Ananias hai Sapira
5
1 Ara wori tohamboko au mampobaluhe tamponda. Tobalilo hangana Ananias, towawinena hangana Sapira. 2 Karoonda mampobalu tamponda, laomi Ananias mohuhu hangkira holo tampo iti i surona Pue Yesu, nauli, “Idemi ope-ope doi holo tampoku.” Moleri himpudumohe hamboko, hanggaa hangko i doi iti rawoli.3 Ido hai mololita Peturu i Ananias, nauli, “Ananias, Datu Tokadake au mokuasai lalumu! Mampodongkoamoko Inao Malelaha, lawi nuuli doi holo tampomu nuhuhumi ope-ope, moleri nuwolito hanggaa! 4 Hangko damani nupobalu tampo iti, oio ampuna. Hai ane nupobalumi, holona oioto wori ampuna. Oio wori au mopakanoto hangkia au nupopenomba. Mewali, noumbari pane ara tunggaiana lalumu mobabehi nodo? Bara tauna au nudongkoki agaiana Pue Alari!”
5 Kanahadina Ananias lolitana Peturu, liliu madungka hai mate. Ope-ope tauna au mohadi apa au mewali, langa mpuuhe. 6 Hangko inditi, bahangkia anantomoane mobungkuhi watana Ananias moula adanda to Yahudi, pane rakowa lao ratawu.
7 Ba ara talu jaa hangko inditi, hawemi towawinena Ananias i Peturu. Agaiana bara mani naisa apa au mewali inona. 8 Nauli Peturu iria, “Uliangaana, tampomi au nipobalu, ba ide mpuumi holona ope-ope?”
Nahanai Sapira, “Io, itimi ope-ope.”
9 Nauli Peturu, “Moapari hai hampepekirikau hamboko i babehiami iti? Ba nipeinao pae mampetandaka Inaona Pue? Peita! Tauna au hangko roohe motawu tobalilomu, oloumohe i baba. Ina rakowa woriko lao ratawu.” 10 Kanahadina Sapira lolitana Peturu, liliu worimi madungka hai mate. Pesulenda mai tauna au laohe motawu Ananias, raita worimi towawinena Ananias mate. Liliu rakowa lao ratawu i holana tobalilona. 11 Mewali, langa mpuuhe ope-ope tauna au mepoinalai i Pue Yesu moita hai mohadi apa au mewali iti. Nodo worihe ope-ope tauna ntanina au mohadi.
Tanda kuasa au rababehi surona Pue Yesu
12 Surona Pue Yesu mobabehihe ngkaia tanda au metingkarai i olonda tauna bosa. Ope-ope tauna au mepoinalai i Yesu, hampepekirihe hai paka teruhuhe i Tambale Salomo i Souna Pue Ala. 13 Tauna au barahe mepoinalai i Yesu, barahe bai meguluki irihira. Agaiana nauri nodo, ope-ope topepoinalai rabila mpuuhe tauna bosa. 14 Hai katetetambaiamohe tauna au mepoinalai i Pue Yesu, maroa tobalilo maroa towawine.
15 Ngkaia tanda kuasa au rababehi suro iti, ido hai bosa tomahai raanti hai rapopaturuhe i ale i wiwi rara. Rababehi nodo lawi raharunga ane Peturu moliu inditi, nau bao-baona pea kana watanda tomahai iti, batenda maoha. 16 Mewali, mokoloromohe tauna hangko i boea-boea au hungku, laohe i wanua Yerusale moanti halalunda au mahai hai tauna au napesuangi seta. Ope-opehe rapakaoha.
Surona Pue Yesu rapopeahi-ahi
17 I tempo iti, Tadulako Mpenomba Mahile hai rangana au mampeulai paturonda toSaduki, mahina mpuuhe i surona Pue Yesu. Ido hai rapepongkami tunggaianda. 18 Mohakamohe surona Pue Yesu iti hai ratarungguhe. 19 Agaiana kaindi iti, hawemi hadua malaekana Pue mobungkahi baba tarunggu hai moantihe lao i raoa. Nauli malaeka iti irihira, 20 “Laomokau i Souna Pue Ala, nipahawe ope-ope Ngkora kana katuwo au wou i tauna bosa.” 21 Mewali, madondo-dondo, lao mpuumohe i Souna Pue Ala hai mepaturohe.
