Daniel kijtowa te̱ kijto̱jneki yej ijkuilijtoya ipan pared
Daniel 5
108
Panoj miaꞌ año, se̱ yej ipilówa̱mpa Nabucodonosor yej ito̱ka̱ꞌ Belsasar mochij rey.Se̱ día Belsasar kichij se̱ weyi‑ilwiꞌ iwá̱n kinechkoj mil itekipanowa̱nimej, iwá̱n senta̱wa̱nkej poxsan. Kua̱ꞌ el rey tá̱wa̱nya, tati̱tan iga mamokuiti va̱sojmej de oro iwá̱n yej de plata yej te̱tajwé̱j Nabucodonosor kikuito̱ya weyitio̱pan yej onoꞌ Jerusalén. Ino̱mej va̱sojmej kikuito̱yaj, iwá̱n ipan inó̱n konijkej má̱j vino, kiweyimati̱ltijtoyaj í̱dolomej de oro iwá̱n de plata, de bronce, de tepos, de kuawiꞌ iwá̱n de teꞌti.
Tajko ilwiꞌ ne̱siko se̱ ima̱ꞌ ta̱gaꞌ, yej tajkuiloj ipan palacio iparedyo. Inochimej momajtijkej iwá̱n el rey pe̱waꞌ tajtoj recio iga mawi̱tzeka̱n yej tamatij. Eꞌ kua̱ꞌ yejeme̱n asikej akimatikej te̱ kijto̱jneki inó̱n yej kijkuiloj ima̱ꞌ ta̱gaꞌ. Iwá̱n el rey tati̱tan iga makino̱tzatij Daniel.
Kua̱ꞌ Daniel asiꞌ, kitajto̱ltij yej ijkuilijtoꞌ ipan pared, iwá̱n kijlij el rey:
—Tej yej ipíltzi̱mpa rey Nabucodonosor, tikmati ken iga Dios yej onoꞌ pox ajko, kali̱mpamatiꞌ motajwé̱j Nabucodonosor, kua̱ꞌ pan iya̱lmaj poxsan moweyimatiꞌ. Eꞌ malej iga tikmati te̱ kisucede̱roj motajwe̱wej iga mopoxweyimatiꞌ, tej ayá̱ꞌ timoali̱mpamati ipan moa̱lmaj, ma̱jwaꞌ timopoxweyimati iyi̱xtaj toTe̱ko yej onoꞌ ajko ipan cielo. Iní̱n yówal ipan ilwiꞌ, tej titatekimáꞌ iga mamitzkui̱li̱tij va̱sojmej yej onoya Jerusalén ipan íkal Dios Jehová. Tej iwá̱n motekipanowa̱nimej iwá̱n mosiwa̱mej ankonijkej vino ipan ino̱mej va̱sojmej.
’Iwá̱n ayéj iga ino̱nsan, sino que tej iwá̱n yej ansen‑ilwimatitoyaj, ankiweyimati̱ltijkej estatua de plata, de oro, de bronce, de tepos, de kuawiꞌ iwá̱n yej de teꞌti, i̱dolojmej yej ayá̱ꞌ tacháj niga takakij niga tajla̱mikij iwá̱n tej ayá̱ꞌ tikneꞌ xikweyimati̱lti yej melaꞌDio̱s. Inó̱n iga, yej ijkuilijtoꞌ ipan pared: “MENÉ, MENÉ, TEKEL, UPARSÍN”, kijto̱jneki iga Dios mitzita iga ayompa tinemi, iwá̱n ayompa timanda̱rowa, iwá̱n ka̱n iná̱n tej timanda̱rowa, yawij manda̱ro̱tij pai̱smej yej ito̱ka̱ꞌ Media iwá̱n yej ito̱ka̱ꞌ Persia.
Ino̱nsan yówal wa̱laj Darío rey de Media, wa̱laj iwá̱n isolda̱dojmej, iwá̱n kimiktij Belsasar iwá̱n mandá̱roja Darío.