Yej kichi̱wa se̱ siwa̱ꞌ yej ito̱ka̱ꞌ Ester kua̱ꞌ Dios kima̱nawiá israeli̱tajmej
Ester 1; 2:1‑10, 15‑18, 21‑23; 3:1‑9:19; 10:3
111
Kua̱ꞌ el rey Darío miguiꞌ, miaꞌ israeli̱tajmej cha̱ntitoyaj ipan país de Persia. Yej motá̱lijoꞌ iga rey ito̱ka̱ꞌ Asuero iwá̱n no̱ kito̱ka̱wia̱yaj Jerjes. Iní̱n ta̱gaꞌ kimanda̱roj ciento veintisiete estados, pe̱wa pan país yej ito̱ka̱ꞌ India iwá̱n tantoya este pan país yej ito̱ka̱ꞌ Etiopía.Iwá̱n kua̱ꞌ é̱yiya años manda̱rojtoꞌ rey Asuero, kilwichi̱wilij itekipanowa̱nimej yej no̱ achi manda̱rowaj. Inochimej monechkojkej ipan a̱ltepe̱ꞌ yej ito̱ka̱ꞌ Susa yej icapita̱l ka̱n manda̱rowa̱ya Asuero. Inó̱n ilwiꞌ nentoya siete día. No̱ kijlijkej iga ompa maonoka̱n nochi gente yej cha̱ntitokej Susa. Ompa ka̱n monechkojkej iga takuajkej poxsan tamo̱nsajtiꞌ. Ipa̱nkomej chijtoya iga oro iwá̱n plata, ijko̱nsan no̱ iva̱sojmej iwá̱n ipla̱tojmej. La reina yej ito̱ka̱ꞌ Vasti iyoka kichij tákual iga kilwichi̱wilij siwa̱tkej iga sentakuajkej iwa̱mej.
Ipanya siete día, kua̱ꞌ tantiaya ilwiꞌ, el rey Asuero kua̱ꞌ acha̱ ta̱wa̱n, tati̱tan makino̱tzili̱tij la reina Vasti iga mayawi ite̱noj. El rey kinekiá iga nochi yej kipale̱wiá ka̱n manda̱rowa iwá̱n nochi gente makitaka̱n iga la reina Vasti poxsan mo̱nsajtiꞌ, eꞌ la reina Vasti ayá̱ꞌ kichij ken kijtoj el rey; iwá̱n el rey poxsan kuejkuesiwiꞌ. Iwá̱n el rey kitati̱tanilij yej tano̱no̱tzaj iwá̱n kitajtan te̱ wel mochi̱wili̱j la reina Vasti iga ayá̱ꞌ kichij ken kijtoj el rey. Yej tano̱no̱tzaj kijlijkej el rey:
—Siga tej tikye̱ꞌita, xikchi̱wa se̱ ley ka̱n makijto iga Vasti ayꞌya yej reina iwá̱n ayꞌya má̱j ompa maono. Iwá̱n ipan ilugar la reina Vasti, xikte̱mo seꞌ iga mamochi̱wa reina. Seꞌ reina yej má̱j matacre̱do que la reina Vasti. Iwá̱n inó̱n ley yej tia tikchi̱wati mamomati no̱ya̱n ka̱n tej timanda̱rowa iga inochi siwa̱tkej makirrespeta̱ro̱ka̱n iwá̱n makicre̱do̱ka̱n iwe̱wejmej iwá̱n amo makichi̱waka̱n ken kichij la reina Vasti.
Yej kijtojkej tano̱no̱tzanimej kiye̱ꞌitaꞌ el rey, iwá̱n ijkó̱n kichij. Iwá̱n kiti̱tan a̱mamej ipan inochi esta̱dojmej. Inó̱n a̱maꞌ mo‑ijkuiloj kensan iga tajto̱lo ipan cada estado iga no̱ya̱n mamomati ken nemi tatekimaka el rey.
Ipan inó̱n a̱ltepe̱ꞌ yej ito̱ka̱ꞌ Susa onoya se̱ ta̱gaꞌ israelita ito̱ka̱ꞌ Mardoqueo, de Jerusalén, yej el rey Nabucodonosor kiki̱xtij Judea iwá̱n sekin má̱j gente yej no̱ kescla̱vojtilijkej. Iní̱n ta̱gaꞌ kiskaltij se̱ itzo̱yo̱ꞌ yej ipri̱maj yej ito̱ka̱ꞌ Ester. Mardoqueo kiskaltij Ester iga itaj iwá̱n iye̱ꞌ mikíkeja. Iní̱n takotzi̱n poxsan mo̱nsajtiꞌ, iwá̱n Mardoqueo kikuiꞌ ken imelaꞌsiwa̱piltzi̱n.