Tanganda mepaturo, Tadulako Mpenomba Mahile hai rangana mokakio ope-ope tadulakonda to Yahudi bona teruhuhe i Pogombo Mahile to Yahudi. Mogulu mpuumohe ope-ope, hai motuduhe tauna lao moala surona Pue Yesu au i lalu tarunggu bona raantihe i lindonda. 22 Agaiana kahawenda tauna au ratudu iti i tarunggu barapohe mohumba surona Pue Yesu. Mesulemohe i tadulakonda, hai rauli, 23 “Kahawengki i tarunggu, kiita baba tarunggu mia-mia tetuko hai tegili. Hai surodado inditi, ara manihe mokampai baba. Kibungkahimi baba, agaiana bara huba hadua au kihumba i lalu!” 24 Karahadina tadulako surodado topokampai Souna Pue Ala hai kapala-kapala tadulako mpenomba bambari iti, wulimohe lawi barapi raisa kaiumbanda suro iti, hai langamohe mampekiri apa au ina mewali.
25 Hangko inditi, hawemi hadua tauna mouliangaahe, “Nipehadingi! Tauna au nitarunggu, aramohe mopaturo tauna bosa i Souna Pue Ala!” 26 Ido hai laomi tadulako surodado hihimbela hai ranganahe i Souna Pue Ala mangala suro iti. Barahe hampai mokakarumpui ba mopapahai Suro iti, lawi langahe rawatui tauna bosa.
27 Mewali, raantimohe suro iti i lindonda tadulako. Mekunemi Tadulako Mpenomba Mahile irihira, nauli, 28 “Kikontomokau hangkoia, ineekau mepaturo mokabelai hangana Yesu. Peita au nibabehi! I humalele wanua Yerusale bosa tauna mampehadingi paturomi iti! Ba nipehangu ikami au masala i karapapatena tauna iti?”
29 Mehanahe Peturu hai surona Pue Yesu au ntanina, rauli, “Bara hawana manusia au kipeulai, agaiana batena pea hawana Pue Ala au kipeulai. 30 Yesu, au nipapatemi i kau mombehape, napatuwo hulemi Pue Ala au rapenombai toiorunta, 31 hai Napopohuda ntanda i koanaNa. Naweimi kuasa mewali Tadulako hai Topehorema bona to Isaraeli menosohe hangko i dosanda hai molambihe peampungi. 32 Ikamimi sabina hinangkana iti, ikami hai Inao Malelaha, au nawei Pue Ala i ope-ope tauna au mengkoru i hawaNa.”
Pololitana Gamaliel
33 Karahadina tadulako lolitanda suro iti, rumpu ntepuumohe, hai rapeinaomi mopapate surona Pue Yesu. 34 Agaiana i olonda tadulako iti, ara hadua toParisi au rahanga Gamaliel. Gamaliel iti, guru agama au rabila ope-ope tauna. Meangkami Gamaliel motudu tauna moantihe suro iti lao hampai i raoa. 35 Roo indo, Gamaliel mopahawe lolitana, nauli, “Halalu-halalu to Yahudi! Nipekiri maroa hampai, apa au hangangaa nibabehi i tauna iti. 36 Lawi bahangkia parena liu, ara hadua tobalilo au rahanga Teudas au mopahawe kaiana tauna au makuasa. Mewali, bosa tauna meula iria, ba aratomohe pae iba atuna. Agaiana kahopoana ia rapapate, hai topeguruna mahawuhe, alana pepaturona barapi pulo. 37 Hambela tempo, i poimba tauna, ara hadua to Galilea, hangana Yudasi. Ia moanti wori bosa tauna moewa topoparenta. Agaiana bara mahae ia rapapate, hai topeguruna mahawu worihe. 38 Mewali, halalu, nipehadingi ide lolitangku: ineehe nipopoapa surona Yesu iti. Nipogiangaahe, lawi ane hangko i manusia pea paturonda hai tunggaianda, batenda ina tunahe. 39 Agaiana ane hangko i Pue Ala, barahe peisa ninangi. Lawi ane niewahe, himbela peakau moewa Pue Ala.”
Mewali, lolitana Gamaliel iti radoko tadulako. 40 Roo indo, suro iti rakakio hulemohe, rapapahaihe hai rauliangaahe, “Ineemokau mepaturo mokabelai hangana Yesu!” Hangko indo, rakabahamohe. 41 Padumohe suro iti mopalehi poteruhuanda. Matana mpuu lalunda, lawi Naweihe Pue Ala katepaka rapopeahi-ahi hai rakakabosai anti peulanda i Yesu. 42 Alo-alona i Souna Pue Ala ba i sou ntanina, mopahawe liliuhe Ngkora Marasa au mopakanoto kaYesunami Datu Topehompo.