Màtíyéè 16

Fàdísìpa nà Sàdúkìpa békú pɔ́ńtáyḭdó

¹ Kà Fàdísìpa nà Sàdúkìpa é pàdi Sèsíì è kpɛ̀i óò bɛń. Kà p'óò cɔ̀hà è yɔ̀ ó pa̰á̰ pɔ́ńtáyḭdó mɛ̀ǹǹ kó bɛka-ko è yɔ̀ o nɔɔ̀ti péé-nà-ní Weèdi pesá-dà. ² K'ó pà tɛ̰́ná è yɔ̀: Kà weèdi dɔti, nɛ hɔ̰́ n'yɔ̀: Hḭ́ńkà weni-mà, tafà kó n'kɔ́ɔ́. ³ Ká̰ńyɛ̰̀ǹfa, kà hḭ́ǹka binì, kà nɛ té yɔ̀: Tafá-dà kó dɔdi yenì. Nɛ nɔn è bahiní hḭ́ǹka peǹtamá-dà è há̰ pú kó nɛɛ́ bantá wɔ̀nì ti péé-dì kú bɛkàma cakú-sa? ⁴ Wɔ̀ǹkù mɛnkù kú nìpa yòǹ kpákpààpa-dà, pà pú tṵ̀n Weèdi cɔ̀ku è há̰ békú n pa̰á̰ pɔ́ńtáyḭdó. Pà pú kó dɛ́há pɔ́ńtáyḭdó tɔɔ̀o òcɔ̰́ǹ k'yè pú yòǹ Sònásì kóoó. Ò wɛɛ̀-ma mɛma, é yíí é ka̰há é pà hédá.

Pa̰á̰-nà yɔkàma nà Fàdísìpa nà Sàdúkìpa

⁵ K'òo dapàm̀ma é n'deèku ye baàdi sóìdi tɔɔ̀di, é dúí pà kó tóó-ma pɛ̰́ɛ̰̀pa. ⁶ Kà Sèsíì é pà caka è yɔ̀: Paá̰-nà yɔkàma nà Fàdísìpa nà Sàdúkìpa yòmu yíkànasá. ⁷ K'òo dapàm̀ma é cetá è wɛì pa cɔ̰́ɔ̰̀di pesá è tonà: Ti pú tóò-ma pɛ̰́ɛ̰̀pa kpɛ́mú-dà tee k'ò wɛì mɛma.

⁸ K'ó bantá pà de wɛì-sa é pà béka è yɔ̀: Baà tee kà nɛ wɛì nɛ cɔ̰́ɔ̰̀di pesá è toò, nɛ pú tóò-ma pɛ̰́ɛ̰̀pa kpɛ́mú-dà tee kà n wɛì mɛma? Nɛ dandaní pú wɛhi báà cɛ̰́ma. ⁹ Nɛ mun pú yeèkaà? Nɛ koò pú dèn ye pɛ̰́ɛ̰̀pa pànùm̀ nɛ de todi-pá nìpa tòhi-kànùm̀ kà pá dii, nà náḿbòhi nɛ de tíkà-hi mìì sɔ̰́ńtà-sa-à é kònà? ¹⁰ Nɛ mɛ̀ɛ koò pú dèn, ye pɛ̰́ɛ̰̀pa pàyehì nɛ de totà-pa nìpa tòhì-kànàhì kà pá dii, nà náḿbòhi nɛ de tíkà-hi mìì sɔ̰́ńtà-sa é kònà nkɛ́ɛ̀? ¹¹ Ntɛ́ yè hḭmà, kà nɛ pú bantà è yɔ̀ n pú nɛ wɛì-nà pɛ̰́ɛ̰̀pa wɛkú, n nɛ cakú tíń wɔ̀ni è yɔ̀, nɛ́ pa̰á̰ yɔkàma nà Fàdísìpa nà Sàdúkìpa yòmu yíkànasá?

¹² Ye wɔ̀ni-dà há̰ dɛɛ̀ pà bantà-ma è yɔ̀ ò de pú pà wɛì-nà pɛ̰́ɛ̰̀ yòmu kú yíkànasá, àmá ò de pà wɛì-nà Fàdísìpa nà Sàdúkìpa biɔhànamá hḭ́ǹka-dà.

Píyɛ́ɛ̀ wɛdà è yɔ̀ Sèsíì yòǹ Weèdi ta̰kadáko

¹³ Kà Sèsíì é yíí taá Sèsàdéè-Fìdípù teǹka mɛhɛká. K'ó tɛ̀i é béka o dapàm̀ma è yɔ̀: Nìpa wɛì mmí Niìfòùo bíitá n hḭ́ǹka è toò n yòǹ wodà? ¹⁴ Kà p'óò tɛ̰́ná è yɔ̀: Pàcɔ̰́ toò a yòǹ Ìsá̰-Bàtísì-dà, kà tɔɔ̀pa toò a yòǹ Èdíì-dà, é yíí kà tɔɔ̀pa toò a yòǹ Sèdèmíì-dà yoo Weèdi wɛtɛ̰́nápa tɔɔ̀pa p'oòcɔ̰́. ¹⁵ K'ó pà béka è yɔ̀: Nɛ́na há̰kà tá, nɛ toò n yòǹ wodà? ¹⁶ Kà Sìmɔ́-Píyɛ́ɛ̀ óò tɛ̰́ná è yɔ̀: A yòǹ Weèdi ta̰kadáko-dà, Weèdi mɛ̀nì fòù-di Bíitá.

