̀ Èdíì yɔ̀ɔ tóḿpu-dà-ní, àmá nìpa p'óò bantà, óò pa̰á̰ pà kpɛ̀i-sá. Ma kú bookú-dà, pà mɛ̀ɛ té kó diá-ma náńkú Niìfòùo bíitá. ¹³ K'òo dapàm̀ma é bantá ye wɔ̀ni è yɔ̀ ò wɛì Ìsá̰-Bàtísì-dà.

Sèsíì kpekànà bíitá kà tà dɔdì kpíǹkpíìka

¹⁴ Pà ta̰ntà tíń wɔ̀ni nìku pesá, kà dɔɔ̀o òcɔ̰́ǹ óò hɛ́tá-ho é hìu o yìhìka è yɔ̀: ¹⁵ N Teù, kɔń séèma n bíitá! Tà mɔn kpíǹkpíìka-dà, è dɔdì wɔ̀ka wɛǹni ha̰mú mɛhɛká yoo nɛ́ɛmá mɛhɛká. ¹⁶ N tà tɛɛ̀ní a dapàm̀ma-dà kà pá tà hɛ̰ka kpekànapú. ¹⁷ Kà Sèsíì é tɛ̰́ná è yɔ̀: Wɔ̀ǹkù mɛnkù kú nìpà nɛ́na, nɛ kɔ́ɔ́ dandaní è tṵ́mà pa̰kú sḭ̀ḭ̀ma. Háá wɔ̀ni m̀mɔ́ni-dà n baà kó nɛ m'péé-nà-ma? Háá daadí m̀mɔ́ni-dà n kó nɛ m'pa̰kú-nà-ma mùyɔ̰? N ya̰à̰-nà-ní miì ye bíitá. ¹⁸ Kà pá tà tɛɛ̀ní, kà Sèsíì é wɛɛ́-nà kpeéma wɛɛ̀ko mɛ̀ǹǹ de tà fá̰kápú-ko, k'ó yɛ̀dì ta mɛhɛká, kà tá kpeka ye wɔ̀ni ni cɔ̰́ɔ̰̀di mɛhɛká.

¹⁹ K'òo dapàm̀ma óò pàdi-ho pà péé tíń wɔ̀ni pa cɔ̰́ɔ̰̀di pesá, óò béka è yɔ̀: Baà tee kà ti pú nɛɛ̀ é bɔhà ye wɛɛ̀ko-ní? ²⁰ K'ó pà tɛ̰́ná è yɔ̀: Nɛ dandaní pú wɛhi-má kpɛ́mú-dà tee mɛma. Bemú-dà n nɛ cakú-ma, kà nɛ dandaní cɛ̰́hímú sá̰à̰-nà kṵ̀ǹsɔ̰̀bíifá, nɛ kó nɛɛ́ é caka-á-ma ta̰a̰dì mɛnì è yɔ̀ yíí miì é taá fìci mɛnkà, kà ní yídá. Yècḭ́ḭ̀ pú kó nɛ n'dɔǹ-nà. [\v 21 Àmá, ye kú wɛɛ̀kò mɛnǹ kú bookù, num̀boóma nà weèdɔɔ̀pu cɔ̰́ɔ̰̀di-dà pà hɔ̰́ nɛɛ́ ò bɔ̀hà-nà-ma.]

Sèsíì tṵ́mà cakú o kṵ́mú n'ɔ̀ɔ yá̰ńtáma wɛmá

²² Daadí yènì, Sèsíì n'ɔ̀ɔ dapàm̀ma kà pá m'péé Kàdìdéè, k'ó pà caka è yɔ̀: Pà kó taàa Niìfòùo bíitá nìpa nɔ̀hi mɛhɛká-dà, ²³ kà pá tà kɔ̀ù, àmá data̰á̰di daadí, kà tá yá̰ńtá-ní. K'òo dapàm̀ma yàma é cɔ̰ha dɛ́dɛ́í.

Sèsíì bodà Weèdi hɔ̰́ɔ̰̀ta dàm̀póò

²⁴ Sèsíì n'ɔ̀ɔ dapàm̀ma, kà pá ta̰ntá Kàpɛ̀nàúm̀. Mɛ̀m̀pà de ta̰à̰ni-pá Weèdi hɔ̰́ɔ̰̀ta dàm̀póò^a, kà pá pàdi Píyɛ́ɛ̀, óò béka è yɔ̀: Nɛ dakpɛ̰́ǹn pú bopù Weèdi hɔ̰́ɔ̰̀ta dàm̀póò-à? ²⁵ Kà Píyɛ́ɛ̀ é tɛ̰́ná è yɔ̀: Ò bopù-ú-ma.

Píyɛ́ɛ̀ dúti tíń wɔ̀ni hɔ̰́ɔ̰̀ta mɛhɛká, kà Sèsíì é cedí é tóó wɛmá è yɔ̀: A maàhu m̀mɔ́ma-dà Sìmɔ́ɔ̀? Wodà yònà é bodá dàm̀póò yoo díicáhàci fòùkù mɛnkù kú wóópa? Pa teǹka bííhí-dà nkɛ́ɛ̀ cà̰ma? ²⁶ Kà Píyɛ́ɛ̀ óò tɛ̰́ná è yɔ̀: Cà̰ma-dà. Kà Sèsíì óò caka è yɔ̀: Kà mɛmá-dà, teǹka bííhí pú yònà é bodá mɛmɛ-ɛ̀. ²⁷ Ti há̰ dá hédá kà nìpa yàma é ti yɛ̀dì, tɔɔ̀ta dàmɛ́dì, é tɛ̀i ká̰ńtá num̀bíipeǹfa. Num̀bíicecetá a kó cɛ̰ɛ̰́-ta, kpetá ta nùdi, a kó dɛ́há dífa kà fà tɛ̀i a kó bodá-ma n dàm̀póò n'àa kóoó.