ยากอบ
บทนำ
กำตั๊กตวายในจดหมายฉบับนี้บอกว่า เขียนโดยยากอบ เถิงแม้ว่าในพระคัมภีร์พันธสัญญาใหม่จะมีคนจื้อยากอบหลายคน แต่คริสตจักรสมัยยุคแรกก็ได้ยอมฮับว่าจดหมายฉบับนี้เขียนโดยยากอบ น้องบ่าวของพระเยซู แม้ว่ายากอบบ่เจื้อว่าพระเยซูเป๋นพระคริสต์ต๋อนตี้พระองค์มีจีวิตอยู่ แต่ต้านมาเจื้อในปายหลัง แล้วก็ได้มาเป๋นผู้นำในคริสตจักรตี้กรุงเยรูซาเล็ม ยากอบเขียนจดหมายฉบับนี้ขึ้นก่อนปี๋ ค.ศ. 49
ในจดหมายฉบับนี้ ยากอบได้บอกว่า ต้านเขียนเถิงสิบสองผะกุ๋นของจาวยิวตี้แตกขะแลขะแจไปกู้ตี้กู้ตาง หมายเถิงว่าต้านเขียนเถิงปี้น้องผู้เจื้อตี้เป๋นจาวยิวตี้โดนค่ำในกรุงเยรูซาเล็ม แล้วได้แตกขะแลขะแจไป ยากอบเขียนจดหมายฉบับนี้ต๋อนตี้เป๋นผู้นำคริสตจักรตี้อยู่ในกรุงเยรูซาเล็ม ต้านเขียนเปื้อหื้อก๋ำลังใจ๋หมู่ผู้เจื้อหื้อมั่นคงในความเจื้อ หื้ออดทนต้ามก๋างก๋านทดลองใจ๋ กับแสดงความมั่นคงในความเจื้อของหมู่เขาโดยก๋านเยียะสิ่งต่างๆ ของเขา
ยากอบสอนว่าจ๋ำเป๋นตี้จะต้องอดทนต้ามก๋างก๋านทดลองใจ๋กับก๋านทดสอบความเจื้อย้อนว่านี่เป๋นวิธีตี้จะเยียะหื้อความเจื้อนั้นเข้มแข็งขึ้น กับต้านได้สอนแหมว่าผู้เจื้อบ่ควรก้าอู้บ่ดายว่ามีความเจื้อแต่ควรเยียะต๋ามความเจื้อนั้น