Kua̱ꞌ itekipanowa̱nimej el rey pe̱wakej iga kite̱mojkej se̱ takotzi̱n iga mamochi̱wa isiwa̱ꞌ el rey, Ester no̱ kiwi̱gakej cha̱n el rey. Kua̱ꞌ el rey Asuero kitaꞌ Ester, ke̱le̱wij poxsan iwá̱n kikuiꞌ iga isiwa̱ꞌ. Eꞌ Ester ayá̱ꞌ kijtoj de ka̱n wa̱laj, niga kijtoj katiapa irra̱zaj, iga Mardoqueo ijkó̱n kinawatij. Iwá̱n el rey kiwi̱gaꞌ ipan ipala̱cioj in Ester iwá̱n poxsan kineꞌ má̱j que sekin siwa̱tkej yej ompa onoyaj. Kita̱lilij ipan itzontekon se̱ coronaa yej re̱inajmej kita̱liáj, iwá̱n kua̱ꞌ mona̱miktijkej, mochij weyi‑ilwiꞌ.
Ino̱mej día Mardoqueo kikaguiꞌ iga o̱me itekipanowa̱nimej el rey kijiyakej el rey, iwá̱n kejla̱nkej iga yawij kimikti̱tij el rey. Mardoqueo yajki kijli̱to Ester ken iga kikaguiꞌ mo‑ijlijtokej ino̱mej tekipanowa̱nimej iwá̱n Ester kimati̱ltij el rey. Kua̱ꞌ el rey kimatiꞌ, tati̱tan iga makimikti̱ka̱n ino̱mej o̱me̱n tajta̱gaꞌ. Eꞌ nochi iní̱n yej mochij kijkuilojkej ipan libro iga amo mamoe̱lka̱wa inochi yej mochi̱wa kua̱ꞌ manda̱rojtoꞌ Asuero.
Después el rey kimáꞌ se̱ weyi cargo se̱ ta̱gaꞌ yej ito̱ka̱ꞌ Amán. Inó̱n iga nochi yej onoyaj ipan ikalte̱nyo palacio motankua̱ketzayaj iwá̱n motzonto̱kayaj iyi̱xtaj Amán kua̱ꞌ panowa̱yaj ite̱noj, iga ijkó̱n tatekimáꞌ el rey. Eꞌ Mardoqueo ayá̱ꞌ motankua̱ketzaya niga motzonto̱kaya iyi̱xtaj Amán,b inó̱n iga Amán poxsan kuejkuesiwiꞌ. Eꞌ Amán ayá̱ꞌ kineꞌ tejte̱san makichi̱wili Mardoqueo, sino que kejla̱n iga makimijmikti inochi israeli̱tajmej yej cha̱ntitokej ipan país ka̱n manda̱rowa Asuero, inochi yej irrá̱zajpa Mardoqueo. Inó̱n iga Amán yajki tajto̱to iwá̱n el rey iwá̱n kijlij:
—Israeli̱tajmej sencha̱ntitokej iwá̱n tejemej iwá̱n onokej má̱j ipan sekin a̱ltepe̱mej ipan inochi esta̱dojmej yej tej tikmanda̱rowa; iwá̱n yejemej ayá̱ꞌ kichi̱waj ken titatekimáꞌ. Siga tej tikye̱ꞌita, ¿te iga ayá̱ꞌ tikchi̱wa se̱ a̱maꞌ ka̱n titatekimaka iga makimikti̱ka̱n?, nej nia nimitzmakati komati tomi̱n iga motomi̱n má̱j makomatiá.
Iwá̱n el rey kiki̱xtij iyani̱lloj ipan imájpil iwá̱n kimáꞌ Amán iwá̱n kijlij:
—Nej ayá̱ꞌ nikneki motomi̱n. Xaj iwá̱n xikchi̱wa ken tej tikneki.
