Yej kisucede̱roj se̱ ta̱gaꞌ yej ito̱ka̱ꞌ Job
Job 1:1‑2:10
113
Ipan país yej ito̱ka̱ꞌ Uz, cha̱ntitoya se̱ ta̱gaꞌ yej ito̱ka̱ꞌ Job. Job ye̱ꞌnemiá iwá̱n ayá̱ꞌ kichi̱waya yej aye̱kti iga kicre̱dowa̱ya Dios. Poxsan motapialia̱ya; kipiaya siete mil borrego, tres mil camello, quinientos to̱rojmej yej ara̱dowaj, quinientos bu̱rrojmej iwá̱n kipiaya poxsan komati itekipanowa̱nimej. Kipiaya no̱ siete iyokichpilowa̱n iwá̱n e̱yi isiwa̱pilowa̱n. Job nochipa ora̱dowa̱ya iga ipilowa̱n. Kitajtanilia̱ya Dios iga make̱lka̱wili siga ino̱mej ipilowa̱n kichi̱wayaj yej aye̱kti iyi̱xtaj Dios.Se̱ día Tzitzimiꞌ yajki iyi̱xtaj Dios, iwá̱n Dios kitajtan:
—¿Ka̱n tiwa̱laj?
Tzitzimiꞌ kijtoj:
—Nej ninejnentinemiá ipan inewi iní̱n ta̱jli.
Iwá̱n Dios kijlij Tzitzimiꞌ:
—¿Ix tikítaꞌya ken iga nemi notekipanowa̱ni Job? Ipan ta̱jli ka̱n cha̱ntitoꞌ ateyi yej kichi̱wa yej ye̱kti iwá̱n ken yej maye̱ꞌnemi ken Job. Yéj ne̱melaꞌcre̱dowa iga inewi iya̱lmaj iwá̱n ayá̱ꞌ kejla̱miki tejté̱ yej aye̱kti.
Tzitzimiꞌ kijlij Dios:
—Job kimati iga tej ticuida̱rojtoꞌ; ticuida̱rowiliá íkal iwá̱n inewi yej kipiá; inó̱n iga mitzcre̱dowa. Tik‑rri̱cojtílija poxsan. Eꞌ siga xikui̱li inochi yej kipiá, tia tikitati siga ayá̱ꞌ tajto̱j a contra iga tej.
Iwá̱n Dios kijlij Tzitzimiꞌ:
—Wel tikchi̱wa ken tikneki; inochi yej yéjpa kipiá onoꞌ ipan moma̱ꞌ, eꞌ yéj amo te̱ xikchi̱wili.
Iwá̱n Tzitzimiꞌ ki̱saꞌ iyi̱xtaj Dios.
Job onoya icha̱n kua̱ꞌ kitaꞌ nemi asi se̱ itekipanowa̱ni iwá̱n kijlij:
—To̱rojwe̱wetkej ara̱dojtoyaj, iwá̱n bu̱rrojmej takuajtoyaj kua̱ꞌ kémpasan asikoj yej tachtekij iwá̱n kimijmiktijkej yej iwá̱n nisenemiáj, iwá̱n kichtekilijkej inochi yo̱lka̱mej. Nejsan yej wel nicholoj iga nimitzmati̱lti̱ko.
Ta̱tapojtóyaoꞌ Job iwá̱n itekipanowa̱ni, kua̱ꞌ asiko seꞌ iwá̱n kijlij:
—Tiꞌti yej kiti̱tan Dios wa̱laj ipan cielo iwá̱n kitatij borre̱gojmej, iwá̱n tekipanowa̱nimej. Nejsan yej wel nicholoj iga nimitzmati̱lti̱ko.
Mie̱j ta̱tapojtoyaj Job iwá̱n iní̱n itekipanowa̱ni, asiko seꞌ iwá̱n kijlij:
—Ino̱mej enemi̱gojmej kichtekikoj came̱llojmeja iwá̱n kimiktijkej yej iwa̱mej ninemiá. Nejsan yej wel nicholoj iga nimitzmati̱lti̱ko.
