เปโตร
บทนำ
ผู้เขียนจดหมายฉบับนี้คือ เปโตรผู้เป๋นอัครทูตต๋ามตี้ต้านบอกในกำตั๊กตวายของจดหมาย คริสตจักรสมัยยุคแรกยอมฮับว่าเปโตรเป๋นผู้เขียน ในบทตี้ 5:12 มีเขียนบอกว่า เปโตรเขียนจดหมายฉบับนี้ผ่านตางลายมือของสิลวานัส (ฮ้องแหมจื้อว่า สิลาส) เขาเป๋นเปื้อนของเปาโลผู้เป๋นอัครทูต กับเกยเตียวตางกับเปาโลในก๋านไปบอกข่าวดีเป๋นบางเตื้อ (กิจก๋าน 15:40) เปโตรคงจะเขียนจดหมายฉบับนี้หละหว่างปี๋ ค.ศ. 64 เถิง 68
เปโตรเขียนจดหมายฉบับนี้ไปเถิงหมู่ผู้เจื้อตี้อยู่ในแคว้นปอนทัส แคว้นกาลาเทีย แคว้นคัปปาโดเซีย แคว้นเอเชีย กับแคว้นบิธีเนีย แคว้นหมู่นี้อยู่ในภาคเหนือของประเทศตุรกีในสมัยนี้ ติดกับทะเลดำ หมู่ผู้เจื้อหมู่นี้ส่วนใหญ่เป๋นคนต่างจ้าด เปโตรเขียนจดหมายฉบับนี้โดยหื้อสิลวานัสเขียนต๋ามตี้เปโตรอู้ ต๋อนตี้ตึงสองอยู่ในกรุงโรม
เปโตรเขียนจดหมายนี้เปื้อหื้อกำสอนตี้จะจ้วยผู้เจื้อตี้อยู่ต้ามก๋างก๋านค่ำ เขาตักเตื๋อนหื้อหมู่เขาตวยต๋ามตั๋วอย่างของพระเยซูตี้มั่นอดตุ๊กยากในจีวิตของพระองค์ กับตักเตื๋อนหื้อฮักกั๋นย้อนวันสิ้นโลกใก้เถิงแล้ว กับหื้อนำของประทานตี้พระเจ้ามอบไว้ไปฮับใจ๊คนอื่น