Paturo i to Sarani
5
1 Ara wori pamperapiku irikamu au mewalikau penatua. Kuukiakau ide lawi iko wori hadua penatua, hai moita matamona kapari au morumpa Kerisitu hangkoia. Hai ane hawe Kerisitu i lalu peawana tuwoNa au ina rapatongawa i ope-ope tauna, ina molambi worina kirangku i lalu peawana tuwoNa iti. 2 Kuperapi bona nikadipura maroa halalumi hampepepoinalai i Pue Ala au ara i olomi. Lawi ihira iti nodo dimba au napoinalaiakau Pue Ala niporewu. Niporewuhe hangko i kamaluluna lalumi moula peundeana Pue Ala; inee nipobago iti nodokau au rapari-paria. Nikadipurahe hangko i kabulana lalumi. Inee peakau mohahaoki rasi. 3 Ineehe nipohawaa tauna au rapoinalaiakau nodokau hadua topoparenta mampohawaa taunana. Agaiana hangangaa mewalirikau pandiri irihira 4 bona ane hawe Toporewunta au meawa tuwoNa, ina Naweikau hambua songko datu au mengkila-ngkila liliu hawe i hae-haena.5 Nodo wori ikamu au mangura mani, hangangaa mengkorukau i tosae. Ope-opekau hangangaa mengkaiwoi hai mombetulungi. Lawi:
“Pue Ala moewahe tauna au mampemahile,
agaiana tauna au mengkaiwoi Natulungihe.”*
6 Ido hai halalu, mengkaiwoimokau, hai mengkorukau i Pue Ala au makuasa bona Napaiwongkokau ane hawe tempona. 7 Nipaisare ope-ope kalangami Iria, lawi Ia au mokadipurakau.
8 Hangangaa manoto pekirimi hai mainga-ingakau! Lawi Datu Tokadake au mewali iwalimi molulumao nodo hambaa singa au melolo-lolo mohahaoki tauna au ina nahaka. Hangko pelolonato, melangakimi. 9 Hangangaa niewa mpuu hangko i pepoinalaimi au maroho. Lawi niisa: halalumi hampepepoinalai i humalele dunia molambi worihe kapari nodo au nihumba. 10 Hai ane liumi kapari au hampalai iti, Pue Ala ina mopahandai apa au makura irikamu. Lempona, Ia ina mopakaroho pepoinalaimi, mopamanoto tuwomi hai mopatetida lalumi. Lawi Pue Ala iami pongkana ope-ope ahi. Ia mokakiokau mewali anaNa bona anti pohintuwumi hai Kerisitu, ina molambikau kirami i lalu kamahilena tuwoNa au bara mokahopoa. 11 Tetoiami Pue Ala lawi Ia au makuasa hawe i hae-haena. Amin!
Kahopoana sura
12 Surangku au sosoe ide kuuki hai petulungina Silwanus,a halalunta hampepepoinalai i Pue Yesu, hai kuisa ia ina mantaha liliu i lalu pepoinalaina. Inona kupahaweakau i kanoto-notoana noumba kamahilena ahina Pue Ala irikita bona maroho lalumi. Hangangaa tetida liliukau i kamaahiNa iti.
13 Tabea hangko i halalumi hampepepoinalai au arahe inde i wanua Babilon au napilei worihe Pue Ala nodo ikamu. Markus au kupoanami, mopakatu wori tabeana irikamu. 14 Mombetabe-tabemokau hadua hai hadua hangko i kamahilena ahimi i halalumi hampepepoinalai.
Kuperapi i Pue Ala bona Naweikau roa ngkatuwo anti pohintuwumi hai Kerisitu.
Hangko iriko
PETURU