5
इ गोठीई फासाडी यहुदिई तीवार ओतु आना यीशु यरूशलेमोम गोयु 2 यरुशलेमोमे एक कुंड होय मेंढरांहा बाअणाआरी ज्याहा इब्रानी भाषम बेथसदा आखिलो जात्लू; त्याआ पाच पाड्व्या होयतिया 3 यामे जास्तीज मांदवाड्यू, आंधले, लेगडे आना उगाल्या डीलोओ (पाई आलीलाआ आशामे ) पोडीत रोत एहलो 4 काहाके निवडीलिया वेलो पोओ परमेश्वराआ होरोगइत कुंडा मेहे उतरित कोईत पा आ याहा आत्वोइत रोते ओते पाई हालताज जो कोई पेल्लू उतीरतलू तो हाजु ओत जातु ती कोडी बी बीमारी केहे ने रोय 5 तिंही एक माहुहू ओतु तो अडोतीस वर्षापोरोत मांदवाड्यू पोडीत ओतु 6 येशूने त्याहा पोड्ल्ये पालीत ओ मोलुम उवेताहा का तो जास्तीज दिहीआ आव परीस्तीतीम पोडीतरोल्यु होय त्याहा फ़ुस्ल्याआ, नाहाकोत हाजो उविलो होय नाहाकोत? 7 तिया आजारामओतुतो त्याहा उत्तर आपिलू, “ओ प्रभू माआ जागे कोडु माहुहू नाहा, का जाहा पाई आलाड्ये जाहो तेहालाम माहु पाअयोम उतरीवीही ” पण माआ पोतीला आगाडीच बिहरु उतरित जात्लू 8 येशूने त्याहा कोल्यो , “उठ , आपाआ खाटलो विस्तीत आना सालता व्हा” 9 तो माहुहू लागेज हाजू पोयो आना आपाआ खाटलो विसित चालीलो फिरूहु लाग्यू 10 तो शब्बाथाचा दीही ओतु त्यापोत यहुदी त्याहा जो हाजू पोयो ओतु, कोहू लागाडीत , आज शब्बाथाचा दीही होय ताहु खाटलो विसिलो योग्य नाहा 11 तिये त्याहा उत्तर आपिलू, “जीआ माहु हाजो कोल्यु, तिये माहुंज कोल्यो , आपाआ खाटलो वीस आना सालता व्हा” 12 तिये त्याहा फ़ुस्ल्याआ, “तो कोडु माहुहू होय जीआ ताहु कोल्यो , खाटलो वीस आना सालता व्हा?” 13 पोन जो हाजू पोयो ओतु त्याहा मोलुम नाहाआत्लू का , काहाके तियाअ जागाम गोर्दी होयकोत येशु तिहीरोत निहित गोल्यो ओतु 14 आव गोठी फासाड़ी येशु त्याहा मंदिरोम मिल्यू , येशूने त्याहा कोल्यो , “पाला तू हाजू पोयो होय फासी पाप कोहू नाहा, एहलो उवूंहू नाहा का त्यापोरोत जाखा समस्या तापो आविलो जावा ” 15 तिया माहुंऊ जात याहुदिना कोत आपिलू का जीआ माहु हाजो कोल्यु तो येशु होय 16 त्यापोत यहुदी येशू फासाडी लागाडीत , काहाके तो एहलो काम शब्बाथाआ तेदीही कोईत ओतु 17 यापो येशूने त्याहा कोल्यो , “माआ आबहू ओमेजा काम कोईत होय , आना आय पोन काम कोअत्लू” 18 त्यापोत यहुदी फासी जाखो त्याहा माईत टाकिलाआ प्रयत्न कोहू लागाडीत काहाके तो शब्बाथाआ विधीला तोड्त्लू एहलो नाहा ताहा परमेश्वराआ आपाआ आबहू कोत स्वतः परमेश्वाराहारकु ठरावीत ओतु 19 यापो येशूने त्याहा कोल्यो , "आय तुम्हामे खोरोज -खोरोज कोल्यो होय , पोऱ्या स्वतः किबी कोअहू शकत नाहा फक्त तोच जे आबहाहा कोअत्लूतेहलाम पालत्लू काहाके ज्या- ज्या कामाकोता तो कोअत्लू त्याहा पोऱ्या पण त्याआ प्रमाणोओ कोअत्लू 20 काहाके आबहू पोऱ्यापो प्रेम कोअत्लू आना जे -जे काम तो स्वतः कोअत्लू ते आखेज त्याहा देखाडोहो ; आना तो त्याहा यापोरोत वोडो काम त्याहा देखाडीही म्हणजे तुमु आश्चर्य कोहू सेकतेहे 21 जेहलो आबहू मोल्याहा उठाडत्लू आना जिवंत कोअत्लू तेहलूज पोऱ्या पण जो त्याहा गोमत्लू त्याहा जिवंत कोअत्लू 22 आबहू कोडाआ न्याय कोईत नाहा पण न्याय कोईओलो आखे काम पोऱ्याहा होफहोपिन आपिलू होय 23 का आखे मांहे जेहलो आबाहा सन्मान कोअता तेहलूज पोऱ्याआ पण सन्मान कोअला