Nimaní̱n Amán kitati̱tanilij itajkuilowa̱nimej el rey, iwá̱n yéj kijlijtiajki ken iga makichi̱waka̱n inó̱n a̱maꞌ iga makiti̱tanili̱ka̱n nochi gobernado̱rmej yej manda̱rowaj ipan esta̱dojmej ipan sejsé̱ itajto̱lmej. Ka̱n támiꞌya kijkuilokej a̱maꞌ, kita̱lij ito̱ka̱ꞌ el rey Asuero iwá̱n kisella̱rojkej iga iyani̱lloj el rey. Iwá̱n ino̱mej a̱mamej kiwi̱gakej tati̱tanimej ipan inochi esta̱dojmej yej onoꞌ ka̱n manda̱rowa Asuero. Ipan inó̱n a̱maꞌ tatekimaka el rey iga makimikti̱ka̱n inochi israeli̱tajmej, tajta̱gaꞌ iwá̱n chokomej, siwa̱tkej iwá̱n ko̱kone̱ꞌ, newi makimikti̱ka̱n. Inochi̱n kinekiáj makimikti̱ka̱n ipan día trece ipan mes yej ito̱ka̱ꞌ Adar, iwá̱n yej yawi tamikti̱ti kikuiskej yej itatkímejpa katka israeli̱tajmej. Inó̱n a̱maꞌ kiki̱xtilijkej miaꞌ copia ipan itájto̱l sejse̱pa estado iga nochi makimatitoka̱n te̱ yawij kichi̱watij inó̱n día.
Kua̱ꞌ Mardoqueo kimatiꞌ yej Amán kineki makichi̱wa iwá̱n ige̱ntej Mardoqueo, poxsan mokno̱matiꞌ. Iwá̱n kakij itzótzol yej tejchiktiꞌ iwá̱n mota̱lilij kuanex ipan itzontekon, iwá̱n mota̱lij ikalte̱nte̱noj el rey, iga ayagaj wel panowa ipan ikalte̱n el rey yej makakijto ino̱mpa tzótzol yej tejchiktiꞌ. Kua̱ꞌ no̱ya̱n momatiꞌ yej el rey kijkuiloj, israeli̱tajmej mokno̱matikej iwá̱n kakijkej itzotzolmej yej tejtejchiktiꞌ, mayuna̱rojkej iwá̱n cho̱kakej poxsan.
Kua̱ꞌ la reina Ester kimatiꞌ iga Mardoqueo onoya ikalte̱nte̱noj el rey iwá̱n kakijtoꞌ itzótzol yej tejchiktiꞌ, kiti̱tan imo̱nsojmej iga makiwi̱guili̱ka̱n ye̱ꞌtzótzol Mardoqueo, iga makiki̱xti inó̱n itzótzol yej tejchiktiꞌ; eꞌ Mardoqueo ayá̱ꞌ kineꞌ. Iwá̱n la reina kiti̱tan se̱ imo̱nsoj iga makitajtani Mardoqueo te̱ kichij, te íga ijkó̱n taajakijtoꞌ.
Mardoqueo kita̱tapowij imo̱nsoj la reina Ester iwá̱n kijlij inochi yej nemi mochi̱wa, no̱ kipowilij iga Amán kinekiá makimaka tomi̱n el rey iga wel makimikti̱ka̱n israeli̱tajmej, iwá̱n kimáꞌ se̱ copia de inó̱n a̱maꞌ yej Amán kitijtí̱tanya ipan inochi esta̱dojmej. Nochi kimati̱ltij Ester iga makimati te̱ mochi̱wasneki iwá̱n iga makitajtowili ige̱ntej iná̱ꞌ el rey. Ijkó̱n iga inó̱n mo̱nsoj yajki ka̱n onoꞌ Ester iwá̱n kipowilij nochi yej Mardoqueo kijlij.
Iwá̱n Ester kijlij imo̱nsoj:
—Xaj ka̱n onoꞌ Mardoqueo iwá̱n xikijli iga ayagaj wel kalaki ka̱n onoꞌ el rey, siga ayá̱ꞌ nemi kino̱tzaj. Siga agaj yokakalaki, ayéj kua̱ꞌ el rey kijtowa, onoꞌ se̱ ley ka̱n kijtowa iga inó̱n yej yokakalaki, makimikti̱ka̱n. Se̱ wel moma̱nawiá siga el rey kitachaltiá ibasto̱n de oro ka̱n se̱ nemi kalaki, ijkó̱n sí ayá̱ꞌ kimiktiáj. Xikijli iga kipiaya se̱ mes iga el rey ayá̱ꞌ nemi ne̱no̱tza iga maniá ka̱n yéj onoꞌ.
