Molambike Inao Malelaha hangko i pepoinalainta i Pue Yesu
3
1 Halalu to Galatia, ntuli mpuukau. Hemarikau au mopakanawo, alana barapi nipeulai paturo au tou? Manoto mpuu paturongku hangkoia irikamu au mopakanotoakau tunggaiana Yesu Kerisitu mate i kau mombehape. 2 Nikatuinao halalu apa au mewali irikamu hangkoia. Modokokau pae Inao Malelaha anti peulami i Aturana Musa? Bara! Agaiana modokokau Inao Malelaha lawi mohadimokau Ngkora Marasa hai mampoinalaimokau Pue Yesu. 3 Mewali, moapari hai ntuli gagakau? Nguru-nguruna i kanipoinalaina Yesu, nilambimi katuwo au wou hangko i kuasana Inao Malelaha. Ba niuliri ide-ide peisakau mewali malelaha anti kamarohomi haduduami? Bara! 4 Mewali hangangaa mantahakau i lalu pepoinalaimi, lawi ane bara nodo, barapi mobundu ope-ope pewatina Pue Ala au nidokomi. 5 Naweimokau Pue Ala Inao Malelaha hai mobabehimi tanda kuasa i olomi. Ba Nababehi nodo anti peulami i Aturana Musa? Bara. Nababehi nodo, lawi mohadimokau Ngkora Marasa hai mampoinalaimokau Pue Yesu.6 Nodo au teuki i lalu Sura Malelaha kana i Burahima au manguli node,
“Burahima mepoinalai i Pue Ala,
ido hai naimba Pue Ala manoto i peitaNa.”*
7 Mewali, taisami halalu: hema au mepoinalai, ihira au teimba pemuleana Burahima. 8 Mepongka hangkoia arami tunggaiana Pue Ala mopamanoto tauna au barahe to Yahudi ane mepoinalaihe. Ido hai i lalu Sura Malelaha, Pue Ala nguru-nguruna mopahawe Ngkora Marasa i Burahima, nauli, “Anti kaoiona, ina Kuwatihe ope-ope tauna i dunia.”* 9 Mewali nodo Burahima nawati Pue Ala anti pepoinalaina, nodo wori ope-ope tauna au mepoinalai i Yesu batena ina nawatihe Pue Ala hihimbela hai Burahima.
10 I lalu Sura Malelaha hangkoia teuki node: “Hema-hema au bara mampeulai hinangka parenta au teuki i lalu Aturana Musa, batenda napaharara Pue Ala.”* Mewali, halalu, taisa: ane ara tauna au napeinao mopamanoto watana i peitana Pue Ala anti pampeulaina Aturana Musa, batena ina harara i lindona Pue Ala. Lawi hema pae au peisa mampeulai ope-ope hai au bara ara kamasalana? 11 Mewali, taisa kadana ara hadua au manoto i peitana Pue Ala anti peulanta i Aturana Musa. Lawi ara wori lolita i lalu Sura Malelaha au manguli node, “Tauna au manoto i peitana Pue Ala molambi katuwo maroa anti pepoinalainda.”* 12 Ane tapeinao mopamanoto watanta i peitana Pue Ala anti peulanta i Aturana Musa, lempona babehianta haduduanta au tapoinalai, barake mepoinalai i Pue Ala. Lawi ara teuki i lalu Sura Malelaha au manguli node: “Hema au mampeulai ntepuu ope-ope atura, ina tuwohe hangko i atura iti.”* 13 Ikita ope-ope hintoto napaharara Pue Ala, lawi moliungike Aturana Musa. Agaiana nauri nodo, Nakabahamoke Kerisitu hangko i pepaharara iti. Teuki i lalu Sura Malelaha hangkoia node: “Ane ara tauna au rapapate i kau mombehape, manoto tauna iti harara i Pue Ala.” Mewali, kapatena Kerisitu i kau mombehape, mopahuruke molambi pepaharara hangko i Pue Ala au katouana hangangaa morumpake. 14 Tunggaiana Yesu mate rapaku i kau bona tauna au barahe to Yahudi peisa worihe molambi pewati au nadandi Pue Ala i Burahima. Pewati iti tahumba anti pohintuwuta hai Yesu Kerisitu. Mewali, ane mepoinalaike i Yesu Kerisitu, molambike Inao Malelaha au nadandimi Pue Ala.