जोवे जो पोऱ्याआ सन्मान कोईत नाहा तो आबहाआ जीआ त्याहा मोक्ल्यीत होय त्याहा सन्मान कोईत नाहा 24 आय तुम्हामे खोरोज कोतलू जो माआ वचन उनात्लू माहु मोकलीनारापो विश्वास कोअत्लू अनंत जीवोन त्याआ होय ; आना त्याआपो लेतजाय वेल आविलो नाहा पण तो मोईलामरोत पार ओतगोल्यु जीवनामे प्रवेश कोल्यु होय 25 "आय तुम्हामे खोरोज- खोरोज कोतलू का ती वेल आवीत होय का आना ती वेल ओमे येत आना जे उनाआनारू ते जिवंत उवे 26 काहाके ज्यपोरोत आबहू स्वतः माय जीवोन मेकोहो त्याआ प्रमाणोओ तिये पोऱ्याहा पण ओच अधिकार आप्यू होय का , स्वतः माय जीवोन मेकिलो; 27 एवडोज नाहा ताहा न्याय कोईओलो पण अधिकार आप्यू होय , यावाही का तो माअहा पोऱ्या होय 28 यावांही आश्चर्य कोहू नाहा , काहाके तो वेल आवीत होय का जेवडे माहाडामेहे होय तिया शब्द उनाअताज निहित आविलो 29 जीआ हाजो काम कोल्यु होय ते जीवनाआ पुनरुस्थानाकोअता उठ्णारू आना जीआ वाईट काम कोल्यु होय ते न्यायाआ पुनरुस्थानाकोअता जिवंत उठ्णारू 30 आय स्वतः किबी कोहू शकत नाहा; जेहलो उनात्लू तेहलूज न्याय कोअत्लू आना माआ न्याय खोरो होय आय माआ इच्छा नाहा पण माहु मोकलीनाराआ इच्छा जोवे 31 जर आय स्वतः माआ साक्ष कोहू ताहा माआ साक्ष खोरी नाहा 32 एक बिहरु होय तो माआ साक्ष आपोहो माहु मोलुम होय माआ साक्ष जो आपोहो ती खोरी होय 33 तुमु योहानाआ फुसुहू लागाडले आना तिये खोरी साक्ष आप्यी होय 34 पोन आय स्वतः विषयी माहाआ साक्ष नाहा जोवे; तेबी पण आय याआ गोठी यावाही कोतलू का तुम्हामे तारण मिलूहु जोवे 35 तो ताहा बालनारू आना सोमकीनारू दिव ओतूएन तुम्हामे किबी टाईमापोजा त्याआ उजवोडाम आनंदाम उविला हाजो लागेहे 36 पोन मांही जी साक्ष होय ती योहानाआ साक्ष पेक्षा वोडी होयकाहाये जे काम आबहे माहु पुरो कोइलाकोअता होपण्ये होय कोअतीज ओ काम जे आय कोअत्लू ते माआ साक्ष होय का आबहे माहु मोक्ल्यीत होय 37 आना आबहू जीआ माहु मोक्ल्यीत होय तीयेज माआ साक्ष आप्यी होय तुमुबीही त्याआ शब्द उनाअयो नाहा आना तिया चेहरू पण पाल्यू नाहा; 38 आना त्याआ वचनाआ मोनुमे स्थिर मेकीत नाहा काहाके ज्याहा तिये मोक्ल्यीत होय तुमु तिया विश्वास कोईत नाहा 39 तुमु पवित्र शस्त्रामेहे होदतेहे काहाके तुम्हामे मोलुम होय का तुम्हामे अनंत जीवोन जोळे; आना ओ तोच होय का जे माआ साक्ष आपत्ले; 40 तेबी पण तुमु जीवोन मिलविलाकोअता माआहने आवीत नाहा 41 माहु महांआ त्यापोरोत सन्मान नाहा हवे 42 पोन आय तुम्हामे होमजीत्लू का तुम्हामे परमेश्वराआ प्रेम नाहा 43 आय आपाआ आबहाआ नावामेहे आवयू होय आना तुमु माहु तेईतले कोईत नाहा जर कोडु स्वतःआ नावामेहे आवे त्याहा तेईतले कोईत लेही 44 तुमु जे एकाबिहरापोरोत सन्मान लत्ले आना तो सन्मान जो फक्त परमेश्वारापोरोत होय लेत नाहा कोडला प्रकारे विश्वास कोहू सेकतेहे? 45 एहलो होमज्यू नाहा का आय आबाहाआगाडी तुमापो दोष लागाडनारू; तुमापो दोष लागाळणारू ताहा मुसा होय ज्यापो तुमु भोरुसो मेकअलू होय 46 जे तुमु मुसाआ विश्वास कोल्योओ ओतलू ताहा माआ पण विश्वास कोल्योओ ओतलू यामुळे का तिये माआ विषयी लेखिलो होय 47 पोन जर तुमु त्याआ लेखल्यो गोठीपो विश्वास कोईत नाहा ताहा माआ गोठीपो केहलो विश्वास कोअनारू ?