Mataayo 20

Eghetuubhaani ghe kobhareha abhatamishi

Yesu akaruusi eghetuubhaani akabhugha, “ mbotuubhiine no omooto uno anyi no omoghondo, uno ꞉ahorokiri anche hakeere kobhatabhara abhatamishi bha ghuköra emeremo mo‑moghondo waache o misabhiibhu. 2 Hano abhabhwine, omwene omoghondo aghiishererani nabho kobhareha omooto woose amareho gha rosiko rumu, akamara akabhahira mo‑moghondo waache.

3 “Atabhoori iyo hano chehikiri chaasa ishato, akaröbhöka anche wiiki, akabharighi abhaato abhande bhiimeeriire mo‑mutëëra bhataanyi na moremo. 4 Akabhabhoorera akabhugha, ‘Na niinyu moghi ghuköra emeremo mo‑moghondo waane o misabhiibhu. Na neeni nekuucha nebharehe bhoose kinya bhuno ekwëndëru.’ 5 Bhoose bhaaghaye.

“Mbe, eriibhagha eryobha rehikiri a‑mutu, akahoroka anche wiiki, aghatomani abhaato abhande bhaghi ghuköra emeremo mo‑moghondo waache. Hano ghahetiri amasa atato, aghaköra hangʼu hangʼu wiiki. 6 Hano ebheere omughörööbha akahoroka anche wiiki, akabharighi abhaato abhande bhiimeeriire mo‑mutëëra. Akabhabhoori akabhugha, ‘Ngwake mwimeeriire hano omwishe moghima motaanyi no omoremo wowoose?’

7 “Nabho bhaghagharokeri bhakabhugha, ‘Gho kubha taanyi‑ho omooto uno atoheere emeremo.’

“Iwe akabhabhoorera akabhugha, ‘Na niinyu moghi mukörë emeremo mo‑moghondo waane o misabhiibhu.’

8 “Hano bhwiriri, omwene omoghondo uyo akamobhoorera omwimeerereri o meremo gheeche akabhugha, ‘Bhabherekere abhatamishi bhoose obharehe amareho ghaabho. Eriibhagha okobhareha, ushame na abhatamishi bhano ꞉bhiichiri ekeenyuma na kumareereri na bhano ꞉bhiichiri ekimbërë.’

9 “Niho abhatamishi bhaare ꞉bhiichiri omughörööbha, bhakaacha bhakarehu amareho gha rosiko rumu. 10 Hano abhatamishi bhaare bhiichiri ekimbërë ꞉bhiichiri, ꞉mbiituuriri kubha mbakuhaabhu ghokera abhaghëndi bhano ꞉bhiichiri ekeenyuma. Amare omooto woose akarehu chambiiri chiire chiire che mareho gha rosiko rumu. 11 Hano bhabhwine amareho ghayo, bhaghasëëma kwingʼunyerangʼunyera kwo mwene omoghondo bharabhugha, 12 ‘Abhaato bhaare mbaköriri emeremo gho sa imu hangʼu! Kana, nibhu keenyi oghatoreha turëngʼiine nabho eriibhagha itu ntuköriri emeremo miköngʼu chwee no omu ꞉nootutëmiri mwishe moghima?’

13 “Omwene omoghondo uyo akamugharokeri umu mo‑bhaato bhayo akabhugha, ‘Oo musaani, ntekongʼiiniri gho ghyokyose. Kana, totiishereriini kubha noghuköra omoremo kwo mareho gha rosiko rumu? 14 Imoki chambiiri cheecho, ondwere hano! Eni mwene niisheriiri komoreha omooto uno arumusiire kuucha amareho ghano gharëngʼiine na ghaghaacho. 15 Kana, nteenyi no obhotoro bho kuhökëri ebheghiro bheene kinya bhuno nekwënda? Ghasi nokorighi eriihari gho kubha moruusi neenyi kwo bhaato abhande?’ ”

16 Yesu akabhugha wiiki, “Gho ghayo, abhaato bhano bhaanyi abhaanyuma ibheere, mbaakubha a bhambërë, na bhano bhaanyi a bhambërë, mbaakubha abhaanyuma.”

