Yɩɩ bʋ̀rɩ̀ ʋ zɩga dwíə́ nəkaran* tə nə
4
1 «Tə dɩan təntə nə, kʋ máŋá tə wa,à nə wá pìí à kwɛn Zwida lʋʋ nii tə,
də Zwerizalɛmə à zɩgɩ zəni,
2 à wá kə dwíə́ nəkaran tə mama duən yáá nə,
à pa ba cú Zozafatə vara tə wa,
yá mə lá nə, à wá bʋ̀rɩ̀ ba bʋra,
Yɩzərayɛlə lɩ̀à tə yɩrɩ, ba nə yɩ à mʋ̀ lɩ̀à,
ba ga yɩ à tori,
dwíə́ nəkaran təntə nə laga
ba kə lʋʋ dwíə́ tə wa,
də à lʋʋ nii tə yɩrɩ, ba nə tàrɩ̀.
3 Ba pwárɩ́ ba ma tara à lalʋʋ tə.
Ba ja bisɩmabara ba ma lárɩ́ kacwarʋ,
ba yoli bisɩmakana ba ma yə̀ divɛn ba nyʋn.
4 Á də yɩ bɛ̀ɛ̀ nə á pɩ̀à də nə,
Tirə də Sidon tɩ̀án-ba,
də á də mama, Filisi lʋʋ níə́-ba?
Á yɩ á pɩ̀à sə á fwi á lɩŋa à yuu wa naaa?
Á nə fwi á lɩŋa à yuu wa,
à wá pa kʋ tə nə mɛ də aba tə
pìí kʋ tʋ á tətə yuu wa lala.
5 Á tì à wárʋ́ də à sɩ́án,
də à wozəŋə tə nə jə funə,
á ja va á kə á padii tə wa.
6 Á yoli Zwida lʋʋ lɩ̀à,
də Zwerizalɛmə tɩ̀án Yavan tɩ̀án yuu wa,
sə á ma pa ba ya yiŋʋnɩ də ba lʋʋ nii tə.
7 Nəŋə, à pɩn à lɩ̀à tə yɩ́á pori,
sə ba nan bwálɩ́ tə wa, á nə yoli ba,
yá à wá pa kʋ tə nə mɛ də aba,
pìí kʋ tʋ á tətə yuu wa.
8 À wá yoli á bɩ̀á də á bwɩ̀ɩ́, Zwida lʋʋ lɩ̀à yuu wa,
yá ba wá yoli ba, Saba tɩ̀án yuu wa,
kʋ nə yɩ lʋʋ nii, kʋ bwálɩ́ nə ŋʋna.»
Cɩ́gá, Ba-Yígúrə́-Jə-Tiu nə swɩ̀n kʋ!
Talɩkwa kʋ̀ʋ̀ də bʋra yoo
9 Á bwərə yoo kʋ tə, dwíə́ nəkaran* tə wa:
«Á tana á tɩ̀àn sə á ta kʋ̀ʋ̀!
Á kənə kwatara babɩran tə duən yáá nə,
sə bara tə mama nə yɩ kwatara,
twən ba yí, ba ta kʋ̀ʋ̀!
10 Á jana á vabɩa, á ma lù kwatara sɩ̀án,
á ga ja á sɩkwarɩ, á ma lù cwiən!
Labwanʋ swɩn, də ʋ yɩ babɩa!
11 Á bɩ̀àn á kun duən nə lala,
á mʋ̀ dwíə́ nəkaran tə mama nə kɩkarɩ Zwida lʋʋ nii tə!
Ba-Yígúrə́-Jə-Tiu, pa n kwatara babɩran tə cú ba wa!
12 Dwíə́ nəkaran tə zaŋa
ba va Zozafatə vara tə con!
Cɩ́gá, mə lá nə à wá jə̀ń,
à ma bʋ̀rɩ̀ dwíə́ nəkaran tə mama
nə kɩkarɩ Zwida lʋʋ nii tə bʋra.
