Màtíyéè 15

Sèsíì wɛì-nà Fàdísìpa, pa bookú pa̰á̰ma hḭ́ǹka

¹ Kà Fàdísìpa nà Weèdi kpɛ̰́ńtìnùka biɔhànapá é yɛɛ̀ni nà Sèdìsàdɛ́m̀, é tɛ̀ni Sèsíì pesá, óò béka è yɔ̀: ² Baà tee k'àa dapàm̀ma pú tṵ̀n pa̰á̰ma ti yààpa ti héè-ma? Pà pú hɔ̰́ nɛɛ̀ta é nɛɛ́ dii. ³ K'ó pà tɛ̰́ná è yɔ̀: Nɛ́na tá! Baà tee kà nɛ yeekú-nà Weèdi kpɛ̰́ńtìnùka, è tṵ̀n nɛ bookú pa̰á̰ma? ⁴ Weèdi yɔ̀: Ní n'cunì a báàa n'àa màa, é yíí tṵ́màkaà mɛ̀ǹǹ kó wɛɛ́-nà-ko o báàa yoo o màa kpákpààma, pà yònà é kɔ̀ù-ú-ma ye yaǹn. ⁵ Àmá nɛ́na há̰ cakú nìpa è yɔ̀: Kà nìi cakáà o báàa yoo o màa è hḭ́n, n de káá-sa è k'áa tempa-nà, n yè pɛ̰ḭ Weèdi, ⁶ yè koò pú hɔ̰́ m'békú ye yaǹn pa̰á̰ yècḭ́ḭ̀ o báàa yoo o màa kpɛ́mú. Ma kú bookú-dà nɛ kpíínì-ma Weèdi wɛmá cakú-sa, è tṵ̀n nɛ bookú pa̰á̰ma. ⁷ Yam̀pèǹtacì nɛ́na! Èsàyíì de naá-ma, ò de wɛɛ̀ tíń daadí nɛ hḭ́ǹka è yɔ̀:

⁸ Bookù mɛnkù ǹ dùǹti nà ku nùdi-dà,

ku yàma pú n tɔ́sí-nà báà cɛ̰́ma.

⁹ Hécí-dà kù n dùǹti-má,

mìì tee-sá kù biɔhɔnì-sa yòǹ nìpa kpɛ̰́ńtìnùka-dà.

Mìì pa̰kú-sa nìdo yɔ̰́káma Weèdi yìhìka

¹⁰ Kà Sèsíì é yíí-ní nìpa é pà caka è yɔ̀: Besí-nà é yekà n kpɛ̀i é n'yɔ̀pu: ¹¹ Yè pú yòǹ mìì dúù-sa nìdo nùdi mɛhɛká-dà òò pa̰kú yɔ̰́káma. Àmá, mìì yɛ̀hu-sá-ní o nùdi mɛhɛká-dà ò pa̰kú yɔ̰́káma Weèdi yìhìka.

¹² K'òo dapàm̀ma óò hɛ́tá-ho ye wɔ̀ni óò caka è yɔ̀: A yá̰á̰ è yɔ̀ a wɛdà-mà kú bookù, yè pú naakáà Fàdísìpa? ¹³ K'ó pà tɛ̰́ná è yɔ̀: Tepú n Báà hḭ́ńkà kóoó pú híù-pu wɛǹni yònà é fokadá-ma. ¹⁴ Pà héé-nà-ho. Yɔ̀ma-dà kà pà dɛ̀di yɔ̀ma. Kà yɔ̀ǹn há̰ dɛɛ̀di yɔ̀ǹn, pa dɛ́ɛ̀di pà kó dɔdi fɔ̰̀ɔ̰̀ku mɛhɛká-dà.

¹⁵ Kà Píyɛ́ɛ̀ é tóó wɛmá óò caka è yɔ̀: Ti wekàna ye wɛbemù yohènamà-ní. ¹⁶ Kà Sèsíì yɔ̀: Nɛ́na mɛ̀ɛtékà, nɛ kɔ́ɔ́ yam̀màhàdi è kó yekà? ¹⁷ Nɛ pú yá̰á̰ è yɔ̀ mìì kú wɛnnì dúù-sa nùdi mɛhɛká, hɔ̰́ dúú piidí mɛhɛká-dà, é ka̰há é yɛ̀ɛ̀ fɔ̰́di bɛ́ka? ¹⁸ Mìì há̰ yɛɛ̀hu-sá-ní nìi nùdi mɛhɛká, mii péé-nà-ní o yàma mɛhɛká-dà, mií-dà mɛ̀ɛ ò kɔ̰́nì yɔ̰́káma. ¹⁹ Nìi yàma mɛhɛká-dà yam̀màhàsḭ̀ka yɛɛ̀hu-má-ní òò túdì niìkɔ̀ùpu mɛhɛká, nà dɔɔdí cɔ̰hàma mɛhɛká, nà dɔ́ɔ́ma, nà túùpu, nà báńdàfa sídàpa yìhìka, nà tɔɔ̀o yèdi cɔ̰hàma. ²⁰ Mií-dà pa̰kú nìdo yɔ̰́káma Weèdi yìhìka. Àmá, é dii è pú nɛtà, mii pú pa̰kú nìdo yɔ̰́káma Weèdi yìhìka.

