24
Vhakumulonjeela uPaavhuli kwa mupiti uwa mkowa
1 Lwe insiku zisaano zyatuuha kufuma pe uPaavhuli áfisile mu nkaaya iya Kayisaaliya, umupuuti umupiti uAnaniiya woope ahafiha. Áali pooka na vhasongo vhamo avha Vhayuuda, nu muntu wumo uwa kuvhayanjila mu malandu gaavho, we izina lyakwe vhahatinji uTelituulo. Lwe vhaafiha, vhahasogola kumuvhuuzya umupiti uwa mukowa uFeeliki amalandu ge vhahamulonjeelaga uPaavhuli. 2 Lwe vhamwita uPaavhuli, uTelituulo ahanda kumulonjeela. Ahati, “We Feeliki uwa mushinzi nkaani, uvhushindamu vhwaho uvhwa njeele uvhwa kulola ukutali vhwinza, mwe pe tuli nu vhutehamu insiku zyonti izi. Havhili vhwefwizye imbiivhi zyonti mu nsi ino. 3 Tukuziposheela zyonti izi ahavhaliilizyo honti ku luseshelo. Havhili tukukusalifwa nkaani ponti paala na kwi dala lyonti. 4 Ishi ntakwanza kuuti inkutamwe ku havhaliilizyo ahatali, nkukulaavha ku vhwila vhwaho kuuti utejeelezye ku vhujimbiilizu amazwi giitu amansi iga.
5 Umuntu uno tuweenyi kuuti mutamwe nkaani. Akuleeta uvhusambusu mu Vhayuuda avha nsi zyonti. Uweene mupiti uwa shipuuto isha Vhanazaleeti she te sha muumwo. 6 Havhili aalinzile kuyihandamania poosye ni Nyumba iMfinjile. Pe twamulema inga tumulonje kulandatana ni ndajizyo zyitu. 7 Ileelo umupiti uwa vhasikaali uLuusiya ahatwinjiilila, ahamufwula ku maha mu nyoovhe zyitu. 8 Ahavhalajizya vhe vhakumulonjeela kuuti, vhinze vhamulonjeele ku kwaho.a Iwe weneewe inga wamuvhuziilizya, pe kwe umanye zyonti, muli izyo zye tukumulonjeela ku kwaho.” 9 AVhayuuda vhoope vhahahomeelezya vhahati, zyonti zye ayanga, zya nalyoli.
UPaavhuli akuyanga izya kuyipoha kwa Feeliki
10 Pe umupiti uwa mukowa ahamusonta uPaavhuli kuuti woope ayanje. Pe uPaavhuli ahati, “Ine imanyile kuuti, iwe we mulonzi mu nsi ino ku maaha aminji, ilyo lye likumbiiha kuuti injanje izya kuyipoha pilongolela lyaho ku luseshelo. 11 Weneewe ungasimishizya ahinza kuuti, zitatuusile insiku kumi na mbiili kufuma pe naasogooye kupuuta ku Yelusaleemu. 12 AVhayuuda vhatanaazile nkudalinkana nu muntu wonti. Havhili vhatanaazile nkusonzya ivho mu Nyumba iMfinjile, poosye mu masinagoogi gaavho, poosye apanji ponti mu nkaaya iyo. 13 Izi zye vhakundonjeela, vhatangasimishizya kuli iwe kuuti zya nalyoli.
14 Ileelo, lye nkwitiha pilongolela lyaho, lye lino ilya kumupuuta uMulungu uwa vhasookulu vhiitu kwi dala ilya kumulandata uYeesu Chilisiti, pooka nu kuuti avheene vhakuti shipuuto she te sha muumwo. Havhili nkuzyitiha zyonti zye zisimviilwe mu makalaata aga ndajizyo izya Moose na mu makalaata aga vhakuvhwi. 15 Ine nkwitiha uvhwanalyoli kuuti, uMulungu alivhazyusya avhantu vhonti, avhagolosu na vhe te vhagolosu, inza vhoope vwe vhakwitiha. 16 Kuli izyo, nkuyikungula kuvhomba inyinza insiku zyonti, inga intahaavhe nu lukwinkwino ku minso aga Mulungu na ku minso aga vhantu.
17 Néefile amaaha aminji, ishi naagalusile ku Yelusaleemu, inga imbaleetele ivwa kuvhaavwa avhantu avha mu nsi yiitu vhe vhasovheliilwe, nu kufumwa impuutile kwa Mulungu. 18 Lwe avhantu ivha vhakunaaga nkufumwa impuutile izyo mu Nyumba iMfinjile, naapezile imbomvile ishipuuto isha kuyizelufwa. Ntaalesite ivho naalimo, poosye kuvhungaaniha impuga iya vhantu. 19 Ileelo kuli aVhayuuda vhamo vhe vhaafumile ku Aasiya, ivho vhe vhahondeeye kundonjeela pilongolela lyaho inga vhali nu vhulonjeelezi wonti. 20 Poosye, vhe vhaliipo ipa vhayanje vhuuvho uvhuvhiivhi vhwe vhaavhuvhwenyi ku kwane, lwe nayangaga izya kuyipoha pa lukuvhato lwavho ulupiti. 21 Vhanga pamo vhaavhwenyi kuuti havhiivhi izwi lye naayanzile kuuti, ‘Ine nkulongwa pilongolela lyinyu ileelo ili, mwe pe nkuhomeelezya kuuti avhafwe vhalizyuha!’”
22 Pe uFeeliki, we ámanyile ahinza izya Yeesu, ahavhavhuuzya ahati, “Kuuti imfumwe uvhwamuzi uvhwa malandu giinyu lwe uLuusiya umupiti uwa vhasikaali ayinza.” 23 Pe uFeeliki ahamulajizya umwimiilizi uwa vhasikaali kuuti, vhamugulililaje uPaavhuli, ileelo vhamupanje uvhusatulwe, kuuti vhatavhadindaje avhajenzi vhaakwe lwe vhakwinza kuumupa vwe akwanza.
UPaavhuli pilongolela ilya mupiti uwa mukowa
24 Lwe zyatuula insiku nyinsi, uFeeliki ahinza pooka nu mushi waakwe uDulaasila, we áamile Muyuuda, ahalajizya kuuti vhamuleete uPaavhuli. Lwe ayinza, ahamutejeelezya lwe akuyanga izya kumwitiha uYeesu Chilisiti. 25 Ileelo lwe uPaavhuli akujendeelela kuyanga izya vhugolosu nu kuyidinda kutepwa ni zya isiku ilya vhulonzi vhwe vhukwinza, uFeeliki ahoogopa, ahati, “Ishi sogolaga, kwe nkwite havhili inga navha na havhaliilizyo.” 26 Pooka niizyo, uFeeliki ahasuvhilaga kuuti uPaavhuli kwe amupe impiiya. Pe ahamwitaga ulwinji nu kuyanga nawo.
27 Lwe amaaha gavhili gatuuha, uPolikiyo uFeesito ahapwanila kukonzya pa Feeliki. Ileelo uFeeliki ahamuleha uPaavhuli mu jeela, mwe pe ahanzaga kuvhahondezya aVhayuuda.