1 Bu landi blong ne, skietendú insylú ku map nde, Nuh sie tang ne keekúm. Ming de, no tang tendú, nembwo klúm tendú, lwouilakakam tendyúam ho.

2 Nomnang spwotum, ee wai ’mpung nendi ne. Ndie ho Sinear map ne, pou temien poindyentim. Ndiene misyo tadetúm, yano sip mwoidyetam. 3-4 Yamho, no nembwo lwouilatam,“Yombe sú iwei menang, ma, yo yano temien mwokledam, demwo ne kwai nggongladum. Mwo ’ngkong yamo* mwo ’ngkong yamo m’ni nde ‘indyo yamo’ demwo ne ngglang ho blong ne kliiklebedam, ee kawo ne tabanglebalum. Yo ku map ne insyiindúm nende.”

Ndie sip demwo kwo kamang, ndiende, meni ne-meni ho, no lwouilatam, “Ma yo mwokledam, map utwem ne demwo menang ho kip ne dúúkedam.” Nggie úp so, map mai siende, aspal tendyúam, demwo tebang menang de.

5 Yano temien, ndiene mwo ’ngkong yamo klielakatum de insylú ne, ndiene Wai Ilam likentim, nu lúetam. 6 Ndiene No utim, “Ndie insylú no tendú tang, tendú nembwo nde, kebali temien ndie imaning blung kointyatam de, tang ne nome nie keno nggleng dúng de n’sam senggwong pai to lemiedenedúm. 7 Ndie tang ’nde, ma yo li. Nombe nembwo mainye kli kau, amai ho pwai-pwai kwo num menang.” 8 Ndie tap ne, Wai Ilam ne nomnang mainye ndie sip sie insyientam, skietendú ku map ne klútúm. Ndiende no kebali kie pliiptyam.

9 Ndiende, ndie sip, Babel tebieikam. (Sú ndie nombe skie, ‘lenggup titatum’ sende). Ndie sip ho Wai Ilam ne, insylú de nembwo kli kwakam lenggup titakum, ndiene, ndie sip sie insylú mainye insyienkam, ku map ne nggiingkekim.

Babel nende nembwo, ndie ne yam.