6
Ku nu lelúú hlu
Orang-orang Majus dari Timur
Matius 2:1-12
1 Kunale Yudea, Betlehem yano ho, Yesus yam túúilakam de, ku nu lelúú hlu, wai 'mpung nendi sie umpuongkam Yerusalem yano ne. Ndie ku, Herodes ne ilam dekekim.* Ilam Herodes ne kie luu de kunale Galilea, Samaria, Perea, Yudea. 2 Nomnang umpuontam de, ndie nembwo tene úailemantam, “Yahudi de haplo ilam delim de, kande sip ho túúilapam? Ngamnang nu pong de, Nom ho yantang de talwap, wai 'mpung nendi ho, ndie sende imsyantu, Nom kie koingmandu ho.”
3 Ilam Herodes, ndie nende nembwo tatam de, nggleng dúng ho deketim, ndiene, skietendú Yerusalem insylú n'sam tabe nanggoityatam. 4 Herodes no, inggyambú-inggyambú insylú de dabum kip dedúú hlu, yamho Yahudi de Wai Demwo ho hnum de hlu, tlangleintyim, nomnang ho nembwo úaleintyim, “Ko lwouklale, Wai Ilam ne blem ho lúú de Ilam, kande túúiladam?” 5 Nomnang lwouilemantam, “Betlehem yano, kunale Yudea ne. Blem ho lúú de Ilam nende, hlu waidyi ne, sam dapu ho, ndie sam to klii de tetúm:
6 'Ko Betlehem, kunale Yehuda 'nde, ko dai tenang de, ndie sam senggwong kwodo keselúm. Skietendú temien-temien Yehuda kie ho luu de, nom nende hlu, ko Betlehem mai sie ho, hlu temien kado podim.
Nome, Ngambe insylú, Israel nenggling kiendam.'”
7 Herodes, ndie nembwo yam tatam de, no nembwo tebu ho, ku nu lelúú hlu tlangleintyim. No nembwo úalentim, nomnang ho, ndiene, no talwap pong de ku, lwouilemantam. 8 Ndiene, nomnang Betlehem ne wabú kiinglentim, ndie nembwo tene, “Ko kemanale de, samsam úakemanale! Ndie dúdywai mai teku de, tantabe ne kendo ho ma, ngo lwouklendi, amai ho ngo ndie sam tabe nalu, no kie kwamenalu de.”
9 Nomnang ilam de nembwo keni yam túúilentúm de, kenakam. Tap ho, nu tiiityatam de, poindyentim, wai 'mpung nendi ne pong de talwap ndie, ming ne nenggatam, nomnang ndie ho keing de kenakam. Yamho, ndie dúdywai de sip blong tenang ne, talwap ndie nggontabam. 10 Nomnang talwap nggontabam de nu poindyentim de, debú mai yako-yako senggwong tadeketúm. 11 Yamo mai ne dekuotentúm de, dúdywai ndie, nemya Maria tene kongkekatúm de, nu poindyentim. Yamho, nomnang skietendú tenggúm ku ngglemúúityatam, sesú kúemantum, dúdywai dai ho. Ndiene, kiewo sip bieityam de, nombe kietetii taaityemantam, Nom ho, ndie úp nde wo: hamong, kle mya, insywali demlo (insylú tú nggetúú menang de).† Yunani nembwo ne: emas, kemenyaan dan mur. Kle mya: minyak gaharu. Insywali demlo: lendir dari sejenis semak seperti pohon jeruk. 12 Yamho, nomnang nombe yano ne kenakam de, tap meni ne tenggleing dentúm. Herodes múe ne tang ne kwo kenakam, ndi mai ne hnumdientim de sende. -yammai-ku ne-kenelum.”