Bhawuro ˆaghaye mo‑se e Maketoniya na Bhoyunaani
20
Mbe,
anyööri e hayo Ebheeso yiiche ghosira,
Bhawuro akabhabherekera Abhakirisito bha hayo,
akabhatoora omukörö,
akabharagha,
aghaye mo‑mukööwa o Maketoniya.
2 Akabha araheta mo‑se iyo,
arabhabhoorera Abhakirisito amangʼana maaru gha kobhatoora omukörö.
Akamara aghaye mo‑se e Bhoyunaani,
3 iyo akamara‑ho emyëri etato.
Hano are aragharuka no obhwato mo‑mukööwa o Siiriya,
Abhayahuuti bhaghaköra ekiina kebhe ighoro yaache,
amangʼana ghayo ghaghaghëri agharuke ahetere mo‑mukööwa o Maketoniya.
4 Eriibhagha riyo,
Bhawuro naare araköra orughëndö haghirohamu na Sobhateeri mwërëëti o Bhiiro o mo‑moghya o Bherooya,
haghirohamu na abhaato bhabhere bha Tesaronike,
Arisitaariko na Sekundo,
Ghaayo o mo‑moghya o Teeribhe,
na Timotewo,
na abhaato bhabhere bha Asiya,
Tikiko na Torobhiimo.
5 Abhaato bhayo bhaghakangata bhaaghaye mo‑moghya o Torowa,
bhaghatughanya iyo.
6 Hano anyangi e mighaate ghino ghetaaghotooreru eghetondori esiriri,
tookaru mo‑moghya o Bhiribhi no obhwato.
Toghaköra orughëndö gho chaasiko ishaano mbagha tokahika mo‑moghya o Torowa,
niho tutëmëriine na abhaghëndi bhiito bhayo.
Toghiikara hayo chaasiko mohungate.
Bhawuro ˆakamoryoki Ewutiko
7 Orosiko ro Chumabhiiri,
toghiikomana,
gho ghiri tosuure omughaate haghirohamu.
Eriibhagha riyo Bhawuro aghasëëma ghosiikëra angʼana e Ryobha na abhaato,
mbagha obhotiko bho ghate,
gho kubha naare ariitëngʼëra atanure atabhoori yaache.
8 Mo‑kenyumba kino toore,
mwirëngö,
mbeere‑mu ebhemore bhyaru bheraaka.
9 Omobhureni umu eriina reeche Ewutiko naare ikeere mo‑ritirisha hano Bhawuro are arëëndërëra ghosiikëra.
Ewutiko aghasëëma ghosundaghera,
antenero chandöörö chekamokeya aghagho haase koru ighoro.
Bhakamutööra amariri ghoku.
10 Mbe,
Bhawuro aghiika haase akiiraari ighoro e mobhureni uyo,
akamokumbatera,
akabhabhoorera abhaato bhayo akabhugha,
“Motatiina!
Naakubha muhöru!”
11 Akamara Bhawuro aghatiira mo‑kenyumba kiyo ki rëngö,
aghasuura omughaate akarë.
Akëëndërëra ghosiikëra mbagha bhooghake,
niho aghatanura.
12 Abhaato bhayo bhakamwimoki omobhureni uyo,
bhakamohira aka anyi muhöru,
bhaghachömëru chwee.
Bhawuro ˆakaraghana na abhagharuka bha Ebheeso
13 Bhawuro akaheta mo‑se ayoomu ghuye mo‑moghya o Aso.
Itu tooghaye iyo no obhwato,
gho ghiri tutëmëërane nawe iyo,
gho kubha hayo niho toore twishereriine kubha ntokomwimokeri‑ho.
14 Niho aghatubhöna iyo,
tokamughëgha mo‑bhwato bhuyo,
tooghaye haghirohamu mo‑moghya o Mitureene.
15 Hano bhookiire,
tökëëndërëra no obhwato bhuyo,
tokaheta rubhareka ro gheghinga ke Kiiyo.
Bhooghake,
orosiko ro ghatato toghatëënya ghuye mo‑gheghinga ghe Saamo,
toghiikara Tiroghiriyo.
Atabhoori yaache hano bhookiire,
tokahika mo‑moghya o Mireeto.
16 Bhawuro ꞉nëëndiri totaheta mo‑moghya o Ebheeso,
kubha ataacha ghukëëchëra hayo mo‑mukööwa o Asiya.
Naare arëënda abhëndë kohika Yerusareemu,
orosiko ro Bhentekositi rokeere kohika,
aribha engabheere hangʼu.
17 Hano Bhawuro are hayo Mireeto,
aghatomani amangʼana kwo abhagharuka bha riikanisa re Ebheeso kubha bhaache.
18 Hano bhahikiri hayo are,
akabhabhoorera,
“Inyu mweche bhuure ꞉niimanyiri ghate yaanyu,
korwera orosiko runo ꞉niitachiri mo‑mukööwa uno o Asiya.