Poòo òcɔ̰́ǹ dań Sèsíì è pú yòǹ Sùwífùpa bookú

²¹ Kà Sèsíì é yídá ye pesá, é taá yɔtí pà toò-ti Tíì nà Sìdónì teǹka mɛhɛká. ²² Kà poòo òcɔ̰́ǹ é tɛ̀ni o pesá, è yòǹ Kànánìpa bookú, è de péé ye teǹka. K'ó é tɛ̀ni é dedí kpeéma è yɔ̀: N kɔń séèma n Teù, Dàfítì bidà! Wɛɛ̀kupá-dà fá̰kápú dɛ́dɛ́í n sepàǹn. ²³ Àmá, Sèsíì p'óò tɛ̰́nà màcɔ̰́mà. K'òo dapàm̀ma óò hɛ́tá-ho óò caka è yɔ̀: Bɔhà ye pooò-ní, ò baà ti tṵ̀n-ń-ma è toó hodí. ²⁴ Kà Sèsíì é tɛ̰́ná è yɔ̀: Ìsìdàyɛ́dìpa yònà hɔ̰̀ci mɛ̀ǹcì fée-cí-dà. Weèdi n tɔn-ní pa kú cɔ̰́ɔ̰̀di kpɛ́mú-dà.

²⁵ Àmá, k'yèe poòo é tɛ̀ni hìu o yìhìka è yɔ̀: N Teù, n tempa-nà. ²⁶ Kà Sèsíì óò tɛ̰́ná è yɔ̀: Yè pú sudi n tódá bííhí dimá é mà kɔ̰́ɔ̰́ mɔbímú.

²⁷ K'yèe poòo óò tɛ̰́ná è yɔ̀: Bemú-dà n Teù, àmá mɔbímú hɔ̰́ n'ta̰nkú-ma mu yaǹn hɔ̰́ n'yon kà mìì nɔ́hú-sa teǹka.

²⁸ Kà Sèsíì óò tɛ̰́ná ye wɔ̀ni è yɔ̀: Poò, a dandaní wɛhi sàma-dà. A kpɛ̀i-sá, yé pa̰ná mɛma. Ye wɔ̀ni ni cɔ̰́ɔ̰̀di mɛhɛká, k'òo sepàǹn é kpeka.

Sèsíì kpekànà mɔkàpa dɔ́ɔ́di

²⁹ Kà Sèsíì é yídá ye pesá, é taá Kàdìdéè baàdi nùdi bɛ́ɛ́kú. K'ó tɛ̀i dìsi ta̰à̰di hḭ́ǹka, é kaàdi. ³⁰ Kà nìku dɔ́ɔ́di é tɛ̀ni o pesá, è toó-ní mɛ̀m̀pà cèǹtì-pa tàdi, nà yɔ̀m̀ma, nà hɔ̀ùhi, nà mùkàpa, nà mɔkàpa tɔɔ̀pa dɔ́ɔ́di. Kà pá tɛ̀ni é pà hḭ́ná o yìhìka, k'ó pà kpekàna. ³¹ K'yé dii nìpa dɛ́dɛ́í nà pà dɛ́hà-ma kà mùkàpa wɛì, kà hɔ̀ùhi kpekáà, kà yɔ̀m̀ma dìi, mɛ̀m̀pà cèǹtì-pa tàdi kà pá cèǹtì sá̰sá̰. Kà pá duntà Ìsìdàyɛ́dì Weèdi dɛ́dɛ́í.

Sèsíì dià nìpa tòhìka kànàhì

³² Kà Sèsíì é yíí o dapàm̀ma é pà caka è yɔ̀: Séèma-dà n káá n'ɛ̀ɛ nìkù mɛnkù kpɛ́mú, mìì tee-sá yè hḭn daàka kàta̰a̰-dà mɛmà kà kù n péé-nà, kù koò pú káá kù kó dii-sá. N pú kpɛ̀i kù wìhìna nà kòni, kà kù dá n'sá̰á̰ cɔ̀ku é hɛ̰ka ta̰ntápu. ³³ K'òo dapàm̀ma óò caka è yɔ̀: Nìì kɔ́ɔ́ bɛ̀m̀bɛ̀nì mɛnì kú mɛhɛká. Ti kó dɛ́tá ya-dà dimá, é diá nìkù mɛnkù kú wɛǹni kà kú dɛn? ³⁴ K'ó pà béka è yɔ̀: Pɛ̰́ɛ̰̀pa pàdɛɛ-dà nɛ káá-ma? Kà p'óò tɛ̰́ná è yɔ̀: Pɛ̰́ɛ̰̀pa pàyehì nà séèka cɛ̰́ma.

³⁵ K'ó caka ye wɔ̀ni ye nìku è yɔ̀ kú kaàdi teǹka. ³⁶ K'ó tódá ye pɛ̰́ɛ̰̀pa payehìka n'ɛ̀ɛ num̀bííhí, é sɛda Weèdi, é wɛ́ha ye pɛ̰́ɛ̰̀pa, é pà kɔ̰́ɔ̰́ o dapàm̀ma kà pá pà totá nìpa wɛǹni. ³⁷ Pa wɛǹni kà pá dii é dɛn. K'òo dapàm̀ma é tíká ye fììka mɛ̀ǹkà de sɔ̰́ńtà-ka, kà ká sṵ́ná náḿbòhi hìyehì, é kònà. ³⁸ Mɛ̀m̀pà de dii-pá ye dimá, daapá de yɔ̀ɔ-ɔ́-ma tòhìka kànàhì kpɛ́ɛmá, é m'bààsí poòpa nà bííhí. ³⁹ Ye kú dàhàka, k'ó wihìna ye nìku, é dìsi hà̰à̰pu hḭ́ǹka, é ka̰há Màkàdánì tempáàku mɛhɛká.