Dios kima̱nawiá Daniel ipan te̱kua̱nimej
Daniel 6:1‑27; 9:2‑17
109
Darío kiyojyokatij íta̱l ka̱n reina̱rowa, kichij ciento veinte estados; iwá̱n ipan cada estado kita̱lij se̱ gobernador, iwá̱n ipan ino̱mej ciento veinte esta̱dojmej kita̱lij e̱yi presidente, Daniel yajki se̱ de ino̱mej presidente. Ayá̱ꞌ wejkatiꞌ momatiꞌ iga Daniel má̱j wel manda̱rowa̱ya que sekin gobernado̱rmej iwá̱n preside̱ntejmej. Iwá̱n el rey kita̱lij Daniel iga makimanda̱ro inewi preside̱ntejmej. Inó̱n iga sekin pe̱wakej iga ki̱xitakej Daniel iwá̱n kite̱molia̱yaj ken iga wel makima̱wetzi̱lti̱ka̱n ipan tejté̱ yej aye̱kti, iga makite̱lwi̱ka̱n wa̱n el rey.Kijtojkej:
—Tiawij tikpi̱piatij iwá̱n siga tikasiliáj iga kichijtoꞌ tejté̱ yej aye̱kti, nimaní̱n tiawij tikijli̱tij el rey.
Eꞌ malej iga má̱j kipi̱piakej, ayá̱ꞌ kasilijkej nité̱ yej aye̱kti, iga yéj ye̱ꞌnemiá iwá̱n moconfia̱rowa̱ya poxsan ipan Dios. Nochipa ipan día e̱yi ve̱j motankua̱ketzaya iga tajtowa̱ya wa̱n Dios.
Iwá̱n ijkó̱n iga ini̱mej gobernado̱rmej yajkij kitatoj el rey iwá̱n kijlijkej:
—Tej tirre̱y, nejemej nigobernado̱rmej nikejla̱nkej iga nimitzijli̱koj iga xikchi̱wa se̱ a̱maꞌ ka̱n xitatekimaka, iwá̱n xikfirma̱ro. Ijkí̱n makijto in inó̱n a̱maꞌ: Siga agaj ipan ini̱mej treinta día makitajtanili tejté̱ idio̱s o agaj seꞌ ta̱gaꞌ yej ayéj tej, mamoaki ipan se̱ texapoꞌ ka̱n onoꞌ te̱kua̱nimej.
El rey kiye̱ꞌitaꞌ yej kijtojkej ino̱mej iwá̱n kifirma̱roj inó̱n a̱maꞌ ka̱n tatekimaka ken iga yejeme̱n kijtojkej.
Daniel kimatiꞌ ken tatekimaka inó̱n a̱maꞌ, yajki icha̱n, motankua̱ketzaꞌ iwá̱n tajtoj wa̱n Dios, iga yéj nochípaya ijkó̱n kichi̱wa iga tajtowa wa̱n Dios e̱yi ve̱j ipan día. Iwá̱n monechkoj gobernado̱rmej iwá̱n preside̱ntejmej, yajkij icha̱n Daniel kasitoj ora̱dojtoꞌ. Nimaní̱n yajkij kijli̱toj el rey iga Daniel ayá̱ꞌ nemi kichi̱wa ken tatekimaka inó̱n a̱maꞌ, iga yéj tajtówasan wa̱n iDio̱s e̱yi ve̱j ipan día.
El rey kua̱ꞌ kikáꞌ iga Daniel kite̱lwi̱toj, mokno̱matiꞌ poxsan iga Daniel poxsan kipale̱wia̱ya ka̱n reina̱rowa el rey, iwá̱n kite̱moj ken iga katka makima̱nawi. Eꞌ como aweljoꞌ kipata ken iga tatekimáꞌ, tati̱tan iga makikuitij Daniel, iwá̱n ino̱nsan tio̱taꞌ kakijkej ipan xapoꞌ ka̱n onoꞌ te̱kua̱nimej. Iwá̱n inó̱n xapoꞌ kite̱ntzakuakej iga se̱ weyiteꞌti. Ite̱mpan inó̱n weyiteꞌti ka̱n netechijtoꞌ wa̱n ite̱n texapoꞌ kita̱lkej sása̱l se̱ parte iwá̱n ompa el rey kisella̱roj iga iyani̱lloj, ijkó̱n ni agaj awel kiki̱xtiá.