¹⁷ Kà Sèsíì óò caka ye wɔ̀ni è yɔ̀: Wɛ̀ɛ̀di é nà m'péé-nà Sìmɔ́ɔ̀ Sònásì bidà, è yá̰á̰ yè pú yòǹ nìdo-d'àà cakáà ye wɛmà, àmá n Báàa mɛ̀ǹǹ péé-ko hḭ́ǹka-dà mà n'àà cakáà. ¹⁸ Mmí mɛ̀ɛ a cakú è yɔ̀ a yòǹ Tá̰à̰di-dà, ye tá̰á̰dì hḭ́ǹka-dà mɛ̀ɛ dɛɛ̀ n kó fiìka-má (tṵná-ma) n nìku, bá kṵ́mú pú kó nɛɛ́ kù pa̰á̰ yècḭ́ḭ̀. ¹⁹ N k'áa kɔ̰́ɔ̰́ hḭ́ǹka wóòti pencí-dà. A kó yee-sá tenkà mɛnkà kú hḭ́ǹka, pà k'éè yee-é-ma hḭ́ǹka mɛhɛká. A mɛ̀ɛ kó teha-sá tenkà mɛnkà kú hḭ́ǹka, pà k'éè teha-á-ma hḭ́ǹka mɛhɛká. ²⁰ Ye kú dàhàka, k'ó fedí o dapàm̀ma há̰ḿbíifá, é pà caka è yɔ̀ pà dá ca-caka òcɔ̰́ǹ è yɔ̀ ò yòǹ Weèdi ta̰kadáko.

Sèsíì cakú o kṵ́mú n'ɔ̀ɔ yá̰ńtáma

²¹ É tódá ye kú wɔ̀ni, kà Sèsíì é cetá è cakú o dapàm̀ma pópóí, è yɔ̀ yè békú ó taá Sèdìsàdɛ́m̀-dà, é tɛ̀i kà yɔtí kpɛ̰́m̀ma, nà dɔ̀hɔ̀ka yam̀ma kpɛ̰́m̀ma, nà Weèdi kpɛ̰́ńtìnùka biɔhànapá óò diá náńkú dɛ́dɛ́í, óò kɔ̀ù, data̰á̰di k'ó yá̰ńtá. ²² Kà Píyɛ́ɛ̀ óò yíí bɛ́ɛ́kú óò wɛ́di-nà è yɔ̀: Weèdi dá yè tɛɛ̀ní, n Teù! Ye kú niì dá a tɛ̀n-tɛ̀ni. ²³ Kà Sèsíì é fitá óò caka è yɔ̀: Nátá n pesà Wɛɛ̀kupá wódì fɔ̰́ń! A n yòǹ kpanáma-dà n dehèmu cɔ̀ku mɛhɛká, è yá̰á̰ a yam̀màhàka pú yòǹ Weèdi kpɛ́ɛká, kà yòǹ nìpa kpɛ́ɛká-dà.

²⁴ Ye kú dàhàka, kà Sèsíì é caka o dapàm̀ma è yɔ̀: Kà mɛ̀ǹǹ kpɛ̀i é n tṵṵ̀na-kó, k'ó héé o mɔ́nń dɔ́kàma, é tóó o kpíidɔkú é toó é n tṵṵ̀na. ²⁵ Mɛ̀ǹǹ kó n'kpɛ̀i-kó é fḭ́hìna o fòùmu, ò kó mù féná-ma. Kà mɛ̀ǹǹ mɛ̀ɛ mù fénà-ko nà n kpɛ́mú, ò kó mù dɛ́tá-ma. ²⁶ Cɔ́ńtídi m̀mɔ́ni-dà nìi kó n'káá-ma, k'ò dɛ́tà fòùku kpɛ́ɛsá wɛǹni, àá fénà o fòùmu? M̀mɔ́ńya̰-dà ò kó nɛɛ́ kɔ̰́ɔ̰́-ma é tṵ́má mù dontá? ²⁷ Niìfòùo bíitá kó tóní-ma-ní nà ta tɔntɔndipá ta Báàa wɛhimú mɛhɛká, é tɛ̀ni é kɔ̰́ɔ̰́ bá mɛ̀ǹǹ dɛ̀ɛ̀-ko o pa̰á̰ma sànà-sa. ²⁸ Bemú-dà n nɛ cakú-ma, pàcɔ̰́ péé-ma miì è kó dɛ́há kà Niìfòùo bíitá é tóní è yòǹ wódo, é nɛɛ́ kpíí.