Ineeke mampeulai paturonda au mepawuli
4
1 Halalu au kupokaahi! Ineehe hampai nipoinalai ope-ope tauna au mouli kaarana Inaona Pue Ala irihira. Nipeita maroahe, ba tou-tou mpuuhe hangko i Pue Ala ba bara. Lawi iumba-umba pea, arahe nabi au mepawuli. 2 Ide au mopakanotoake hema au nakuasai Inaona Pue Ala: ope-ope tauna au mopangaku kaYesuna Datu Topehompo au mewali manusia, tauna iti napoanamohe Pue Ala. 3 Ope-ope tauna au bara mopangaku Yesu, barahe napoana Pue Ala. Tauna iti nakuasaihe inao au hangko i Tomampoiwali Kerisitu. Nihadimi paturo au manguli kaina hawena tauna au mampoiwali Kerisitu, hai ide-ide arami i lalu dunia.4 Agaiana ikamu anangku, napoanamokau Pue Ala, hai ninangimohe nabi au mepawuli iti, lawi Inao au ara i lalumi melumbu kuasana hangko i inao au ara i lalunda au barahe mepoinalai i Pue. 5 Nabi au mepawuli iti, hangko i dunia au kadake ide. Ido hai paturonda mesupa wori hangko i dunia au kadake. Hai tauna au barahe mepoinalai i Pue, ihira au mampehadingi hai mampeulai paturonda. 6 Agaiana ikita halalu, napoanamoke Pue Ala. Hai tauna au moisa Pue Ala, mampehadingi hai mampeulaihe paturongki. Agaiana tauna au barahe hangko i Pue Ala, barahe mampeulai paturongki. Iti au mopakanotoake kahemana au nakuasai Inaona Pue Ala, au mopahawe paturo au tou, hai kahemana au nakuasai inao au mepawuli.
Pue Ala maahi, ido hai hangangaa mombepokaahike
7 Halalu au kupokaahi! Mombepokaahimoke hadua hai hadua, lawi ahi mentumbu hangko i Pue Ala. Ope-ope tauna au mampokaahi ranganda, ihira au napoana Pue Ala hai au moisa Pue Ala. 8 Tauna au barahe mampokaahi ranganda, bara manihe moisa Pue Ala, lawi Pue Ala iami ahi. 9 Hai idemi rarana Pue Ala mopatongawa ahiNa irikita: AnaNa au haduduaNa Natudu mai i dunia bona molambike katuwo hangko Iria. 10 Idemi au rauli ahi: bara ikita au nguru-nguruna mampokaahi Pue Ala, agaiana Pue Alari au nguru-nguruna mampokaahike, ido hai motudu mai AnaNa mewali pahuruna watanta bona teampungi dosanta.
11 Halalu au kupokaahi, nodomi kamahilena ahina Pue Ala irikita! Ido hai hangangaa mombepokaahi worike hadua hai hadua. 12 Bara mani mpuu ara hadua au moita Pue Ala. Agaiana nauri nodo, ane mombepokaahike hadua hai hadua, Pue Ala mohintuwu liliu hai ikita, hai ahiNa tetambai liliu i lalu katuwonta duuna barapi makura.
13 Hintuwumoke hai Pue Ala, hai Pue Ala mohintuwu hai ikita. Iti taisa lawi Naweike InaoNa. 14 Ikami au mewali suroNa, moitamongkai Anana Pue Ala, hai kisabikimi kaIana mpuu au natudu Pue Ala Umanta mewali Datu Topehorema i ope-ope tauna i dunia. 15 Hema pea au mopangaku Yesu iami Anana Pue Ala, Pue Ala mohintuwu hai ia, hai ia mohintuwu hai Pue Ala. 16 Ido hai taisa hai tapoinalai ahina Pue Ala irikita, lawi Pue Ala iami ahi. Mewali, hema au mampokaahi liliu halaluna, iami au mohintuwu hai Pue Ala, hai Pue Ala mohintuwu hai ia. 17 Ane mampokaahike halalunta moula peundeana Pue Ala, barake langa i Pue Ala i alo pebotusi. Ina baike mampombelindoa Pue Ala, lawi apa au tababehi i lalu dunia ide moula apa au nababehi Kerisitu. 18 Ane taisa mpuu ahina Pue Ala irikita hai tapokaahi halalunta, barapoke langa i Pue Ala. Anti ahina Pue Ala au bara ara kamakurana, ido hai barapoke langa. Ane langa manike ina nahuku Pue Ala, lempona, bara manike moisa ahiNa irikita.
Ane mampokaahike Pue Ala, batena mampokaahi worike halalunta hampepepoinalai
19 Mampokaahike Pue Ala hai halalunta, lawi Pue Ala iorumi mampokaahike. 20 Hema au manguli, “Mampokaahina Pue Ala,” agaiana bara mampokaahi halaluna, modongkomi. Lawi ane halaluna bara napokaahi, apa mani Pue Ala au bara naita. 21 Mewali, ide hawana Kerisitu irikita: hema au mampokaahi Pue Ala, hangangaa mampokaahi wori halaluna.