Yesu ˆaghaturungʼaneru gho chandiryato
11
Hano Yesu na abhaanabheegha bhaache bhatingʼiri Yerusareemu,
haghuhe ne ebhyaro bhe Bhetibhaaghe na Bhetaniya,
mo‑gheghoro ke Miseyituuni,
Yesu akabhatoma abhaanabheegha bhaache bhabhere.
2 Akabhabhoorera akabhugha,
“Mughëndë mo‑kyaro kino keenyi ambërë yaanyu.
Hano moghusöha‑mu,
mokubhöna omoona o tikere abhöhuru,
uno ataamara aghëgha omooto.
Momusaasure momundëëtërë.
3 Omooto wowoose arabhabhoori,
‘Ngwake ˆmokamusaasura?’
momobhoorere mobhughe,
‘Omutëmi nakomwënda,
aramara nakomugharoki.’ ”a
4 Mbe,
bhaaghaye bhakamubhöna omoona o tikere abhöhuru mo‑nchëra ambërë e kehita,
bhakamusaasura.
5 Abhaato nyarebhe mo‑bhano bhaare bhiimeeriire hayo,
bhakabhabhoori bhakabhugha,
“Inyu!
Neke moghuköra hayo?
Ngwake mokomusaasura omoona uyo o tikere?”
6 Abhaanabheegha bhayo bhakabhagharokeri kebhuno Yesu are abhabhooriire bhabhughe.
Mbe,
abhaato bhayo bhakabhiisherereri.
7 Bhakamohirëra Yesu omoona o tikere,
na kwara changibho cheebho ighoro e tikere iyo.
Yesu aghatiira,
aghiikara,
aghasëëma orughëndö.
8 Abhaato bhaaru bhakaara changibho cheebho mo‑nchëra,
abhande bhakanunga ebhisaghe bhe mete koru mo‑meghondo na kwara mo‑nchëra.
9 Abhaato bhano ꞉bhaare bhamukangatiri Yesu na bhano ꞉bhaamoruure anyuma bhaghatiiri amaraka ghaabho bharabhugha,
“Hosaana!
b
Niitabhiiru uno akuucha kwo riina re Mutëmi Waryobha!c
10 Ntoghoghoghongi iye,
Omutëmi o bhutëmi bho sookoro wiito Tawuti bhuno bhokuucha!
Hosaana Eryobha re Mwishaaro!”
11 Yesu aghasöha Yerusareemu,
aghaye kimu kimu,
aghasöha Mwisëngërö re Ryobha.
Akamööhi chambaara choose,
akarighi ebheghiro bhyose bhino bheenyi‑mu.
Amare gho kubha n‑omughörööbha ꞉haare,
aghatanura,
aghaye Bhetaniya haghirohamu na abhaanabheegha bhaache ikomi na bhabhere.
Yesu ˆakawiihiima omotiini uno otaanyi na amakorobhese
12 Atabhoori yaache Yesu na abhaanabheegha bhaache mbaare bhararu Bhetaniya bharagharuka Yerusareemu,
anchëra ekamughööta.
13 Akarighi gho kurë omote o omotiini,
uno ore na amato maaru.
Akawishukerera arighi aribha noonyi na amakorobhese.
Amare hano ahikiri hayo,
akabhöna tughöötë,
n‑amato agheene wichwire,
gho kubha eriibhagha re ghusönga amakorobhese ndeere rekeere kohika.
14 Mbe,
akawobhoorera omote uyo akabhugha,
“Korwera reero ino mbagha emiishe ghyose,
otasönga amakorobhese!”
d Abhaanabheegha bhaache bhakooghu amangʼana ghayo.
Yesu ˆakahëëbha abhasorocha mo‑riigho re Risëngërö
15 Hano bhahikiri Yerusareemu,
Yesu aghasöha mo‑riigho re Risëngërö,
aghasëëma kobhahëëbha abhaato bhano ꞉bhaare bharaghori,
na bharaghora‑mu ebheghiro.
Aghacheturunkani chameecha che bhano ꞉bhaare bharakerani chambiiri,
ne ebhetumbe bhe bhano ꞉bhaare bharaghori chaasarari.
