Zwerizalɛmə tɩ̀án yoo
9
1 Ba gàlɩ̀ Yɩzərayɛlə lɩ̀à tə mama, ba pʋ́pʋ́nɩ́ ba yɩra, ba tún Yɩzərayɛlə lɩ̀à pɛ̀gá sagɩ tə wa. Ba ja Zwida lʋʋ lɩ̀à tə mʋ̀ ba va yongaʋ, Babɩlɔnə nə, ba nə wà Yɩɩ nii nə twá yɩrɩ. 2 Təntən lɩ̀à tə nə pìí ba bà ba jə̀ń ba dəkuu bwálɩ́ tɩan tə wa, yà yɩ Yɩzərayɛlə lɩ̀à, də Yɩɩ joŋwana, də Levi dwíí tə, də Yɩɩ dìə̀ tʋtʋnbɩa tə.3 Lɩ̀à tə nə twi ba jə̀ń Zwerizalɛmə wa yɩ Zwida dwíí tə, də Bɛnzwamɛn dwíí tə, də Efərayimə dwíí tə, də Manase dwíí tə. 4 Zwida dwíí tə wa, kʋ yɩn Utayi, ʋ nə yɩ Amihudə bìú. Amihudə yɩ Oməri bìú, Oməri yɩ Yiməri bìú, Yiməri yɩ Bani bìú, Bani yɩ Zwida bìú Perɛsə bìú don. 5 Swela dwíí tə wa, kʋ yɩn ʋ bikwɩa Asaya, də ʋ bɩ̀á tə. 6 Zera dwíí tə wa, kʋ yɩn Yewuwɛlə, kʋ súrí ba nubɩa 690 nə. 7 Bɛnzwamɛn dwíí tə wa, kʋ yɩn Salu, ʋ nə yɩ Meswulamə bìú. Meswulamə yɩ Hodavɩa bìú, Hodavɩa yɩ Hasenuwa bìú. 8 Kʋ súrí Yerohamə bìú Yibəneya nə, də Uzi bìú Ela, ʋ nə yɩ Mikəri nàʋ́, də Swefatɩa bìú Meswulamə, ʋ nə yɩ Rewuwɛlə nàʋ́, ʋ ga yɩ Yibənɩa nanagɩ. 9 Bara təntə mama yà yɩ dìì tɩ̀án. Ba də ba nubɩa tə dwíə́ tə nə ken duən nə, ba yɩ 956.
10 Yɩɩ joŋwana dwíí tə wa, kʋ yɩn Yedaya, də Yehoyaribə, də Yakin, 11 də Azarɩya, ʋ nə yɩ Hiləkiya bìú. Hiləkiya yɩ Meswulamə bìú, Meswulamə yɩ Sadɔkə bìú, Sadɔkə yɩ Merayɔtə bìú, Merayɔtə yɩ Ahitubə, ʋ nə yɩ Yɩɩ dìə̀ tə yuu tíú, bìú. 12 Kʋ súrí Adaya nə, ʋ nə yɩ Yerohamə bìú. Yerohamə yɩ Paswurə bìú, Paswurə yɩ Maləkɩya bìú. Kʋ tə súrí Masayi nə, ʋ yɩ Adɩyɛlə bìú. Adɩyɛlə yɩ Yazera bìú, Yazera yɩ Meswulamə bìú, Meswulamə yɩ Meswilemitə bìú, Meswilemitə yɩ Yɩmɛrə bìú. 13 Ba də ba nubɩa tə duən tə nə yɩ dìì tɩ̀án tə nə ken duən nə, ba yɩ bara 1 760, ba nə jə dun, ba ga tʋŋa Yɩɩ dìə̀ tə wa.
14 Levi dwíí tə wa, kʋ yɩ Swemaya ʋ nə yɩ Haswubə bìú. Haswubə yɩ Azərikamə bìú, Azərikamə yɩ Haswabɩa bìú, Haswabɩa yɩ Merari bìú don. 15 Kʋ súrí Mika bɩ̀á Bakəbakarə, də Erɛswə, də Galalə, də Matanɩa nə. Mika yɩ Zikəri bìú, Zikəri yɩ Asafə bìú. 16 Kʋ súrí Swemaya bìú Abədɩasə nə. Swemaya yɩ Galalə bìú, Galalə yɩ Yedutunə bìú. Kʋ súrí Asa bìú Berekɩa nə. Asa yɩ Ɛləkana bìú. Asa yà yɩ ʋ wulə Netofa tɩʋ tə nagwanaa tə wa.
