14
प्रेमाआ तुमु अनुकरण कोआ आना आत्मिक वारदानाआ बी घुनोमेहे रोआ विशेष कोईत ऐ भाविश्वानी कोआ 2 काहाके ज्याहा बिहीरा भाषाम गोगीला वरदान जोडयेहे होय ते वास्तव्याम मांहाआरी नाहा, ताहा परमेश्वराबरोबर गोठी कोईत होय काहाके त्याहा कोडु होमज्यू शकत नाहा तो ताहा आम्हा शक्तीवांही गूढ गोठी कोल्यो होय 3 पोन तो ज्याहा परमेश्वारापोरोत गोगीलाआ वरदान जोडयेहे होय तो माहुंहु आत्म्यात, मजबुते, उत्तेजन, आना शांती पोचाडीलो गोगीत होय 4 ज्याहा जुदेजुदे भाषांमेहे गोगीलाआ वरदान जोडयेहे होय तो ताहा बोह आपाहाच आत्म्याहा सुदृढ कोअत्लू पोन ज्याहा परमेश्वारापोरोत गोगीलाआ सामर्थ्य जोडयेहे होय तो आखे मोडलील आत्मिक रुपोमे सुदृढ बोनातलू 5 ओमे माआ इच्छा होय का , तुमु आखे बिहीरा भाषा गोगे पण यापोरोत जाखो माआ इच्छा होय का तुमु परमेश्वारापोरोत गोगे काहाके मंडली आत्मिक वादीलोकाजे आपाआ कअलोअ व्याख्या कोआनाराहा सोडवीत बिहीरा भाषा गोगीलोकोता परमेश्वारापोरोत गोगाड्नारु वोडू होय 6 ऐ पाहीही, जर आय आविलो बिहीरा भाषामेहेरोतेहे गोगीत होय ताहा याकोयईत तुमाआ नाहाकोत हाजो उवे जो पर्यंत तुम्हाकोअता आय कोडु गूढ उद्घाटक, दिव्यज्ञान, परमेश्वराआ संदेष्टा किंवा कोडूबी मास्तर इये गोगनारू नाहा 7 ओ गोग्या ताहा एहलो रोही जेहलो निर्जीव वाद्यांचा आवाज जर कोडोबीही शील परस्पर अंतर होय ताहा कोडु केहलो नाहाकोत होदहू सेकेहे का पावी किंवा सारंगीपो कोंडली चाल वाजाळतले रोल्या होय 8 आना जर कान अस्पष्ट आवाज काडनारू ताहा फासाड़ी लोढाई याकोअता कोडू तीयार उवे? 9 याकोईत कोडु बिहीरा भाषांमेहे जोपोरोत तुमु साफ- साफ गोगीत नाहा तोपोरोत कोडु केहलो होमज्यू गोयो का तुमु नाहाकोत कोल्यो होय काहाके एह्लामेहे तुमु ताहा बोह हवेस गोगनारे ओतगोल्यु जानारू 10 यामे किबी शंका नाहा का जगुमे जुदेजुदे भाषा गोगल्या जातेहे आना त्यांमे कोडूबी अर्थ रोत्लू नाहा 11 तेबी जोपोरोत आय तियाअ भाषाविषयी मोलुम कोअनारू नाहा तोपोरोत गोगनाराकोते आय एक बर्बर एहेलू होय तो गोगाड्नारु माकोअता एक बर्बर एहेलू उवे 12 तुमापो एज गोठी लागणारच ओते काहाके तुमु आत्मिक वरदानोहो मिलविलाकोअता उत्सुक होय कोईत त्यामे जाअखो उविला प्रयत्न को, ज्यामुळे मोडलील आत्मिक सुज्ञता जोडयो उवे 13 परिणाम स्वरूपामध्ये जो बिहीरा भाषम गोगत्लू त्याहा प्रार्थना कोअला जोवे का तो आत्मावांहि कोल्यो गोठीई अर्थ पण कोहू सेकेहे 14 काहाके जर आय कोडला बिहीरा भाषांमेहे गोगीत प्रार्थना कोअनारू ताहा माआ आत्माआ ताहा प्रार्थना कोईत होय पण माआ बुद्धी व्यर्थ रोनारे 15 ताहा फासाड़ी नाहाकोत कोअला जोवे आय आपाआ आत्मावांहि ताहा प्रार्थना कोनारू पण आरी ओक्कल पण प्रार्थना कोअनारू , आपाआ आत्मावांहि ताहा स्तुती कोनारू पण आपाआ ओक्कल पण त्याआ स्तुती कोअनारू 16 काहाके जर तू फक्त आपाआ आत्मावांहि ताहा आशीर्वाद आपी पण तीइही बोहीतरोल्यु माहहू फक्त एखलुज होय पण ताआ धन्यवादको आमेन केहलु कोअही काहाके जे तू कोल्यो होय त्याहा तो होमाजाडीत नाहा 17 ओमे पाला तू जर हाजो धन्यवाद आपित होय परंतु बिहीरा माहांआ ताहा तीयावाही किबी आत्मिक मजबूत उवनारा नाहा 18 आय परमेश्वराआ धन्यवाद आपोहो का आय तुम्हामे कोयोताहारोत जुदेजुदे भाषा गोगीतशकतो 19 पोन मोडलीम कोडोबीही बिहीरा भाषाम दहा हजार शब्द गोगीला अपेक्षा आपाआ बुद्धीचा वाप्रिलो कोईत पाच शब्द गोगीला हाजो होमजीत्लू म्हणजे बिहराहा पण शिक्षण आपुहू सेकेहे 20 ऐ पाहीही, आपाआ विचारोम पोऱ्यो बुद्धी सारखो