Surana Suro
Peturu
au nguru-nguruna
1
1 Sura ide hangko iriko, Peturu, surona Yesu Kerisitu. Sura ide kupakatu irikamu halalungku au napileimokau Pue Ala, au mahawukau i propinsi Pontus, Galatia, Kapadokia, Asia hai Bitinia, hai au maidakau nodo topolilo i olonda tauna au barahe moisa Pue Ala. 2 Ikamu, napileikau Pue Ala Umanta lawi nodomi tunggaiaNa hangko i nguru-nguruna. Ia mopileikau, hai anti pobagona Inao Malelaha, mewalimokau kiraNa bona mengkorukau i Yesu Kerisitu hai Napamalelahakau hai waheNa.Kuharunga Pue Ala ina moweikau ngkaia pewati hai roa ngkatuwo.
Peharunga au maroho
3 Tatoiami Pue Ala, Umana Amputa Yesu Kerisitu! Anti kamahilena ahiNa, Naweimoke katuwo au wou, hai katuwo au wou iti tahumba hangko i katuwona hule Yesu Kerisitu. Ido hai maroho peharunganta. 4 Taharunga kaina molambita pewati au napasilolongaamoke Pue Ala i suruga. Pewati iti bara ina marugi ba kadake ba tebali. 5 Hai anti pepoinalaimi, Nakampaikau Pue Ala hai kuasaNa hangko i ope-ope dake bona molambikau katehorema au ina Napatongawa i kahopoa dunia.
6 Ido hai hangangaa matana liliukau. Ide-ide masusa lalumi lawi ara ngkaia pakana kapari au morumpakau. Agaiana nauri nodo, hangangaa nipamatana lalumi, lawi kaparimi iti hampalai pea. 7 Narumpakau kapari bona ane mantahakau ina tongawa mpuu kamarohona pepoinalaimi. Ane bulawa rawoli i api, tongawa bulawa ba bara. Agaiana melumbu kamasulina pepoinalaimi pane bulawa, lawi bulawa bara mantaha hawe i hae-haena. Bulawa hangangaa raparesa i lalu api. Nodo wori pepoinalaimi hangangaa rapetandaka i tempomi narumpa kapari. Mewali ane maroho mpuu pepoinalaimi, ikamu ina ratoia, rabila hai rapomahile i kahaweNa hule Yesu Kerisitu i dunia. 8 Nauri bara manikau moita Yesu Kerisitu, agaiana, nipokakaiami. Hai ide-ide, bara mani wori niita, agaiana nipoinalaimi. Ido hai matana lalumi, hai kamatanami iti mahile, melumbu hangko i apa au peisa rapololita. 9 Matanamokau, lawi nihumbami wuana pepoinalaimi, iami tanoanami Nahorema hangko i huku dosami.
10 Katehorema au nilambi, itimi au rapepekiri nabi-nabi hangkoia hai rahaoki lempona. Rapahawe noumba Pue Ala ina mopatongawa kamaahiNa irikamu. 11 Anti peninina Inaona Kerisitu au ara i lalunda, Pue Ala mampopaisaahe noumba karumihina kapari au hangangaa morumpa watana Kerisitu hai noumba kamahilena tuwoNa ane liumi kapari iti. Agaiana nabi-nabi hangkoia, barahe moisa noumba ope-ope iti ina mewali. Ido hai raparesa ntepuu, lawi rapeinao raisa impira kaina haweNa hai noumba pewalina. 12 Hai Pue Ala mampopaisaahe nabi-nabi hangkoia barahe mopahawe bambari kana i watanda haduduanda. Agaiana ikamuri au ratunggai. Hai ide-ide, apa au rapahawe nabi-nabi hangkoia, rapahawemi i kanoto-notoana irikamu, lawi aramohe tauna au mopahaweakau Ngkora Marasa melempo i kuasana Inao Malelaha au hangko i Pue Ala. Mogalori malaeka, mampeinao worihe moisa kana i katuwo maroa au nihumba iti.
Hangangaa malelaha katuwonta
13 Mewali, halalu, anti kamarohona peharungami, ido hai kuuliangaakau: nipakanoto pekirimi, nirempeki peundeana lalumi au kadake, hai nipakaroho peharungami i kabulana laluNa au ina raweikau ane hawe hulemi Yesu Kerisitu. 14 Napoanamokau Pue Ala, ido hai hangangaa nipeulai hawaNa. Ineekau moula peundeami haduduami nodo hangkoia i tempomi mani tuwo i lalu kamakaindi. 15 Hangangaa malelahakau i hinangka babehiami, nodo Pue Ala au malelaha tuwoNa au mopileimokau. 16 Lawi ara teuki i lalu Ngkorana Pue Ala au manguli, “Hangangaa malelaha tuwomi, lawi Iko, malelahaNa.”
17 Halalu, ane niuli Pue Ala iti, Umami, hangangaa mengkorukau i Pue Ala tempomi mani maida i dunia ide, nodokau topolilo. Lawi Pue Ala au nipouma iti, iami Topobotusi kara-karanda ope-ope tauna moula babehianda, hai Ia bara mampopontani tauna. 18 Hangangaa mengkorukau i Pue Ala, lawi niisami noumba kanahompokimi Pue Ala. Ia mokabahamokau hangko i tuwomi hangkoia au bara mobundu. Tuwomi iti iami sosorami hangko i toiorumi. Hai i kaNahompokimi Pue Ala iti, bara hai anu-anu au bara mantaha nodo bulawa ba salaka, 19 agaiana hai au meliu kamasulina, iami wahena Kerisitu. Kerisitu iti nodo hambaa ana dimba au bara ara hakina ba kamakurana. Iami au rahuku mate mopahurukau. 20 Hangko damani dunia rapopewali, Yesumi au napakanoto Pue Ala mewali Topehompo. Ide-ide, i tempona hungkumi kahopoa dunia, Ia hawemi bona mohuru dosami. 21 Anti kahaweNa, ido hai mepoinalaikau i Pue Ala au mopatuwo hule Yesu hangko i kapate hai mowei katuwo mahile Iria, alana mepoinalaikau hai meharungakau i Pue Ala.
22 Ide-ide, malelahamokau anti pampeulaimi paturo au tou, ido hai niisami mampokaahi halalumi hampepepoinalai i katou-touana. Mewali kuweikau lolita bona mombepokaahikau hadua hai hadua hangko i lalumi mpuu. 23 Lawi molambimokau katuwo au wou, hai katuwo au wou iti bara hangko i manusia au peisa mate. Katuwo iti naweikau Pue Ala au bara ara kahopoana. Molambikau katuwo au wou lawi mepoinalaimokau i Ngkorana Pue Ala au tuwo hai au bara mokahopoa. 24 Ara teuki i lalu Sura Malelaha au manguli,
“Katuwo manusia nodo hehi,
peawa manusia nodo bunga hehi.
Hehi batena malau,
hai bungana ina maoru,
25 agaiana Ngkorana Pue Ala mantaha hawe i hae-haena.”*
Ngkorana Pue Ala iti, iami Ngkora Marasa au rapahaweamokau.