16 Wiiki,
tiishereriiru omooto wowoose ghughëgha egheghiro ghyokyose ghe ghoghori koheta mo‑riigho re Risëngërö.
17 Akamara Yesu akabheeghi,
arabhugha,
“Kana,
tyandëkuru mo‑Mandëkö Amatööbhiyu,
kubha,
‘Anyumba yaane neekubha anyumba e masabhi kwo bhaato bha matöngö ghoose’?
e Amare inyu,
ˆmokayiköra kubha akööbhö e manyangara!”f
18 Hano abhakoro bha bhachaama na abheeghi bha meghiro bhooghwire ghayo,
bhaghasëëma ghutabhara anchëra e komwita,
gho kubha,
mbaare bharamotiina,
abhaato bhoose mbaare bhararoghooru na ameeghi ghaache.
19 Hano bhwiriri,
Yesu na abhaanabheegha bhaache bhaghatanura koru mo‑moghya uyo.
Ghusabha Eryobha kwo bhokumi
20 Atabhoori yaache hano ꞉bhaare bharagharuka mo‑moghya o Yerusareemu,
bhakabhöna omote wuure o motiini woomiri woose koru emerya gheeche.
21 Bheetero akahiita amangʼana ghano Yesu abhughiri,
akamobhoorera akabhugha,
“Omweghi,
mööhi!
Omote o motiini uno ꞉wiihiimiri,
woomiri!”
22 Yesu akabhabhoorera akabhugha,
“Morekumi Eryobha.
23 Mahëënë ˆnekabhabhoorera,
aribha mahëënë omooto naghokumi na taanyi na ahaho mo‑motema waache,
ino akobhugha neghuköru.
Naghotora kobhoorera egheghoro kino kubha,
‘Iheka na kwirëkëra mo‑nyancha,’
na ghayo ngaghuköru.
24 Gho hayo ˆnekabhabhoorera kubha,
hano moghusabha ghyokyose,
mubhe no obhokumi kubha mokebhwine,
na moghokibhöna.
25 Amare hano moghusabha,
momwabhërë omooto wowoose uno abhatasiiri.
Niho Iso waanyu uno anyi Mwishaaro akobhaabhëra na niinyu amasari ghaanyu. [
26 Amare aribha inyu motaakwabhëra abhande,
Iso waanyu o Mwishaaro woose taakobhaabhëra amasari ghaanyu.]”
Abhakangati bha Bhayahuuti ˆbhakaanga obhuhëënë
27 Yesu na abhaanabheegha bhaache bhakahika wiiki Yerusareemu.
Hano ꞉bhaare bharaghënda Mwisëngërö,
abhakoro bha bhachaama,
na abheeghi bha meghiro na abhagharuka bha Bhayahuuti bhakamutambana.
28 Bhakamobhoori bhakabhugha,
“Ghano iye oghuköra,
noghuköra kwo bhotoro bhwa we?
Na n‑niwe uno akoheere obhotoro bho ghukörëra ghayo?”
29 Yesu akabhagharokeri akabhugha,
“Na neeni nekobhabhoori angʼana imu.
Morangarokeri,
nekobhabhoorera,
ghayo neghukörëra n‑kwo bhotoro bhwa we.
30 Kana,
Yohana,
obhotoro bho kubhatiisa abhaato hayi ꞉bhoorweriire?
꞉Mboorweriire Mwishaaro kwo Waryobha ghasi mo‑bhaato?
Mungarokeri!”
31 Bhaghasëëma kobhoorani abheene kwo bheene kubha,
“Torabhugha kubha,
‘꞉Mboorweriire Mwishaaro,’
naghotobhoori kubha,
‘Ngwake motaamokumiri?’
32 Amare,
torabhugha kubha,
‘꞉Mbooruure mo‑bhaato,’
abhaato mbaghotukararera.”
Mbaare bharatiina erikinda re bhaato bhano,
gho kubha bhoose mbaanyi no obhuhëënë kubha Yohana m‑murööti are.
33 Mbe,
bhakamugharokeri Yesu bhakabhugha,
“Itu toteeche.”
Woose akabhabhoorera kubha,
“Na neeni nteekobhabhoorera n‑kwo bhotoro ke neghuköra ghano.”