Salomón tano̱no̱tza
Proverbios 1:7‑8
116
Iga tikmajmawiliáj Dios, ompa pe̱was iga tikmatij katiapa yej Dio̱spa kineki iga mamochi̱wa; eꞌ yej xe̱toꞌnemij kijiyaj ye̱ꞌtájto̱l yej tano̱no̱tza.Nopiltzi̱n, xikchi̱wa ken iga mitzno̱no̱tza motaj, iwá̱n amo xike̱lka̱wa ken iga mitzne̱xtilij moye̱ꞌ.
Proverbios 3:5‑6
Ximomelaꞌconfia̱ro nokta ipan toTe̱ko, amo ximoconfia̱ro ipan yej tejpa tikmati.
Xikejla̱nto Dios ipan nochi yej tikchi̱wa iwá̱n yéj mitzpale̱wi̱j iga xiye̱ꞌnemi ipan ye̱ꞌojti.
Proverbios 3:12
Ijkó̱n ken te̱taj kajajwa ipiltzi̱n iga kipoxneki, ijkó̱n no̱ Dios kajajwa inochi yej kineki.
Proverbios 6:23
Yej te̱ne̱xtiliá itájto̱l toTe̱ko, te̱ta̱wiá ka̱n takomichka̱n; kua̱ꞌ itájto̱l te̱no̱no̱tza iwá̱n teajajwa, inó̱n teojmaka iga matiye̱ꞌnemika̱n.
Proverbios 10:1
Te̱piltzi̱n yej kitapejpena ken iga nemi, kiyo̱lchika̱wa itaj; eꞌ te̱piltzi̱n yej xejxe̱toꞌnemi, kiyo̱lmiktiá iye̱ꞌ.
Proverbios 10:19
Yej pox tajtajtowa, kijtowa miaꞌ tájto̱l yej ajaye̱kti, eꞌ yej kitapejpena yej kijtowa, inó̱n sí, kimati kén iga ye̱ꞌnemi.
Proverbios 13:1, 3
Te̱piltzi̱n yej kimati katiapa yej ye̱kti, kitajto̱lkaki itaj kua̱ꞌ kino̱no̱tza; eꞌ yej kaja̱wilmati Dios, ayá̱ꞌ kikaki malej iga kajajwaj. Yej ye̱ꞌtajla̱ntoꞌ kitapejpena achto te̱ yawi kijto̱ti, eꞌ yej santajtajtowa, igá̱najsan mopojpolowa.
Proverbios 13:24
Yej ayá̱ꞌ kichiliya̱rowa ipiltzi̱n kua̱ꞌ kichi̱wa yej aye̱kti, inó̱n ayá̱ꞌ kineki; eꞌ yej kineki ipiltzi̱n, kichiliya̱rowa kua̱ꞌ kajasi.
Proverbios 15:5
Yej xejxe̱toꞌnemi ayá̱ꞌ kikakisneki kua̱ꞌ kino̱no̱tza itaj; eꞌ yej kitajto̱lkaki kua̱ꞌ kino̱no̱tzaj, inó̱n kimatis ken iga ye̱ꞌnemis.
Proverbios 15:20
Te̱piltzi̱n yej kitapejpena ken iga nemi, kiyo̱lchika̱wa itaj; eꞌ te̱piltzi̱n yej xejxe̱toꞌnemi, iga yéj, pi̱na̱wa iye̱ꞌ.
Proverbios 16:24
Ye̱ꞌtájto̱l tzope̱liꞌ ken tikita nekti; te̱yo̱ltzope̱liá wa̱n teachitialtiá.
Proverbios 17:27‑28
Yej kimati ken iga maye̱ꞌnemi, ayá̱ꞌ pox tajtowa. Yej xe̱toꞌnemi, no̱ wel kijli̱skej iga ye̱ꞌtajla̱ntoꞌ, siga ayá̱ꞌ pox tajtowa.
Proverbios 19:18
Xikno̱no̱tza mopiltzi̱n mie̱j weljoꞌ, amo santá̱ꞌ motechko mopojpolo̱j.
Proverbios 20:7
Ta̱gaꞌ yej ye̱ꞌnemi, ipilowa̱n pa̱kij iga kichi̱waj kensan kichi̱wa itaj.
Proverbios 22:6
Xikne̱xtili mochoochi̱n kén iga maye̱ꞌnemi; ijkó̱n kua̱ꞌ yó̱leja ayá̱ꞌ kikajte̱was ye̱ꞌojti.
Proverbios 23:13‑14
Amo ximajmawi iga tikchiliya̱rowa mochokotzi̱n kua̱ꞌ kichi̱wa yej aye̱kti, porque iga tikmagas ayá̱ꞌ tia tikmikti̱ti, ma̱jwaꞌ tikma̱nawi̱j iga amo mamopojpolo.
Proverbios 23:24
Te̱taj yej kipiá ipiltzi̱n yej wel kitapejpena kén iga ye̱ꞌnemi, inó̱n te̱taj kajasi iga mapa̱kto.
Proverbios 25:28
Ken se̱ a̱ltepe̱ꞌ yej ayá̱ꞌ kola̱ltitoꞌ, awel moma̱nawiá iga ayá̱ꞌ tzaktoꞌ; ijkó̱n se̱ ta̱gaꞌ yej ima̱tika awel kichi̱wa iga maye̱ꞌnemi.
Proverbios 29:15
Chilillo iwá̱n tano̱nó̱tzal te̱ne̱xtiliá ken iga matinemika̱n; eꞌ chokotzi̱n yej ayá̱ꞌ kino̱no̱tzaj, yéj itechko iga pi̱na̱was iye̱ꞌ.
Proverbios 29:17
Xikno̱no̱tza mopiltzi̱n, iwá̱n wel tiye̱ꞌonos, iwá̱n yéj mitzyo̱lchikajtos.
Proverbios 31:30
Imo̱nsajyo siwa̱ꞌ wel te‑i̱xkajkaya̱wa, eꞌ se̱ siwa̱ꞌ yej kiweyimati̱ltiá toTe̱ko, kajasi iga mamoye̱ꞌita.
Eclesiastés 4:13
Má̱j vale̱rowa se̱ chokotzi̱n yej ayá̱ꞌ motapialiá yej kitapejpena ken iga maye̱ꞌnemi, que se̱ rey yej wé̱weja iwá̱n xe̱toktiꞌ, yej ayá̱ꞌ kineki agaj makino̱no̱tza.