19 Koru eriibhagha neere ndanyaakibhu ighoro e amagharokeri amabhe gha Bhayahuuti,
neere neramuhökëri Omutëmi kwo bhunyööhu bhoose,
na gho changishori.
20 Wiiki mweche kubha nteetighiri kobhabhoorera angʼana yoyoose ino engabhasakiiri inyu.
Neere nerabheeghi ghayo haheero,
koru na mo‑chanyumba cheenyu.
21 Neere nerabhabhoorera Abhayahuuti haghirohamu na abhaato bha matöngö kubha bhatuukuunere amasari ghaabho kwo Waryobha,
wiiki bhamokumi Omutëmi wiito Yesu Kirisito.
22 “Ibheere eni,
nekwëndëru na Akörö Ahörëëru kubha neghi Yerusareemu.
Neeghuye,
nangabha ntyeche ghano ghakumböna iyo.
23 Kino nyeeche n‑kubha,
mo‑moghya wowoose uno neekubha nerahetera,
Akörö Ahörëëru nëkönyëërëki kubha nekubhöna ebhibhöhö,
wiiki neekubha neranyaakibhu chwee.
24 Koru neraku,
taanyi gheghiro ghokoone.
Kino nekwënda nehikeerani omoremo uno Omutëmi Yesu aheere nikörë.
Omoremo uyo,
n‑kuraghaneri abhaato Angʼana Anchömu e ghareeya e Ryobha.
25 “Inyu bhoose,
mweche neere neraheta ghate yaanyu neraraghani ighoro e bhutëmi bho Ryobha.
Amare ibheere,
nyeeche kubha,
taanyi‑ho koru umu ghate yaanyu uno aghotora kondighi wiiki.
26 Gho ghayo,
ˆnekabhabhoorera haheero kubha,
aribha naanyi‑ho umu ghate yaanyu uno akobhora,
amasaahë ghaache ghataakubha ighoro yaane,
27 gho kubha ghano ghoose Eryobha reere rërëënda mumënyë,
nebhabhooriire ghoose netaanyi na ahaho yoyoose.
28 Akörö Ahörëëru nebhatooriri mubhe abhiimeerereria bha bhaato bhaache.
Gho ghayo,
mubhe moriichonga inyu bheene,
mubhe morachonga ne eriikanisa reeche,
gho kubha eriikanisa riyo,
Eryobha ndereghoriri kwo masaahë gha Moona waache kobhatoori.
29 “Nyeeche kubha hano neekubha nebhatighiri inyu,
abhaato bhahaari kinya chasuuche,
mbakuucha ghateghate yaanyu,
na bhataakorerigheri changori erikinda riyo.
30 Wiiki koru ghate yaanyu inyu bheene,
mbakorwera‑mu abhaato bhano bhakobhugha amangʼana ghano ghataanyi gha bhuhëënë gho kobhangʼiina abhaanabheegha,
kubha bhabhatambane ibho.
31 Gho ghayo,
mubhe amiisho!
Mubhe morahiita kubha,
꞉niimariri emeeka etato,
obhotiko no omwishe nerabhashaangʼi omooto woose,
gho changishori.
32 “Ibheere nekabhatighera Eryobha ribhe niryo rekobhachonga.
Mubhe morachongu na angʼana yaache ino enyi na aghareeya.
Aghareeya yaache neghotora kobhaköngʼi,
mbagha mubhönë aghabho ino bhatooriiru abhaato bhaache bhoose.
33 “Eni ntiighombiri chambiiri che mooto wowoose,
koru sahaabhu cheeche,
koru amaghööti ghaache.
34 Inyu bheene mweche kubha neere neraköra emeremo kwo mabhökö ghaane,
gho ghiri e mënda ghaane,
na gha bhaghëndi bhano toore haghirohamu nabho.
35 Gho ghayo,
neere nerabhëërëki kubha ntokwëndëru tubhe torahöki kwo bhigheri,
kubha tubhönë ebheghiro bhe kobhatoori abhaato bhano bhataaghotora.
Eriibhagha ryose mohiite amangʼana ghano Omutëmi Yesu omwene abhughiri,
‘Ngʼoni abhaato bhano bhakoruusi,
ghokera bhano bhakuhaabhu.’”
36 Bhawuro hano amariri kobhugha amangʼana ghayo,
akabhuna ebheru haghirohamu na abhaato bhayo,
akarisabha Eryobha.
37 Bhakamara bhaato bhayo bhoose bhakamutahata Bhawuro kwo miigha ino bhararera gho changishori chaaru chwee.
38 Kino ꞉ghiighëriri bhabhe na amacheeche,
n‑ighoro e ngʼana ino abhughiri kubha bhataakomorighi wiiki.
Bhakamuhërëëkërëra mbagha bhakamohiki mo‑ryato.