13 Cɩ́gá, ba wʋlʋŋʋ tə dáá zənzən!
Kʋ mʋ̀ yɩrɩ, á tíə́ á sɩkwara, á ma gan ba,
ndə ba nə ganɩ kárɩ́ wiən nətʋ!
Á bɩ̀àn á tɩtaga ba,
ndə ba nə nɩŋɩ divɛn tɩ̀án bɩ̀á nətʋ!
Cɩ́gá, divɛn tɩ̀án bɩ̀á gwàlʋ́ tə súə́,
kwara tə súə́ tə pàlɩ̀!»
14 Lalʋʋ kapʋpʋ, nə̀ń lalʋʋ kapʋpʋ nyɩɛn bʋra vara tə wa!
Cɩ́gá, Ba-Yígúrə́-Jə-Tiu dɩɩn tə bwə́lə́, bʋra vara tə wa.
15 Yɩcaʋ tə də cànà tə beri,
yá kacɩlacɛɛ tə kwɩ̀n tə poni nə.
16 Ba-Yígúrə́-Jə-Tiu zɩgɩ Siyon paan tə yuu wa, ʋ baa,
ʋ zɩgɩ Zwerizalɛmə nə, ʋ pa ba nì ʋ kori,
lanworu tə də tɩa tə ga vuvugə.
Yá Ba-Yígúrə́-Jə-Tiu yɩ yuu yikwala bwálɩ́,
ʋ pa ʋ lalʋʋ tə nə,
ʋ yɩ dɩ̀àn dəkuu bwálɩ́,
ʋ pa Yɩzərayɛlə lɩ̀à nə.
17 Ba-Yígúrə́-Jə-Tiu swɩ̀n, ʋ wʋ́:
«Á dàń wá lwarɩ də
à mʋ̀ nə yɩ Ba-Yígúrə́-Jə-Tiu, á tíú Yɩɩ tə,
yá à wulə Siyon paan tə yuu wa,
à paan tə ka nə yɩ parɩ.
Zwerizalɛmə də wá ya parɩ,
yá vərə kʋ́ʋ̀ bá twá kʋ wa ba kɛ̀ń.»
Yɩɩ pɩn jɩjə nədʋn ʋ lalʋʋ tə nə
18 «Kʋ máŋá tə wa,
divɛn tɩ̀án bɩ̀á nɩ́á wá pàlɩ̀, pɛɛn tə yun wa,
nayɩla ga pàlɩ̀ dədwələn tə yuu wa,
yá nɩ́á wá pàlɩ̀ Zwida lʋʋ nii varnɛɛ tə mama wa.
Nabuliyii wá nan Ba-Yígúrə́-Jə-Tiu dìə̀ tə wa,
kʋ gàrɩ̀ Switimə nacoru tə.
19 Ezwipətə lʋʋ nii tə wá cʋ̀gʋ̀ mɩ́ámɩ́án.
Edomə wá cʋ̀gʋ̀ mɩ́ámɩ́án, kʋ jì digə,
wʋlʋŋʋ tə yɩrɩ, ba nə tʋn Zwida lʋʋ lɩ̀à tə yɩra,
ba nə lwá ba jana tɩa tə yuu wa,
yá ba wà yoo cʋ̀gʋ̀.
20 Yá lɩ̀à wá ya Zwida lʋʋ nii də Zwerizalɛmə wa,
máŋá də máŋá mama wuuu.
21 À yà wà ba jələ ndə lɩ̀à nə,
ba nə wà yoo cʋ̀gʋ.
Yá sɩ́ʋ́n nə, à dàń wá jələ ba,
ndə lɩ̀à nə, ba nə wà yoo cʋ̀gʋ̀,
ba nə lwá ba jana,
yá ba wà yoo cʋ̀gʋ̀ yɩrɩ.
Yá à mʋ̀ Ba-Yígúrə́-Jə-Tiu dàń wá ya Siyon paan tə yuu wa.»