Job ayá̱ꞌ kima̱lijlij Dios malej iga mokno̱matitoꞌ
Job 2:11‑13; 3:1‑3, 26; 4:1; 5:6‑8; 6:24, 30; 8:1‑22; 10:2; 11:1‑6; 13:4; 16:1; 19:25; 23:12; 31:1‑35; 38:1‑39:30; 42:1‑17
114
Kua̱ꞌ e̱yi iyami̱gojwa̱n kimatikej iga Job we̱títoꞌya, yajkij kiyo̱lchika̱watoj. Eꞌ kua̱ꞌ kitakej, ayꞌya ki̱xmatikej iwá̱n cho̱kakej este wa̱ꞌtzajtzikej. Iwá̱n siete días iwá̱n siete yówal e̱watoyaj ta̱lpan ite̱noj Job, eꞌ ni agaj ayá̱ꞌ tajtoj, iga kitayaj iga poxsan kisufri̱rojtoꞌ.Iwá̱n Job pe̱waꞌ iga ta̱tapowa, kijtoj:
—Anka má̱j ye̱kti katka amo semi manono, iga amo ijkí̱n maniksufri̱rojto ken iná̱n. Siga wel katka nimikiá anka ijkó̱n má̱j ye̱kti, iga poxsan niksufri̱rojtoꞌ iwá̱n nej anikmati te íga. Nikmátisan iga ayá̱ꞌ nikchij yej aye̱kti, iwá̱n nej nipoxtekipanowa.
Iwá̱n se̱ de iyami̱gojwa̱n yej e̱watoya íwa̱n, kijlij:
—Nemi timokno̱chi̱wa poxsan iga ayá̱ꞌ tikijtowa iga tikchij yej aye̱kti. ¿Te iga ayá̱ꞌ timote̱nxitoma iyi̱xtaj Dios iga tikchij yej aye̱kti? Iwá̱n ijkó̱n ayꞌya timokno̱chijtos.
Job kijlij iyami̱goj:
—Xine‑ijli, ¿te̱ nikchij yej aye̱kti? Bá̱ldejsan tikijtowa iga nikchij yej aye̱kti, porque nej ayá̱ꞌ nikchij yej aye̱kti.
Iwá̱n sewoꞌ iyami̱goj kijlij ijkí̱n:
—Siga katka tiye̱ꞌnemiá, Dios mitzpale̱wia̱ya iwá̱n ayá̱ꞌ mikiáj mopilowa̱n. Eꞌ tikmátijya siga tike̱lka̱waj Dios, nochipa tiawij timokno̱chiwatij.
Job kijtoj ijkí̱n:
—Nej ayá̱ꞌ nikijtowa iga ayí̱ꞌ nikchi̱wa yej aye̱kti. Nej nikmati iga nikchi̱wa yej aye̱kti. Siga Dios mane‑ijli katka te íga niksufri̱rojtoꞌ, iná̱n nipa̱ktoya.
Iwá̱n sewoꞌ iyami̱goj Job pe̱waꞌ iga tajtoj, iwá̱n ijkí̱n kijlij:
—Anka poxsan tikchij yej aye̱kti; siga Dios katka mamitzikno̱chi̱wa iga inochi yej tikchij, anka ayá̱ꞌ tikijyo̱wi̱j. Dios mitzikne̱liá, inó̱n iga ayá̱ꞌ mitzikno̱chi̱wa iga inewi yej aye̱kti tikchij.
Iwá̱n Job kijtoj:
—Ayéj ijkó̱n ken amejeme̱n ankijtowaj, iga ayá̱ꞌ ankimatij nité̱. Amejeme̱n ken kua̱ꞌ inó̱n médico yej ayá̱ꞌ kimati te̱ irreme̱diojyo kita̱liliá yej onoꞌ enfermo. Má̱j ye̱kti iga ayꞌya má̱j xitajto̱ka̱n. Nikneki manikaki yej Dios yawi ne‑ijli̱ti, porque nej nikmati iga ayá̱ꞌ nemi nikchi̱wa yej aye̱kti. Nej nikmati iga yej ne̱ma̱nawiá isatoꞌ; malej iga nej manimiki, nikmati iga wi̱tzeti día iga nia niknojma‑itati Dios. Iga nej má̱j ye̱kti manikaki yej Dios kijtowa que iga manitakua.
’Nej nikmati iga Dios yawi kikno̱chi̱wati yej ke̱le̱wiá yej ayéj isiwa̱ꞌ, eꞌ nej ayá̱ꞌ nemi nikchi̱wa ijkó̱n. Ayagaj nemi nikajkaya̱wa niga nikuili̱jneki yej itatkimej. Iwá̱n ayá̱ꞌ nike̱le̱wilij isiwa̱ꞌ noveci̱nojmej, niga nikikno̱chi̱wa nomo̱nsojmej, iwá̱n ayá̱ꞌ nikajkayaj yej ayá̱ꞌ motapialiáj, sino que nej nikpale̱wij yejeme̱n. Nikmakakej yej kinekiáj ino̱mej yej ayá̱ꞌ motapialiáj. Ayá̱ꞌ nimoconfia̱rowa ipan tomi̱n, sino que nej nochipa nimoconfia̱rowa ipan Dios. Ayí̱ꞌ nikweyimati̱ltij to̱nati̱ꞌ iwá̱n me̱tzti,a iga maono ken nodio̱s. Nikperdoná̱roja noenemi̱gojwa̱n, iwá̱n ayꞌya nikijiyaj. Nochipa nikpale̱wij noami̱gojwa̱n. Dios makijto siga melá̱ꞌ yej amejeme̱n ankijtowaj, iga nej nemi niksufri̱rowa iga nikchij yej aye̱kti.