17 Mimii nəcɩra də yɩn lá: Ba mʋ̀ nə yɩ Swalumə, də Akubə, də Taləmon, də Ahiman, də ba nubɩa tə. Swalumə yà nə yɩ ba yuu tíú. 18 Də zə̀n mama, ba mʋ̀ tə nə wulə yɩɩ yipɩan con, ba cɩ̀ pɩ̀ʋ́ mimii tə nə. Ba nɩbara də yɩn Levi dwíí tə mimii nəcɩra. 19 Swalumə yɩ Kore bìú, Kore yɩ Abɩyasafə bìú, Abɩyasafə yɩ Kore bìú. Swalumə də ʋ nubɩa tə, ba nə yɩ Kore dìə̀ lɩ̀à nə yɩn Yɩɩ jə́rə́ gansili tə mimii tə nəcɩra, ndə ba nɩbara də nə yɩn Ba-Yígúrə́-Jə-Tiu lɩ̀à tə yijaa bwálɩ́ tə nəcɩra nətʋ. 20 Eleyazarə bìú Fineyasə yà nə dí yáá ʋ ya ba yáá tíú. Cɩ́gá, Ba-Yígúrə́-Jə-Tiu yà wulə də wá. 21 Meswelemɩa bìú Zakari də yà yɩ Yɩɩ jə́rə́ gansili tə mimii nəcɩrʋ. 22 Mimii nəcɩra tə mama ba nə kúrí yà yɩ lɩ̀à 212. Ba yà pʋ́pʋ́nɩ́ ba yɩra ba tún ba tɩan tə dwíí dəkuu saga tə wa. Davidə də Yɩɩ yinarʋ Samiyɛlə nə kúrí ba nɩbara-ba ba tún, sə ba tʋn tʋ̀tʋ̀nán təntə, ba nə yɩ pùə́ nədʋ tɩ̀án yɩrɩ. 23 Ba də ba bɩ̀á tʋtʋŋɩ yà nə yɩ sə ba yà Ba-Yígúrə́-Jə-Tiu dìə̀ tə mimiən nəcɩra, ba cɩ̀ ʋ jə́rə́ gansili tə nə, máŋá mama. 24 Mimii nəcɩra tə yà wulə mimiən banɩa tə nədʋ mama nii nə, yɩɩ yipɩan con, də yɩɩ yizwɩa con, də jɩzən saparʋ con, də jɩgwiə saparʋ con. 25 Ba nubɩa tə yà nə wulə ba tɩan tə wa, yà mɛ sə ba də ba twi ba saŋa ba ba tʋŋa dɩan barpɛ barpɛ. 26 Cɩ́gá mimii nəcɩra yáá tɩ̀án banɩa tə mʋ̀ yà yɩ ba wulə lá máŋá mama. Ba yɩ Levi dwíí tə lɩ̀à ba nə cɩ̀ Yɩɩ dìə̀ dəwoo dibɩa tə, də Yɩɩ dìə̀ jɩjə tə nə. 27 Ba yà jwɩ Yɩɩ dìə̀ tə bírə́ tàŋá nə. Cɩ́gá, ba yà mɛ sə ba cɩ̀ ka nə, sə ba ga súrí ka nii jɩjʋ mama. 28 Ba wa lɩ̀à duən yà yɩ tʋtʋnzɩla tə yuu ba ywàŋá. Ba yàá gàlà tə, máŋá tə mama ba nə ja tə ba zʋ sə ba tún, nə à yə̀ə́ ba nə zʋa sə ba tì tə. 29 Ba duən də yà nə ywàŋá Yɩɩ wúlú bwálɩ́ tə tʋtʋnzɩla tə, də mun tə, də divɛn tə, də nʋga tə, də wusinə tə, də tɩralɩ tə yuu nə. 30 Yá kʋ yà yɩ Yɩɩ joŋwana tə bɩ̀á nə mɛ, sə ba tanɩ tɩralɩ tə.
31 Matɩtɩa ʋ nə yɩ Levi dwíí tə wa lìù, ʋ ga yɩ Swalumə bikwɩa Kore sàń tə wa, yà nə wè gàtó tə. 32 Ba nubɩa tə duən, ba nə yɩ Kehatə sàń tə lɩ̀à, yà nə tanɩ dipɛn tə, ba nə tuŋə ba pɩn Yɩɩ nə, sìə́ dɩɩn* mama.
33 Levi dwíí dìì tɩ̀án tə, ba nə yɩ gwàgá yà wulə Yɩɩ dìə̀ dəwoo dibɩa tə wa. Gwaran tə yà nə yɩ ba tʋtʋŋɩ tɩtɩn də yɩcaʋ, yá ba yà kʋ́ʋ̀ ba tʋtʋŋɩ don mama tʋŋa. 34 Mə Levi dìì tɩ̀án tə nə, kʋ twá ba dwíí dəkuu nə yɩ nətʋ. Ba yà wulə Zwerizalɛmə nə.
Sayulə dwíí dəkuu yoo
35 Gabawon tɩ̀án nɩbɛɛ Yeyiyɛlə yà wulə Gabawon nə. Ʋ kan yɩrɩ yà nə yɩ Maka. 36 Ʋ bikwɩa nə yɩ Abədon. Kʋ dàń súrí Surə, də Kiswə, də Baalə, də Nɛrə, də Nadabə, 37 də Gedɔrə, də Ahiyo, də Zakari, də Mikəlɔtə nə, 38 ʋ nə lɩrɩ Swimeyamə. Ba də də ba nubɩa tə yà wulə duən nə, Zwerizalɛmə nə.
39 Nɛrə lɩrɩ Kiswə, Kiswə lɩrɩ Sayulə, Sayulə lɩrɩ Zonatan, də Maləkisʋa, də Abinadabə, də Yiswəbaləa. 40 Zonatan bìú nə yɩ Meribaləb. Meribalə lɩrɩ Mika. 41 Mika bɩ̀á nə yɩ Piton, də Melɛkə, də Tareya. 42 Ahazə lɩrɩ Yayera, Yayera lɩrɩ Alemɛtə, də Azəmavɛtə, də Ziməri, Ziməri lɩrɩ Mosa, 43 Mosa lɩrɩ Bineya, Refaya yɩ Bineya bìú, Elasa yɩ Refaya bìú, Asɛlə yɩ Elasa bìú. 44 Asɛlə lɩrɩ bɩ̀á bardʋ, ba yɩra nə yɩ Azərikamə, də Bokəru, də Yɩsəmayɛlə, də Sweyarɩa, də Obadɩa, də Hanan.