Pitu tauna rapilei modurei surona Pue Yesu
6
1 Kamahae-haea katetetambaiami tauna au meula i Yesu. I tempo iti, ope-ope tauna au mepoinalai i Yesu, to Yahudi peahe, agaiana hanggaahe mobasa Yunani, hai hanggaa worihe mobasa Yahudi. Au mobasa Yunani, mohume-humehe mosalai ranganda au mobasa Yahudi, rauli, “Tobemba towawine au ara irikami barahe molambi kiranda hangko i apa au rakira-kira alo-alona i topeahi-ahi.”2 Ido hai, hampulo hai rodua suro iti mokakiohe ope-ope tauna au mepoinalai i Yesu bona teruhuhe, hai rauliangaahe, “Bara maroa ane ikami au mokadipura pokira-kira paande, lawi ane nodo, barapongkai tepaka mobambari Ngkorana Pue Ala. 3 Mewali, halalu-halalu, agina nipilei hangko i olomi pitu tauna au maroa babehianda, au nakuasai Inao Malelaha hai au mapande. Irihira au kiwei bago mokadipura pokira-kira paande iti. 4 Lawi ikami hangangaa mekakae hai mobambaringkai Ngkorana Pue Ala.”
5 Ope-opehe mampokana lolitanda suro iti. Ido hai rapileimi Setepanu lawi ia mepoinalai mpuu i Pue Yesu hai nakuasai Inao Malelaha. Rapilei worihe: Pilipu, Prokorus, Nikanor, Timon, Parmenas hai Nikolaus to Antiokia. (Nikolaus iti, bara to Yahudi, agaiana mesuami agama Yahudi.) 6 Raantimohe tauna au pitu iti lao i surona Pue Yesu, hai suro iti moona taienda i waanda tauna au pitu iti hai mekakaehe bona Pue Ala mowatihe.
7 Hangko inditi, tebambari ntepuumi Ngkorana Pue Ala, mewali kabosa-bosaamohe tauna i Yerusale au meula i Yesu, hai bosa worihe tadulako mpenomba au mepoinalai i Yesu.
Setepanu rahaka
8 Setepanu, nawati mpuu Pue Ala au mowei kuasa iria. Ido hai nabuku mobabehi ngkaia pakana tanda kuasa i lindonda tauna bosa. 9 Agaiana ara worihe au moewa Setepanu. Topeewa itihe iami tauna au menomba i sou penombaa au rahanga Sou Libertini (Libertini lempona: tauna au rakabaha hangko i karapohawinda). Ihira iti, to Yahudi au hangko i wanua Kirene hai Aleksandria. Ara worihe to Yahudi hangko i Kilikia hai Asia, au mai moewa hai mampombehehea Setepanu. 10 Agaiana tauna iti bara rabuku mohanai apa au nauli Setepanu, lawi Inaona Pue Ala mopakanoto laluna mololita. 11 Ido hai lao pearaihe mohuweki lalunda bahangkia tauna bona mobabehihe lolita au mosalai Setepanu, rauli, “Kihadi ia mopakoi pepaturona Musa hai mopakoi Pue Ala!”
12 Karahadina tauna bosa lolitanda au mesalai iti, rumpumohe hihimbela hai tadulakonda to Yahudi hai guru-guru agama, pane laomohe mohaka Setepanu raanti i lindonda tadulako agama. 13 Kahawenda inditi, moanti worimohe bahangkia tauna bona mewalihe sabi au bara tou. Rauli sabi iti, “Tauna iti mopakoi liliu Souna Pue Ala hai mopakoi Aturana Musa! 14 Ia kihadi manguli node: Yesu au hangko i Nasare ina mogero Souna Pue Ala hai mobaliki ope-ope ada au napaturoake Musa.” 15 Karahadina tadulako iti lolitanda, mototokimohe Setepanu. I tempo iti, lindona Setepanu raita nodo lindo malaeka.