Á lorə Yɩɩ Zwerizalɛmə sìə́ yɩrɩ
122
1 Gwaran ba nə nuŋə ba ja dɩ̀ Ba-Yígúrə́-Jə-Tiu dìə̀ tə wa. Davidə gwaran.
À yàá wulə pupwən wa,
də ba nə swɩ̀n à con, ba wʋ́:
«Nə vələ Ba-Yígúrə́-Jə-Tiu dìə̀ tə wa!»
2 Nə nɛɛ zɩga n mimien nə, Zwerizalɛmə!
3 Zwerizalɛmə, n yɩ tɩʋ tə ba nə lwə̀,
kʋ zʋ duən zəni!
4 Mə lá nə dwíə́ tə nə yɩ Ba-Yígúrə́-Jə-Tiu dwíə́ yàá bà,
ba pa dun Ba-Yígúrə́-Jə-Tiu nə,
ndə kʋ nə yɩ yofwamɩʋn Yɩzərayɛlə wa nətʋ.
5 Cɩ́gá, mə lá nə, Davidə dwíí tə padaʋ tə wulə,
padaʋ tə, ba nə jəni ba ma bʋ̀rɩ̀ bʋra tə.
6 Á lorə Yɩɩ, sə ʋ kə sìə́ Zwerizalɛmə wa,
sə lɩ̀à tə nə swə Zwerizalɛmə ya sìə́ wa!
7 Yɩɩ wá kə sìə́ n bərənɛɛ tə wa,
də yazurə n pɛ̀gá sànɩ́ tə wa!
8 À nubɩa tə, də à dabara tə yɩrɩ,
à wá swɩ̀n, à wʋ́:
«Yɩɩ wá pa sìə́ ya n wa!»
9 Ba-Yígúrə́-Jə-Tiu, ʋ nə yɩ nə Yɩɩ dìə̀ tə yɩrɩ,
à pɩ̀à n zəni!