मॅथि 28

शाबाथओ दिहोओ फासाडी हाफ्ताआ पेल्लू दिह उगताच मरिया मगदालिया आना बीहरी मरिया महानोहो पालू हु आई 2 आना पाला एक वोडू भूकंप पोयो, काहाके प्रभूआ दूत होर्गामरोत उतरीलो आना जागे आवीत त्याआ डोणुहु ढेपलीत आपिलू, आना त्याआ उपो बोहित गोल्यो 3 त्याआ रूप विजोहोस ओते आना त्याआ आंगडे बर्फाहास पांडो ओते 4 त्याआ बिखीकी रखवाली कोआ थरथरलेकोअयो, आना मृतप्राय उवे 5 स्वर्ग दूताकोई बोअयीही कोल्यो,'' बित नाहा , माहु मोलुम होय का तुमु ज्याहा क्रूसापो सोडवियू गोल्यो त्याहा होदित होय 6 तो इही नाहा होय , परंतु आपाआ वचना नुसार जिवंत पोयो होय आव ए जागू पाला इही प्रभूहु मेक्ल्ये ओते 7 आना ओमेज जात त्याआ शिष्यांआ कोआ का तो मोइलमरोत जिवंत पोयो होय , आना तो तुमाआ आगाडी गालीलामेहे गोल्यो होय , होमजीत्लो त्याआ दर्शन जोडीत पाला आय तुम्हामे कोत आपिलू'' 8 ते बिखीकी आना वोडा आनंदावाही त्याआ शिष्यांआ खोबोर आपिलाकोअता लागेज गुगदिलो गोये 9 तेहालाम येशू त्याहा मिल्यू आना कोल्यो'' सलाम'' ते त्याआ जागे आवीत आना त्याआ गुडू तोईत त्याहा दंडवत काल्ये 10 तेहालाम येशू त्याहा कोल्यो , बित नाहा ; माआ पाहीही त्याहा जात कोआ का गालीलामेहे निहित जा, तिही माहु देखे'' 11 तियाअ जात ओयताहा राखवालदार मायारोत किबी नगरामे आवीत पुरो वर्तमान प्रधान याजक माहुंहु कोल्यो 12 तेहालाम तिये आबहू मालक्याआरी एकठे आवीत संपली याकोअता हिपायांहा जाअखो चांदी आपित कोल्यो , 13 ओच कोओलो का राती आमुहू हुविलो ओतू , ताहा त्याआ शिष्य आवीत त्याहा चोरीते लेत गोये 14 आना ए गोठी सुभेदाराआ कानापो पोचीही, ताहा आमुहू त्याहा होमजाडीत लेहु आना तुम्हामे वासाडीत लेहु '' 15 तिये पोशा लेत जेहलो हिकाडये गोये , तेहलूज कोल्यु ए गोठी ओमेजा यहुदात पेरीतकोईत आवयी 16 अकरा शिष्य गालीलामेहे तियाअ डोगोपो गोये , जेहलो येशूने त्याहा कोल्यो ओते 17 तिये त्याआं दर्शन लेत त्याहा नमन कोल्यु, पण कोडा -कोडा ला शंका आवयी 18 येशू त्याआ जागे आवीत कोल्यो,'' होर्गाहा आना धोरतीई अधीकार माहु आप्यू होय 19 याआ याकोअता तुमु जा, आखे जातीई माहुंहु शिष्य बोनाडा; आना त्याहा आबहु, आना पुत्र, आना पवित्र आत्म्याआ नावामेहे बाप्तिस्मे आपा , 20 आना त्याहा आखे गोठी ज्या आय तुम्हामे आज्ञा आप्यी होय , ते पालीला याकोअता हिकडा: आना पाला, आय जुगाआ शेवटपोरोत सदासर्वकाल तुमाआ आरी होय '.