To Sarani hangangaa rapaturo bona maroa babehianda i ope-ope tauna
3
1 Nupopaingaahe to Sarani au ara inditi bona mengkoruhe i topoparenta hai i totosae boea. Hangangaa mampeulaihe hawanda topoparenta hai mampopolumaohe ope-ope bago au maroa. 2 Ineehe mopakadake hanga tauna, ineehe mombembehanai. Hangangaa rapamaalusu poantinda, hai mengkaiwoi liliuhe i ope-ope tauna.3 Lawi hangkoia, makaindi mani lalunta, bara taisa rara au manoto, taliungi AturaNa. I tempo iti, napohawi manike peundeana lalunta au kadake hai katana dunia au mepakanawo. Kadake lalunta, mahinake i ranganta, hai mombekahihi peake. 4 Nauri nodo kakadakena babehianta, agaiana Pue Ala mia-mia mampokakaiake hai Napopaitaamoke kamaroana laluNa i kaNahoremanta hangko i huku dosanta. 5-6 Moapari hai Nahoremake hangko i huku dosanta? Ba Nahoremake lawi manoto babehianta? Bara. Nahoremake anti kamaahina laluNa. Yesu Kerisitu mate mohuru dosanta, mewali Datu Topehoremanta. Ido hai pane Pue Ala moweike Inao Malelaha au mokale i lalunta. Anti kuasana Inao Malelaha iti, Nabahoimoke hangko i dosanta, Napopewalike anaNa haduduaNa, hai Naweike katuwo au wou. 7 Tunggaiana Pue Ala mobabehi nodo irikita bona hangko i kabulana laluNa, Naimbamoke tauna au manoto bona molambike katuwo maroa au bara mokahopoa, nodo au Nadandimi i ope-ope tauna au Napoana.
8 Tou mpuu lolitangku inona. Ido hai kuperapi bona paturo ide nupakanotoahe ope-ope tauna au mepoinalai i Pue Ala bona mobabehi liliuhe apa au maroa. Paturo ide iami paturo au maroa, hai au mobundu i ope-ope tauna.
Ineeke mampogaloa tauna au mopaara posisala
9 Agaiana ara worihe tauna au mombehehe hai mampombehanaingi atura agama Yahudi ba tuntukana pemuleanda. Nukaraohihe! Nupalehi peamohe i pombembehanainda au bara mobundu hai au bara moanti pewati i tauna. 10 Ane ara tauna au mopaara posisala i halalunta hampepepoinalai, nukontohe hambela ba rombela. Ane bara liliu rakabaha, ineemohe nupohintuwua. 11 Lawi nuisa: tauna au nodo, raoaka mehupe hangko i paturo au tou. Anti dosanda iti, mohukumohe watanda haduduanda.
Pamperapiku au kahopoana hai tabea
12 Ane hawe Artemas ba Tikikus au kutudu lao irikamu, nupari-pari mampohidupaana i boea Nikopolis, lawi kubotusimi maida liliu inditi i tempo makuli. 13 Ane Senas, guru agama iti, hai Apolo, kuperapi bona nipopelingka maroahe bona dati ara kamakuranda i polumaonda. 14 Halalunta hampepepoinalai hangangaa mampopolumao liliuhe bago au maroa bona molambihe apa au raparaluu alo-alona,a hai bona tuwonda bara mbero-mbero.
15 Kupahawe wori tabeanda ope-ope rangangku au arahe inde. Nupahawe wori tabeangki i halalunta hampepepoinalai inditi, i Kreta. Pue mowatikau ope-ope.
Hangko iriko
PAULU