Iwá̱n Mardoqueo ijkí̱n kijlij inó̱n mo̱nsoj iga makijli Ester:
—Amo xikijto iga tej tia timoma̱nawi̱ti iga tonoꞌ ipan palacio, mie̱j nemi kimiktiáj tokni̱wa̱n israeli̱tajmej. Siga tej ayá̱ꞌ titajtowa iwá̱n el rey iná̱n kua̱ꞌ te̱mikti̱jnekij, Dios ne̱ma̱nawi̱skej ken iga yéj wel ne̱ma̱nawiáj, eꞌ tej iwá̱n mokni̱wa̱n anyawij anmikitij. Anka Dios mitzta̱lij iga xima̱nda̱ro iga xine̱pale̱wi̱ka̱n iná̱n kua̱ꞌ te̱mikti̱jnekij.
Ester kiti̱tan sej imo̱nsoj iga makijli Mardoqueo:
—Nia nikchi̱wati, eꞌ achto xiknechko israeli̱tajmej yej cha̱ntitokej Susa iga mamayuna̱ro̱ka̱n iwá̱n maora̱do̱ka̱n iga nej; amo matakua̱ka̱n niga makoni̱ka̱n nité̱ e̱yi día iwá̱n e̱yi yówal. Nej no̱ ijkó̱n nia nikchi̱wati, iwá̱n nia̱ti ite̱noj el rey malej iga yéj ayá̱ꞌ nemi ne̱tati̱taniliá iwá̱n ayá̱ꞌ nimajmawi siga nia nimikiti.
Mardoqueo nimaní̱n kichij nochi yej Ester kijtoj. Inochi israeli̱tajmej monechkojkej iwá̱n mayuna̱rojkej e̱yi día iwá̱n e̱yi yówal.
Ipanya e̱yi día, Ester kakij iwí̱pi̱l yej kakiajpa re̱inajmej, iwá̱n kalaꞌ ka̱n onoꞌ el rey. El rey e̱watoya ipan iweyi‑asie̱ntoj ka̱n manda̱rowa, yej tachi̱xtoꞌ kalte̱nkóbapa, iwá̱n kua̱ꞌ el rey kitaꞌ Ester iga onoꞌ ipan patio, kijlij iga makalaki iwá̱n kitachaltij ibasto̱n de oro ka̱n onoꞌ Ester. Iwá̱n Ester kalaꞌ iwá̱n kichijchin ipu̱ntaj ibasto̱n de oro el rey, iwá̱n el rey kitajtan:
—¿Té̱ tikneki, reina Ester? ¿Té̱ tiktajtanisneki? Wel nimitzmaka la mitad yej nochi nikmanda̱rowa siga tine̱tajtaniliá.
Ester kijtoj:
—Nej nikneki iga a̱man tej iwá̱n Amán xa̱ka̱n nocha̱n, iga nikchij se̱ tákual.
Iwá̱n el rey tatekimáꞌ:
—Xikno̱tzatij Amán iga mawi̱ki igakiꞌ mania̱ka̱n manitakua̱tij cha̱n Ester.
Iwá̱n íkua̱ꞌsan el rey iwá̱n Amán yajkij takua̱toj cha̱n la reina. Iwá̱n el rey kitajtan Ester:
—¿Te̱ tikneki? Xikijto, iwá̱n wel nimitzmaka la mitad yej nochi nikmanda̱rowa siga tikneki.
Ester kijtoj:
—Nej nikneki iga mo̱sta sej xiwi̱ki iwá̱n Amán iga nia nimitzchi̱wili̱tij seꞌ tákual iwá̱n íkua̱ꞌya nimitzijli̱j te̱ nikneki.
