Surana Suro Paulu i
Titu
1
1 Sura ide hangko iriko, Paulu, hawina Pue Ala hai surona Yesu Kerisitu. Naangkana Pue Ala mewali suroNa, hai Natuduna mopakaroho pepoinalainda tauna au Napilei. Natudu worina mopaguruahe paturo au tou, lawi ane tapeulai paturo au tou iti, ina mengkoruke i Pue Ala. 2 Ido hai taharunga kaina molambita katuwo maroa au bara mokahopoa, nodo au nadandiake Pue Ala hangko damani dunia ide Napopewali. Hai Pue Ala bara modongko. 3 Mewali, i tempo au Napakanoto, Napopaisaake rara molambi katuwo maroa melempo i bagongku mobambari Ngkora. Bago iti Napoinalaiana moula hawana Pue Ala, au mohoremake hangko i huku dosanta.4 Sura ide kupakatu irio Titu, au kupoanamoko, lawi hampepepoinalaike. Mekakaena i Pue Ala Umanta hai i Kerisitu Yesu Datu Topehoremanta bona Nawatiko, hai Naweiko roa ngkatuwo.
Tauna au raangka mewali penatua hangangaa au maroa babehianda
5 Titu, anangku, kupopaida liliuko i Kreta bona mourusiko pobagonta au bara mani roo. Mewali, nodo au roomoko kuhawaa, hangangaa nuangka tauna i ope-ope wanua au peisa motadulakoi to Sarani inditi. 6 Hai tauna au raangka mewali penatua, hangangaa tauna au bara ara au peisa rasalaia, au hadua pea towawinena; anana hangangaa mepoinalai wori i Kerisitu hai barahe makasara hai barahe mearoha. 7 Tauna au mewali penatua, ihirami au mokadipura bagona Pue Ala. Ido hai hangangaa nuangka tauna au bara ara au peisa rasalaia, au bara mampemahile ba au masodo, au bara malangu-langu ba topombetie ba au mohaoki pea doi. 8 Tauna au nuangka mewali penatua, hangangaa tauna au naisa modoko torare, maroa liliu babehiana, matopa, manoto laluna, malelaha katuwona, hai au nabuku morempeki peundeana laluna au kadake. 9 Hangangaa maroho pepoinalaina i paturo au tou, nodo au nadokomi bona naisa rara mopaguru tauna i paturo au tou iti hai mopakaroho lalunda, hai bona nabuku wori mopatongawa kamasalanda tauna au moewa paturo iti. 10 Tunggaiaku mopaturoko nodo lawi bosamohe tauna au moewa paturonta, pelumbunami ihira au mampeulai ada mpetile Aturana Musa.a Mearohahe, hai mopakanawohe ranganda hai paturo au bara mobundu. 11 Tauna iti hangangaa nukontohe, ineehe nupaliu mepaturo, lawi moantihe pepawuli hai pepaturonda au bara hintoto i tambi-tambina. Hai tunggaianda mepaturo bona molambi peahe rasi. Babehianda iti mepakaea mpuu. 12 Hangkoia ara hadua tauna au meula i agamanda to Kreta au manguli node, “To Kreta, ope-opehe modongko, nodohe binata maila, mehioro hai lohehe.” 13 Tou mpuu apa au nauli tauna iti! Ido hai to Kreta au arahe inditi hangangaa nuwei mpuuhe lolita bona mepoinalai liliuhe i paturo au tou. 14 Weihe lolita bona ineemohe mohaile lolitanda to Yahudi au moula pea parenta-parenta hangko i manusia au mosapuaka paturo au tou. 15 Tauna au malelaha, bara ara palianda. Agaiana i tauna au kadake hai au barahe mepoinalai, bara ara hampaka au malelaha, lawi maroa pekirinda ba lalunda kadake hahami. 16 Rauli, moisahe Pue Ala, agaiana modongkohe, lawi babehianda bara hintoto hai apa au rauli. Kadake mpuu babehianda. Barahe matundu i hawana Pue Ala, hai bara rabuku mobabehi apa au maroa.