Aturana Musa bara peisa mobaliki dandina Pue Ala i Burahima hai i pemuleana
15 Halalu, kuala pandiri hangko i katuwonta alo-alona. Pandirina node: ara hadua tauna au mouki sura podandi. Ane sura iti ratekengi hai rapekatandai moula atura topoparenta, ihina barapi peisa ratambai tauna ntanina hai tunggaiana barapi peisa rabaliki. 16 Nodo wori hai podandina Pue Ala. Pue Ala mopaara dandiNa i Burahima hai i pemuleana. (Paresa maroa lolita iti inona. Bara teuki “i pemuleanahe” Burahima au bosa. Au teuki: “i pemuleana”, lawi au natunggai lolita ide, iami pemuleana Burahima au hadua pea, iami Kerisitu.) 17 Mewali halalu, idemi lempona ngkora pandiriku inona: nguru-nguruna Pue Ala mopenemi dandiNa i Burahima. Iba atuna hai talu pulona parena roo indo, Ia mowei wori AturaNa Musa. Agaiana Atura iti bara mpuu mobaliki dandina Pue Ala au Napaarami hangkoia i Burahima. DandiNa iti batena mewali. 18 Ane rapana pemuleana Burahima hangangaa mampeulai Aturana Musa bona molambi apa au nadandi Pue Ala i Burahima, lempona pewati iti bara rahumba hangko i dandina Pue Ala. Agaiana taisa: Burahima molambi pewati iti batena hangko i dandina Pue Ala anti kabulana laluNa.
Tunggaiana Aturana Musa bona taisa kamadosanta
19 Mewali, batena ina ara tauna au manguli node, “Ane nodori, apa tunggaiana Aturana Musa?” Aturana Musa naweike Pue Ala bona mopakanoto kamadosanta moliungi peundeaNa. Tunggaiana Pue Ala bona manusia mampeulai Aturana Musa hawe pea i pemuleana Burahima au Natunggai i lalu dandina Pue Ala hangkoia, iami Kerisitu. Pue Ala mampohawaa malaekaNa mopahawe AturaNa i Musa, hai Musa iti mewali sarungkoro au mopahawe Aturana Pue i manusia. 20 Mewali, Aturana Pue rapahawe i manusia melempo i Musa. Agaiana i kanapahawena Pue Ala dandiNa i Burahima, bara ara au mosarungkoroi. Batena pea Pue Ala haduduaNa au mopahawe dandi iti.
21 Kaliliuana halalu, Aturana Musa bara moewa tunggaiana dandina Pue Ala. Ane rapana, peisa tapeulai atura-atura iti bona molambike katuwo maroa, lempona atura itimi au mewali raranta mopamanoto watanta i peitana Pue Ala. 22 Agaiana i lalu Sura Malelaha, tepakanoto humalele dunia tetakai hai dosa. Mewali, bara ara rara ntani au mopamanotoke i peitaNa, batena pea pepoinalainta i Yesu Kerisitu. Katuwo maroa au nadandi Pue Ala, batena Nawei i hema pea au mepoinalai i Yesu Kerisitu.
Aturana Musa moninike duunta mepoinalai i Kerisitu
23 Hangkoia, hangko damani taisa rara mepoinalai i Yesu, mengkoruke i Aturana Musa. I tempo iti, nodoke tauna au ratarunggu hai rakampai, lawi natakake atura-atura iti. Nodomi katuwonta duuna Pue Ala mopakanoto noumba raranta mepoinalai i Pue Yesu. 24 Aturana Musa monini hai mokampaike duuna Kerisitu mai i dunia bona Napatongawa Pue Ala kamanotonta i peitaNa, lawi mepoinalaimoke i Kerisitu. 25 Ide-ide mepoinalaimoke i Kerisitu; ido hai barapoke nanini ba nakampai Aturana Musa.
26 Mewali, Napoanamoke Pue Ala ope-ope anti pepoinalainta i Kerisitu Yesu. 27 Lawi ikita ope-ope rariumoke mewali tauna au mohintuwu hai Kerisitu, ido hai manotomoke i peitana Pue Ala hai Naimbamoke himbela hai Kerisitu. 28 Pue Ala bara mampopontani tauna maroa to Yahudi ba bara to Yahudi, maroa hawi ba au bara hawi, maroa tobalilo ba towawine; i peitana Pue Ala himbela haha peake anti pohintuwuta hai Kerisitu Yesu. 29 Anti pohintuwuta hai Kerisitu, Naimbamoke pemuleana Burahima, hai batena mohumbake apa au nadandi Pue Ala, iria.