Israeli̱tajmej yawij sej ipan ita̱lmej
Esdras 1:1‑2:2, 64‑65; 3:1‑3, 10‑12; 4:1‑6, 21, 24; 5:1‑2; 6:7‑8, 14‑17; Hageo 1:1‑15; Zacarías 1:1; 4:6‑9; 9:9; 12:10; 13:7
110
Panoj miaꞌ año iga yej icha̱mej ipan país yej ito̱ka̱ꞌ Babilonia kita̱nilijkej israeli̱tajmej iwá̱n kiwi̱gakej preso israeli̱tajmej ipan país de Babilonia. Después wa̱lkej yej icha̱mej ipan pai̱smej yej ito̱ka̱ꞌ Media iwá̱n yej ito̱ka̱ꞌ Persia iwá̱n ino̱mej kita̱nilijkej yej icha̱mej Babilonia. Ipan Persia kita̱lijkej iga rey se̱ yej ito̱ka̱ꞌ Ciro.Dios kitajto̱lmáꞌ profeta Jeremíasa kua̱ꞌ aya kiki̱xtia̱yaj israeli̱tajmej ipan ita̱lmej, kijlij iga kua̱ꞌ pano̱j 70 años, israeli̱tajmej mokuepaskej sej icha̱mej. Iwá̱n iga mamochi̱wa ken kijtoj el profeta Jeremías, Dios kitajla̱ntij iní̱n rey iga matajto wa̱n israeli̱tajmej yej cha̱ntitoyaj ipan país de Persia. Rey Ciro kijtoj:
—Jehová, Dios yej onoꞌ ipan cielo ne̱ta̱lij iga manimanda̱ro no̱ya̱n ipan iní̱n ta̱jli iwá̱n ne̱tekimáꞌ iga manikchi̱wili sej itio̱pan Jerusalén. Inó̱n iga nochi yej kineki mayawi ipan íta̱l iga maki‑ojpachi̱watij weyitio̱pan wel yawij ke̱man kinekij; yej ayá̱ꞌ ya̱jnekiskej, matapale̱wi̱ka̱n iga tomi̱n o tejté̱ yej kinekiskej yej ya̱tij. No̱ ankimakaskej amoofre̱ndaj, ke̱ꞌya ankinekiskej iga mochi̱was íkal Dios.
Iwá̱n yajkij Jerusalén yej te̱tajmej ipan sejsé̱ familia, yej itri̱buj Judá iwá̱n Benjamín, sacerdo̱tejmej, ipilówa̱mpa Leví iwá̱n nochi yej kiyo̱lmakakej iga yajkij kichi̱watoj íkal Dios Jerusalén. Iwá̱n nochi yej ka̱wikej Persia kimakayaj yej kinekiáj yej yajkij tio̱panchi̱watoj, iyókapa kimakayaj iyofre̱ndajmej ke̱ꞌya iga kinekiáj iga mamochi̱wa weyitio̱pan.
El rey Ciro kikuepaꞌ nochi va̱sojmej de oro iwá̱n de plata yej Nabucodonosor kichtekka weyitio̱pan kipiayay miaꞌ años. Iwá̱n miaꞌ israeli̱tajmej yajkij ipan ita̱lmej. Iwá̱n yejemej yajki se̱ ta̱gaꞌ iga mamanda̱ro yej ito̱ka̱ꞌ Zorobabel, yej má̱j despué̱j kita̱lkej iga gobernador Jerusalén, yajki no̱ se̱ sacerdote yej ito̱ka̱ꞌ Josué. Iga inochimej yej yajkij ipan ita̱lmej cincuenta mil tajta̱gaꞌ.
Kua̱ꞌ asikej Jerusalén, achto kichijkej altar ka̱n kita̱lia̱yaj iyofre̱ndajmej iga Dios, yowaltiꞌ iwá̱n tio̱taꞌ, iga kimajmawilia̱yaj yej cha̱ntitoyaj ipan a̱ltepe̱mej yej najna̱ꞌsan onoyaj. Iwá̱n pe̱wakej iga kichi̱waj weyitio̱pan.
Kua̱ꞌ pe̱wakej iga kichi̱waj weyitio̱pan, sacerdo̱tejmej moketzkej iwá̱n itrompe̱tajmej iga tapi̱tzaj, iwá̱n ipilówa̱mpa Leví kina̱wati̱ltijkej ichixchixmejb, iwá̱n la gente takui̱kayaj iga kiweyimati̱ltiáj iwá̱n kimakaj gracias Dios, ijkí̱n kikui̱kayaj:
—Dios poxsan kajasi iga mamoweyimati̱lti iga nochipa kikne̱liá israeli̱tajmej.
Iwá̱n nochi gente takui̱kayaj iga poxsan pa̱ktoyaj, kiweyimati̱ltiáj Jehová iga nemi kita̱liliáj sej iba̱sejyomej íkal Dios.