Yesu aghosiikëra mara e ghatato ighoro e ghoku na koryoka kooche

(Maariko 10:32–34; Ruuka 18:31–34)

17 Hano Yesu are mo‑nchëra aratiira ghuye , akabhiimoki rubhareka abhaanabheegha bhaache ikomi na bhabhere, akabhabhoorera akabhugha, 18 “Mööhi, ibheere ˆtoghatiira ghuye Yerusareemu. Iyo, eni neghughöötu na kohiru mo‑bhakoro bha bhachaama na mo‑. Nabho mbaghontenera ekiina neku, 19 na koohira mo‑bhaato bha matöngö kubha bhanchëërë, na ghuntëma emicharicho na kumamba mo‑musarabha. Amare orosiko ro ghatato, Eryobha ndekondyoki.”

Omukangati abhahökëri bhano aghukangata

(Maariko 10:35–45)

20 Niho muka Sebhetaayo akaacha o‑Yesu na abhaana bhaache bhabhere, akabhuna ebheru ambërë yaache na ghusabha egheghiro kimu. 21 Yesu akamobhoori akabhugha, “Nokwënda neghukörërë ke?”

Nawe akamugharokeri akabhugha, “Eriibhagha oghusëëma ghukangata mo‑bhutëmi bhoocho, neghusabha obhiisherereri abhaana bhaane bhano bhabhere kubha umu ikare okubhökö koocho gho kwiro, na owonde okubhökö koocho gho kumosi.”

22 Yesu aghagharokeri akabhugha, “Moteeche ghano moghusabha. Kana, moghotora kunyaaka kebhuno neeghuye kunyaakibhu?”

Bhaghagharokeri bhakabhugha, “Ntoghotora.”

23 Yesu akabhabhoorera akabhugha, “Mahëënë moghotora kunyaaka kinya bhuno neeghuye kunyaaka, amare ghwikara okubhökö koone gho kwiro hamu gho kumosi, ghiyo ghetaanyi emeremo gheene. Emyeya ghiyo n‑ghe bhano Taata waane amariri kobhasëëmëra.”

24 Hano abhaanabheegha abhande bhaare ikomi bhooghwire ghayo, bhakabhakararera abhaghëndi bhaabho bhaare bhabhere. 25 Niho Yesu akabhabherekera bhoose haghirohamu, akabhabhoorera akabhugha, “Mweche kubha abhakangati bha matöngö mbaanyi no obhotoro na abhaato bhaabho, wiiki abhakoro bhayo mbahabhahöki gho changuru. 26 Amare etaacha kubha hangʼu ghokoonyu. Omooto wowoose uno akwënda kubha omokoro ghate yaanyu, nakwëndëru abhe omutamishi waanyu. 27 Wiiki, omooto wowoose uno akwënda kubha ighoro ghate yaanyu, nakwëndëru abhe omusësë waanyu. 28 Gho nchëra iyo iyo, eni uno neenyi Omoona o Mooto ntiichiri kuhökëru, amare niichiri nebhahökëri abhaato na koruusi obhuhöru bhoone kubha nebhatingori abhaato bhaaru.”

Yesu ˆakabhahöri abhahuku bhabhere

(Maariko 10:46–52; Ruuka 18:35–43)

29 Hano Yesu na abhaanabheegha bhaache ꞉bhaare bhararu mo‑moghya o Yeriko, erikinda ikoro re bhaato rekamutambana. 30 Abhahuku bhabhere mbaare bhiikeere rubhareka ro nchëra, ino Yesu are arahetera. Mbe, hano bhooghwire kubha Yesu nakoheta hayo, bhakabherekera kwo riiraka ikoro bharabhugha, “Oo Omutëmi, , ntoghoghusabha otoghwere bheghongi!”

31 Erikinda riire re bhaato rekabharëki kubha bhakire, amare ibho bhakëëndërëra ghotiiri amaraka bharabhugha, “Omutëmi, Omoona o Tawuti, otoghwere bheghongi!”

32 Yesu akiimeerera, akabhabherekera na kobhabhoori arabhugha, “Neke mokwënda nebhakörërë?”

33 Niho abhahuku bhayo bhakamugharokeri bhakabhugha, “Oo Omutëmi, ntokwënda amiisho ghiito gharighi.”

34 Niho Yesu akabhaghwera bheghongi, akabhaturi amiisho ghaabho. Hayo hayo, amiisho ghaabho ghakahöra na korighi, bhakamutambana Yesu.