Amán yajki icha̱n este yo̱lpa̱ktiajki. Eꞌ kua̱ꞌ ki̱saꞌ, kuejkuesiwiꞌ iga kitaꞌ Mardoqueo e̱watoꞌ ipan ikalte̱n palacio. Ma̱jya kuesiwiꞌ iga Mardoqueo ayá̱ꞌ motzonto̱ka iga kiweyimati̱ltiá, inó̱n iga Amán poxsan kuejkuesiwiꞌ, eꞌ ayo̱lki̱saꞌ, iwá̱n yajki icha̱n. Kua̱ꞌ asiꞌ icha̱n, Amán kipowilij isiwa̱ꞌ iwá̱n iyami̱gojmej ken iga inó̱n día kiweyimati̱ltijkej. Iwá̱n no̱ kijtoj:
—Nej iwá̱n el rey yeguin la reina Ester ne̱tamakakej; ayagaj má̱j takua̱to̱ya. Iwá̱n mo̱sta nia̱tij sej nitakua̱tij iwá̱n el rey iga Ester yawi kichi̱wati seꞌ tákual. Eꞌ iní̱n yej kichi̱wa la reina, ayá̱ꞌ ne̱yo̱lta̱liá kua̱ꞌ nimasi iwá̱n Mardoqueo yej israelita iga yéj ayá̱ꞌ motzonto̱ka note̱noj niga ayá̱ꞌ ne̱weyimati̱ltiá.
Iwá̱n isiwa̱ꞌ iwá̱n iyami̱gojmej kijlijkej:
—Xikto̱ka se̱ weyaꞌkuawiꞌ iwá̱n mo̱sta xiktajtanili el rey iga xikpi̱pilo Mardoqueo ipan inó̱n weyaꞌkuawiꞌ yej tia tikto̱kati, ijkó̱n tipa̱ktiá̱j iga titakua̱ti iwá̱n el rey.
Amán kiye̱ꞌitaꞌ yej kijlijkej iwá̱n kitekimáꞌ imo̱nsojmej iga makito̱kaka̱n se̱ weyaꞌkuawi.
Inó̱n yówal el rey awel kochá, inó̱n iga tatekimáꞌ iga makikui̱li̱tij inó̱n libro ka̱n ijijkuilijtoꞌ nochi yej sucede̱rowa kua̱ꞌ manda̱rojtoꞌ el rey iga makilee̱rowili̱ka̱n. Pe̱waꞌ iga kilee̱rowilijkej iwá̱n asikej ka̱n ijkuilijtoꞌ ken iga Mardoqueo kine̱xtij o̱me tajta̱gaꞌ yej kimikti̱jnekiáj el rey Asuero.
Iwá̱n el rey kitajtan imo̱nsojmej:
—¿Té̱ kimakakej Mardoqueo iga inó̱n kichij?
Imo̱nsojmej kijtojkej:
—Akimakakej nité̱.
Después el rey tatajtan:
¿Iná̱n a̱ꞌyéj onoꞌ ipan patio?
Íkua̱ꞌ Amán asiꞌ ipan palacio iwá̱n onoya ipan ipa̱tioj el rey. Wa̱laj iga kitajtanili̱ko el rey iga wel makipi̱pilo Mardoqueo ipan weyaꞌkuawiꞌ yej kito̱kkej. Iwá̱n imo̱nsojmej el rey kijtojkej:
—Amán onoꞌ ipan patio.
—Makalaki —kijtoj el rey.
Iwá̱n Amán kalaꞌ ka̱n onoꞌ el rey, iwá̱n kua̱ꞌ ónoꞌya ite̱noj, el rey kiwe̱jtajtan Amán:
—¿Té̱ nikchi̱was iwá̱n se̱ ta̱gaꞌ yej nikneki manikweyimati̱lti?
Amán kijtoj pan iya̱lmaj anka yéj yawij kiweyimati̱lti̱tij inó̱n iga ijkí̱n kijtoj:
—Nej nikijtowa iga makiwajligaka̱n se̱ tzótzol yej tejpa tikakiá iwá̱n se̱ kawa̱yoj yej tejpa tiktejkawiliá, iwá̱n se̱ corona makita̱li̱lti̱ka̱n ipan itzontekon. Después makino̱tzaka̱n se̱ ta̱gaꞌ yej kipiá weyi cargo ka̱n timanda̱rowa iga makita‑ajaki̱lti inó̱n ta̱gaꞌ yej tej tikneki xikweyimati̱lti. Después matejkatiá ipan kawa̱yoj, iwá̱n makitayawalo̱lti̱ka̱n tajkoa̱ltepe̱ꞌ iwá̱n inó̱n ta̱gaꞌ yej kite̱ntila̱ntiá kawa̱yoj ijkí̱n makijtojtiá: “El rey ijkí̱n kichi̱wiliá se̱ ta̱gaꞌ yej kineki makiweyimati̱lti.”