Eꞌ mokuejkueso̱lo̱j kua̱ꞌ némiya mochi̱wiliá iparedyomej weyitio̱pan iga asikej sekin tajta̱gaꞌ de Samaria iwá̱n yejemej kijtojkej:
—Niawij nimitzpale̱wi̱tij iga mamo‑ojpachi̱wa weyitio̱pan iga nejemej no̱ nicre̱dowaj ipan ino̱nsan Dios kensan amejeme̱n.
Iní̱n ayá̱ꞌ kiye̱ꞌitaꞌ Zorobabel iga kimatiá iga nemi takajkaya̱waj, iga samarita̱nojmej kiweyimati̱ltiáj i̱dolojmej. Iwá̱n Zorobabel ayá̱ꞌ kineꞌ iga matekipano̱ka̱n ka̱n nemi moojpachi̱wa weyitio̱pan. Inó̱n iga samarita̱nojmej poxsan kuejkuesiwikej, iwá̱n yajkij mote̱lwi̱toj iná̱ꞌ rey de Persia, inó̱n ve̱j onoya iga rey yej ito̱ka̱ꞌ Artajerjes. El rey tatekimáꞌ iga ayꞌya má̱j matekipanojtolo ka̱n nemi moojpachi̱wa weyitio̱pan. Iwá̱n dieciséis años kikajtejkej iga atekipanojkej ka̱n moojpachi̱waya weyitio̱pan, pe̱walo̱ꞌ sej este que pe̱waꞌ iga manda̱roj el rey Darío.c
Íkua̱ꞌ onoyaj o̱me iprofe̱taj Dios; se̱ ito̱ka̱ꞌ Hageo iwá̱n seꞌ ito̱ka̱ꞌ Zacarías. Ini̱mej o̱me profe̱tajmej kijlia̱ya la gente yej Dio̱spa kine̱xtilia̱ya.
Hageo kijlij la gente, iga ayá̱ꞌ kiweyimati̱ltiáj niga kichi̱waj ken kijtowa Dios, inó̱n iga ayá̱ꞌ mochi̱waya yej kito̱kaj ipan ta̱jli iwá̱n inó̱n iga a̱pistajtiaya. Eꞌ Hageo no̱ kijlij la gente iga Dios kijtoj iga nochipa kipale̱wi̱skej. Kua̱ꞌ iní̱n kikakikej nochi kiyo̱lmakakej iga tekipanowaj ka̱n nemi moojpachi̱wa íkal Dios.
El profeta Zacarías, yej no̱ sacerdote, kanima̱roj la gente iga mamoye̱kawi̱lti weyitio̱pan. Se̱ día Dios kijlij Zacarías yej makijli Zorobabel:
—Anyawij ankiye̱kawi̱lti̱tij weyitio̱pan, ayéj iga anmiakejmej niga antajpalejkej, sino iga noEspí̱ritoj mitzpale̱wi̱skej, ijkó̱n ken tej tikpe̱waltij. Ijkó̱n mitzijliá Dios yej nochi wel kichi̱wa.
Iga kiye̱kawi̱ltijkej weyitio̱pan kiwi̱gaꞌ seꞌ cuatro años, este kua̱ꞌ Zorobabel iwá̱n israeli̱tajmej sej ki‑ojpa pe̱waltijkej iga tekipanojkej. Inó̱n ve̱j manda̱rowa̱ya Persia inó̱n rey yej ito̱ka̱ꞌ Darío, yéj kixtaj inochi yej mogasta̱roj iga mochij weyitio̱pan yej israeli̱tajmej kichijkej Jerusalén.
Kua̱ꞌ weyitio̱pan ye̱káwiꞌya, israeli̱tajmej kimakakej miaꞌ yo̱lka̱mej iga kitatijkej iga ofrenda iga Dios iwá̱n kimakakej gracias Dios iga kipale̱wijkej.
Dios sej kitajto̱lmáꞌ Zacarías iga kijlij yej yáwi‑oꞌ mochi̱wati. Kijlij:
—Xikijli israeli̱tajmej iga mapa̱kika̱n iga yawi wi̱tzeti se̱ rey yej kima̱nawi̱kij iwá̱n yéj kichi̱was yej ye̱kti; yéj ya̱ti se̱ ta̱gaꞌ yej ayá̱ꞌ moweyimatis iwá̱n tejkatiwi̱ꞌ ipan se̱ burro.
No̱ kijlij:
—Nochi gente yawi kitati iga inó̱n rey yawij kimikti̱tij.
Iwá̱n seꞌ ve̱j kijlij:
—Kua̱ꞌ kimiktí̱skeja inó̱n pastord, nochi borre̱gojmej yej kicuida̱rowa̱ya yawij pa̱payi̱nitij.