Pue Ala bara mampopontani tauna
2
1 Ido hai halalu, hema-hema pea bara ara rarana mosalai rangana. Hema au mosalai rangana himbela pea mosalai watana haduduana, lawi apa au nasalaiaa rangana nababehito wori. 2 Taisa ane Pue Ala mohuku tauna au mobabehi dake, pebotusina batena manoto. 3 Hai ane mobabehito worikau babehia au nisalaiahe rangami, inee nipehangu barakau nahuku Pue Ala. 4 Tou, laluna Pue Ala maroa, sabara hai mahile ahiNa. Agaiana inee nauli lalumi, “Barake paraluu mobaliki babehianta au kadake.” Nikatuinao, halalu tunggaiana kamaroana laluna Pue Ala bona tepakakau mampenosoi dosami.5 Anti kamatuana lalumi, hai anti kadami mau mobaliki babehiami au kadake, ina mantimi hukumi i alo pebotusi. I alo pebotusi iti, Pue Ala ina mobotusi ope-ope i kanoto-notoana hai mohuku ope-ope tauna au kadake babehiana. 6 Ia ina mohurungi ope-ope tauna moula babehiana hadua-hadua. 7 Ara tauna au mobabehi liliuhe roa, lawi rapeinao molambi petoia, pebila hai katuwo au monono hangko i Pue Ala. I tauna au nodo, ina naweihe Pue Ala katuwo maroa au bara mokahopoa. 8 Agaiana ara worihe tauna au mampekiri pea watanda. Barahe mau moula peundeana Pue Ala, moula pearihe peundeanda au kadake. Ihira ina molambi karumpuNa hai pehukuna Pue Ala. 9 Ope-ope tauna au mobabehi dake, batenda mantodiha hai molambi kapari i alo pebotusi, mepongka hangko i to Yahudi hawe i tauna au barahe to Yahudi. 10 Agaiana tauna au mobabehi roa ina molambihe petoia, pebila hai roa ngkatuwo, mepongka i to Yahudi hawe i tauna au barahe to Yahudi. 11 Lawi Pue Ala bara mampopontani tauna.
12 Tauna au mobabehi dosa au bara moisa Aturana Musa, masala worihe hai hintotohe ragaaki hangko i Pue Ala. Hai nahukuhe Pue Ala anti kamadosanda, agaiana barahe Nahuku anti poliunginda Aturana Musa. Nodo wori tauna au mobabehi dosa au moisa Aturana Musa, Nahuku worihe Pue Ala, 13 anti poliunginda Aturana Musa. Lawi bara tauna au mohadi Aturana Musa, au manoto i peitana Pue Ala, agaiana batenda pea tauna au mampeulai Aturana Musa au Naimba manoto i peitaNa. 14 Tauna au bara to Yahudi barahe moisa Aturana Pue au nauki Musa. Agaiana nauri nodo, masala worihe i peitana Pue Ala. Lawi i lalunda moisatohe babehia au maroa hai au kadake. Iti tongawa lawi hambela-hambela mobabehi worihe apa au maroa nodo au teuki i lalu Aturana Musa. Nauri barahe moisa Aturana Musa au teuki, lalunda haduduanda au mewali nodo Aturana Musa irihira. 15 Hangko i babehianda iti, tongawa kaarana Aturana Musa au teuki i lalunda. Hangko i pekirinda, tongawa wori kaarana aturana Pue Ala i lalunda, lawi hambela-hambela nauli lalunda, “Babehia iti sala,” hai hambela-hambela wori, nauli lalunda “Babehia iti maroa.”
16 Nodo wori i alo pebotusi i kahopoa i dunia. I tempo iti, Pue Ala ina mowei kuasa i Yesu Kerisitu bona mobotusi ope-ope au tewuniangi i laluna manusia. Itimi Ngkora Marasa au kubambari.
To Yahudi moisa mpuuhe Aturana Musa, agaiana batenda masala
17 Mewali, halalu, noumbakau to Yahudi? Arakau au mampemahile lawi mohintuwumokau hai Pue Ala? Hai niuli, “Ina nadokokau Pue Ala anti peulami i Aturana Pue au napahawemi Musa? 18 Ikita to Yahudi, moisake peundeana Pue hai taisa mampopontani apa au maroa hai apa au kadake, lawi rapaturoamoke Aturana Musa.” 19-20 Noumbami ane ikamu to Yahudi manguli, “ikita ide tauna au mapande. Taisa monini tauna au bara moisa Pue Ala, hai hangangaa mopakanoto tauna au ara manihe i kakaindiana hai bara manihe moisa paturo au tou. Lawi paturo au tou iti teukimi i lalu Aturana Musa au ara irikita to Yahudi.”
21 Mewali, ane mopaturokau tauna ntanina, moapari pane watami bara nipaturo? Mopaturokau rangami datihe manangka. Mole, manangkato worikau! 22 Mouliangaakau rangami inee mebualosi, mole mebualosito worikau! Niuli mokahihikau anitu, moapari hai arakau au mopanangka anu-anu hangko i lalu sou penombaa i anitu? 23 Mampemahilekau lawi arami irikamu Aturana Pue Ala au napahawe Musa hangkoia. Agaiana apami pobunduana atura iti ane barakau moadai Pue Ala lawi bara nipeulai aturaNa? 24 Arami teuki i lalu Sura Malelaha node, “Ikamu to Yahudi, anti kakadakena babehiami, tauna au barahe to Yahudi mopapakoi wori hangana Pue Ala.”*
To Yahudi ratile moula Aturana Musa, agaiana batena masalahe
25 Ikita to Yahudi, tauli karatilenta ara pobunduana asala mampeulaike Aturana Musa. Agaiana ane taliungi Aturana Musa, karatilenta iti barapi mobundu. 26 Tauna au barahe to Yahudi, barahe ratile. Agaiana ane manoto babehianda moula apa au ratuntu i lalu Aturana Musa, batena nadokohe Pue Ala himbela hai tauna au ratile moula Aturana Musa. 27 Kahopoana, babehianda tauna au barahe to Yahudi ina mopatongawa kamasalanta to Yahudi, lawi nauri molambimoke Aturana Musa au teuki, hai ratilemoke moula atura iti, agaiana ikita worimi au moliungi atura iti. Hai tauna au barahe ratile, ihirari au moula Aturana Pue Ala.
28 To Yahudi ratilehe moula Aturana Musa, agaiana karatilenda iti iami ada au rabababehi pea i watanda hai raita pea i raoa. Bara iti au mampopewalihe taunana Pue Ala. 29 To Yahudi au nadokohe Pue Ala, iami tauna au moulahe Aturana Pue Ala hangko i lalunda hai tou-tou mpuuhe ratile i lalunda. Lempona, nadokohe Pue Ala anti pobagona Inao Malelaha i lalunda, bara anti peulanda i atura-atura au teuki. Tauna itimi au ina natoia Pue Ala. Kehapirihe bara ratoia tauna, agaiana batena napomahilehe Pue Ala.