Iwá̱n el rey kijlij Amán:
—Nikye̱ꞌita yej tikijtoj. Xikui notzótzol iwá̱n nokawa̱yoj iwá̱n xikchi̱wili̱ti ijkó̱n ken tikijtoj, se̱ ta̱gaꞌ israelita yej ito̱ka̱ꞌ Mardoqueo, iwá̱n nochi xikchi̱wa kensan tine‑ijlij.
Amán awel teoꞌ má̱j kichij, sino que kikuiꞌ kawa̱yoj, iwá̱n isota̱ntzótzol el rey iwá̱n yajki kita‑ajaki̱lti̱to Mardoqueo iwá̱n kiwi̱gaꞌ ipan kawa̱yoj iga kitayawalo̱lti̱to tajkoa̱ltepe̱ꞌ, ijkí̱n tzajtzitinemiá iyi̱xtaj la gente: “El rey ijkí̱n kichi̱wiliá se̱ ta̱gaꞌ yej kineki makiweyimati̱lti.”
Kua̱ꞌ Mardoqueo tamiꞌ kitayawalo̱ltijkej, yajki sej mota̱li̱to ikalte̱nte̱noj palacio, iwá̱n Amán motalojtiajki icha̱n, moxa̱ygatzaktiajki iga pi̱na̱wa.
Ayá̱ꞌ wejkaj iga asiꞌ, asikej imo̱nsojmej el rey iga kikuitoj Amán iga matakua̱ti iga la reina kichij tákual. Iwá̱n kua̱ꞌ nemi takuaj, el rey sej kitajtan Ester:
—¿Té̱ tikneki xiktajtani reina Ester? Yej tiktajtanis, nimitzmakas.
Iwá̱n la reina kijtoj:
—¡Rey! siga melá̱ꞌ iga tine̱ye̱ꞌítaya iwá̱n siga tej tikneki, xine̱ma̱nawi iwá̱n xikma̱nawi no̱ noge̱ntej iga nej iwá̱n noge̱ntej ne̱namakakej ino̱mej yej kinekij mane̱mikti̱ka̱n iwá̱n ayá̱ꞌ mose̱wi̱skej este que mane̱melaꞌmijmikti̱ka̱n.
Iwá̱n el rey kitajtan la reina:
—¿Té̱ tikijtowa? ¿A̱ꞌyéj in inó̱n yej mi̱xe̱wiá iga mitzmikti̱jnekij?
Iwá̱n Ester kijtoj:
—Yej ne̱mikti̱jnékijwaꞌ iní̱n Amán.
Kua̱ꞌ iní̱n kikáꞌ Amán, momajtij iwá̱n ken tapolijtika̱wiꞌ iga majmawi iga onoꞌ iyi̱xtaj el rey iwá̱n la reina. Iwá̱n el rey moketzaꞌ ka̱n takuajtoya iwá̱n poxsan kuejkuesiwiꞌ. Ki̱saꞌ ka̱n takuajtoya iwá̱n yajki ipan ijardi̱nyo palacio, mie̱j Amán ka̱wiꞌ, pe̱waꞌ iga kitekiꞌtajtanilij Ester iga makima̱nawi iga kimatiꞌ iga el rey yawi kimikti̱ti. Mie̱j Amán kirroga̱rojtoꞌ Ester, Amán montankuaketzaꞌ ite̱noj weyi asiento ka̱n onoꞌ la reina. Íkua̱ꞌ kalaꞌ el rey iwá̱n kitaꞌ yej Amán kichijtoꞌ, el rey kijtoj anka tejté̱ kichi̱wili̱jneki la reina. Inó̱n iga el rey kuejkuejsiwiꞌ iwá̱n kitekimáꞌ isolda̱dojmej iga makiki̱tzki̱ka̱n Amán.
Iwá̱n se̱ de ino̱mej solda̱dojmej kijtoj:
—Amán kito̱gaꞌ se̱ weyaꞌkuawiꞌ ka̱n kinekiá makipi̱pilo Mardoqueo, inó̱n weyaꞌkuawiꞌ onoꞌ icha̱n.
Iwá̱n el rey kijlij isolda̱dojmej:
—¡Ompa xikpi̱pilo̱tij Amán sémisan!
Iwá̱n solda̱dojmej kipi̱pilojkej Amán ipan inó̱n weyaꞌkuawiꞌ yej yéjsan kito̱ꞌ iga ompa katka makipi̱pilo Mardoqueo.