Iwá̱n wa̱laj se̱ ajkamalakaꞌ iwá̱n ipan inó̱n ajkamalakaꞌ tajtoj Dios iga kino̱tzaꞌ Job, kijlij:
—¿Té̱ moteki in tej iga xiduda̱ro iga yej nej nikchi̱wa? Tej ayá̱ꞌ tikmati nité̱. Inewi yej nej nikchi̱wa inochi ye̱kti. Nej nikmanda̱rowa inochi yej onoꞌ ipan iní̱n ta̱jli: gente, anima̱lmej, to̱to̱mej iwá̱n inochi yej onoꞌ ipan cielo. Tej ayá̱ꞌ tikmati ken iga nikchij cielo iwá̱n ta̱jli iwá̱n inochi yej onoꞌ. Tej ayá̱ꞌ tikmati ka̱n taksatoꞌ ta̱jli iga amo mawetzi. Ayá̱ꞌ tikmati ken iga niktzakuilijtoꞌ láma̱r iga amo mapexo̱ni. Tej awel tikchi̱wa iga matane̱si. Ayá̱ꞌ tikmati ken iga tane̱si iwá̱n tayowati, niga tikmati ken iga mochi̱wa granizo, inó̱n tiawa̱ꞌ yej ken hielo. Ayá̱ꞌ tikmati ka̱n ígapa wi̱ꞌ ejekaꞌ iwá̱n tiawa̱ꞌ iwá̱n ajwich. Malej iga xikijto katka: “¡Mawi̱ki tiawa̱ꞌ!” iwá̱n awel tikwetzi̱ltia̱ya. Atiki̱xmati kempa si̱talimej. Ayá̱ꞌ tikmati ken iga kasij itakualmej to̱to̱mej iga ipilowa̱n, iwá̱n ken iga pox tajpalej kawa̱yoj. Ayá̱ꞌ tikmati ken iga kui̱ximej pata̱nij este pox ajko. Niga tikmati te̱ iga a̱guilajmej kichi̱waj itapasolmej pox ajko. Iwá̱n atikmati ken iga wel kitaj este ipan itapasolmej yej kinekij makikua̱ka̱n, iwá̱n este ompa pata̱ntitemowaj iwá̱n kiki̱tzkiáj. Siga ayá̱ꞌ tikmati nisé̱ yej nimitzijijlij, ¿weljoꞌ tine‑ijliá iga tej tikchi̱wa yej san ye̱kti?
Iwá̱n Job kijtoj:
—Ikyay nikaktoꞌ motájto̱l iwá̱n iná̱n nikita iga ayá̱ꞌ nikejla̱miki ken tej tikejla̱miki. Tej weyi mopode̱r iwá̱n tej nochi tikmati. Nikmati siga tej ayá̱ꞌ tine̱pale̱wiá nej awel nikchi̱wa nité̱. Inó̱n iga nimoyo̱lpata iga akajasi iga ken nikijtojka.
Iwá̱n Dios kijlij inó̱n e̱yi iyami̱gojwa̱n Job yej íwa̱n onoyaj:
—Nimitzkuesowilijtokej iga ayéj ijkó̱n ken ankijtojkej de nej, nosie̱rvoj Job sí kijtoj yej melá̱ꞌ. Iná̱n xikuika̱n siete to̱rojtzitzi̱n iwá̱n siete borrego iga xine̱tatili̱ka̱n iga ofrenda iwá̱n xiktajtanili̱ka̱n Job iga maora̱do iga amejeme̱n, ijkó̱n nia nimitze̱lka̱wili̱tij iga anne̱pantijkej iga nej nikikno̱chijtoꞌ Job.
Iyami̱gojmej Job kichijkej ken Dios kitekimakakej. Iwá̱n Dios kikáꞌ Job. Iwá̱n kua̱ꞌ támiꞌya ora̱doj Job iga iyami̱gojmej, Dios kipajtilij ikekex, iwá̱n kimáꞌ ma̱jya komati yej kipolojka que yej kipiaya achto. Ijkó̱n iga Job sej kipiáꞌ catorce mil borre̱gojmej, seis mil came̱llojmej, mil yunta yej ara̱dowaj iwá̱n mil bu̱rrojmej. Kipiáꞌ no̱ seꞌ siete iyokichpilowa̱n iwá̱n e̱yi isiwa̱pilowa̱n. Iwá̱n Job onóyaoꞌ seꞌ 140 años má̱j, iwá̱n kítagoꞌ sej inie̱tojmej iwá̱n yej inie̱tojmej ipilowa̱n.