Iwá̱n mie̱j ta̱tapojtoya Job iwá̱n itekipanowa̱ni asiko seꞌya tekipanowa̱ni iwá̱n kijlij:
—Mookichpilowa̱n iwá̱n mosiwa̱pilowa̱n takuajtoyaj cha̱n mopiltzi̱n yej te̱ko̱ko, iwá̱n wa̱laj ejekaꞌ yej tajpalej iwá̱n kiwetzi̱ltij kajli iwá̱n nochi mikikej. Nejsan nicholoj iga nimitzmati̱lti̱ko.
Iwá̱n Job poxsan mokno̱matiꞌ iwá̱n motankua̱ketzaꞌ ipan ta̱jli iwá̱n kijlij Dios:
—Kua̱ꞌ ninace̱roj até̱ nikuajli̱ꞌ iwá̱n kua̱ꞌ nimikis ayá̱ꞌ nikui̱gas nité̱. Tine̱máꞌ nochi iwá̱n iná̱n tine̱kui̱lij sej nochi. Nimitzweyimati̱ltiá tej noDio̱s.
Íkua̱ꞌ Job ayá̱ꞌ kikajtej iga moconfia̱rowa ipan Dios.
Seꞌ día yajki sej Tzitzimiꞌ iyi̱xtaj Dios iwá̱n Dios kijlij:
—¿Ka̱n tiwa̱laj?
Tzitzimiꞌ kijlij:
—Nej ninejnentinemiá ipan inewi iní̱n ta̱jli.
Iwá̱n Dios kijlij Tzitzimiꞌ:
—¿Ix tikítaꞌya ken iga kichi̱wa notekipanowa̱ni Job? Ipan inewi ta̱jli ka̱n cha̱ntitoꞌ ateyi nisé̱ ta̱gaꞌ yej makichi̱wa yej ye̱kti ken kichi̱wa notekipanowa̱ni Job. Moconfia̱rójtoꞌsan ipan nej, iwá̱n ayá̱ꞌ kichi̱wa yej aye̱kti malej iga tikui̱lij nochi yej kipiaya.
Tzitzimiꞌ kijlij Dios:
—Siga mamenferma̱ro Job, tia tikitati siga ayá̱ꞌ yawi ma̱ltajto̱ti iga tej.
Dios kijlij Tzitzimiꞌ:
—Onoꞌ ipan moma̱ꞌ, eꞌ amo xikmikti.
Tzitzimiꞌ ki̱saꞌ iyi̱xtaj Dios iwá̱n yajki cha̱n Job. Tzitzimiꞌ kichij iga Job makasi kekex ipan ikajlo̱ꞌ. Pe̱waꞌ inó̱n kekex ipan iyikxi iwá̱n asiꞌ este ipan itzontekon. Mota̱li̱to nexko iwá̱n kikuiꞌ tepalkaꞌ iga kijchiki ikajlo̱ꞌ iga pox kekexkiaya. Iwá̱n isiwa̱ꞌ kijlij:
—Siga Dios poxsan nemi mitzikno̱chi̱wa, ¿ix tikweyimati̱ltíjtossan? Xikmaldecí̱roya Dios iwá̱n ximíkiya. Ijkó̱n ayꞌya má̱j timokno̱chijtos.
Kijtoj Job:
—Tej titajtowa ken tikita se̱ yej ayá̱ꞌ ki̱xmati Dios. Eꞌ siga tikui̱liáj yej ye̱kti yej Dios te̱maka, no̱ matikui̱li̱ka̱n yej aye̱kti.
Malej iga Job kualo̱toꞌ, ayá̱ꞌ ma̱ltajtoj iga iDio̱s iwá̱n ayá̱ꞌ kichij yej aye̱kti iyi̱xtaj Dios.