Anyaarubha e kabhere e
Yohana
Amakëërani
1
Eni omugharuka o riikanisa,
neghokwandëkëra iye omosubhaati omwahöru,
haghirohamu na abhaana bhaachoa bhano nesiighiri kwo bhuhëënë.
Taanyi eni mwene hangʼu nebhasiighiri,
koru na abhande bhano bheeche obhuhëënë,
ibho bhoose mbabhasiighiri kwo hëënë.
2 Nebhasiighiri gho kubha eni na niinyu ntweche obhuhëënë,
wiiki ntokwëndërëra kobhumënya miishe ghyose.
3 Mbe,
Taata Waryobha na Yesu Kirisito Omoona waache,
mbaghotuha aghareeya na mbaghotorigheri changori,
na ghotuha omurëmbë,
itu bhano toghutambana obhosiighi no obhuhëënë.
Kumanya kwo bhosiighi
4 Nichömiiru chwee hano nyoghwire ighoro e bhaana bhaacho abhamu kubha mbaghöötiri obhuhëënë,
kinya bhuure Taata Waryobha ꞉aturagheriiri.
5 Ibheere omosubhaati omosiighani,
mo‑nyaarubha ino neghoghusabha osooke emeghiro ghino ghekobhugha kubha tosiighane.
Emeghiro ghiyo,
taanyi mihë,
amare n‑ghiire ghiire toore naghyo korwera hano tookumiri.b
6 Ghosiighana n‑kwëndërëra ghosooka emeghiro ghe Ryobha.
Omoghiro uno ꞉mooghwire korwera hano mokumiri n‑kubha,
mumanye kwo bhosiighi.
Motabhaghënëhi abheeghi bha bhuröngö
7 Nekobhugha hangʼu gho kubha abharöngö bhaaru mbarweriire mo‑se ino,
bhano bhataaghwishereri kubha Yesu Kirisito ꞉niichiri akabha no omobhere kinya omooto.
c Omooto wowoose uno aghosiikëra ghayo n‑omuröngö,
wiiki n‑omobhisa o Kirisito.d
8 Ibheere mwichonge inyu bheene,
kubha motaacha kobhori emeremo ghino muköriri ambërë e Ryobha,
amare mubhönë atuho e hëënë.
9 Wowoose uno ataakwëndërëra ghughööta ameeghi gha Kirisito,
wiiki naghugharura ameeghi ghayo,
uyo taanyi no obhumu ne Eryobha.
Amare,
uno akwëndërëra ghughööta ameeghi gha Kirisito,
naanyi no obhumu na Taata Waryobha no Omoona waache.
10 Mbe,
aribha omooto wowoose akuucha ghokoonyu uno ataakweghi obhuhëënë ighoro e Kirisito,
motamughënëhi mo‑chanyumba cheenyu,
koru motamukëëri kinya Omokirisito mughëndi waanyu.
11 Omooto uno akomukëëri,
naanyi haghirohamu nawe mo‑masari ghano aghuköra.
Amangʼana gha kuragha
12 Ibheere neenyi na amangʼana maaru ghano nekwënda kobhabhoorera,
amare nteekwënda kobhaandëkëra ghayo mo‑nyaarubha ino.
Amare,
neghwitëngʼëra kuucha kobhataarera na ghosiikëra haghirohamu na niinyu obhosho kwo bhosho,
kubha ghuchömëru kwito kohikeerane.
13 Mbe,
abhaana bha mosubhaati waanyu uno ahwiru ne Eryobha,
mbaghoghukëëri.