Iwá̱n íkua̱ꞌsan el rey Asuero kimáꞌ la reina yej katka íkal Amán, iwá̱n Mardoqueo yajki iyi̱xtaj el rey, iga Ester kijlij el rey iga Mardoquéojwaꞌ iko̱ko. Iwá̱n el rey kimáꞌ Mardoqueo se̱ anillo yej Amán kimakaka iwá̱n Ester kita̱lij Mardoqueo iga makicuida̱ro yej katka íkal Amán.
Iwá̱n Ester sej tajtoj iwá̱n el rey, Ester motankua̱ketzaꞌ iyi̱xtaj el rey iwá̱n kitekiꞌtajtanilij iga makipata ken tatekimakaka Amán, iga makimikti̱ka̱n israeli̱tajmej. Ester ijkí̱n kijlij el rey:
—Siga tej tikneki norre̱y, xikchi̱wa seꞌ a̱maꞌ ka̱n makijto iga ayꞌya mamochi̱wa ken tatekimakaka Amán yej kitijtí̱tanya ipan inochi esta̱dojmej iga makimikti̱ka̱n noge̱ntej; iga nej awel maniksemaka noge̱ntej makimikti̱ka̱n.
Iwá̱n el rey kijlij Ester iwá̱n Mardoqueo:
—Xikchi̱waka̱n seꞌ a̱maꞌ iga amoge̱ntej ken iga amejemej ankiye̱ꞌitaj iwá̱n xikta̱li̱ka̱n noto̱ka̱ꞌ iwá̱n xiksella̱ro̱ka̱n iga noani̱lloj iga inó̱n a̱maꞌ ka̱n tatekimáꞌ Amán kipiá noto̱ka̱ꞌ iwá̱n onoꞌ sellado iga noani̱lloj iwá̱n aweljoꞌ mopata. Eꞌ wel tikchi̱waj seꞌ ley iwá̱n matiktijti̱tanika̱n no̱ya̱n.
Iwá̱n kino̱tzkej itajkuilowa̱nimej el rey iwá̱n kijkuilojkej inochi ken iga Mardoqueo kijlijtiajkij. Ijkó̱n iga seꞌ a̱maꞌ ka̱n tatekimaka el rey, kiti̱tanilijkej gobernado̱rmej ipan esta̱dojmej iwá̱n inochi israeli̱tajmej yej cha̱ntitokej ipan país ka̱n manda̱rowa Asuero, kimati̱ltijkej inó̱n yej ijkuilijtoꞌ ipan seꞌ a̱maꞌ. Iní̱n a̱maꞌ kijkuilojkej ken iga tajtowaj ipan sejsé̱ a̱ltepe̱ꞌ. Ipan inó̱n a̱maꞌ tatekimaka iga israeli̱tajmej wel mamoma̱nawi̱ka̱n kua̱ꞌ iyenemi̱gojmej kimikti̱jnekiskej. Ijkó̱n iga iní̱n a̱maꞌ yej kichijkej momatiꞌ no̱ya̱n ipan país ka̱n manda̱rowa Asuero.
Asiꞌ inó̱n día kua̱ꞌ iyenemi̱gojmej israeli̱tajmej kichi̱xtoyaj iga makimijmikti̱ka̱n israeli̱tajmej, eꞌ ayá̱ꞌ ijkó̱n mochij iga israeli̱tajmej kita̱nkej, kimiktijkej iyenemi̱gojmej. Israeli̱tajmej monechkojkej ipan sejsé̱ iya̱ltepe̱mej, ijkó̱n kichijkej ipan inochi esta̱dojmej iga makiki̱tzki̱ka̱n iyenemi̱gojmej iwá̱n makimikti̱ka̱n. Kipi̱pilojkej diez yej ipilówa̱mpa Amán. Después israeli̱tajmej mose̱wijkej iwá̱n kichijkej ilwiꞌ iga pa̱kikej iga kita̱nilijkej iyenemi̱gojmej.
Mardoqueo no̱ kiye̱ꞌitakej iwá̱n kita̱lkej iga ima̱selkayo el rey Asuero iga no̱ manda̱rowa. Iwá̱n israeli̱tajmej kiye̱ꞌitakej Mardoqueo iga yéj kichij iga onókeja tamelá̱.