Ikita to Sarani, barapoke tetaka i Aturana Musa, lawi mohintuwumoke hai Kerisitu
7
1 Mewali halalu, ide-ide ina taala hambua ngkora pandiri hangko i aturana topoparenta. Niisa halalu, ikita manusia batena tuwoke i lalu kuasa atura topoparenta lianta mani tuwo. 2 Pandirina, ara hadua towawine au motambi hai tuwo mani tobalilona, batena tetaka i tobalilona moula ada mpotambi. Agaiana ane matemi tobalilona, tekabahami hangko i atura au motaka i tobalilona. 3 Mewali, ane towawine iti tuwo mani tobalilona hai mombekadipura hai tobalilo ntani mebualosi hangana. Agaiana ane matemi tobalilona, barapi tetaka hai atura iti. Kehapiri motambi hai tobalilo ntanina, barapi masala.4 Nodo wori ikita, halalu: Hangkoia tetaka manike i Aturana Musa. Agaiana ane matemoke hihimbela hai Kerisitu, tebolehimi pohintuwuta hai atura iti. Hai ide-ide, mohintuwumoke hai tohaduana, iami Kerisitu au tuwo hule hangko i kapate. Anti pohintuwuta hai Kerisitu, mobundumoke i Pue Ala.
5 Hangkoia, i kadanta mani mepoinalai i Yesu, tapeinao peami mobabehi au kadake. Hai apa au rakontoake i Aturana Musa, itiri au tapeinao tababehi. Lawi i lalu katuwonta hangkoia, watanta tapake mobabehi dosa, alana hintotoke rahuku mate hai ragaakike hangko i Pue Ala. 6 Agaiana ide-ide, tekabahamoke hangko i Aturana Musa au motakake hangkoia lawi matemoke hihimbela hai Kerisitu. Mewali, barapoke moula rara au hae; moula atura-atura au teuki. Ide-ide moulamoke rara au wou; mengkoruke i Pue Ala anti kuasana Inao Malelaha.
Anti poliunginta Aturana Musa, tongawami kamadosanta
7 Tauli inona, Kerisitu mokabahake hangko i Aturana Pue Ala au napahawe Musa. Agaiana inee tauli kadake Atura iti. Bara tou lolita iti! Aturana Musa maroa, lawi hangko i atura iti, taisa apa au rauli dosa. Ane rapana bara ara parenta au manguli, “Inee nupokaelu anu-anuna rangamu,” kebara kuisa kakadakena babehia iti. 8 Agaiana i kamohadingku parenta au teuki i Aturana Musa, tepakami dosa mokale i lalungku, alana mentumbu i lalungku mampokaelu hinangka anu-anuna rangangku. Ane rapana bara ara Aturana Musa au mopakanoto apa au rauli dosa, dosa iti kebara makuasa mopakanawona.
9 Hangkoia hangko damani kuisa Aturana Musa, kuuli maroa mpuu katuwongku. Agaiana i kakuhadina Atura iti, tepakami dosa mokale i lalungku, 10 alana nauli lalungku: hintoto mpuuna rahuku mate hai ragaakina hangko i Pue Ala. Katouana, tunggaiana Aturana Musa bona molambina katuwo maroa. 11 Agaiana i pohadingku Aturana Musa, tepakami dosa mokale i lalungku. Mewali anti atura iti, napakanawona dosa, alana hintotona rahuku mate hai ragaakina hangko i Pue Ala.
12 Mewali, Aturana Musa iti malelaha, hai parentana Pue batena malelaha, manoto hai maroa. 13 Ba Aturana Musa au maroa iti au mogaakina hangko i Pue Ala? Bara. Agaiana Aturana Musa iti mewali rara au mogaakina hangko i Pue Ala anti dosangku. Hangko i atura au maroa iti, tongawami kamadosangku, hai manoto worimi kakadakengku.
Bara tabuku mampeulai Aturana Pue Ala lawi dosa ara i lalunta
14 Taisa mpuu, halalu, Aturana Pue Ala batena maroa lawi hangko i Inao Malelaha. Agaiana ide iko, tomadosana, lawi napohawina dosa. 15 Kupowuli babehiangku ide lawi babehia maroa au kupeinao kubabehi, barari iti kubabehi, hai apa au kukahihi, itiri au kubabehi! 16 Agaiana ane kubabehi babehia au bara kuunde, lempona kupokana kamaroana Aturana Pue Ala, lawi kusalai babehiangku. 17 Mewali, katouana barari iko au mobabehi au kadake iti agaiana dosari. Dosa iti au mobago i lalungku. 18 Lawi kuisa, bara ara roangku, ide iko manusia au madosana. Kuunde mpuu mobabehi babehia au maroa, agaiana bara kubuku mobabehi. 19 Bara kubabehi babehia au maroa nodo peundeaku. Au kubabehi liliu, iami babehia au kadake au bara kuunde. 20 Agaiana ane kubabehi babehia au bara kuunde, lempona bara iko au mobabehi iti. Dosa au i lalungkuri, au mobago.
21 Itimi au mewali liliu i lalu katuwongku kuunde mobabehi apa au maroa, agaiana babehia au kadake peari au kubabehi. 22 I lalungku kuunde Aturana Pue Ala. 23 Agaiana atura iti barari kupeulai, lawi ara kuasa ntanina i lalu katuwongku au monangina. I lalungku, kuunde mpuu moula Aturana Pue Ala, agaiana kuasa dosa au i lalu katuwongku moewa peundeaku iti, alana nanangina dosa hai kupeulai pearai peundeana lalungku au kadake.
24-26 Mewali, i pekiringku kuunde mpuu mampeulai Aturana Pue Ala, agaiana batengku madosa liliu anti peundeana lalungku au kadake, alana hintotona rahuku mate hai ragaakina hangko i Pue Ala.
Meahi-ahi mpuuna dide! Hema wongkoia au ina mohoremana hangko i rugingku ide? Kuuli ngkaia kamaroana i Pue Ala lawi Iami au mohoremana hangko i rugingku ide anti petanga-tangaina Yesu Kerisitu, Amputa!