Itakui̱ꞌmej israeli̱tajmej
Salmo 1
115
Pa̱ktokej yej ayá̱ꞌ kitajto̱lkuij ino̱mej yej ayá̱ꞌ ye̱ꞌnemij, niga kichi̱waj ken kichijtokej ino̱mej yej kichi̱waj yej aye̱kti, iwá̱n ayá̱ꞌ motokaj iwá̱n ino̱mej yej kaja̱wilmatij Dios.Yejeme̱n pa̱ktokej iga kichi̱waj ken Dios tatekimaka. Nochipa kejla̱ntokej iley Dios.
Yej kichi̱waj ijkó̱n, ken tikita se̱ kuawiꞌ yej ixwatoꞌ ipan a̱te̱n, nochipa ta̱ki, iwá̱n iyiswayomej ayá̱ꞌ pili̱nij niga ayá̱ꞌ xijxi̱nij.
¡Iwá̱n nochi yej kichi̱waj, ye̱ꞌki̱sa!
Eꞌ yej ayá̱ꞌ kicre̱dowaj Dios, ayéj ijkó̱n. Yejemej ken kua̱ꞌ iwa̱ꞌiswayo trigo yej wel kiwi̱ga ejekaꞌ. Ayá̱ꞌ moma̱nawi̱skej, niga wel sen‑onoskej iwá̱n ino̱mej yej kiweyimati̱ltiáj Dios.
Yej kinekij Dios, kichi̱waj ken yéj kijtowa, inó̱n iga ye̱ꞌki̱saj. Eꞌ ino̱mej yej ayá̱ꞌ kicre̱dowaj Dios, ayá̱ꞌ kinekij kichi̱waj ken Dios kitekimaka, wa̱n pojpoliwij.
Salmo 23
Jehová kita iga maniye̱ꞌono, ken tikita se̱ yej kicuida̱rowa iborre̱goj, inó̱n iga ayá̱ꞌ ne̱polowa nité̱. Ken tikita yéj ne̱wi̱ga iga manimose̱wi ipan sakayoj yej este xojxoxoktiꞌ, iwá̱n yawi nea̱makati ka̱n a̱yawaltitoꞌ. Ne̱yo̱lchika̱wa iwá̱n ne̱wi̱ga ipan ye̱ꞌojti, iga mamoweyimati̱lti ito̱ka̱ꞌ.
Kua̱ꞌ nipanowa pan kuajkuantas yej ne̱yo̱lmiktiá yej este ne̱mikti̱jnekiy, ayá̱ꞌ nimajmawi, iga nikmati iga tej noDio̱s tonoꞌ nowa̱n; iwá̱n mobasto̱n yej iga tikpe̱wa borrego, ne̱yo̱lta̱liá.
Tej tine‑i̱xna̱ntiá ipan mesa iga nitakua iyi̱xtaj yej ne‑ijiyaj. Tej noDio̱s tite‑ijikni̱n iga tine̱ye̱ꞌita: tine̱ta̱liliá aceite ipan notzontekon iwá̱n tine̱te̱miliá nova̱soj este pe̱pexo̱ni. Tine̱ye̱ꞌita iwá̱n tine̱nekis nochipa iwá̱n nicha̱ntitos mocha̱n nochipa, tej tinoTe̱ko.
Salmo 51
Tej Dios, xine‑ikne̱li, porque tej tipoxte‑ijikni̱n iwá̱n anne̱nekij. Achi xinee̱lka̱wili nochi yej nikchij yej aye̱kti. Nimokui̱tiá iga nikchij yej aye̱kti; nikchij yej aye̱kti mo‑i̱xtaj iga ayá̱ꞌ nikchij ken tej tikneki, iwá̱n kajasi iga xine‑ikno̱chi̱wa. Porque este iga noye̱ꞌ ne̱talaxwij, nikchíjtoꞌya yej aye̱kti. Eꞌ tej tikye̱ꞌita yej ayá̱ꞌ ki̱ya̱na nité̱ ipan iya̱lmaj iwá̱n tej tine̱pale̱wij iga iní̱n manikentende̱ro. Inó̱n iga nimitztajtaniliá iga xinee̱lka̱wili yej nikchij iwá̱n manono este nichipaktiꞌ mo‑i̱xtaj.
Amo xine̱kajte̱wa, iwá̱n moEspí̱ritoj maono nowa̱n. Xine‑ejla̱nti sej iga tej tine̱ma̱nawij, iwá̱n sej nia niyo̱lpa̱ktoti. Iwá̱n moEspí̱ritoj ne̱pale̱wi̱j iga manikne̱xtili sekin iga kichijkej yej aye̱kti, iwá̱n nikne̱xtili̱j ken iga makichi̱waka̱n ken tej tikneki.
Xine̱ma̱nawi iga amo mane‑ikno̱chi̱waka̱n ken ino̱mej yej kichijkej yej aye̱kti, iwá̱n nimitztakui̱kili̱j iga nimitzweyimati̱lti̱j. Porque nej nikmati iga tej ayá̱ꞌ tikneki manimitzmiktili yo̱lka̱mej iga noofre̱ndaj, sino que tej tikneki iga amo manimoweyimati iwá̱n manimokui̱ti iga nikchij yej aye̱kti iwá̱n nikneki xono nowa̱n.
Salmo 115:1‑13
Amo mane̱weyimati̱lti̱ka̱n nejemej, sino que mamitzweyimati̱lti̱ka̱n tej iga anne̱poxnekij iga tej timelaꞌDio̱s.
¿Te iga manimosemakaka̱n iga ijkí̱n mane‑ijli̱ka̱n iga ne̱pi̱najtiáj?: “¿Ka̱n onoꞌ amoDio̱s?”
NoDio̱s onoꞌ ipan cielo iwá̱n yéj wel kichi̱wa nochi yej yéj kineki. Iyi̱dolojmej la gente chijtoꞌ iga oro iwá̱n plata, iwá̱n inó̱mejwaꞌ itachí̱walpa ta̱gaꞌ. Te̱nyojkej, eꞌ awel tajtowaj; i̱xyojkej, eꞌ ayá̱ꞌ tacháj; yakyojkej, eꞌ awel ta‑ijnekuij; ma̱yojkej, eꞌ awel tachijchimij; ikxiyojkej, eꞌ awel nejnemij. Nisé̱ tájto̱l awel ki̱sa ipan ite̱n. Ijko̱nsan no̱ yej kichi̱waj ídolo, iwá̱n ijko̱nsan no̱ yej kicre̱dowaj i̱dolojmej.
Noge̱ntej, ximoconfia̱ro̱ka̱n ipan toTe̱ko; yéj yej te̱pale̱wiá iwá̱n te̱ma̱nawiá. Amejeme̱n sacerdo̱tejmej, ximoconfia̱ro̱ka̱n ipan toTe̱ko, iga yéj te̱pale̱wiá iwá̱n te̱ma̱nawiá. Nochi yej kiweyimati toTe̱ko, ximoconfia̱ro̱ka̱n ípan, yéj yej te̱pale̱wiá iwá̱n te̱ma̱nawiá. Miaꞌya ve̱j te̱pale̱wij; te̱senye̱ꞌchi̱wa iwá̱n topilowa̱n. Dios kipale̱wiá yej kiweyimati̱ltiá, yej yo̱lejkej iwá̱n yej aya yo̱lejkej.