Iwá̱n el rey yajki ipan ipala̱cioj, eꞌ ayá̱ꞌ takuaj. Iwá̱n kua̱ꞌ mote̱gaꞌ, ayá̱ꞌ wel kochá iga kejla̱ntoya yej kichi̱wilijkej Daniel. Kua̱ꞌ tane̱siꞌ, yowáltiꞌsan, moketzaꞌ iwá̱n motalojtiajki ka̱n onoꞌ xapoꞌ ka̱n kite̱ntzaktokej Daniel iwá̱n te̱kua̱nimej. Kua̱ꞌ asiꞌ, kitzajtzilij Daniel iwá̱n kijlij:
—Daniel, tej yej tiktoka Dios yej isatoꞌ, ¿ix welitiꞌ moDio̱s mitzma̱nawij ipan te̱kua̱nimej?
Iwá̱n Daniel kijlij:
—Norre̱y, noDio̱s kiti̱tan se̱ iyá̱ngel iga kitejte̱ntzakuako te̱kua̱nimej iga amo mane̱kua̱ka̱n, iga nej iyi̱xtaj Dios ayá̱ꞌ nemi nikchi̱wa yej aye̱kti; iwá̱n no̱ mo‑i̱xtaj ayá̱ꞌ nemi nikchi̱wa nité̱ yej aye̱kti.
Kua̱ꞌ el rey kitajto̱lkaguiꞌ Daniel, yo̱lpa̱guiꞌ poxsan iwá̱n tatekimáꞌ iga makiki̱xti̱ka̱n Daniel ipan xapoꞌ ka̱n onoꞌ te̱kua̱nimej. Kua̱ꞌ kiki̱xtíjkeja kitakej iga nikanaj ane̱si ka̱n kijisteꞌ te̱kua̱nimej, iga moconfia̱roj ipan Dios.
Iwá̱n el rey tatekimáꞌ iga makikuitij ino̱mej tajta̱gaꞌ yej kite̱lwijkej Daniel, makaki̱ka̱n iwá̱n ipilowa̱n iwá̱n isiwa̱mej ipan xapoꞌ ka̱n onoꞌ te̱kua̱nimej. Iwá̱n ino̱mej aya asiáj este ta̱lpan kua̱ꞌ te̱kua̱nimej ájkosan kimajkuikej iwá̱n kitza̱tzaya̱nkej.
Iwá̱n el rey yajki sej icha̱n iwá̱n kichij se̱ a̱maꞌ iga inochi yej cha̱ntitokej ka̱n yéj manda̱rowa. Ipan inó̱n a̱maꞌ kijkuiloj ken iga Dios kima̱nawij Daniel, iwá̱n kino̱no̱tzkej iga nochi makicre̱do̱ka̱n ipan inó̱n Dios yej isatoꞌ, yej iDio̱spa Daniel.
Daniel onoya Babilonia kua̱ꞌ kilee̱roj yej kijkuiloj profeta Jeremías, iwá̱n ijkó̱n iga kimatiꞌ iga israeli̱tajmej yawij pre̱sojtitotij setenta años, iwá̱n íkua̱ꞌ Jerusalén ayꞌya onolo̱j. Daniel wé̱weja katka iwá̱n kimatiá iga ayꞌya wejkatis iga yawi mochi̱wati inó̱n yej Dios kijtoj. Inó̱n iga nochipa kua̱ꞌ tajtowa̱ya wa̱n Dios, kijlia̱ya:
—NoTe̱ko Dios, xiktajto̱lkaki kua̱ꞌ tejté̱ mitztajtaniliáj moge̱ntej. Nimokui̱tiáj iga poxsan nikchijkej yej aye̱kti mo‑i̱xtaj, ayá̱ꞌ nemi nikchi̱waj ken kijtowa motájto̱l; eꞌ nimitztajtaniliá noTe̱ko, iga xinee̱lka̱wili̱ka̱n yej nikchijkej yej aye̱kti iwá̱n xine̱ma̱nawi̱ka̱n ipan ima̱mej babilo̱niojmej, ijkó̱n ken tiki̱xtij notajwe̱wetkej Egipto iga inó̱n moweyipode̱r. Xikchi̱wa iga mania̱ka̱n sej ipan nota̱lmej ijkó̱n moto̱ka̱ꞌ ipan nejemej yawij kiweyimati̱lti̱tij, iga iná̱n inewi gente kipi̱najtiá a̱ltepe̱ꞌ Jerusalén iwá̱n nejeme̱n yej tejpa moge̱ntej no̱ ne̱pi̱najtiáj.
’Iná̱n, annoDio̱s, xikaki yej nimitztajtaniliá nej yej nimitztoka iwá̱n ayꞌya maxi̱xiti̱nto moweyitio̱pan ken iná̱n onoꞌ.