Càn máŋá də ka pìí ka bwin yoo
12
1 Máŋá təntə wa, Yɩɩ kwatara yáá tíú Miswɛlə, ʋ nə tɛ ʋ joŋə n lʋʋ lɩ̀à tə, wá zàn yɩɩ nə. Kʋ wá ya jɩgwarʋ máŋá, kʋ yiri nə wà dí yáá kʋ ya lá, kʋ nə zɩgɩ máŋá tə mama, lʋʋ dwíə́ nə wulə, kʋ bà kʋ yí máŋá təntə. Kʋ máŋá təntə wa, n lʋʋ lɩ̀à tə mama, ba yɩrɩ nə pʋ́pʋ́nɩ́ sagɩ tə wa, wá jon ba tɩ̀àn. 2 Lɩ̀à kapʋpʋ, ba yà nə dwɛ̀ libərə wa, wá zàn dwiən nə. Ba duən wá zàn ba na mɩɩ kʋ nə ba zwɛ̀, ba duən də ga zàn ba də́ cavɩra də lɛɛ, tə nə ba zwɛ̀. 3 Yənu tɩ̀án wá pɩpɩlɩ ndə lanworu poni nə. Ba mʋ̀ lɩ̀à tə nə ja lɩ̀à kapʋpʋ ba bà cɩ́gá cwəŋə wa, wá pɩpɩlɩ ndə kacɩlacɛɛ nə, máŋá mama wuuu.4 N mʋ̀ Danɩyɛlə dàń ja sʋ̀ràn tə tə n bɩcan wa, n ga sun sagɩ kʋ tə nii, kʋ va kʋ yí máŋá tə yígúrə́. Lɩ̀à kapʋpʋ dàń wá twarɩ yənu tɩa mama, yá ba yənu wá súrí zənzən.
Yígúrə́ máŋá tə yɩ yosəgu
5 À mʋ̀ Danɩyɛlə nɩ bara bələ duən, ba zɩga yɩɩ nə. Ʋ don yà zɩga mʋnaa tə bibiru don nə, ʋ don də ga zɩga ka bibiru tə don nə. 6 Ba wa lìù don swɩ̀n bɛɛ tə nə zʋa ganbʋa tə, ʋ ga zɩga mʋnaa tə nɩ́á tə yuu con, ʋ wʋ́: «Máŋá kwà wa nə yogwaran tə tə wá zwɛ̀?» 7 Bɛɛ tə nə zʋa ganbʋa tə, ʋ ga zɩga mʋnaa tə nɩ́á tə yuu con, zɩ̀n ʋ jɩ̀àn bələ tə, ʋ te yɩɩ nə, ʋ ga dù də Yɩɩ tə nə wulə máŋá mama wuuu, ʋ wʋ́: «Kʋ wá dán bɩna batwa də faan. Yá máŋá tə wa Yɩɩ lɩ̀à tə dɩ̀àn nə wá zwɛ̀ mɩ́ámɩ́án, yìə̀n təntə də mama dàń wá zwɛ̀.»
8 À nì sʋ̀ràn tə, yá à wà tə də̀ń nì. À ma bwe, à wʋ́: «À yuu-tiu, yìə̀n təntə yígúrə́ wá ya nətə?» 9 Ʋ le nə, ʋ wʋ́: «Vəli Danɩyɛlə. Cɩ́gá, sʋ̀ràn təntə mɛ sə tə ya yosəgu, tə nii sun, kʋ va kʋ yí máŋá tə yígúrə́. 10 Lɩ̀à kapʋpʋ kwɛn ba tɩ̀àn, ba lɩ durən yìə̀n wa, ba jì parɩ. Wʋlʋnyɩna wá tʋn wʋlʋŋʋ, ba lìù mama ga bá yəni kʋ də̀ń. Yá yənu tɩ̀án mʋ̀ wá yəni kʋ də̀ń. 11 Kʋ nə zɩgɩ máŋá tə wa, dɩɩn mama joŋi tə nə kʋ́ʋ̀ bá ya lá, ba ga tún cʋcʋran wolwan tə kʋ bwálɩ́ nə, kʋ wá ya dɩan 1 290. 12 Pupwən lìù nə yɩ lìù tə, ʋ nə wá zɩgɩ ʋ dàn, ʋ va ʋ yí dɩan 1 335 tə! 13 Yá n mʋ̀ Danɩyɛlə, ciŋi n zɩgɩ, n va n yí n yígúrə́. N wá na sìə́, n ga wá pìí n zàn, n jon n tori, máŋá tə yígúrə́ wa.»