Ma̱joꞌ israeli̱tajmej mokuepaj sej ipan ita̱lmej, senyawij iwá̱n Esdras iwá̱n Nehemías
Esdras 7:1, 6‑28; Nehemías 1:1‑2:8, 17‑20; 4:10‑23; 6:15; 8:1‑3, 18; Malaquías 1:1, 6‑8; 2:8‑9, 13‑16; 3:7‑10, 13‑4:6
112
Kiwi̱gayay miaꞌ años iga sekin israeli̱tajmej asikej sej Jerusalén iga onoyaj preso ipan país de Persia. Ki̱skej Persia iwá̱n se̱ lider yej ito̱ka̱ꞌ Zorobabel.a Inó̱n ve̱j rey yej manda̱rowa̱ya ipan Persia ito̱ka̱ꞌ Artajerjes yej ipiltzi̱n rey Asuero. Ompa Persia cha̱ntitoya no̱ se̱ sacerdote yej ito̱ka̱ꞌ Esdras. Iní̱n sacerdote kimatiá poxsan iley Moisés. Se̱ día iní̱n ta̱gaꞌ kitajtanilij permiso el rey iga mayawi Jerusalén, iwá̱n el rey mote̱máꞌ iga Esdras mayawi iwá̱n nochi yej kinekikej maya̱ka̱n sej ipan ita̱lmej, iga Dios onoya iwá̱n Esdras. Iwá̱n el rey kimáꞌ Esdras komati oro iwá̱n plata iga makimo̱nsajtachalti̱ka̱n weyitio̱pan.Iwá̱n Esdras kinechkoj nochi yej kinekij maya̱ka̱n Jerusalén. Monechkoj mil ochocientos tajta̱gaꞌ, ini̱mej gente seꞌya grupo yej yajkij Jerusalén. Nejnenkej na̱wi mes iwá̱n kua̱ꞌ asikej Jerusalén, pe̱wakej iga kiyeꞌta̱liáj weyitio̱pan. Esdras kino̱tzaꞌ miaꞌ sacerdo̱tejmej iga sej matekipano̱ka̱n iga Dios ken kichi̱wayaj ikya; iwá̱n no̱ kilee̱rowilijkej itájto̱l Dios inochi gente iga makichi̱waka̱n ken Dios kineki.
Ipan país de Persia onoya se̱ itekipanowa̱ni rey Artajerjes, inó̱n ta̱gaꞌ de Israel ito̱ka̱ꞌ Nehemías yej tekipanowa̱ya iga kimakaya yej konia̱ya el rey. Se̱ día kikáꞌ iga imu̱rojyo Jerusalén xi̱xití̱ntogoꞌ iwá̱n poxsan mokno̱matiꞌ. Iwá̱n kitajtanilij Dios iga el rey makimaka permiso iga mayawi ipan íta̱l. Iwá̱n yajki kitato el rey iwá̱n kitajtanilij permiso iga mayawi Jerusalén iga maki‑ojpachi̱wati muro yej kiyawalojtoya Jerusalén. El rey mote̱máꞌ iga Nehemías mayawi Jerusalén iwá̱n el rey sej tatekimáꞌ iga mamoye̱kawi̱lti imu̱rojyo Jerusalén iwá̱n kita̱lij Nehemías iga gobernador ipan estado de Judea.
Ásiꞌsan Jerusalén, Nehemías kinechkoj israeli̱tajmej yej íwa̱n asikej iwá̱n pe̱wakej iga kichi̱waj muro. Kua̱ꞌ némiya tekipanowaj yajkij e̱yi tajta̱gaꞌ yej ayéj israeli̱tajmej iga kikuejkueso̱toj. Wa̱lkej iga kipi̱najti̱koj israeli̱tajmej iga yej nemi kichi̱waj, kite̱mowa̱yaj ka̱nsan mamomajmagaka̱n. Inó̱n iga israeli̱tajmej yej nemi kichi̱waj imu̱rojyo Jerusalén kinentia̱yaj yej iga moma̱nawiáj siga kataca̱rowaj. Ijkó̱n iga, se̱ ima̱ꞌ tekipanowa̱yaj, iwá̱n iga seꞌ ima̱ꞌ kiki̱tzkijtokej ila̱nzajmej. Inó̱n iga iyenemi̱gojmej majmawiáj iwá̱n awel kitechowa̱yaj, mie̱j Nehemías kanima̱rojtoya la gente iga matekipano̱ka̱n.
Nochi kisempo̱lojkej tekipáno̱l iga ki‑ojpachijkej weyi muro ipansan 52 días. Kua̱ꞌ tzo̱piꞌ muro, kichijkej weyi‑ilwiꞌ, wa̱n Esdras kilee̱roj itájto̱l Dios ka̱n nochi makikakika̱n.