ओवुहू नाहा पोन वाईटकोयदेदू हानू पोऱ्याहरके बोणीत रपण आपाआ सोमझेपोने बदल डायोओग्ल् बन्यो 21 नियमशास्त्राम लेखिलो होय का , “तिया वाप्रिलो अतांवाही जे बिहरि भाषा गोगत्ले, त्याआ सोबीही वाप्रिलो कोईत ओतलू जे पार्के होय त्याआरी न गोगनारू, पण तेहालाम पण ओ माआ उनाआनारू नाहा” प्रभू ऐहलेच कोल्यो होय 22 तेबी बिहरि भाषा गोगीलाआ वरदान विश्वासी माआहुकोअता संकेत होय एहलो नाहा ताहा अविश्वासी माआहुकोअता जेव्हा परमेश्वारापोरोत गोगीला अविश्वासी माआहुकोअता नाहा, ताहा विश्वासी माआहुकोअता होय 23 परंतु आखी मोडंली एकठे उवे आना हरएक जोओ बिहरि भाषा माय गोगीत होय तेबी पण बारथेए माहे किंवा अविश्वासी माय आविलो जानारू ताहा नाहाकोत ते तुम्हामे गांडे कोअही नाहा 24 परंतु जर हरएक जोओ परमेश्वारापोरोत गोगीत होय आना तो पर्यंत किबी जोओ अविश्वासी किंवा बारथेए आविलो जानारू ताहा नाहाकोत आखे माहे त्याहा त्याआ पापापो सावध कोअनारू नाहा? आखे माहे जे कोल्यो होय त्यापोओ त्याआ न्याय उवे नाहा? 25 जेव्हा त्याआ मोनामे लीकाल्यो भेद उगाडीत जानारू तेहालाम पर्यंत तो ओ कोअही , “खरोज परमेश्वर तुम्हामे होय ” नमन कोईत परमेश्वराआ सेवा कोअनारू 26 ऐ पाहीही, ताहा फासाड़ी नाहाकोत कोअला जोवे? तुमु जेव्हा एकठे ओये ताहा तुमामेहेरोत कोडु रोटू , कोडु हिकवन आना कोडु आत्मिक रहस्याचे शालूकयके कोअत्लू कोडु कोडोबीही बिहरे भाषांमेहे गोगीत रोतो ताहा कोडु तिया अर्थ कोतलू, आव आखे गोठी मंडली मजबुतीकोता कोअयी जोवे 27 जर कोडोबीही बिहीरा भाषम गोगीला होय ताहा जाह्खो जाखो बेन किंवा तीन जोहोओ गोगीला जोवे पाळी- पाळी, एक -एक कोईत आना जे किबी कोल्यो गोये एकाने तिया अर्थ कोहू जोवे 28 जर तीइही अर्थ कोअनारो कोडु नेओय ताहा गोगनारू तीइही मिटींगोमे मोंडली ठावकू रोअलो आना फासाड़ी त्याहा स्वतः आरी आना परमेश्वराबरोबर गोगीला जोवे 29 परमेश्वारापोरोत त्याआ दूताआ रुपात गोगीलाआ ज्याहा वरदान जोडयेहे होय , एहलो बेन किंवा तीन माहुअज गोगीला जोवे आना बिहीरावाही जोवे का किबी तिये कोल्यो होय ते तिये फूस कोईओलो 30 जर तीइहीa बोहितरोलो कोडोबीही गोठीई निकाडीत सुरवात उवनारा होय ताहा परमेश्वारापोरोत गोगणारा पाल्या वक्त्याला ठावकू ओतगोल्यु जाहू जोवे 31 काहाके तुमु एक- एक कोईत परमेश्वारापोरोत गोगू सेकतेहे म्हणजे आखे माहे हिकीही आना उत्तेजित उवे 32 काहाके संदेष्टांचे आत्मे संदेष्टाआ काबुमेहे रोनारे 33 काहाके परमेश्वर गाडायकोतो नाहा, शांती आपोहो, जेहलो भक्तांच्या मिटीग, मोडलीम ओये 34 बोईही जोवे का ते मोंडली मिटीग माय ठावकु रोअलो काहाके त्याहा गोगीला परवानगी नाहा, पण जेहलो का नियम शस्त्रामेहे पण कोल्यो होय तिये आपाआ मर्यादेत रोंहु जोवे 35 जर त्याहा किबी मोलुम कोईओलो होय ताहा तिये कोमेहे आपाआपाआ डोहाहा फुसुहू जोवे काहाके बोहीकाजे ओ होबा आपित नाहा का ती मोडली मिटींगोमे गोगनारू 36 नाहाकोत परमेश्वराआ वचन तुमाआ त्यापोरोत निर्माण उवे? किंवा ते पोन तुमाजागेजा पोतले ? खरोज नाहा 37 जर कोडु फूस कोअत्लू का तो भविष्य वक्ता होय म्हणजे तियाअ आत्मिक वरदान जोडयेहे होय त्याहा ओलखीत लेई जोवे का आय तुम्हामे जे किबी लेखत्लू होय ते प्रभूऊ आज्ञा होय 38 जर कोडु याहा ओळखीतल्यो नाहा ताहा त्याहा पण ओलखिलो जानारू नाहा 39 यकोअता ऐ माआ पाहीही, परमेश्वारापोरोत गोगीला तत्पर रो आना बिहीरा भाषांमेहे गोगतुलू पण थाबाडीहि नाहा 40 पोन आखे गोठी योग्य प्रकारे आना व्यवस्था नुसार कोअयी गोयी जोवे.