4
1 Mewali, Kerisitu molambimi kapari tangana mani tuwo i dunia ide. Ido hai ikamu wori hangangaa nipakaroho lalumi bona masilolongakau mohalea kapari nodo Ia. Lawi hema au mohaleami kapari au nodo, barapi ina mobabehi dosa. 2 Mewali, i tempomi mani tuwo i dunia ide, inee nipeulai peundeana lalumi au kadake. Hangangaa moulakau peundeana Pue Ala. 3 Lawi mahae gagamokau mobabehi babehianda tauna au barahe moisa Pue. I tempo iti, merikai babehiami, moulakau peundeana lalumi au kadake, malangu-langukau, mosusa liliukau, masurokoakau, hai menombakau i anitu au bara hintoto rapenombai. 4 Agaiana ide-ide, rapowulimi rangami au hangkoia lawi barapohe niporanga mobabehi hinangka babehia au kadake. Ido hai rakakabosaimokau. 5 Agaiana hambela tempo tauna iti hangangaa mohanai Pue Ala kana i babehianda au kadake. Lawi Pue Ala ina mobotusi kara-karanda ope-ope tauna, maroa au tuwo mani ba au matemohe. 6 Ido hai Ngkora Marasa rabambaria worihe tauna au mate, bona kehapihe mate nodo ope-ope manusia anti kamadosanda, batenda molambi worihe katuwo maroa moula peundeana Pue Ala.Hangangaa mohintuwuke hai mombetulungike
7 Halalu, kahopoa dunia ide hungkumi hai ope-ope ihina ina matanta. Ido hai hangangaa mainga-ingakau hai nipamanoto pekirimi bona peisakau mekakae. 8 Au melumbu hangko i hinangkana, iami pombepokaahimi hadua hai hadua. Hangangaa mombepokaahikau hangko i lalumi mpuu, lawi ane nibabehi nodo, ina nibuku wori moampungi salanda rangami. 9 Hangangaa matanakau ane ara toraremi, hai ineekau mohume-hume.
10 Ikita ope-ope molambimoke kapande au montani-ntani moula apa au naweike Pue Ala. Mewali hangangaa tapake kapande iti bona motulungike ranganta hai tapopolumao maroa bago au naweimoke Pue Ala hangko i kabulana laluNa. 11 Hema au motuntu, hangangaa mopahawe apa au nadokomi hangko i Pue Ala. Hema au motulungi rangana, hangangaa metulungi hangko i karoho au nalambi hangko i Pue Ala. Hangangaa nibabehi nodo bona i hinangkana au mewali, Pue Ala rapomahile i lalu hangana Yesu Kerisitu, lawi Pue Ala au makuasa hai hintoto rapomahile hawe i hae-haena! Amin.
Paturo i tauna au rapopeahi-ahi anti peulanda i Kerisitu
12 Halalu au kupokaahi! Inee nipotingkara kapari au morumpakau. Kapari iti peisa rapandiri nodo api, lawi napake Pue Ala mampetandaka kamarohona pepoinalaimi. Agaiana inee nipehangu kapari au morumpakau iti melumbu hangko i apa au biasana. 13 Aginari nipokatana, lawi molambimokau kirami i lalu kapari au morumpa Kerisitu. Ido hai halalu, ane hawe tempona Kerisitu mopatongawa peawana tuwoNa i ope-ope tauna, ina matana mpuukau. 14 Morasikau, halalu, ane rakakabosaikau anti peulami i Kerisitu, lawi Inao Malelaha au meawa au hangko i Pue Ala maida liliu i lalumi. 15 Agaiana inee mpuu ara hadua i olomi au molambi kapari lawi mepapate ba manangka ba mobabehi au kadake ba mampesuaki peami urusana rangana. 16 Agaiana ane rapopeahi-ahikau anti katoSaranimi, inee nipokaea. Niuli ngkaia kamaroana i Pue Ala lawi ikamu au rauli topeulana Kerisitu.
17 Hawemi tempona Pue Ala ina mobotusi kara-karanda ope-ope tauna. Hai ikita au Napoana, batena ioru Nabotusi kara-karanta. Mewali ane kara-karanta au ioru Nabotusi, manoto ina melumbu pehukuNa i tauna au barahe mepoinalai i Ngkora Marasa au hangko Iria. 18 I lalu Sura Malelaha teuki node:
“Mogalori tauna au manoto babehianda,
hangangaa motodihahe kapari,
hangko molambirihe katuwo maroa.
Apa mani tauna au kadake hai
au bara mengkoru i Pue Ala!”
19 Ido hai, halalu, ane arakau au molambi kapari moula peundeana Pue Ala, nipaisare katuwomi i Pue Ala au mampopewali hinangkana, hai hangangaa nibabehi liliu babehia au maroa. Hai Pue Ala ina mopabukei ope-ope dandiNa irikamu.