Inó̱n ve̱j onoya se̱ profeta yej Dios kitapejpen yej ito̱ka̱ꞌ Malaquías. Dios ijkí̱n kitajto̱lmáꞌ Malaquías iga makijli israeli̱tajmej:
—Te̱piltzi̱n kiweyimati itaj, iwá̱n mo̱nsoj kiweyimati ipatró̱n. Iwá̱n siga nej amoTaj, ¿te iga ayá̱ꞌ anne̱ye̱ꞌitaj? Iwá̱n siga nej amoTe̱ko, ¿te iga ayá̱ꞌ anne̱weyimati̱ltiáj? Amejemej sacerdo̱tejmej anneaja̱wilmatij iga anne̱makaj ofrenda yo̱lka̱ꞌ yej pacha, ko̱xo iwá̱n kokolisyoj. ¿Ix a̱n ompay ken ankichijtokej? Amejemej ankikajtéjkeja iga anye̱ꞌnemij, iwá̱n ken ankichijtokej, antanejne̱xtiliáj iga mamochi̱wa yej aye̱kti. Eꞌ nej nia nikchi̱wati iga la gente amo mamitzye̱ꞌitaka̱n, iwá̱n mamitzpi̱najti̱ka̱n iga ayá̱ꞌ ankichi̱waj ken nitatekimaka.
’Ayá̱ꞌ wel nikui̱liá iyofre̱ndaj yej kikájteja isiwa̱ꞌ. Ayá̱ꞌ nikui̱li̱j yo̱lka̱ꞌ yej ne̱miktiliá, iga nej nikneki iga amo agaj makikajte̱wa isiwa̱ꞌ. Iga ijkó̱n ipilowa̱n mane̱weyimati̱lti̱ka̱n. Iná̱n xikitaka̱n te̱ ankichijtokej, porque nikijiya yej ayá̱ꞌ kichi̱wa ken kijlij isiwa̱ꞌ kua̱ꞌ mokuikej iwá̱n nej nikijiya yej kikajte̱wa isiwa̱ꞌ.
’Este kua̱ꞌ onóyajoꞌ amo‑ikyapatajwa̱n, ankikajtejkej iga ankichi̱waj ken nikijtowa pan noley, iwá̱n iná̱n aya̱ꞌsan ankinekij ankichi̱waj. Xikchi̱waka̱n ken nikijtowa iwá̱n nonos amowa̱n. Eꞌ amejemej ankijtowaj: “¿te iga manikchi̱waka̱n ken tej tikijtowa?” Nej nikijtowa iga anne̱tachtekijkej, iga ayá̱ꞌ anne̱makaj ofrenda yej ankipiáj. Xikuajligaka̱n amodie̱zmoj yej ankipiáj iwá̱n anyawij ankitatij iga nimitzye̱ꞌitaskej. Iwá̱n poxsan nimitzpale̱wi̱skej ipan inochi yej ankipiáj.
’Amotajto̱lmej ne̱poxyo̱lmiktiá iga amejemej ankijtowaj: “¿Téjas iga maniktokaka̱n Dios? ¿Té̱ nimota̱niliáj iga matikchi̱waka̱n ken Dios tatekimaka? ¿Té̱ nimota̱niliáj iga timomachi̱liáj iga tikchijkej yej aye̱kti iyi̱xtaj Dios? Tikitaj iga yej kichijtokej yej aye̱kti, ye̱ꞌonokej; tikitaj yej kichi̱waj yej aye̱kti, motapialiáj.”
’Nej amoDio̱s, nimitzijliáj iga yej ne̱weyimati̱ltiáj, nikpoxnekis ken tejté̱ yej pox patiyoj; iwá̱n nike̱lka̱wili̱j yej kichi̱wa yej aye̱kti, kenkua̱ꞌ se̱ ta̱gaꞌ ke̱lka̱wiliá ipiltzi̱n yej kichi̱wa yej aye̱kti. No̱ yawi asiti día kua̱ꞌ yawi wi̱tzeti tiꞌti yej pox wewelkas, ompa yej kichijtokej yej aye̱kti iwá̱n yej mopoxweyimatij, yawij tatatij ken tikita wa̱ꞌsakaꞌ, eꞌ yej ne̱weyimati̱ltiáj moma̱nawi̱skej.
’Xikejla̱mikika̱n inó̱n ley yej nikmáꞌ notekipanowa̱ni Moisés.
’Nej nimitzti̱tanili̱skej el profeta Elías kua̱ꞌ aya asi inó̱n día kua̱ꞌ tajuzga̱ro̱j Jehová Dios, ipan inó̱n día kua̱ꞌ pox majmawilo̱j. Yéj yawi kichi̱wati iga te̱tajmej mamoye̱ꞌitaka̱n sej iwá̱n ipilowa̱n, iwá̱n te̱pilowa̱n mamoye̱ꞌitaka̱n sej iwá̱n te̱tajmej, eꞌ siga ayá̱ꞌ kichi̱waskej, nej niwi̱ꞌ nita‑ikno̱chi̱waki iwá̱n nitamelaꞌpolo̱ki.